Sili atu nai lo le Parataiso, saunia e Kendal Ray Johnson

17–23 Ianuari

Kenese 5; Mose 6

“Ia Aoao Saoloto Atu Ia Mea i Lau Fanau”

Ae e te lei faitauina isi anomea faaopoopo, faitau ma manatunatu loloto i le Kenese 5 ma le Mose 6, ma tusifaamaumau ou lagona uunai faaleagaga. O leSau, Mulimuli Mai ia te Au—Mo Tagata Taitoatasi ma Aiga ma lenei otootoga e mafai ona tuuina atu ia te oe ni manatu i le ala e fesoasoani ai ia i latou o loo e aoaoina ia iloa upumoni e talafeagai ma i latou.

Tusi Faamaumau Ou Lagona Uunai

Valaaulia le Fefaasoaai

E mafai faapefea ona e faamalosiauina tagata o le vasega e faasoa mai malamalamaaga ma aafiaga na latou maua a o latou suesueina le Kenese 5 ma le Mose 6? E mafai ona e tusia igoa o Atamu ma Enoka i le laupapa ma valaaulia tagata o le vasega e tusi se mea na faia e se tasi o nei perofeta pe na aoaoina atu, e taua ia i latou.

Aoao Atu le Aoaoga Faavae

Mose 6:26–39

E valaaulia e le Alii i tatou e faia Lana galuega e ui lava i o tatou lē atoatoa.

• E ono i ai se avanoa lelei na lagona ai e se tasi o lau vasega—pe o lagonaina—le lē atoatoa e uiga i se tiutetauave i le aiga po o le lotu. Ina ia fausia le faatuatua o tagata o le vasega faapea e mafai e le Alii ona fesoasoani ia i latou, e mafai ona e valaaulia i latou e faitau le aafiaga o Enoka o loo maua i le Mose 6:26-39. Na faapefea ona fesoasoani le Atua ia Enoka e faia Lana galuega e ui lava i popolega o Enoka? Fai i tagata o le vasega e mafaufau i nisi faataitaiga o tagata na faatoilaloina o latou vaivaiga ma faataunuuina le galuega a le Alii, mai tusitusiga paia po o ō latou lava olaga. O a ni faataitaiga e mafai ona tatou faasoa atu? (Tagai foi Esoto 4:10–16; Ieremia 1:4–10; 2 Nifae 33:1–4; Eteru 12:23–29).

• E tele perofeta o aso nei ma perofeta na faaalia popolega faapei o Enoka ao latou faamatalaina lagona i taimi na maua ai o latou valaauga. O ō latou aafiaga e mafai ona faateleina ai le malamalama o tagata o le vasega i le Mose 6:26–39. Mafaufau e faaali le vitio “On the Lord’s Errand: The Life of Thomas S. Monson” (ChurchofJesusChrist.org; i le va o minute 35:46 ma le 39:40) po o se lauga talu ai nei a se sui o le Korama a le Toasefululua (mo se faataitaiga, tagai i molimau a Elder Ronald A. Rasband, Elder Gary E. Stevenson, ma Elder Dale G. Renlund [Liahona, Nov. 2015, 89–94]). Tuu atu i tagata o le vasega e faasoa mai ni mea na uunaia ai i latou e uiga i nei faataitaiga. O a ni mea tatou te aʻoaʻoina mai i nei taitai e uiga i o latou lava lagona o le lē atoatoa? O le saunoaga a Peresitene Thomas S. Monson i le “Punaoa Faaopoopo” e ono fesoasoani o se vaega o lenei talanoaga.

Mose 6:48–65

O le faatuatua, salamo, papatisoga, ma le mauaina o le Agaga Paia e saunia ai i tatou e toe foi atu i le Atua.

• O leotootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga ua fautuaina mai ai le faitauina o le Mose 6:48–62 e sue ai mea e tatau ona tatou iloaina taitoatasi ma faia ina ia laveaiina ai. Atonu e mafai e tagata o le vasega ona faasoa mai ni malamalamaaga na oo mai ao suesue i o latou aiga. Pe mafai ona outou talanoaina le Mose 6:48–62 faatasi o se vasega. E faapefea ona tatou tali atu i se tasi e fesili mai pe aisea e taua ai le faatuatua, salamo, papatisoga, ma le mauaina o le meaalofa o le Agaga Paia? Ua faapefea ona taliina e le Alii lenei fesili i fuaiupu 53–56, ma o le a foi se mea tatou te aoao mai Lana tali?

  

  E tatau i matua ona aoao atu le talalelei ia latou fanau.

Mose 6:51–63

“Ia Aoao Saoloto Atu Ia Mea i lau Fanau.”

• I le Mose 6:51–63 ua tatou aoao ai i upumoni o le talalelei faapea na aoao e le Alii ia Atamu ma fai atu ia te ia ia aoao atu i tupulaga o le lumanai. E mafai e tagata o le vasega ona faia se lisi o nei upumoni i le suesueina o vaega laiti o fuaiupu, e pei o fuaiupu 51–52, 53–57, 58–60, 61–63. Aisea e taua ai nei upumoni i le tupulaga faia’e o le asō? O a mea o le a e manao i tagata talavou ia iloa e uiga i le Faaola mai nei fuaiupu? E mafai foi e tagata o le vasega ona naunau e faasoa mai ni manatu po o ni aafiaga e fesoasoani i le tasi ma le isi ia sili atu ai ona lelei le aoaoina atu o nei upumoni i fanau ma talavou. O a nisi mea e mafai ona tatou aoao mai faatonuga a le Alii i matua i le Mosaea 4:14–15 ma le Mataupu Faavae ma Feagaiga 68:25–28; 93:40–50?

• Ina ia faaopoopo i mea ua aoao mai i le Mose 6 e uiga i le tiutetauave o matua e aoao a latou fanau, e mafai ona e valaaulia tagata o le vasega e matamata i se tasi po o le sili atu o nei vitio: “Parenting: Touching the Hearts of Our Youth,” “Proclamation Series: Children,” po o “Mother in Israel” (ChurchofJesusChrist.org). O le a se mea ua tatou aoao mai i nei vitio e uiga i le aoaoina atu o le talalelei ia tatou fanau? Afai o loo e aoaoina le autalavou, e mafai ona e valaaulia i latou e faasoa mai le ala e mafai ai ona latou lagolagoina o latou matua i a latou taumafaiga e aoao le talalelei i le aiga.

Punaoa Faaopoopo

“O lē ua valaauina e le Alii, e faaagavaaina e le Alii.”

Na aoao mai Peresitene Thomas S. Monson: “Atonu e i ai nisi o outou e matamumuli i o outou natura, pe manatu ane ia te outou lava faapea e le gafatia ona talia o se valaauga. Manatua o le galuega lenei e le o sau galuega na o oe po o sa’u galuega na o au. O le galuega a le Alii, ma a tatou i ai i le feau a le Alii, ua ia i tatou le aia tatau mo le fesoasoani a le Alii. Ia manatua o le valaauina e le Alii, e faaagavaaina e le Alii” (“Tiute o Valaauga,” Liahona, Iulai 1996, 44).

Faaleleia o Lo Tatou Aoao Atu

O le Agaga Paia o le faiaoga. O lau matafaioi o se faiaoga e taua, ae manatua o le Agaga Paia o le faiaoga moni lea. Fesoasoani i tagata o le vasega e aoao mai le Agaga ma fefaasoaai ma le tasi ma le isi i mea latou te aoaoina.