li xRebeka

Xjalam-uuch li xRebekah, xb’aan li xDilleen Marsh

21–27 febrero

Genesis 24–27

Xk’ojob’ankil wi’chik li sumwank

Naq yookat chirilb’al Genesis 24–27, patz’ re li Dios chan ru taatenq’aheb’ li komon re naq te’xtaw xna’leb’ xjuneseb’ rib’ sa’ li loq’laj hu.

Tz’iib’a li nakak’oxla

reetalil li wotzok

Xkanab’ankileb’ chi wotzok

Re xtenq’ankileb’ li komon chixwotzb’al li na’leb’ li neke’xtaw sa’ Genesis 24–27, naru taapatz’ reheb’ naq te’xtz’iib’a sa’ hu jun li raqal li xwulak chiruheb’. Taaxokeb’ lix hu, ut tex’aatinaq chirixeb’ sa’ komonil.

reetalil li k’utuk

Xk’utb’al li tzolʼlebʼ

Genesis 24

Aajel ru li sumlaak sa’ xk’anjel li Dios.

• Li esilal chirix lix sik’b’al li rixaqil laj Isaak naru tatxtenq’a chixk’utb’esinkil naq aajel ru li sumlaak sa’ xk’anjel li Dios. Re xtikib’ankil li aatinak, li komon naru te’ril Genesis 24 junpaataq re naq te’xye k’a’ru kixb’aanu li Qaawa’ choq’ re laj Isaak ut li xRebeka. K’a’ut naq aajel ru li sumlaak choq’ re li Qaawa’? Re xtenq’ankileb’ li komon chixsumenkil li patz’om a’in, naru taak’ut raatin li Elder D. Todd Christofferson li wan sa’ “Xkomon chik li k’anjeleb’aal.” Chan ru taqatenq’a xk’anjel li Dios choq’ re li sumlaak?

• Patz’ reheb’ li komon k’a’ru neke’ril sa’ junaq li sum aatin, jun li na’b’ej yuwa’b’ej, malaj jun li sumal li naxk’e xkawilal li sumlaak. Sa’ Genesis 24 wan li na’leb’ li naru tixk’e sahil ch’oolejil sa’ jun li sumal—malaj sa’ li qayu’am. Sa’ li raqal 12 naxk’ut naq naru toob’eresiiq xb’aan li Dios, ut sa’ li raqal 19 naxk’ut naq naru taqayal qaq’e chixtenq’ankileb’ li qas qiitz’in. K’a’ chik ru naxye sa’ Genesis 24–27? Li komon naru ajwi’ te’xsik’ li na’leb’ sa’ “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org).

Genesis 25:29–34

Naru taqasik’ li k’a’ru naqaj anajwan anajwan, malaj ut li k’a’ru jwal nim wi’chik xloq’al.

• Chan ru taatenq’aheb’ li komon chixtawb’al xna’leb’ xjuneseb’ rib’ sa’ li esilal chirix laj Jakob ut laj Esau? Naru taak’eheb’ chixtz’iib’ankil wiib’ paay chi na’leb’ sa’ li pizarron—li k’a’ru naxyeechi’i li Dios ut li k’a’ru naxyeechi’i li ruchich’och’. Toja’ naq naru te’ril Genesis 25:29–34 re naq te’xk’e xb’een paay li na’leb’ jo’ ruuchil li aatin “xb’eenil alalb’ejil” ut xkab’ paay li na’leb’ jo’ ruuchil li aatin “juyb’il maxkenq’.” Chan ru nokoxb’alaq’i laj tza re naq taqajal ru lix maatan li Dios rik’in li k’a’ru kub’enaq xloq’al? Maare taak’eheb’ li komon chixch’olob’ankil chirib’ileb’ rib’ chan ru te’xjayali li Kolonel ut li maatan naxyeechi’i.

Genesis 26:18–25, 32–33

Li Jesukristo, a’an xyo’leb’aal li yo’yookil ha’.

