Sara o loo sapasapaia le pepe o Isaako

Sara ma Isaako, saunia e Scott Snow

14–20 Fepuari

Kenese 18–23

“Pe i ai Se Mea e Faigata Tele i le Alii?”

A o e sauniuni e aoao atu, ia manatua o le tele o tagata o le vasega atonu na i ai ni o latou lava aafiaga anoa ao latou faitauina le Kenese 18–23. O le a se mea e mafai ona e faia e uunaia ai i latou e faasoa mai nei aafiaga ma malamalamaaga? Mafaufau e faaaoga na malamalamaaga e tosina ai le talanoaga a le vasega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O o tatou tofotofoga ma faigata e masani ona avea ma ni taimi taua i o tatou olaga. Ua faamatala mai e leKenese 18–23 ni nai taimi faapena i olaga o Aperaamo ma Lota. Atonu e mafai e tagata o le vasega ona faasoa mai se fuaiupu na latou maua ia latou suesuega patino i lenei vaiaso e faamatala ai se taimi taua faapea mo Aperaamo. Ona mafai lea ona latou faasoa mai mea na latou aoaoina mai ai.

aikona o le aoao atu

Aoao Atu le Aoaoga Faavae

Kenese 18:9–14; 21:1–7

E faataunuuina e le Alii Ana folafolaga i Lona lava taimi.

• O le tala o i ai i nei fuaiupu e mafai ona avea ma musumusuga i tagata o le vasega o e mafaufau pe faataunuuina folafolaga a le Atua ia i latou. Ina ia amata se talanoaga, atonu e aoga le valaaulia o tagata o le vasega e iloilo ma se tasi i le vasega le tala i folafolaga a le Atua ia Aperaamo ma Sara i le Kenese 17:4, 15–22; 18:9–14 ma le faataunuuina o na folafolaga i le Kenese 21:1–7. O a ni mea o loo i nei fuaiupu e tulagaese i tagata o le vasega? O a ni upumoni e mafai ona tatou aumaia mai aafiaga o Aperaamo ma Sara e faasoa atu i se uo ua leai se faamoemoe o le a faataunuu e le Atua Ana folafolaga? O a isi mau po o aafiaga patino e mafai ona tatou faasoa atu? (tagai, mo se faataitaiga, Roma 8:28; Eperu 11; Mamona 9:19–21; Mataupu Faavae ma Feagaiga 88:64). O a aafiaga e mafai ona faasoa atu e tagata o le vasega ia na faataunuu ai folafolaga a le Atua i o latou olaga? E mafai faapefea ona tatou faatumauina lo tatou faatuatua pe afai o faamanuiaga na folafolaina mai e le maua i lenei olaga? (tagai Eperu 11:8–13).

Kenese 19:15–26

I le avea ai ma soo o Iesu Keriso, ua tatau ona tatou sosola ese mai le amioleaga ma aua le toe tepa i tua.

• O a lesona e te manatu e mafai ona aoao e tagata o le vasega mai le tala i le aiga o Lota na sosola ese mai Sotoma ma Komoro? O le tasi lesona mautinoa ua fautuaina mai i le saunoaga a Elder Jeffrey R. Holland i le “Punaoa Faaopoopo.” Atonu e mafai ona e faasoa atu i le vasega pe a uma ona otooto atu mea na tutupu i le Kenese 19:15–26. O a auala po o ni tulaga tatou te “toe [tepa] ai i tua” i nisi taimi (fuaiupu 26) ae ua tatau ona tatou taulai atu i luma ma le faatuatua i le Faaola? Atonu e mafai e tagata o le vasega ona faasoa mai ni aafiaga e faaalia ai le taua o le lē toe tepa i tua. O le a se mea ua faaopoopo e le Luka 9:62 i lo tatou malamalama i lenei autu?

  Ata o Lota ma lona aiga ua sosola ese mai Sotoma ma Komoro

  Sosola ese mai Sotoma ma Komoro, saunia e Julius Schnorr von Carolsfeld

Kenese 22:1–14

O le naunau o Aperaamo e ositaulagaina ia Isaako o se faatusa o le Atua ma Lona Alo.

• O le tala ia Aperaamo na ofoina atu lona atalii o se taulaga e mafai ona aoaoina ai i tatou e uiga i le taulaga a le Tama Faalelagi o Lona Alo. O se tasi auala e sailiilia ai lenei tala o le tofi lea o le afa o le vasega e mafaufau loloto i le Kenese 22:1–14 mai i le vaaiga a Aperaamo ma le Atua le Tama, ae o le isi afa e mafaufau loloto i lenei tala mai le vaaiga a Isaako ma Iesu Keriso. Fai atu i tagata o le vasega e faasoa mai ni malamalamaaga sa latou mauaina. E faapitoa lava, o le a le mea sa aoaoina e tagata o le vasega e faateleina ai lo latou faafetai mo le Tama Faalelagi ma Iesu Keriso? O se vaega o lenei talanoaga, e mafai ona e faaalia le ata o Aperaamo o loo Aveina Isaako e Osi ai le Taulaga (Tusiata o le Talalelei, nu. 9) pe faaali le vitio “Akedah (The Binding)” (ChurchofJesusChrist.org).

additional resources icon

Punaoa Faaopoopo

“O le faatuatua e masani lava ona faasino atu i le lumanai.”

Na aoao mai Elder Jeffrey R. Holland:

“E mafai foi ona faapea na tepa i tua le ava a Lota faatasi ai ma le tetee i le Alii mo mea ua Ia fai atu ai ia te ia e tuu aua le avea. … O le mea lea e le na o lona tepa i tua; ae sa ia tepa i tua ma le moomoo. I sona faapuupuuga, o lona taofi mau o mea ua tuanai ua faatoilalo ai lona talitonu i le lumanai. …

“… Ou te aioi atu ia te outou ia aua nei nopia’i ai i taimi ua alu, pe moomoo naumati mo taimi ua sola, po o le a lava le lelei atonu na i ai na taimi ua sola. O le tuanai e mo le aoaoina mai ai, ae le o le ola ai. Tatou te vaai i tua e pue mai aloiafi mai aafiaga susulu ae le o lefulefu. Ma afai ua tatou aoaoina mea e manaomia ona tatou aoaoina ma ua tatou aumaia ma i tatou mea sili atu na tatou aafia ai, ona tatou vaavaai lea i luma ma tatou manatua o le faatuatua e masani lava ona faasino atu i le lumanai. …

“… O le [ava a Lota] e lei i ai se faatuatua. Sa masalosalo o ia i le gafatia e le Alii ona tuuina atu ia te ia o se mea e sili atu nai lo mea ua ia maua. O le mea moni lava, sa manatu o ia e leai se mea o loo i le lumanai e mafai ona tutusa le lelei e pei o na mea ua ia tuua. …

“… O lena nofoa’i i olaga ua tuanai, e aofia ai mea sese ua tuanai, e matua le sa’o lava! E le o le talalelei lena a Iesu Keriso” (““O Le a Oo Mai le Mea Sili,”,” Liahona, Ian. 2010, 24, 26–27).

Faaleleia o Lo Tatou Aoao Atu

Faamanuiaga folafolaina. A o e valaaulia i latou o loo e aoaoina e faatino i luga o mea ua latou aoaoina, ia molimau atu foi i faamanuiaga sa folafolaina e le Atua ia i latou e faia faapea. (Tagai foi i le Aoao Atu i le Ala a le Faaola, 35.)