Fa’ahōho’ara’a nō Noa i te haerera’a i rāpae i te pahī, nā Sam Lawlor

31 nō Tēnuare–6 nō Fepuare.

Genese 6–11 ; Mose 8

« ’Ua aroha te Fatu ia Noa »

Tē ha’apāpū nei teie arata’i ha’api’ira’a i te mau parau tumu e ’itehia i roto i te Genese 6–11 ’e te Mose 8, e ’ere rā ’o te reira noa te mau parau tumu e nehenehe e rōtahi atu i ni’a iho ’a ha’api’i ai ’oe. ’A ti’aturi i te mau muhumuhura’a pae vārua tā ’oe e fāri’i ’a tuatāpapa ai ’oe i te mau pāpa’ira’a mo’a.

Pāpa’i i te mau mana’o e tae mai

Tītau i te mana’o

’A feruri e ani i te mau pīahi ’ia fa’a’ite mai i te hō’ē poro’i pae vārua nō tō tātou nei ’anotau nō roto mai i te ’ā’amu o Noa ’aore rā te patu o Babela. E fa’aitoito ia rātou ’ia fa’a’ite mai i te hō’ē pāpa’ira’a mo’a e turu i te reira poro’i.

Ha’api’i i te ha’api’ira’a tumu

Genese 6–8 ; Mose 8

Tē vai ra te pārurura’a pae vārua i te pe’era’a i te peropheta a te Fatu.

• E nehenehe te ’ino i te ’anotau o Noa e fa’aha’amana’o ia tātou i te ’ino tā tātou e ’ite nei i tō tātou nei ’anotau. Nō te tauturu i te mau pīahi ’ia ’āpī mai i te mau ha’api’ira’a i roto i te ’ā’amu o Noa, e nehenehe e pāpa’i i ni’a i te tāpura ’ere’ere Te mau parau fa’aarara’a ’e Te mau parau ha’apāpūra’a. E nehenehe te mau pīahi e hi’o fa’ahou te Genese 6–8 ’aore rā te Mose 8:13–30 ’e ’ia ’ite mai i te hō’ē mea tā rātou e mana’o nei e parau fa’aarara’a faufa’a rahi nō tō tātou nei ’anotau, ’e te tahi mea tā rātou e feruri nei ’ei ha’apāpūra’a (hi’o ato’a « Te tahi atu mau rāve’a tauturu »). E nehenehe rātou e pāpa’i i te mea tā rātou i ’ite mai i raro a’e i te upo’o parau tano i ni’a i te tāpura ’ere’ere. E aha te faufa’a o te ’ā’amu o Noa nō tātou i teienei ’anotau ?

Genese 9:8–17

E tauturu te mau tokene ’e te mau tāpa’o ia tātou ’ia ha’amana’o i tā tātou mau fafaura’a ’e te Fatu.

• Tē vauvau nei te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare i te mana’o e tai’o i te Genese 9:8–17 ’e e feruri nāhea te mau tāpa’o ’e te mau tokene i te tauturu ’ei mau ha’amana’ora’a nō tā tātou mau fafaura’a. Nō te tauturu i te mau pīahi ’ia fa’a’ite mai i tō rātou mau mana’o, e nehenehe ’oe e ’āfa’i mai i roto i te piha ha’api’ira’a i te tahi mau tao’a ’o tē fa’aha’amana’o ia tātou i te mau mea faufa’a rahi—mai te tāpe’a rima fa’aipoipora’a, te reva o te fenua ’aore rā te tāreta i’oa nō te mau misiōnare—’e ’ia fa’aau i te reira i te « tokene » o te ānuanua. E aha tā Te ’īritira’a a Iosepha Semita, Genese 9:21–25 (i roto i te Bible appendix) e ha’api’i nei ia tātou nō ni’a i teie tokene ? Nāhea te Atua i te fa’a’ohipa i te mau tokene ’e te mau tāpa’o nō te tauturu ia tātou ’ia ha’amana’o i tā tātou mau fafaura’a ?

Genese 11:1–9

Te rāve’a hō’ē roa nō te tae i te ra’i, ’o te pe’era’a ïa ia Iesu Mesia.

• Tē hōro’a nei te fa’ati’ara’a nō te mau ta’ata nō Babela, tei patu i te hō’ē pare, i te hō’ē fa’aaura’a fa’ahiahia roa ’e te fa’ati’ara’a nō ni’a ia Enoha ’e tōna mau ta’ata tei patu ia Ziona, ’o tā te mau pīahi i tuatāpapa i te hepetoma i ma’iri. To’opiti pupu ta’ata tei tāmata i te tae atu i te ra’i, ma te rāve’a ’ē rā. E nehenehe ’oe e ani i te mau pīahi ’ia pāpa’i i ni’a i te tāpura ’ere’ere i te mau mea tā rātou e ha’amana’o ra nō ni’a i te mau ta’ata nō Ziona (hi’o Mose 7:18–19, 53, 62–63, 69) ’e te mea tā rātou i ha’api’i mai nā roto mai i te Genese 11:1–9 ’e te Helaman 6:26–28 nō ni’a i te mau ta’ata nō Babela. E aha te mau ta’a-’ē-ra’a tā rātou i ’ite mai ? E aha tā te reira e ha’api’i nei nō ni’a i tā tātou iho mau tauto’ora’a nō te ho’i i mua i te aro o te Atua ?