• Sa’ Genesis 26 naxye k’iila sut naq laj Isaak ut lix junkab’al ke’xb’ek li jul re naq te’xtaw li ha’, ut wan naq jwal kaw li k’anjel a’an. Sa’ li eetalil a’in, naru taak’utb’esi chiruheb’ li komon naq xk’ulb’al lix “yo’yookil ha’ ” li Kolonel naraj xyalb’al qaq’e (chi’ilmanq Jwan 4:10). Maare sa’ pizarron taatz’iib’a xjalam-uuch jun li yo’leb’aal ha’ li tz’aptz’o rub’el ch’och’. Timil timil, li komon naru te’xb’or li ch’och’ naq yookeb’ chixtz’ilb’al rix k’a’ru te’xb’aanu re xtawb’al lix yo’yookil ha’ li Kolonel. Tenq’aheb’ chixtawb’al xkomon chik lix na’leb’ sa’ li K’utul Raqal reheb’ li Loq’laj Hu.

  jun li najter yo’leb’aal ha’

  Jun li najter yo’leb’aal ha’ sa’ Berseba, b’ar wi’ laj Abraham ut laj Isaak neke’xb’ek xjulel li ha’.

reetalil xkomon chik li k’anjeleb’aal

Xkomon chik li k’anjeleb’aal

Yoob’anb’il li sumlaak ut li junkab’al xb’aan li Dios.

Li Elder D. Todd Christofferson xch’olob’ k’a’ut naq aajel ru li sumlaak ut li junkab’al sa’ xk’anjel li Dios:

“Jun li junkab’al li xaqxo sa’ xsumlajik jun li winq ut jun li ixq, a’an li na’ajej b’ar wi’ lix na’leb’ li Dios na’usaak—b’ar wi’ neke’yo’la li kok’al chalen chaq sa’ li saq ruhil wank rik’in li Dios, ut b’ar wi’ te’xtzol xb’eresinkil xyu’am chi us sa’ li ruchich’och’ a’in ut sa’ li junelik yu’am. Aajel ru naq li xk’ihaleb’ li junkab’al te’wanq chi jo’ka’in wi te’usaaq li tenamit. …

“… A’b’an li qayehom chirix li sumlaak ut li junkab’al ink’a’ nachal sa’ tzoleb’aal, rik’in b’an li Dios. A’an li kixyiib’ laj Adan ut li xEva sa’ xjalam-uuch, ut kixjunajiheb’ jo’ b’eelomej ut ixaqilb’ej re te’wanq jo’ jun ajwi’ li tz’ejwalej ut te’k’iihanq ut te’xnujob’resi li ruchich’och’. Wan xjalam-uuch qik’in chiqajunil, a’b’an sa’ li sumlaak re ixq ut winq naqataw tz’aqal xyaalalil naq yiib’anb’ilo jo’ xjalam-uuch li Dios—teelom ut ixq. … Li sumlaak chi jo’ka’in … wan xna’aj sa’ li na’leb’ re sahil ch’oolejil jo’ chanru naq wan xna’aj li T’ane’k ut lix Tojb’al rix li maak” (“K’a’ru aj-e li sumlaak, k’a’ru aj-e li junkab’al,” Jolomil ch’utub’aj-ib’, abril 2015).

Xkawresinkil qib’ jo’ aj k’utunel

K’e aach’ool chixk’utb’al li tz’aqal tzol’leb’. Naq yookex chi aatinak sa’ komonil, tenq’aheb’ li komon re naq li aatinak junelik taaraqe’q sa’ xna’leb’ li loq’laj hu. Re xb’aanunkil a’an, naru taak’eheb’ li komon chixyaab’asinkil li aatin sa’ loq’laj hu, naru taapatz’ reheb’ k’a’ru naxye sa’ li loq’laj hu, ut naru taab’oqeb’ chixch’olob’ankil xnawom xch’ool chirix li aatin sa’ li loq’laj hu.