Xjalam-uuch laj Jose re Egipto, xb’aan laj Robert T. Barrett

14–20 marzo

Genesis 42–50

“Li Dios xsutq’isi choq’ re li us”

Chan li Elder David A. Bednar, “Laa na’leb’ laa’at ut lin na’leb’ laa’in li xqak’ul sa’ li musiq’ej … maajo’q’e naru xsiib’al re jun li qas qiitz’in” (“Seek Learning by Faith,” Ensign, septiembre 2007, 67). Chan ru taatenq’aheb’ li komon chixk’ulb’al xna’leb’ xjuneseb’ rib’?

Tz’iib’a li nakak’oxla

Xkanab’ankileb’ chi wotzok

Re xtenq’ankileb’ li komon chixwotzb’al li na’leb’ li xe’xtaw sa’ loq’laj hu xjuneseb’ rib’ malaj sa’ xjunkab’al, naru taaye li patz’om chanchaneb’ a’in: B’ar wan jun li aatin li xwulak chawu? Ma xawaj xk’iilasutinkil junaq li raqal? Ma xawaj xwotzb’al junaq li raqal? Ma xwan junaq li raqal li xwaklesi li chaab’il aatinak sa’ xyanqeb’ laa komon?

Xk’utb’al li tzolʼlebʼ

Genesis 45:1–15; 50:15–21

Li kuyuk maak naxk’e tuqtuukilal.

• Naq maji’ tex’ok chi aatinak chirix li kuyuk maak li kixb’aanu laj Jose, maare us raj naq jun li komon tixseraq’i junpaataq li esilal sa’ Genesis 37; 39–45. K’a’ut naq ch’a’aj raj choq’ re laj Jose naq tixkuy xmaakeb’ li ras? Chan ta ru naq laj Jose ak kixtaw chaq lix metz’ew re naq tixkuy li maak? (naru rilb’al sa’ Genesis 45:1–15 malaj 50:15–21). Chan ru nokoxtenq’a li esilal chirix laj Jose re naq taqakuy li maak?

  Sa’ li video “El perdon aligeró mi carga” (ChurchofJesusChrist.org) wan jun chik li chaab’il esilal chirix li kuyuk maak. Chan ru nokoxtenq’a li Kolonel chixkuyb’al xmaak li qas qiitz’in?

• K’a’ru usilal kixk’ul laj Jose xb’aan naq kixkuy xmaakeb’ li ras? Maare teeraj rilb’al chan ru kiwan xjunkab’al laj Jose sa’ xtiklajik li esilal (maare sa’ Genesis 37:3–11) ut chan ru ke’wan sa’ xraqik (sa’ Genesis 45:9–15; 50:15–21). Chan ru naq li kuyuk maak kixtenq’aheb’ xkomon laj Jose chixjalb’al xk’a’uxl? K’a’ raj ru ke’xk’ul sa’ xjunkab’al laj Jose wi ta laj Jose ink’a’ kixkuyeb’ xmaak? Naru taapatz’ reheb’ li komon chan ru naq li esilal a’in tixtenq’aheb’ li junkab’al chixkanab’ankil li wech’ok-ib’ ut li kaqal.

Genesis 45:5–11; Genesis 50:24–38 chi jaltesinb’il ru xb’aan laj Jose Smith (sa’ xraqik li roxichal li loq’laj hu)

Lix k’anjel laj Jose, laj Moises, ut laj Jose Smith neke’xch’olob’ xyaalal lix k’anjel li Jesukristo.