  

  Fa’ahōho’ara’a nō te Patu o Babela, nā David Green

• ’Aita te ’oire tahito nō Babela e vai fa’ahou ra, tē vai noa nei rā te te’ote’o ’e te peu o teie nei ao tāna e fa’ahōho’a nei. Nō te tauturu i te mau pīahi ’ia fa’a’ohipa i te mau ha’api’ira’a nō roto mai i te Patu o Babela i tō rātou orara’a, ’a ha’amata ma te anira’a ia rātou ’ia hi’o fa’ahou i te Genese 11:1–9. ’Ei reira e nehenehe ai ’oe e ’ōpere i te mau ’api parau ’e e ani i te mau pīahi ’ia pāpa’i i te mau mea tā te mau ta’ata e rave nei ’o tē fa’aātea ia rātou i te Atua : i muri iho, i ni’a i te tahi atu mau ’api parau, e pāpa’i rātou i te mau mea tā te mau ta’ata e rave nei ’o tē ha’afātata atu ia rātou i te Atua. E au paha te feiā ’āpī e tu’u haere i te mau ’api parau nō te pupu mātāmua i ni’a i te tāpura ’ere’ere ma te fa’ahōho’a i te hō’ē pare, ’e te mau ’api parau nō te pupu piti, mai te hō’ē hiero. E aha tā te Atua i hōro’a mai nō te tauturu ia tātou ’ia « puta noa atu te upo’o i ni’a i te ra’i » ? (Genese 11:4 ; hi’o ato’a Ioane 3:16). E nehenehe ’outou e hīmene i te hō’ē hīmene nō ni’a i teie tumu parau, mai te hīmene « ’Ei pīha’i iho vau i tō’u Fatu » (Te mau Hīmene, n°51).

Te tahi atu mau rāve’a tauturu

Mau ha’api’ira’a nō roto mai ia Noa.

’Ua parau te peresideni Henry B. Eyring ē :

« E fa’aiti mai te ’orera’a e ha’apa’o i te parau a’o a te peropheta i tō tātou mana e ha’apa’o i te parau a’o fa’auru ’āraua’e. Te taime tano roa nō te fa’aoti e tauturu ia Noa e hāmani i te pahī, ’o te taime mātāmua roa ïa ’oia i te anira’a. I te taime tāta’itahi i ani ai ’oia i muri iho ’e te ’orera’a e pāhono i te reira, ’ua fa’aiti mai i te ara-’ōhie-ra’a a te Vārua. Mai te reira atu taime, e riro mai tāna mau anira’a tāta’itahi ’ei mea ma’ama’a atu ā, e tae roa i te taime ’ua topa mai te ua. ’E ’ua tāere roa atu ra.

« I te mau taime ato’a o tō’u orara’a, ’ia mā’iti au e fa’ataime i te pe’e i te parau a’o fa’auru ’aore rā ’ua fa’aoti au ē e mea ta’a ’ē au, ’ua ha’api’i mai au ē, ’ua tu’u vau iā’u iho i roto i te ’ati. I te mau taime ato’a ’ua fa’aro’o vau i te parau a’o a te mau peropheta ’e ’ua ’ite i te ha’apāpūra’a o te reira nā roto i te pure ’e i muri iho ’ua pe’e au i te reira, ’ua ’ite mai au ē, tē haere ra vau i te vāhi e pāruruhia ai » (« Finding Safety in Counsel », Ensign, Mē 1997, 25).

Nō te aha te Atua i ’āfa’i mai ai i te Diluvi ?

Tē uiui nei te tahi mau ta’ata nō ni’a i te parauti’a o te Atua nō te ’āfa’ira’a mai i te diluvi nō te « ha’amou… i te ta’ata » (Genese 6:7). ’Ua fa’ata’a mai Elder Neal A. Maxwell ē, i te taime nō te Diluvi rahi, « ’ua tae roa te vi’ivi’ira’a i te fāito ha’amoura’a ti’amāra’a, ’o tā te mau vārua parauti’a e ’ore e nehenehe e tono mai i’ō nei » (We Will Prove Them Herewith [1982], 58).

Ha’amaita’i i tā tātou ha’api’ira’a

Vaiiho i te taime nō te feruri. E tītau te mau uira’a tano maita’i i te ferurira’a, te mā’imira’a ’e te fa’aurura’a. E hōro’a i te mau pīahi i te tahi ma’a minuti nō te feruri i te hō’ē uira’a hou ’a ani ai i te mau pāhonora’a. (Hi’o Ha’api’ira’a mai tā te Fa’aora, 31–34.)