« 7–13 nō Fepuare. Genese 12–17 ; Aberahama 1–2 : ’Ia riro ’ei ta’ata pe’e mau i te parauti’ », Mai, pe’e mai—nō te Haʼapiʼiraʼa Sābati : Faufa’a Tahito 2022 (2021)
« 7–13 nō Fepuare. Genese 12–17 ; Aberahama 1–2 », Mai pe’e mai—nō te Ha’api’ira’a Sābati : 2022
Fa’ahōho’ara’a nō Aberahama ’e ’o Sara nā Dilleen Marsh
7–13 nō Fepuare
Genese 12–17 ; Aberahama 1–2
« ’Ia riro ’ei ta’ata pe’e mau i te parauti’a »
E aha tā te Vārua Maita’i i ha’api’i ia ’oe i roto i teie hepetoma ’a tuatāpapa ai ’oe i te Genese 12–17 ’e Aberahama 1–2 ? ’Ia pāpū e hōro’a i te mau pīahi i te rāve’a nō te fa’a’ite mai i te mea tā te Vārua Maita’i i ha’api’i ia rātou.
Pāpa’i i te mau mana’o e tae mai
Tītau i te mana’o
Nō te fa’afāna’o i te mau pīahi ’ia fa’a’ite mai i te tahi mea tā rātou i ha’api’i mai nā roto mai i te Genese 12–17 ’e te Aberahama 1–2, e nehenehe rātou tāta’itahi e mā’iti i te hō’ē ta’ata tei fa’ahitihia i roto i teie mau pene ’e ’ia fa’aoti i te pereota mai teie : « ’Ua ha’api’i Aberahama iā’u » ’aore rā « ’Ua ha’api’i Sara iā’u ».
Ha’api’i i te ha’api’ira’a tumu
Genese 15:1–6 ; 17:15–22 ; Aberahama 1:1–19
E ha’amaita’i mai te Atua ia tātou nō tō tātou fa’aro’o ’e nō tō tātou mau hina’aro parauti’a.
-
E nehenehe te mau ’ohipa i tupu nō Aberahama ’e nō Sara i roto i te Genese 15 ; 17 ; Aberahama 1 e tauturu i te mau pīahi ’ia tāpe’a noa i te fa’aro’o ē ’ia tupu tō rātou mau hina’aro parauti’a i te taime o te Fatu. Nāhea ’oe i te ha’amata i te hō’ē ’āparaura’a nō ni’a i teie parau tumu ? Hō’ē mana’o, ’o te anira’a ïa i te piha ha’api’ira’a ’ia ’imi i roto i te Genese 15:1–6 ’e te Aberahama 1:1–19 ’e ’ia fa’ata’a mai i te mau hina’aro o Aberahama ’e te mau huru fifi. Nāhea Aberahama ’e ’o Sara i te fa’a’itera’a i tō rāua fa’aro’o i roto i te mau taime fifi ? (hi’o Hebera 11:8–13). Nāhea tō rāua hina’aro parauti’a i te fa’atupuhia i te hope’a (hi’o Genese 17:15–22 ; 21:1–3 ; Te Parau Ha’api’ira’a ’e te mau Parau Fafau 132:29 ; Aberahama 1:31). Nāhea tātou i te fa’a’ite i tō tātou fa’aro’o i te taime ’aita tō tātou mau hina’aro parauti’a i fa’atupuhia mai tā tātou i hina’aro ? Penei a’e e nehenehe te mau pīahi e fa’a’ite mai e mea nāhea tō te Fa’aora turura’a ia rātou i roto i terā huru taime.
-
E fāri’i paha vetahi mau pīahi o tā ’oe piha ha’api’ira’a i te turura’a iti a te ’utuāfare ’a tūtava ai rātou i te ora i te ’evanelia—’e e penei a’e tē fa’aruru nei rātou i te pāto’ira’a. E aha tā tātou e ha’api’i mai nā roto mai i te hi’ora’a ’o Aberahama, i roto i te Aberahama 1:1–19, ’o tē nehenehe e tauturu i te feiā e tūtava nei ’ia ora ma te parauti’a i roto i terā huru taime ?
-
E ani i te mau pīahi ’ia tai’o i Te ’īritira’a a Iosepha Semita, Genese 14:36–40 (i roto i te Bible appendix) ’e ’ia fa’a’ite mai e aha tā rātou i ’apo mai nō ni’a i te fa’aro’o ’e te mau hina’aro ’o Aberahama. E nehenehe ato’a rātou e fa’a’ite mai nāhea rātou i te ha’amaita’ira’ahia i te taime ’a fa’a’ohipa ai rātou i tō rātou fa’aro’o e ’aufau i te tuha’a ’ahuru.
Tē ha’amaita’i nei te fafaura’a a Aberahama ia tātou pā’āto’a.
