laj Moises ut li toon chi k’ix li naxamnak

Laj Moises ut li toon k’ix li naxamnak, xb’aan laj Harry Anderson

21–27 marzo

Exodo 1–6

“Jultik we insumwank”

Naq yookat chirilb’al Exodo 1–6, k’oxlaheb’ li ani te’tzoloq aawik’in. B’ar wan li na’leb’ sa’ li raqal a’in li tixtenq’aheb’ sa’ xyu’am? Chan ru taatenqʼahebʼ chixtawbʼal li na’leb’ a’an?

Tz’iib’a li nakak’oxla

reetalil li wotzok

Xkanab’ankileb’ chi wotzok

Naru taatz’iib’a jun li patz’om chanchan a’in sa’ li pizarron: Naq xatzol Exodo 1–6, k’a’ru xawil li ink’a’ xak’e reetal junxil? B’oqeb’ li komon chixsumenkil li patz’om.

reetalil li k’utuk

Xk’utb’al li tzolʼlebʼ

Exodo 1–2

Li Jesukristo, aʼan li qaKolonel.

• Us ta maak’a’ xk’ab’a’ li Jesukristo sa’ Exodo 1–2, li esilal a’in naru tixtenq’aheb’ li komon chixpaab’ankil lix k’anjel li Jesukristo choq’ re li qakolb’al sa’ preexil. Li komon naru te’xsik’ junaq aatin sa’ Exodo 1–2 li naxch’olob’ chan ru kiwan lix ch’a’ajkilaleb’ laj Israel. Chan ru naq li aatin a’an naxch’olob’ ajwi’ li ch’a’ajkilal sa’ qayu’am laa’o? K’a’ru ke’xb’aanu laj Israel re naq te’xsik’ xkolb’al, ut chan ru ke’sumeek xb’aan li Dios? (chi’ilmanq ajwi’ Exodo 2:23–25; 3:7–8). Chan ru taqab’oq chaq xwankil li Dios naq na’ajman li qakolb’al? Chan ru nokoxsume li Dios naq naqatz’aama li qatenq’ankil? Li komon naru te’xsik’ xkomon chik li na’leb’ sa’ raatin li Awa’b’ej Russell M. Nelson, “Roksinkil lix wankil li Jesukristo sa’ li qayu’am” (Jolomil ch’utub’aj-ib’ re abril 2017).

  li k’uula’al aj Moises sa’ chakach

  Laj Moises sa’ li b’ayal, © Providence Collection/k’eeb’il xliceens xb’aan goodsalt.com

Exodus 3–4

Naq yooko chixb’aanunkil xk’anjel li Qaawa’, naru taqak’ul xwankil li Qaawa’.

• Li tusb’il na’leb’ choq’ re li xamaan a’in sa’ Kim, Taaqehin—Choq’ reheb’ li komon ut li junkab’al naxye naq naru rilb’al Exodo 3–4 re xnawb’al chan ru naq li Qaawa’ kixsume laj Moises naq wan xk’a’uxl chirix li k’anjel. Wi ta li komon ak xe’xb’aanu li tzolok a’an sa’ rochoch, b’oqeb’ chixyeeb’al k’a’ru na’leb’ xe’xtaw. Malaj ut naru teeb’aanu li tzolok a’an sa’ komonil. Sa’ Exodo 3:11–18; 4:1–17, wan xk’ihal li aatin chirix lix k’a’uxl laj Moises ut lix sumenkil xb’aan li Qaawa’. Chan ru naq li raatin li Qaawa’ sa’ li raqal a’an tooxtenq’a naq anchal maak’a’ qaseeb’al chixb’aanunkil xk’anjel?

Exodo 3:5

Aajel ru roxloq’inkil li k’a’ru wan xsantilal.

