Xjalam-uuch laj Jose re Egipto sa’ tz’alam, xb’aan laj Jeff Ward

7–13 marzo

Genesis 37–41

“Li Qaawa’ kiwan rik’in laj Jose”

Ink’a’ na’ajman xb’aanunkil chixjunil li wan sa’ li tusleb’ a’in. Naq nakakawresi aawib’ choq’ re li k’utuk, tz’aama naq li Santil Musiq’ej tixk’ut chawu b’ar wan li na’leb’ aajel ru choq’ reheb’ li komon sa’ laa tzoleb’aal.

Tz’iib’a li nakak’oxla

Xkanab’ankileb’ chi wotzok

Re xtenq’ankileb’ li komon chixyeeb’al k’a’ru xe’xtzol xjuneseb’ rib’ malaj sa’ xjunkab’al, naru taapatz’ reheb’ b’ar wan jun li aatin sa’ Genesis 37–41 li nawulak chiruheb’.

Xk’utb’al li tzolʼlebʼ

Genesis 37:1–28; 39; 40:1–19; 41:9–45

“Li Qaawa’ kiwan rik’in laj Jose” sa’ lix ch’a’ajkilal.

• Jo’ chanchan laj Jose, maare wankeb’ li komon li yookeb’ chixk’ulb’al li ch’a’ajkilal. Re xtenq’ankileb’ chixtawb’al xna’leb’ sa’ resilal laj Jose, naru taach’utub’eb’ sa’ oxib’ li ch’uut re naq li junq ch’uut taaril jun reheb’ li raqal a’in: Genesis 39; 40:1–19; malaj 41:9–45. Toja’ naq li junq ch’uut naru tixch’olob’ chan ru naq li Qaawa’ kiwan rik’in laj Jose sa’ jar paay li ch’a’ajkilal. A’ yaal jo’ na’ajman, li komon naru te’xseraq’i chan ru wanjenaq li Qaawa’ rik’ineb’ sa’ jun li ch’a’ajkilal. Chan ru taqak’e reetal naq wan li Qaawa’ qik’in?

• Naru taak’utb’esi naq naru too’elq sa’ li ch’a’ajkilal chi jo’ka’in: k’e li chaqi arroz malaj li chaqi kenq’ sa’ jun li k’uuleb’aal, ut muq jun li b’atz’uul li moko aal ta chi sa’—maare jun li ch’ina t’ort’o. K’e jun li komon chixchuq’chuq’inkil li k’uuleb’aal toj reetal naq li b’atz’uul na’el chaq sa’ xb’een li arroz malaj li kenq’. Chan ru naq li b’atz’uul nareetali laj Jose? Li komon naru te’xye chan ru naq li Qaawa’ kixtenq’a laj Jose chi elk sa’ ch’a’ajkilal sa’ Genesis 37:5–11; 39; 40:1–19; 41:9–45. Naru ajwi’ te’xseraq’i chan ru naq li Qaawa’ ak xtenq’aheb’ chi jo’kan.

• Maare teeraj xb’ichankil malaj rilb’al raatinul jun li b’ich li naxch’olob’ xsik’b’al ru li chaab’il b’e, maare a’an li b’ich “Us taab’aanu” (Eb’ li B’ich, 149). Toja’ naq li komon naru te’xsik’ li na’leb’ malaj li aatin sa’ Genesis 37:1–28; 39; 40:1–19; 41:9–45 li naxch’olob’ ajwi’ xna’leb’ li b’ich. K’a’ru usilal kixk’ul laj Jose naq kixb’aanu li us, us ta wan sa’ ch’a’ajkilal? K’a’ru usilal ak xqak’ul laa’o naq xqab’aanu li us sa’ ch’a’ajkilal?

Genesis 37:5–11; 40; 41:1–38

Wi ta tiiko chi paab’ank, li Qaawa’ tooxb’eresi.

• Us ta wankeb’ li ink’a’ neke’xk’ul xna’leb’ sa’ matk’, li k’a’ru kixk’ul laj Farahon, lix moos, ut laj Jose naru tixk’ut chiqu chan ru naq li Dios naxb’eresi qana’leb’. Naru taak’eheb’ li komon chirilb’al junpaataq li esil sa’ Genesis 37:5–11; 40:5–8; 41:14–25, 37–38 re naq te’xye chan ru naq li Dios naxb’eresi qana’leb’. Naru ajwi’ taapatz’ reheb’ chan ru neke’xk’e reetal, chan ru neke’xtaw ru, ut chan ru neke’xyu’ami li na’leb’ k’eeb’ileb’ re xb’aan li Dios.

