Noa, lona aiga, manu, o le vaa, ma se nuanua

Ata o Noa ua tuua le vaa, na tusia e Sam Lawlor

31 Ianuari–6 Fepuari

Kenese 6–11; Mose 8

“Ma sa Faapea ona Maua e Noa le Alofa Tunoa i Fofoga-Silasila o le Alii”

Ua faamamafaina e lenei otootoga ia mataupu faavae o loo maua i le Kenese 6–11 ma le Mose 8, ae e le na o le pau ia o mataupu faavae e mafai ona e taulai atu i ai ao e aoao atu. Talitonu i uunaiga faaleagaga e te maua a o e suesue i tusitusiga paia.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Mafaufau e fai i tagata o le vasega e faasoa mai se savali faaleagaga mo o tatou taimi mai le tala ia Noa po o le Olo o Papelu. Fautuaina i latou e faasoa mai se mau e lagolagoina ai lenei savali.

aikona o le aoao atu

Aoao Atu le Aoaoga Faavae

Kenese 6–8; Mose 8

E i ai le saogalemu faaleagaga i le mulimuli i le perofeta a le Alii.

• O le amioleaga i aso o Noa e mafai ona faamanatu mai ai ia i tatou le amioleaga ua tatou vaaia o loo siomia ai i tatou i ona po nei. Ina ia fesoasoani i tagata o le vasega e aoao mai lesona i le tala ia Noa, e mafai ona e tusia i le laupapa Lapataiga ma le Faamautinoaga. E mafai e tagata o le vasega ona iloilo le Kenese 6–8 po o le Mose 8:13–30 ma saili se mea latou te lagona o se lapataiga taua mo o tatou taimi ma se mea latou te manatu o se toe faamautinoaga (tagai foi “Punaoa Faaopoopo”). E mafai ona latou tusia mea latou te maua i lalo o le autu talafeagai i luga o le laupapa. Aisea e taua ai le tala ia Noa ia i tatou i le taimi nei?

Kenese 9:8–17

E fesoasoani ia faailoga ma faatusa ia i tatou e manatua ai a tatou feagaiga ma le Alii.

• O leotootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ua fautuaina mai ai le faitauina o le Kenese 9:8–17 ma mafaufau loloto pe faapefea ona avea faailoga ma faatusa o ni faamanatu o a tatou feagaiga. Ina ia fesoasoani i tagata o le vasega e faasoa mai o latou mafaufauga, e mafai ona e aumai i le vasega ni mea e faamanatu ai ia i tatou ni mea taua—e pei o se mama faaipoipo, se fu’a a le atunuu, po o se pine faifeautalai—ma faatusatusa i le “faailoga” o le nuanua. O a mea ua aoaoina ai i tatou e le Faaliliuga a Iosefa Samita, Kenese 9:21–25 (i le faaopoopoga i le Tusi Paia) e uiga i lenei faailoga? E faapefea e le Atua ona faaaoga faailoga po o faatusa e fesoasoani ia i tatou ia manatua ai a tatou feagaiga?

Kenese 11:1–9

E na o le pau le ala e oo ai i le lagi o le mulimuli ia Iesu Keriso.

• O le tala i tagata o Papelu na fauina o se olo ua tuuina mai ai se faatusatusaga malie i le tala ia Enoka ma ona tagata i le fausiaina o Siona, lea na suesueina e tagata o le vasega i le vaiaso talu ai. Na taumafai vaega uma e lua ia oo atu i le lagi ae e eseese auala. E mafai ona e valaaulia tagata o le vasega e lisi i luga o le laupapa soo se mea latou te manatua e uiga i le nuu o Siona (tagai Mose 7:18–19, 53, 62–63, 69) ma mea latou te aoao mai le Kenese 11:1–9 ma le Helamana 6:26–28 e uiga i tagata o Papelu. O a ni eseesega na latou mauaina? O le a se mea ua tatou aoao mai i lenei mea e uiga ia tatou lava taumafaiga e toe foi atu i le afioaga o le Atua?

  o le olo o Papelu

  Ata o le Olo o Papelu, na tusia e David Green

• E le o toe i ai nei le aai anamua o Papelu, ae o le faamaualuga ma le faalelalolagi o loo faatusa i ai o loo i ai pea. Ina ia fesoasoani i tagata o le vasega e faaaoga lesona mai le Olo o Papelu i o latou olaga, amata i le valaaulia o i latou e iloilo le Kenese 11:1–9. Ona mafai lea ona e tufa atu fasipepa ma valaaulia tagata o le vasega e tusi mea e fai e tagata e tosoese ai i latou mai le Atua; ona, i isi fasi pepa, e mafai ona latou tusi ai mea e fai e tagata e faalatalata atili atu ai i latou i le Atua. Atonu e fiafia le autalavou e faatulaga le vaega muamua o pepa i le laupapa i le foliga o se olo ma le vaega lona lua i le foliga o se malumalu. O le a le mea ua aumaia e le Atua e fesoasoani ia i tatou e “oo atu ai i le lagi”? (Kenese 11:4; tagai foi Ioane 3:16). E mafai ona outou usuina se viiga e uiga i lenei autu, e pei o le “Ta Felatai Nei, le Atua ma Oe” (Viiga, nu. 59).

aikona o punaoa faaopoopo

Punaoa Faaopoopo

Lesona mai ia Noa.

Na saunoa Peresitene Henry B. Eyring:

“O le le mafai ona taliaina o fautuaga faaperofeta e faaitiitia ai lo tatou malosiaga e taliaina fautuaga musuia i le lumanai. O le taimi sili lava e faia ai le faaiuga e fesoasoani ia Noa e fau le vaa o le taimi muamua lava sa ia fesili ai. O taimi uma sa ia fesili ai i le mavae ai o lena taimi muamua, o toilalo taitasi e tali atu semanu e faaitiitia ai le nofouta i le Agaga. Ma o taimi uma la sa foliga mai o lana talosaga sa sili atu ona faavalevalea, seia oo ina timu mai. Ae sa fai lava si tuai.

“O taimi uma i lo’u olaga pe a ou filifili ai e faatuatuai ona mulimuli i se fautuaga musuia pe filifili faapea e le aofia ai au, sa oo ina ou iloa ai sa ou tuuina au lava i se ala e pagatia ai. O taimi uma lava na ou faalogo ai i fautuaga a perofeta, ma lagonaina le faamautuina i se tatalo, ona mulimuli lea i ai, na ou iloa ai lou agai atu i le saogalemu” (“Mauaina o le Saogalemu i Fautuaga,” Liahona, Iulai 1997, 28).

Aisea na auina mai ai e le Atua le Lolo?

O nisi tagata e tau mafaufau e uiga i le amiotonu o le Atua i le auina mai o se lolo e “soloieseina i le fogaeleele tagata” (Kenese 6:7). Na faamalamalama mai e Elder Neal A. Maxwell faapea i le taimi o le Lolo Tele, “ua ausia e le amioleaga le tulaga o le faatamaia o le faitalia ua le mafai ai e agaga, i le faamasinogatonu, ona auina mai iinei’ (We Will Prove Them Herewith [1982], 58).

Faaleleia o Lo Tatou Aoao Atu

Faaavanoa le taimi mo le mafaufau loloto. O fesili lelei e manaomia ai le mafaufau loloto, sailiili, ma musumusuga. Tuu atu i tagata o le vasega ni nai minute e mafaufau loloto ai i se fesili ae lei fesili atu mo ni tali. (Tagai Aoao Atu i le Ala a le Faaola, 31–34.)