27 Tesema–2 Ianuari

Mose 1; Aperaamo 3

“O La’u Galuega ma Lo’u Mamalu Lenei”

Ao e faitau i le Mose 1 ma le Aperaamo 3, ia tatala lou mafaufau ma lou loto i uunaiga mai le Agaga. O le a Ia musuia oe i mafaufauga ma manatu o le a fesoasoani ia te oe e saunia ai e aoao atu.

Tusi Faamaumau Ou Lagona Uunai

Valaaulia e Fefaasoaai

Atonu na i ai ni aafiaga matagofie o tagata o lau vasega i le faitauina o le Mose 1 ma le Aperaamo 3 i le fale. O le a faapefea ona e tuuina atu i tagata o le vasega avanoa e faasoa mai ai na aafiaga? Atonu e faigofie lava e pei o le faia o fesili faapenei: O a mea na uunaia ai oe ao e faitauina tusitusiga paia i lenei vaiaso? O a ni mea na e ofo ai? O a ni mea na e taofi ai ma mafaufau? O a ni mea na fesoasoani ia te oe e lagona ai le latalata atili i lou Tama Faalelagi ma Iesu Keriso?

Aoao Atu le Aoaoga Faavae

Mose 1:1–10, 37–39; Aperaamo 3:22–26

Ona o fanau a le Atua, ua i ai so tatou taunuuga paia.

• O upumoni na faaalia mai i faaaliga ia Mose ma Aperaamo e mafai ona i ai se tosinaga mamana ia tatou filifiliga ma lo tatou mafaia ona faatoilalo luitau o le olaga. E mafai faapefea ona e fesoasoani i tagata o lau vasega ia iloa nei upumoni i le Mose 1 ma le Aperaamo 3? O se tasi auala o le vaevae lea o le vasega i ni vaega ma tofi vaega taitasi i se tasi o nei fuaitau: Mose 1:1–10; Mose 1:37–39; Aperaamo 3:22–26. E mafai e vaega taitasi ona vaai mo tali i fesili e pei “O ai a’u?” “Aisea ua ou i ai iinei?” ma le “O ai e finagalo le Atua ia ou avea ai?” E lava loa le taimi, ona mafai lea e vaega ona faasoa mai a latou tali. E mafai faapefea e nei tali ona tosina ai a tatou faatinoga i aso taitasi?

  

  O Keriso ma le Foafoaga, saunia e Robert T. Barrett

Mose 1:12–23

E mafai ona tatou teena faatosinaga a Satani.

• O le talanoaga a Mose ma Satani, i le Mose 1: 12–23, o loo i ai lesona e mafai ona fesoasoani i tagata o lau vasega ao latou feagai ma faaosoosoga po o taufaasese mai le fili. O le a se mea e mafai ona tatou aoao mai i le tali a Mose? O le vitio “O A’u o se Atalii o le Atua” (ChurchofJesusChrist.org) e mafai ona fesoasoani i tagata o le vasega e talanoaina se tasi o togafiti a Satani—faaosoosoina i tatou ia masalosalo i o tatou aafiaga faaleagaga (tagai “Punaoa Faaopoopo”). Atonu e aoga pe a faasoa mai e tagata o le vasega ni manatu ma ni faamalosiauga e fesoasoani ai i le tasi ma le isi ia iloa ma tetee atu ai taumafaiga a Satani.

• O le tasi lesona mai le aafiaga o Mose e faapea o Satani e faaosoosoina i tatou i mea e feteenai ma upumoni ma le mana o le Atua. Ina ia fesoasoani i tagata o le vasega ia vaai i lenei mea, e mafai ona e aumai i le vasega ni mea e faafoliga o isi mea, e pei o se laau palasitika po o se pepe meataalo. E faapefea ona tatou iloa e le o ni mea moni nei mea? O a nisi o taufaasese e faaaoga e Satani i aso nei e faaosooso ai i tatou? E mafai faapefea ona tatou iloa ma teena na mea? (Ina ia aoao pe na faapefea ona faia e Mose lenei mea, tagai Mose 1: 13–18.) E faapefea ona fesoasoani le Alii ia i tatou ia tatou taumafaiga? (Tagai Mose 1: 24–26).

Aperaamo 3:22–28

O le olaga lenei o lo tatou avanoa e faaali atu ai o le a tatou faia mea ua poloai mai ai le Atua.

• E mafai faapefea ona e fesoasoani i tagata o le vasega ia vaai i o latou olaga o se avanoa e faamaonia ai lo latou faamaoni i poloaiga a le Atua? E mafai ona e amata i le fai atu ia i latou e talanoa e uiga i aafiaga ao latou taumafai e faaalia le poto masani i se tomai—mo se faataitaiga, i le aoga, i le galuega, po o se au afeleti. E mafai ona latou talanoa e uiga i mea na manaomia ona latou faia e faamaonia ai i latou lava. E tutusa faapefea nei aafiaga ma mea o loo faamatalaina i le Aperaamo 3:24–26? E faapefea ona eseese? E faapefea ona tatou faaaofia ai le Tama Faalelagi ma le Faaola ia tatou taumafaiga e “faamaonia” i tatou lava? (Aperaamo 3: 25). E faapefea e le iloaina ua tatou i ai iinei e faamaonia i tatou lava i le usiusitai ona aafia ai le ala tatou te tali atu ai i luitau o le olaga?

• O a isi mea tatou te aoao mai le Aperaamo 3: 22–28 e uiga i le muai olaga, po o lo tatou “esetete muamua”? (fuaiupu 26). Aisea e taua ai nei upumoni ia i tatou?

Punaoa Faaopoopo

Aua le masalosalo i mea ua faaalia ia te outou.

Na aoao mai lenei mea e Elder Jeffrey R. Holland e uiga i le aafiaga o Mose i le Mose 1: “O le savali a Mose ia te oe i le asō o le: Aua le loto vaivai. Aua le faapea o se faaaliga maoae, o sina taimi ofoofogia, ma musuia, le avanoa o se auala musuia, o le iuga lea. … O le taimi lava na faamalamalamaina ai, faaeteete i le faaosoosoga e aloese mai i se mea lelei. Afai na sa’o ina ua e tatalo i ai ma talitonuina ma ola ai, e sa’o i le taimi nei. Aua le fiu pe a faateleina le mamafa. O le mea moni aua nei gauai atu i lena tiapolo ua nopia’i i le faataumaoia o lou fiafia. Faafetaia’i ou masalosaloga. Pulea ou atuatuvalega. ‘Aua le lafoai ai o outou faamalosi.’ [Eperu 10:35]. Ia tumau i le ala ma vaai i le matagofie o le olaga ua matala mai mo oe” (“O Le Mea Lea, Aua Le Lafoai Ai Lo Outou Faamalosi,” Liahona, Iun. 2000, 34).

Faaleleia o Lo Tatou Aoao Atu

Fesoasoani i tagata aoao e suesue upumoni i tusitusiga paia. A o lei valaauliaina tagata o le vasega e faitau se fuaitau o mau, e mafai ona e tuuina atu ia i latou se mea faapitoa e sailia pe mafaufauina. Mo se faataitaiga, e mafai ona latou sailia se mea na latou aoaoina e uiga i le Faaola po o se mea latou te mananao e faasoa atu i se tagata o le aiga. (Tagai Aoao Atu i le Ala a le Faaola, 21.)