28 febrero–6 marzo

Genesis 28–33

“Chi yaal wan li Qaawa’ sa’ li na’ajej a’in”

Naq nakakawresi aawib’ choq’ re li k’utuk, patz’ re li Dios b’ar wankeb’ li na’leb’ sa’ Genesis 28–33 li jwal aajeleb’ ru choq’ reheb’ li ani te’tzoloq aawik’in. Li na’leb’ a’in naru tatxtenq’a sa’ li tzolok choq’ aawe aajunes.

Tz’iib’a li nakak’oxla

Xkanab’ankileb’ chi wotzok

Li ch’utlaak sa’ Dominkil Tzoleb’aal naxtenq’aheb’ li komon chixtawb’al xna’leb’ sa’ li loq’laj hu. Tenq’aheb’ li komon re naq te’aatinaq sa’ ka’kab’il chirix li k’a’ru naxye li Santil Musiq’ej reheb’ naq neke’xtzol li loq’laj hu chiru li xamaan. Maare sa’ komonil teerab’i xna’leb’ wiib’ oxib’ li komon. Maare chi jo’kan naru tex’ok chi aatinak chirix li na’leb’ choq’ re li tzoleb’aal.

Xk’utb’al li tzolʼlebʼ

Genesis 28:10–22

Sa’ li santil ochoch noko’ok sa’ sumwank rik’in li Dios.

• Chan ru taatenq’aheb’ li komon chixtawb’al xna’leb’ sa’ li k’a’ru kixk’ul laj Jakob sa’ Betel, jo’ yeeb’il resil sa’ Genesis 28:10–22? Maare xb’een wa te’ril Genesis 27:41–45; 28:1–5 re naq te’xk’oxla k’a’ru ak yoo chaq chixk’ulb’al laj Jakob sa’ xyu’am. K’a’ ta ru nareek’a laj Jakob sa’ xch’ool? Toja’ naq naru te’ril Genesis 28:10–22. Chan ta ru xkawresiik laj Jakob’ sa’ li esilal a’in? K’a’ ta ru xk’ojob’ lix ch’ool? Chan ru nokoxkawresi li esilal a’in choq’ re li k’anjelak sa’ santil ochoch? Li komon te’ruuq ajwi’ chixb’ichankil, chirilb’al, malaj chirab’inkil li b’ich “Nach’ aawik’in, Qaawa’,” li nareetali li esilal a’in (Eb’ li B’ich, 54). Naru te’xye b’ar wan junaq aatin sa’ li b’ich malaj sa’ Genesis 28:10–22 li naxk’eheb’ chixk’oxlankil li k’a’ru ak xe’xk’ul sa’ xyu’am naq neke’xyal xq’e chi nach’ok rik’in li Kolonel.

• Wan naq li taqleb’aal li kiril laj Jakob nak’anjelak jo’ reetalil li sumwank sa’ santil ochoch. Maare taatz’iib’a malaj taak’ut xjalam-uuch jun li taqleb’aal ut jun li santil ochoch. Li komon naru te’ril Genesis 28:10–22 junpaataq re naq te’xtzil rix sa’ komonil k’a’ru naraj naxye li taqleb’aal chirix li santil ochoch. K’a’ chik ru naqil sa’ li raqal a’an li nokoxk’e chixk’oxlankil li usilal sa’ li sumwank re li santil ochoch? (Chi’ilmanq “Sobre la investidura del templo” ut “Sobre el sellamiento en el templo” [churchofjesuschrist.org/temples?lang=spa].)

• Re xtenq’ankileb’ li komon chixk’oxlankil li k’a’ru yeechi’inb’il sa’ li sumwank re laj Abraham, li kixk’ul ajwi’ laj Jakob, naru taak’eheb’ chirilb’al Genesis 28:10–15 ut chixyeeb’al chirib’ileb’ rib’ chan ru naqak’ul li k’a’ru yeechi’inb’il chaq najter (chi’ilmanq ajwi’ Genesis 12:2–3). Naru ajwi’ te’ril raatin li Awa’b’ej Russell M. Nelson sa’ “Xkomon chik li k’anjeleb’aal” li naxch’olob’ ajwi’ k’a’ru nayeechi’iman qe sa’ li sumwank. Chan ru kikawresiik laj Jakob xb’aan li k’a’ru kixyeechi’i li Qaawa’ sa’ Genesis 28:10–15? K’a’ru naqil sa’ li esilal a’in li kiwan ajwi’ xwankil sa’ li k’a’ru kik’ulman toj moqon sa’ Genesis 29 ut 30 (xsumlajik laj Jakob ut xyo’lajikeb’ li ralal xk’ajol)? Chan ru nokoxkawresi li Qaawa’ naq noko’ok sa’ loq’laj sumwank?

