“24–30 Ianuari. Mose 7: “Ma sa Ta’ua e le Alii Lona Nuu o Siona” Sau, Mulimuli Mai ia te A’u—Mo Le Aoga Sa: Feagaiga Tuai 2022 (2021)
“24–30 Ianuari. Mose 7,” Sau, Mulimuli Mai ia te A’u—Mo Le Aoga Sa: 2022
Ia Outou Fealofani, saunia e Emma Donaldson Taylor
24–30 Ianuari
Mose 7
“Ma sa Ta’ua e le Alii Lona Nuu o Siona”
Ao e suesue i le Mose 7, mafaufau i tagata o loo e faiaoga ai ma le ala e mafai ai ona e fesoasoani ia i latou ia malamalama i mea ua aoao mai e lenei mataupu e uiga i Siona ma isi mataupu faavae o le talalelei.
Tusi Faamaumau Ou Lagona Uunai
Valaaulia le Fefaasoaai
O nisi taimi o se fesili faigofie ma ni nai minute e mafaufau loloto ai ua lava lea e fesoasoani ai i tagata e faasoa mai mea na latou aoaoina i le fale. Atonu e mafai ona e tuuina atu i tagata o le vasega sina taimi e iloilo ai le Mose 7, sue se fuaiupu latou te lagona ai le faafetai mo upumoni na toefuatai mai i le tusi a Mose, ona faasoa mai lea.
Aoao Atu le Aoaoga Faavae
E mafai ona tatou fausia Siona i o tatou aso.
-
O le a le ala sili e faailoa atu ai le autu o Siona i lau vasega? O le tasi auala o le faafesootai o tagata o le vasega i le gasologa o le vaiaso ae lei faia le vasega ma valaaulia i latou e aumai se mea mai le fale latou te lagona e faamanatu mai ai uiga o tagata o Siona, e pei ona ta’ua i le Mose 7:18. Ao outou talanoaina faatasi lenei fuaiupu , e mafai e tagata o le vasega ona faamatala le taua o le mea na latou aumaia.
E tatau ona tatou taumafai ia “tasi le loto ma tasi le mafaufau” (Mose 7:18).
-
O le vitio “We Come Together and Unite as One” (ChurchofJesusChrist.org) e mafai ona fesoasoani ia te oe e amata ai se talanoaga pe faapefea ona tatou “tasi le loto ma tasi le mafaufau” (Mose 7:18) i a tatou uarota ma aiga. Mafaufau e fai i tagata o le vasega e mafaufau i taimi na latou lagona ai le lotogatasi ma o latou aiga pe ao auauna atu faatasi ma isi i le Ekalesia po o le nuu. O a mea na fai e tagata e maua ai le lotogatasi i nei tulaga? O a mea e mafai ona tatou aoao e uiga ia Siona ma le lotogatasi mai le Mose 7? (tagai faapitoa lava i fuaiupu 16–21, 27, 53, 62–69). O nisi nei o mau e mafai ona fesoasoani: Filipi 2:1–4; 4 Nifae 1:15–18; Mataupu Faavae ma Feagaiga 97:21; 105:5.
E tutulu le Atua mo Ana fanau.
-
O nisi tagata atonu e vaai i le Atua faapea e mamao ese, e le mafai ona oo atu i ai, ma e le popole mai foi. E mafai faapefea ona e faaaogaina le faaaliga ia Enoka e fesoasoani i lau vasega ia malamalama ai faapea e i ai le Atua i o tatou olaga ma tausia i tatou? E mafai ona e valaaulia tagata o le vasega e faitau le Mose 7:28–44 ma fai se lisi o nisi o mafuaaga na tutulu ai le Atua. O a mea ua aoao mai e nei mau ia i tatou e uiga i lagona o le Atua i Ana fanau? O fuaitau i le “Punaoa Faaopoopo” e mafai ona faaopoopo i lenei talanoaga.
-
O leotootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo fautua mai e mafaufau loloto i mea ua aoao mai e le Mose 7:28–31, 35 e uiga i le Atua. O i latou na faia lenei mea i le fale atonu e fia faasoa mai o latou manatu i le vasega. Pe e mafai ona e valaaulia tagata o le vasega e mafaufau loloto i nei fuaiupu ma talanoaina i le vasega.
O le a toe afio mai le Alii i aso e gata ai.
-
E mafai faapefea ona e fesoasoani i lau vasega ia maua mea ua aoao mai i le Mose 7:59–67 e uiga i le Afio Mai Faalua o le Faaola? Atonu e mafai ona e lisiina ni upumoni se tolu pe sili atu po o ni mea mai nei fuaiupu i le laupapa ma fai atu i tagata o le vasega e sue fuaiupu ma faaopoopo i le lisi. Aisea ua avea ai o se faamanuiaga le i ai o le faamaumauga o le faaaliga ia Enoka—o se tasi o uluai valoaga i le Afio Mai Faalua?
Punaoa Faaopoopo
E tutulu le Atua mo Ana fanau.
Na aoao mai Elder Jeffrey R. Holland:
“O iina, i le totonugalemu o faaaliga vaaia silisili i tagata lea na tatalaina ai le lagi i lana vaai, na matauina ai e Enoka ia faamanuiaga ma luitau o le olaga faaletino, na ia tepa atu ai i le Tama ma sa maofa i le vaai atu o tutulu o Ia. Na ia saunoa atu ma le maofa ma le ofo i lenei Tamalii silisili ona mamana i le atulaulau: “Po ua faapefea ona e tutulu?’ …
I le silasila atu i mea o loo tutupu e toetoe lava o soo se vaitaimi, na tali atu ai le Atua: “Faauta i ou uso nei; o i latou o galuega a o’u lava lima. … Na ou tuuina atu ia i latou … [se] poloaiga, ia latou fealofani, ma e ao ina latou filifilia au, lo latou Tama; ae faauta, ua aunoa i latou ma le alofa, ma ua latou inoino i o latou lava toto. … Pe le tatau ea ina laue le lagi i lo latou iloa ai o le a puapuagatia i latou ia?’ [Mose 7:29–33, 37].
“O lena vaaiga mamana e tasi, ua sili atu mea ua na faia e aoao mai ai le natura moni o le Atua nai lo soo se isi lava tusitusiga faalelotu ua mafai ona faailoa atu ai. … O se faatusa e le mafaagaloina lea o le aafia ai o le Atua i o tatou olaga! E maeu le tiga i se matua pe afai e le filifilia o Ia e Lana fanau po o le “talalelei a le Atua” na Ia auina mai! [Roma 1:1]. E maeu le faigofie ona alofa i se tasi o le e tupito le alofa ia i tatou!” (“O Le Silisiliese o le Atua,” Liahona, Nov. 2003, 72).
Faaleleia o Lo Tatou Aoao Atu
Fautuaina tagata o le vasega e suesue ia tusitusiga paia i le fale. O se tasi auala e mafai ona e faamalosiauina ai le suesue o tusitusiga paia i le fale o le tuu atu o se taimi mo tagata o le vasega e faasoa mai ai mea latou te maua ma malamalamaaga mai a latou lava suesuega i le fale. (Tagai Aoao Atu i le Ala a le Faaola, 29.)