Aperaamo ma Sara

Ata o Aperaamo ma Sara na tusia e Dilleen Marsh

7–12 Fepuari

Kenese 12–17; Aperaamo 1–2

“Ia Avea ma Soo Sili Atu o le Amiotonu”

O a mea ua aoao mai e le Agaga Paia ia te oe i lenei vaiaso ao e suesue i le Kenese 12–17 ma le Aperaamo 1–2? Ia mautinoa ua tuu atu i tagata o le vasega avanoa e faasoa mai ai mea ua aoaoina ai i latou e le Agaga Paia.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia maua e tagata o le vasega avanoa e faasoa mai ai se mea sa latou aoaoina mai i le Kenese 12–17 ma le Aperaamo 1–2, e mafai ona latou tofu filifilia se tagata o ta’ua i nei mataupu ma faauma se fuaiupu e pei o nei: “Na aoaoina au e Aperaamo ” po o “Na aoaoina au e Sara .”

aikona o le aoao atu

Aoao Atu le Aoaoga Faavae

Kenese 15:1–6; 17:15–22; Aperaamo 1:1–19

O le a faamanuiaina i tatou e le Atua mo lo tatou faatuatua ma manaoga amiotonu.

• O aafiaga o Aperaamo ma Sara i le Kenese 15; 17; Aperaamo 1 e mafai ona fesoasoani i tagata o le vasega e faatumauina ai le faatuatua faapea o o latou manaoga amiotonu o le a faataunuuina i le taimi a le Alii. E faapefea ona e amata se talanoaga e uiga i lenei mataupu faavae? O se tasi auala o le valaaulia lea o le vasega e suesue le Kenese 15:1–6 ma le Aperaamo 1:1–19 ma faamatala manaoga ma tulaga faigata o Aperaamo. Na faapefea ona faaalia e Aperaamo ma Sara lo la faatuatua i taimi faigata? (tagai Eperu 11:8–13). Na faapefea ona iu lava ina faataunuuina o la manaoga amiotonu? (tagai Kenese 17:15–22; 21:1–3; Mataupu Faavae ma Feagaiga 132:29; Aperaamo 1:31). E faapefea ona tatou faaalia lo tatou faatuatua pe afai e lei faataunuuina lava o tatou manaoga amiotonu e pei ona tatou mananao ai? Atonu e mafai e tagata o le vasega ona faasoa mai pe na faapefea ona lagolagoina i latou e le Faaola i na tulaga.

• O nisi tagata o lau vasega atonu na maua sina lagolago mai o latou aiga ao latou tauivi e ola i le talalelei—ma atonu foi na latou feagai ma ni feteenaiga. O a mea e mafai ona tatou aoao mai le faataitaiga a Aperaamo i le Aperaamo 1:1–19 e mafai ona fesoasoani ia i latou o loo tauivi e ola amiotonu i na tulaga?

• E mafai ona e fai i tagata o le vasega e faitau i le Faaliliuga a Iosefa Samita, Kenese 14:36–40 (i le faaopoopoga i le Tusi Paia) ma faasoa mai mea na latou aoaoina e uiga i le faatuatua ma manaoga o Aperaamo. E mafai foi ona latou faasoa atu faamanuiaga ua faamanuiaina ai i latou ao latou faaaogaina lo latou faatuatua i le totogiina o le sefuluai.

Aperaamo 2:6–11

Ua faamanuiaina i tatou uma lava i le feagaiga faaAperaamo.

