Sara ’e Isaaka, nā Scott Snow

14–20 nō Fepuare

Genese 18–23

« Tē vai atu ra ānei te hō’ē mea e ’ore e ti’a ia Iehova ’ia rave ? »

’A fa’aineine ai ’oe nō te ha’api’i, ’ia vai i roto i te ferurira’a ē, e rave rahi pīahi tei ora na paha i te tahi ’ohipa ta’a ’ē ’a tai’o ai i te Genese 18–23. E aha tā ’oe e nehenehe e rave nō te fa’aitoito ia rātou ’ia fa’a’ite mai i taua mau ’ohipa ra ’e te mau mana’o ? ’A feruri e vaiiho i teie mau mana’o nō te fa’atupu i te ’āparaura’a a te piha.

Pāpa’i i te mau mana’o e tae mai

Tītau i te mana’o

Pinepine tō tātou mau tāmatara’a ’e te mau fifi i te riro ’ei taime rahi i roto i tō tātou orara’a. Tē fa’ata’a nei te Genese 18–23 i taua mau taime ra i roto i te orara’a o Aberahama ’e ’o Lota. Penei a’e e nehenehe te mau pīahi e fa’a’ite mai i te hō’ē ’īrava tā rātou i ’ite mai i roto i tā rātou tuatāpapara’a ta’ata hō’ē i teie hepetoma ’o tē fa’ata’a nei i te tahi taime rahi nō Aberahama. ’Ei reira rātou e fa’a’ite mai ai e aha tā rātou i ha’api’i mai.

Ha’api’i i te ha’api’ira’a tumu

Genese 18:9–14 ; 21:1–7

E fa’atupu te Fatu i tāna mau parau fafau i tōna iho taime.

• E nehenehe te fa’ati’ara’a i roto i teie mau ’īrava e riro ’ei fa’aurura’a nō te mau pīahi ’o tē uiui nei te mana’o, e tupu mau ānei te mau parau fafau a te Atua nō rātou. Nō te ha’amata i te hō’ē tāu’ara’a parau, e mea maita’i paha ’e ani i te mau pīahi ’ia hi’o fa’ahou ’e vetahi mau ta’ata i roto i te piha ha’api’ira’a i te fa’ati’ara’a nō te mau parau fafau a te Atua ia Aberahama ’e ia Sara i roto i te Genese 17:4, 15–22 ; 18:9–14 ’e te tupura’a te reira mau parau fafau i roto i te Genese 21:1–7. E aha te mea i roto i teie mau ’īrava tā te mau pīahi e tāpe’a mai ? E aha te mau parau mau tā tātou e nehenehe e rave mai i roto i te ’ohipa i tupu nō Aberahama ’e nō Sara nō te fa’a’ite atu i te hō’ē hoa ’o tē mo’e ra te tīa’ira’a ē e fa’atupu te Atua i tāna mau parau fafau ? E aha te tahi atu mau pāpa’ira’a mo’a ’aore rā mau ’ohipa i tupu nō tātou, ’o tā tātou e nehenehe e fa’a’ite atu ? (hi’o, ’ei hi’ora’a, Roma 8:28 ; Hebera 11 ; Moromona 9:19–21 ; Te Parau Ha’api’ira’a ’e te mau Parau Fafau 88:64). E aha te mau ’itera’a tā te mau pīahi e nehenehe e fa’a’ite mai, i te tupura’a te mau parau fafau a te Atua i roto i tō rātou orara’a ? Nāhea tātou i te pa’epa’e i tō tātou fa’aro’o, teie rā e’ita te mau ha’amaita’ira’a i fafauhia e fāri’ihia i roto i teie nei orara’a ? (hi’o Hebera 11:8–13).

Genese 19:15–26

’Ei pipi nā Iesu Mesia, e ti’a ia tātou e horo ’ē i te ’ino ’e ’eiaha e hi’o i muri.

• E aha te mau ha’api’ira’a tā ’oe e mana’o nei e nehenehe te mau pīahi e ’apo mai nā roto mai i te fa’ati’ara’a nō te horora’a te ’utuāfare o Lota i rāpae ia Sodoma ’e Gomora ? Hō’ē ha’api’ira’a te nehenehe e ’apo mai, ’ua fa’ahitihia i roto i te a’ora’a a Elder Jeffrey R. Holland i roto i « Te tahi atu mau rāve’a tauturu ». E nehenehe paha ’oe e fa’a’ite atu i te reira i te piha ha’api’ira’a, i muri iho i te ha’apotora’a i te mau ’ohipa i tupu i roto i te Genese 19:15–26. Mai te aha te huru ’aore rā i roto i te hea huru orara’a e « hi’o [ai tātou] i muri » i te tahi taime (’īrava 26), teie rā e ti’a roa ia tātou e hi’o i mua ma te fa’aro’o i te Fa’aora ? Penei a’e e nehenehe te mau pīahi e fa’a’ite mai i te mau ’ohipa i tupu e fa’ahōho’a nei i te faufa’a rahi nō te ’orera’a e hi’o i muri. E aha tā te Luka 9:62 e tu’u fa’ahou mai nei nō tō tātou hāro’aro’ara’a i teie parau ?