• B’antiox re lix k’ojob’ankil wi’chik li evangelio, ak naqanaw naq laj Jose, li kixkol lix junkab’al chiru li we’ej, kixye chaq jo’ profeet naq toj taachalq xnimal ru li usilal xb’aan xk’anjel laj Moises ut laj Jose Smith. Chixjunileb’ li profeet a’in neke’reetali li Nimajwal Kolonel, a’an li Jesukristo. Re xtenq’ankileb’ li komon chirilb’al reetalil li Kolonel sa’ xk’anjeleb’ li oxib’ chi profeet a’in, naru taatz’iib’a jun li tusleb’ na’leb’ sa’ li pizarron, jo’ chanru li wan sa’ “Xkomon chik li k’anjeleb’aal.” Li komon naru te’xtus li na’leb’ chi sa’. Toja’ naq naru te’xk’e li na’ajej re xtz’iib’ankil resil lix k’anjel laj Jose re Egipto, laj Moises, ut laj Jose Smith, jo’ chanru li naxye sa’ Genesis 45:5–11 ut sa’ Genesis 50:24–38 chi jaltesinb’il ru xb’aan laj Jose Smith (sa’ xraqik li roxichal li loq’laj hu). Chan ru naq lix k’anjeleb’ li profeet a’in neke’reetali lix k’anjel li Jesukristo? (Naru taawil lix yu’am laj Jose re Egipto jo’ chanchan lix yu’am li Kolonel sa’ Genesis 37:3 ut Mateo 3:17; Genesis 37:26–28 ut Mateo 26:14–16; Genesis 45:5–7 ut Lukas 4:18; ut sa’ Genesis 47:12 ut Jwan 6:35; naru ajwi’ taawil Moises 6:63.)

  

  Xjalam-uuch laj Jose re Egipto, xb’aan laj Paul Mann

Genesis 50:19–21

Li Dios tooxtenq’a chixnawb’al k’a’ru aj-e li qach’a’ajkilal.

• Us ta lix k’anjel li Dios ink’a’ nak’utun chi saqen ru naq laj Jose yoo chi nume’k sa’ lix ch’a’ajkilal, toj moqon kiru chixk’eeb’al reetal naq “li Dios xsutq’isi choq’ re li us” (Genesis 50:20). Wi ta xooru chirula’aninkil laj Jose naq toj wan sa’ li jul malaj sa’ li tz’alam, k’a’ raj ru taqaye re? Chan ru tooxtenq’a li na’leb’ sa’ Genesis 50:19–21 naq wanko sa’ ch’a’ajkilal? Maare li komon te’raj xseraq’inkil chan ru naq li Dios ak xtenq’aheb’ sa’ xyu’am, us ta yookeb’ chi nume’k sa’ ch’a’ajkilal. K’a’ chik ru naxye sa’ Tzol’leb’ ut Sumwank 122 chirix li na’leb’ a’in?

Xkomon chik li k’anjeleb’aal

Lix yu’ameb’ li profeet neke’reetali li Jesukristo ut lix k’anjel.

Lix yu’ameb’ laj Jose re Egipto, laj Moises, ut laj Jose Smith naru toohe’xtenq’a chixk’oxlankil li Jesukristo. Li komon naru te’xtz’iib’a li na’leb’ sa’ li tusleb’ a’in, toja’ naq te’xk’e xna’aj laj Jose re Egipto (wan resil sa’ Genesis 45:5–11), laj Moises (chi’ilmanq Genesis 50:24, 29, 34–36 chi jaltesinb’il ru xb’aan laj Jose Smith [sa’ xraqik li roxichal li loq’laj hu]), ut laj Jose Smith (wan resil sa’ Genesis 50:26–28, 30–33 chi jaltesinb’il ru xb’aan laj Jose Smith [sa’ xraqik li roxichal li loq’laj hu]).

	Li Jesukristo
Ani ki’el sa’ ch’a’ajkilal?
K’a’ru lix ch’a’ajkilal?
Chan ru ki’el chaq?

Xkawresinkil qib’ jo’ aj k’utunel

Ye li patz’om li taasumeeq rik’in xnawom li ch’oolej. Xyeeb’al li patz’om li taasumeeq rik’in xnawomeb’ xch’ool laj tzolonel naru tixb’oq chaq li Santil Musiq’ej. Naq yookat chixk’utb’al Genesis 45:1–15, maare taaye li patz’om “K’a’ru usilal xak’ul naq xakuy junaq li maak?” (chi’ilmanq Li k’utuk jo’ li Kolonel, 32).