  

  Laj Jose naxtaw xyaalaleb’ lix matk’ laj k’ehol uk’a’ ut laj yiib’ahom kaxlan wa, xb’aan laj François Gérard

Genesis 39:1–20

Chi tenq’anb’ilo xb’aan li Qaawa’, naru too’eeleliq chiru li maak.

• Maare taawaj xpatz’b’al reheb’ li komon k’a’ru xe’ril sa’ Genesis 39 chirix xkuyb’al li aaleek. K’a’ru kixb’aanu laj Jose re naq tixkuy xnumsinkil li aaleek? (wan sa’ raqal 7–12). Wan reetalileb’ li ani neke’xkuy xnumsinkil li aaleek sa’ li video “¡Vete de la fiesta!” ut “Atrévete a lo correcto aunque solo estés” (ChurchofJesusChrist.org). Maare taawaj xk’eeb’aleb’ li komon chixtz’iib’ankil jar paay li k’a’ru taqab’aanu re xk’ulb’al xmetz’ew li Dios naq wanko sa’ li aaleek. (Naru te’xtaw li na’leb’ sa’ Mateo 4:1–11 malaj b’ar wi’ naxch’olob’ li aatin “Aaleek, aalenk” sa’ li K’utul Raqal reheb’ li Loq’laj Hu.)

• Chan ru taak’ut li resil laj Jose re naq li komon te’raj xkuyb’al li aaleek? Rochb’een li esilal sa’ Genesis 39:1–20, naru te’ril li video “La castidad: ¿cuáles son los límites? ” (ChurchofJesusChrist.org) malaj “Xsaqal ru li tib’elej” (sa’ Choq’ re Xkawilaleb’ li Saaj [2011], 35–37). Naru te’xch’olob’ k’a’ru naxye re naq te’xram ru xk’oxlankil, xyeeb’al, malaj xb’aanunkil li k’a’ru tixk’am xb’e sa’ toj sa’ li maakob’k. Rilb’al li raqal chirix li “Jalb’a-k’a’uxlej” (sa’ Choq’ re Xkawilaleb’ li Saaj , 28–29) naru tixtenq’aheb’ li komon chixk’eeb’al reetal naq li Jesukristo nokoxkanab’ chixjalb’al qak’a’uxl.

Genesis 41:15–57

Aajel ru xkawresinkil qib’ choq’ re li ch’a’ajkilal.

• Naru taak’e jun li komon chixyeeb’al k’a’ru kixmatk’i laj Farahon (wan sa’ Genesis 41:15–24) ut jun chik chixyeeb’al chan ru naq laj Jose kixch’olob’ li matk’ (sa’ raqal 25–32). K’a’ru kixye laj Jose naq taab’aanumanq? (sa’ raqal 33–36, 47–49). K’a’ru na’leb’ naqataw sa’ li esilal a’in choq’ re li qakutankil anajwan? (chi’ilmanq li raatin li Awa’b’ej Gordon B. Hinckley sa’ “Xkomon chik li k’anjeleb’aal”).

Xkomon chik li k’anjeleb’aal

Xkawresinkil qib’ choq’ re li ch’a’ajkilal.

Chan li Awa’b’ej Gordon B. Hinckley: “Nin’elajin chawu re naq tuulanaqat sa’ li k’a’ru nakaloq’; b’is laa loq’om re naq taasach jo’ nimal li k’as li naru chawu. Yal aaq’e chixtojb’al laa k’as chi junpaat. … K’uula jun li rela’ laa tumin, us ta yal ka’ch’in” (“A los jóvenes y a los hombres,” Liahona, noviembre 1998).

Xkawresinkil qib’ jo’ aj k’utunel

Li ab’ink naxk’utb’esi li rahok. Tz’aama chiru li qaChoxahil Yuwa’ naq tatxtenq’a chixtawb’al ru li k’a’ru neke’xye li komon. Naq nakak’e reetaleb’ chi us, us ta ink’a’ neke’aatinak, naru taanaw k’a’ru na’ajman choq’ reheb’ ” (Li kʼutuk joʼ li Kolonel, 34).