• Chan ru taak’ut li raqal a’in re naq tex’ok chi aatinak chirix roxloq’inkil li k’a’ru wan xsantilal? Maare teeril Exodo 3:5 sa’ komonil, toja’ naq taak’ut k’a’aq re ru li wan xsantilal (maare jun li loq’laj hu, malaj xjalam-uuch li santil ochoch) jo’ ajwi’ li k’a’ru maak’a’ xsantilal (maare yalaq huhil, malaj xjalam-uuch yalaq ochochil). Li komon naru te’xye k’a’ chik ru wan xsantilal choq’ reheb’ ut k’a’ru neke’xb’aanu re roxloq’inkil (chi’ilmanq ajwi’ Levitico 19:30; Tzol’leb’ ut Sumwank 6:10–12). K’a’ut naq li Qaawa’ naraj naq taqak’e roxloq’inkil li k’a’ru wan xsantilal?

Exodo 5:4–9, 20–23; 6:1–13

Lix k’anjel li Qaawa’ taatz’aqloq ru jo’q’e naraj li Qaawa’.

• Maare ra li qach’ool naq maak’a’ nayo’la sa’ lix yalb’al qaq’e choq’ re li us—maare jun li komon ink’a’ naxsume li qak’anjel choq’ re, malaj maji’ naqak’ul li k’a’ru naqatz’aama chiru li Dios choq’ re jun li qalal qak’ajol li ink’a’ naraj paab’ank. Li komon naru te’ril chan ru naq laj Moises kixnumsi ajwi’ li ch’a’ajkilal a’an sa’ Exodo 5:4–9, 20–23. Chan ru naq li Qaawa’ kixtenq’a laj Moises naq ra lix ch’ool chirix li k’anjel? (wan sa’ Exodo 6:1–13). Li komon naru te’xseraq’i chan ru naq timil timil na’el ru lix k’anjel choq’ re li Qaawa’. K’a’ru naqil sa’ resil laj Moises li nokoxtenq’a chixsumenkil li ch’a’ajkilal a’an? (Chi’ilmanq ajwi’ “Xkomon chik li k’anjeleb’aal.”)

reetalil xkomon chik li k’anjeleb’aal

Xkomon chik li k’anjeleb’aal

Naqatenq’a li qas qiitz’in choq’ re li Qaawa’.

Li Awa’b’ej Joy D. Jones xseraq’i naq xk’anjelak rochb’een lix b’eelom jo’ aj ilol komon, a’b’an maak’a’ nayo’la sa’ li k’anjel a’an. Xe’xtz’il rix ut xe’tijok re xtz’aamankil xna’leb’. Xye naq xe’xk’ul xsumenkil lix tij chi jo’ka’in:

“Xqak’e reetal naq yooko chi k’anjelak chiru li junkab’al a’an ut chiru li obiisp, a’b’an tento taqatz’il rix ma yooko ta chi k’anjelak xb’aan naq naqara li Qaawa’. Li rey aj Benjamin kixch’olob’ li na’leb’ a’an naq kixye, “Kʼehomaq reetal, ninye eere naq rikʼin naq kinye eere naq xinnumsi inkutan chi kʼanjelak cheru, moko nawaj ta xnimankil wibʼ, xbʼaan naq yal wanjenaqin chi kʼanjelak chiru li Dios” [Mosiah 2:16].

“Ani b’i’ chi aj-u yoo chi k’anjelak li rey aj Benjamin? A’an li qaChoxahil Yuwa’ ut li Kolonel. Xnawb’al ani aj-e ut k’a’ru aj-e li qak’anjel nokoxtenq’a chixk’eeb’al reetal naq li rahok jwal nim, a’an xraab’al li Dios” (“Sa’ xk’ab’a’ a’an,” Jolomil ch’utub’aj-ib’ re octubre 2018).

Xkawresinkil qib’ jo’ aj k’utunel

Xseraq’inkil li musiq’ejil na’leb’ li naqak’ul sa’ qayu’am Naru taab’oq chaq xwankil li Santil Musiq’ej sa’ laa tzoleb’aal wi taatenq’aheb’ li komon chixyeeb’al k’a’ru na’leb’ xe’xk’ul xb’aan li Santil Musiq’ej naq xe’xtzol li loq’laj hu chiru li xamaan.