-
Nō te tauturu i te mau pīahi ’ia māramarama e aha te fafaura’a a Aberahama, e nehenehe ’oe e vauvau atu i te mau parau i fa’ahitihia e te peresideni Russell M. Nelson i roto i « Te tahi atu mau rāve’a tauturu » (hi’o ato’a Gospel Topics, « Abrahamic Covenant [Fafaura’a a Aberahama] », topics.ChurchofJesusChrist.org). ’Ua ha’api’i mai paha te mau pīahi nō ni’a i te fafaura’a a Aberahama nā roto mai i te Aberahama 2:6–11, mai tei parauhia i roto i te arata’i ha’api’ira’a o teie hepetoma nō te Mai, pe’e mai—nō te ta’ata hō’ē ’e te ’utuāfare. Penei a’e e nehenehe te mau pīahi e fa’a’ite mai i te mea tā rātou i ha’api’i mai, ’aore rā e nehenehe te piha ha’api’ira’a e tuatāpapa ’āmui i teie mau ’īrava. E aha te mau parau fafau ’e te mau hōpoi’a tā tātou i fāri’i nā roto mai i te fafaura’a a Aberahama ? E nehenehe te video « Special Witness—President Nelson [’Ite ta’a ’ē—Peresideni Nelson] » e tauturu i te pāhono i teie uira’a (ChurchofJesusChrist.org/media-library/video/2011-04-18-special-witness-president-nelson). E aha tei tītauhia ia tātou ’ia rave nō te fāri’i i te mau ha’amaita’ira’a o teie fafaura’a ? Nāhea tātou, ’ei hua’ai nā Aberahama, e ha’amaita’i i « te mau ’ōpū ato’a o te fenua nei » ?(Aberahama 2:11).
Genese 14:18–19 ; Te ’īritira’a a Iosepha Semita, Genese 14:25–40
« E ta’ata fa’aro’o ’o Melehizedeka ».
-
Nō te fa’aho’i-fa’ahou-ra’a-hia mai o te ’evanelia, ’ua mātau te rahira’a o te mau melo o te ’Ēkālesia i te Autahu’ara’a a Melehizedeka, ’aita rā vetahi i ’ite ’o vai te ta’ata ra ’o Melehizedeka. Nō te tauturu i te mau pīahi ’ia ha’api’i rahi mai nō ni’a iāna, penei a’e e nehenehe e ani ia rātou ’ia feruri ē, ’ua anihia rātou e vauvau i tōna parau i te hō’ē ta’ata ’aita i matau iāna, ’e ’ia tāpura mai i ni’a i te tāpura ’ere’ere, i te mau mea tā rātou e parau. E nehenehe rātou e fa’atumu i teie mau mea i ni’a i te mea tā rātou i tai’o i roto i Te ’īritira’a a Iosepha Semita, Genese 14:26–27, 33–38 (i roto i te Bible appendix) ; Alama 13:13–19 ; ’e Te Parau Ha’api’ira’a ’e te mau Parau Fafau 107:1–4. E aha tā tātou i ha’api’i mai nō ni’a i te Autahu’ara’a a Melehizedeka nā roto mai i teie mau ’īrava ?
Hōho’atē ha’amaita’i ra Melehizedeka ia Aberama’Ua ha’amaita’i Melehizedeka ia Aberama, nā Walter Rane
Te tahi atu mau rāve’a tauturu
Te mau ha’amaita’ira’a nō te fafaura’a a Aberahama.
’Ua ha’api’i te peresideni Russell M. Nelson :
« E mea fa’ahiahia roa… te fafaura’a tā te Atua i fafau ia Aberahama tei ha’apāpūhia mai i muri iho i ni’a ia Isaaka ’e ia Iakoba… ’Ua fā mai te Fatu i teie mau mahana hope’a nei nō te fa’a’āpī i te fafaura’a a Aberahama… Nā roto i teie fa’a’āpīra’a, ’ua fāri’i tātou, mai tō muta’a iho ra, i te autahu’ara’a mo’a ’e te ’evanelia mure ’ore. E ti’ara’a tō tātou ’ia fāri’i i te ’īra’a o te ’evanelia, ’ia ’oa’oa i te mau ha’amaita’ira’a o te autahu’ara’a ’e ’ia fa’ata’ahia nō te ha’amaita’ira’a rahi roa a’e a te Atua—’oia ho’i te ora mure ’ore » (« Te mau fafaura’a », Liahona, Nov. 2011, 87–88).
« Tei roto i te mau hiero te mau ha’amaita’ira’a rahi roa a’e o te fafaura’a a Aberahama e hōro’ahia ai. E fa’ati’a teie mau ha’amaita’ira’a ia tātou ’ia ti’a mai i roto i te Ti’afa’ahoura’a mātāmua nō te fāri’i i te mau terono, te mau bāsileia, te mau mana, te mau hau hui ari’i, nō tō tātou « fa’ateiteira’a ’e te hanahana ho’i i roto i te mau mea ato’a ra’ [Te Parau Ha’api’ira’a ’e te mau Parau Fafau 132:19] » (« Special Witnesses of Christ », Ensign, ’Ēperēra 2001, 7).
Ha’amaita’i i tā tātou ha’api’ira’a
’A fa’a’ite pinepine i te ’itera’a pāpū. E nehenehe te ’itera’a pāpū ’ōhie ’e te hōhonu e riro ’ei fa’aurura’a pūai i ni’a i te feiā tā ’outou e ha’api’i ra. ’Ei hi’ora’a, e nehenehe e fa’a’ite i te hō’ē ’itera’a pāpū ’ōhie nō ni’a e nāhea te mau fafaura’a i te ha’amaita’ira’a i tō ’oe orara’a.