  

  Te horora’a i rāpae ia Sodoma ’e Gomora, nā Julius Schnorr von Carolsfeld

Genese 22:1–14

Te ineinera’a ’o Aberahama e fa’atusia ia Isaaka, e fa’ahōho’ara’a nō te Atua ’e tāna Tamaiti.

• Tē ha’api’i nei te fa’ati’ara’a nō te pūpūra’a Aberahama i tāna tamaiti ’ei tusia, ia tātou nō ni’a i te fa’atusiara’a a te Metua i te Ao ra i Tāna Tamaiti. Hō’ē rāve’a nō te hi’o haere i teie fa’ati’ara’a, ’o tē hōro’ara’a i te ’āfara’a o te piha ’ia feruri i te Genese 22:1–14 nō ni’a i te hi’ora’a ātea a Aberahama ’e a te Atua te Metua, ’e te tahi ’āfarara’a e feruri i teie fa’ati’ara’a, nō ni’a i te hi’ora’a ātea a Isaaka ’e a Iesu Mesia. E ani i te mau pīahi ’ia fa’a’ite mai i te mau mana’o tā rātou i fāri’i. Maori rā, e aha tā te mau pīahi i ’apo mai ’o tei fa’ahōhonu atu ā i tō rātou māuruuru nō te Metua i te Ao ra ’e nō Iesu Mesia ? ’Ei tuha’a nō teie tāu’ara’a parau, e nehenehe e pia i te hōho’a nō Aberahama e ’āfa’i ra ia Isaaka ’ia fa’atusiahia (Buka hōho’a nō te ’evanelia, n°9) ’aore rā e fa’a’ite atu i te video « Akedah (Te tā’amura’a) » (ChurchofJesusChrist.org).

Te tahi atu mau rāve’a tauturu

« E fāriu noa te fa’aro’o i ni’a i te ananahi ».

’Ua ha’api’i Elder Jeffrey R. Holland :

« E nehenehe e parau ē ’ua hi’o te vahine a Lota i muri ma te riri i te Fatu, nō te mea tāna [te Fatu] i ani iāna ’ia fa’aru’e… Nō reira e ’ere i te hi’o-noa-ra’a i muri ; ’ua hi’o ra ’oia i muri ma te mi’imi’i. Nō te ha’apoto, e mea pūai a’e tōna tā’amura’a i te mea nō tahito ra, i tōna ti’aturi i te ananahi…

« Tē tāparu nei au ia ’outou ’eiaha e fa’aea i ni’a i te mau mahana tei reva a’ena, ’eiaha ato’a e mi’imi’i i tahito ra, noa atu ā te maita’i o taua mau tau ra. ’A ’apo mai i te ha’api’ira’a nō tahito ra, ’eiaha rā e ora i reira. E hi’o tātou i muri nō te ’ohi mai i te mau maita’i ’ānapanapa ’eiaha rā te rehu. ’E ’ia oti tātou i te ’apo mai i te mea e tītauhia ia tātou ’e ’ua tāpe’a mai tātou i te mea maita’i roa a’e tā tātou i ora na, ’ei reira tātou e hi’o ai i te ananahi ma te ha’amana’o ē e fa’atoro noa te fa’aro’o i ni’a i te ananahi

« … ’Aita tō [te vahine a Lota] e fa’aro’o. ’Ua fē’a’a ’oia i te ’aravihi o te Fatu i te hōro’a mai iāna i te hō’ē mea maita’i a’e i tāna e fāna’o nei. E au ē, ’ua mana’o ’oia ē, ’aita hō’ē mea e vai ra i mua iāna e nehenehe e ’aifāito i te mau mea maita’i tāna i vaiiho…

« ’Aita roa atu e tano ’ia fa’aea i ni’a i te orara’a tahito, mai te mau hape ! E ’ere te reira te ’evanelia a Iesu Mesia » (« The Best Is Yet to Be », Ensign, Tēnuare 2010, 24, 26–27).

Ha’amaita’i i tā tātou ha’api’ira’a

’A fafau atu i te mau ha’amaita’ira’a. ’A ani ai ’oe i te feiā tā ’oe e ha’api’i ra ’ia ’ohipa i ni’a i te ha’api’ira’a tā rātou i ’apo mai, ’a fa’a’ite pāpū ato’a nō te mau ha’amaita’ira’a tā te Atua i parau i te feiā e nā reira. (Hi’o ato’a Ha’api’ira’a mai tā te Fa’aora, 35.)