• Ina ia fesoasoani i tagata o le vasega ia malamalama po o le a le feagaiga faaAperaamo, e mafai ona e faasoa atu le saunoaga a Peresitene Russell M. Nelson i le “Punaoa Faaopoopo” (tagai foi Gospel Topics, “Feagaiga FaaAperaamo,” topics.ChurchofJesusChrist.org). Atonu na aoao tagata o le vasega e uiga i le feagaiga faaAperaamo mai le Aperaamo 2:6--11, e pei ona fautuaina i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga. Atonu e mafai e tagata o le vasega ona faasoa mai mea na latou aoaoina, pe mafai foi e le vasega ona suesue faatasi nei fuaiupu. O a folafolaga ma tiutetauave tatou te maua e ala mai i le feagaiga faaAperaamo? O le vitio “Special Witness—President Nelson” e mafai ona fesoasoani e taliina lenei fesili (ChurchofJesusChrist.org/media-library/video/2011-04-18-special-witness-president-nelson). O le a le mea e tatau ona tatou faia e maua ai faamanuiaga o lenei feagaiga? E mafai faapefea e i tatou o fanau a Aperaamo, ona “faamanuiaina aiga uma o le lalolagi”?Aperaamo 2:11)

Kenese 14:18–19; Faaliliuga a Iosefa Samita. Kenese 14:25–40

“O Mekisateko sa o se alii o le faatuatua.”

• Ona o le Toefuataiga o le talalelei, ua masani ai le tele o tagata o le Ekalesia i le Perisitua Mekisateko, ae o nisi e le iloa e uiga i le tagata o Mekisateko. Ina ia fesoasoani i tagata o le vasega ia aoao atili e uiga ia te ia, atonu e mafai ona e valaaulia i latou e vaai faalemafaufau faapea ua fesiligia i latou e faailoa atu o ia i se tasi e le iloa o ia ma faia se lisi i luga o le laupapa o mea o le a latou fai atu ai. E mafai ona latou faaautu nei mea i mea latou te faitauina i le Faaliliuga a Iosefa Samita 14:26–27, 33–38 (i le faaopoopoga i le Tusi Paia); Alema 13:13–19; ma le Mataupu Faavae ma Feagaiga 107:1–4. O le a se mea ua tatou aoaoina mai nei fuaiupu e uiga i le Perisitua Mekisateko?

  Mekisateko o loo faamanuiaina Aperamo

  Mekisateko o loo Faamanuiaina Aperamo, saunia e Walter Rane

aikona o punaoa faaopoopo

Punaoa Faaopoopo

Faamanuiaga o le feagaiga faaAperaamo.

Na aoao mai Peresitene Russell M. Nelson:

“O le feagaiga na osia e le Atua ma Aperaamo ma mulimuli ane toe faamautuina ma Isaako ma Iakopo e matuai sili ona taua. … Na faaali mai le Alii i nei aso e gata ai e toe faafou lena feagaiga faa-Aperaamo. … Faatasi ai ma lenei faafouga, ua tatou maua ai, e pei foi o i latou anamua, le perisitua paia ma le talalelei e faavavau. O loo ia i tatou le aia tatau e maua ai le atoatoaga o le talalelei, olioli i faamanuiaga o le perisitua, ma agavaa ai mo faamanuiaga silisili a le Atua—o le ola lea e faavavau.” (“Feagaiga,” Liahona, Nov. 2011, 87–88).

“O faamanuiaga tupito o le feagaiga faaAperaamo e faaee i totonu o malumalu paia. O nei faamanuiaga e mafai ai e i tatou ona tutulai mai i le Uluai Toetutu ma mautofi i nofoalii, malo, itumalo, ma mana, ma puleaga, i lo tatou ‘faaeaga ma mamalu i mea uma’ [Mataupu Faavae ma Feagaiga 132:19]” (“O Molimau Faapitoa a Keriso,” Liahona Ape. 2001,7).

Faaleleia o Lo Tatou Aoao Atu

Tuu atu soo le molimau. O lau molimau faigofie, ma faamaoni o upumoni faaleagaga e mafai ona i ai se uunaiga mamana i luga o i latou e te aoaoina. Mo se faataitaiga, e mafai ona e faasoa atu se molimau faigofie e uiga i ala ua faamanuiaina ai e feagaiga lou olaga.