Xjalam-uuch laj Jakob ut laj Esau, xb’aan laj Robert T. Barrett

Genesis 32–33

Li Qaawa’ naru tooxtenq’a chixsachb’al li wech’ok-ib’ sa’ qajunkab’al.

• Li esilal sa’ Genesis 32–33 naru tixtenq’aheb’ li komon li te’raj xtuqub’ankil li po’e’k sa’ xjunkab’al. Naru taapatz’ re jun li komon naq tixch’olob’ chi junpaat li esilal sa’ Genesis 27. Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al wankeb’ li patz’om re xtz’ilb’al rix Genesis 32–33. Li komon naru te’xsik’ jun reheb’ li patz’om a’an re naq te’xsik’ xsumenkil sa’ li raqal a’an. Naru ajwi’ te’xseraq’i k’a’ru ak xe’xk’ul sa’ xtuqub’ankil li po’e’k sa’ junkab’al. Tenq’aheb’ re naq te’xye chan ru xe’xk’ul xtenq’ankil xb’aan li qaChoxhail Yuwa’.

Xkomon chik li k’anjeleb’aal

Laa’o ralal xk’ajol li sumwank.

Li Awa’b’ej Russell M. Nelson kixye:

“Sa’ li kub’iha’ naqaye naq took’anjelaq chiru li Qaawa’ ut naq taqapaab’ lix taqlahom. Naq naqak’ul li loq’laj wa’aj, noko’ok wi’chik sa’ li sumwank a’an ut naqaye naq taqaj xk’ulb’al lix k’ab’a’ li Jesukristo sa’ qab’een. Chi jo’kan, eechaninb’ilo jo’ li ralal xk’ajol ut noko’ok jo’ qas qiitz’in qib’. Li Jesukristo, a’an xyuwa’il li ak’ yu’am li naqak’ul. Moqon, sa’ li santil ochoch, naru taqeechani li xnimal ru osob’tesink sa’ junkab’al, li kiyeechi’iman chaq najter re laj Abraham, laj Isaak, laj Jakob, ut li riyajileb’. Jo’kan naq li sumlaak, a’an li sumwank li naxtaqsi qaloq’al.

“Naq naqak’e reetal naq laa’o li ralal xk’ajol li sumwank, naqanaw aniho ut k’a’ru naxyo’oni li Dios qik’in. Nakana lix chaq’rab’ chi tz’iib’anb’il sa’ qach’ool. A’an li qaDios, ut laa’o lix tenamit. Eb’ li ralal xk’ajol li sumwank neke’xxaqab’ rib’ re naq ink’a’ te’eek’anq, us ta wankeb’ sa’ xyi li ch’a’ajkilal. Naq k’ojk’o li na’leb’ a’an chi us sa’ qach’ool, nakotz ajwi’ xrahil li kamk, ut nakawuuk xmetz’ew li qamusiq’ ” (“Convenios,” Liahona, octubre 2011, 88).

Xkawresinkil qib’ jo’ aj k’utunel

Tenq’aheb’ li komon chixyu’aminkil li k’a’ru naxye li Santil Musiq’ej. “Lix jalajik li qach’ool chi tz’aqal yaal ink’a’ yal naraj naq li Santil Musiq’ej tixye li yaal sa’ qach’ool; tento aj b’an wi’ naq taqayu’ami li yaal.” Tenq’aheb’ li komon chixnawb’al ru li Santil Musiq’ej sa’ xch’ool jo’ ajwi’ chixyu’aminkil li k’a’ru naxye” (Li k’utuk jo’ li Kolonel, 10).