Here i te tahi ’e te tahi, nā Emma Donaldson Taylor

24–30 nō Tēnuare

Mose 7

« Ma’iri ihora te Fatu i te i’oa o tōna ra feiā, ’o Ziona »

’A tuatāpapa ai ’oe i te Mose 7, ’a feruri i te ta’ata tā ’oe e ha’api’i ra ’e e nāhea ’oe e nehenehe ai e tauturu ia rātou ’ia māramarama e aha tā teie pene e ha’api’i nei nō ni’a ia Ziona ’e te tahi atu mau parau tumu o te ’evanelia.

Pāpa’i i te mau mana’o e tae mai

Tītau i te mana’o

I te tahi taime, e nava’i noa hō’ē uira’a ’ōhie ’e te tahi ma’a minuti nō te feruri nō te tauturu i te ta’ata ’ia fa’a’ite mai i te mea tā rātou i ’apo mai i te fare. Penei a’e e nehenehe e hōro’a i te tahi ma’a taime i te mau pīahi nō te hi’o fa’ahou i te Mose 7, nō te ’ite mai i te hō’ē ’īrava ’o te fa’atupu i tō rātou māuruuru nō te parau mau tei fa’aho’ihia mai i roto i te buka a Mose, ’e i muri iho e fa’a’ite atu i te reira.

Ha’api’i i te ha’api’ira’a tumu

Mose 7:16–21, 27, 53, 62–69

E nehenehe tātou e patu ia Ziona i tō tātou nei ’anotau.

• E aha te rāve’a maita’i a’e nō te fa’aō i te parau o Ziona i roto i te piha ha’api’ira’a ? Hō’ē mana’o, ’o tē niuniura’a i te mau pīahi i roto i te hepetoma nā mua i te ha’api’ira’a ’e e ani ia rātou ’ia ’āfa’i mai i te hō’ē tao’a nā te fare mai, ’o tā rātou e mana’o nei e fa’ahōho’a i te huru o te mau ta’ata nō Ziona, mai tei fa’ahitihia i roto i te Mose 7:18. ’A ’āparau ai ’outou i teie ’īrava, e nehenehe te mau pīahi e fa’ata’a mai i te aura’a o te tao’a tā rātou i ’āfa’i mai.

  

  Te feiā e ora i Ziona, « hō’ē ā tō rātou ’ā’au ’e hō’ē ā tō rātou mana’o » (Mose 7:18).

• E nehenehe te video « We Come Together and Unite as One [E ’āmui tātou ’e e tāhō’ē ’ei hō’ē] » (ChurchofJesusChrist.org) e tauturu ia ’oe e ha’amata i te hō’ē ’āparaura’a, e nāhea tātou e riro ai ’ei « hō’ē ā tō rātou ’ā’au ’e hō’ē ā tō rātou mana’o » (Mose 7:18) i roto i tā tātou mau pāroita ’e mau ’utuāfare. ’A feruri e ani i te mau pīahi ’ia ha’amana’o i te taime ’a putapū ai rātou i te tāhō’ēra’a i roto i tō rātou ’utuāfare ’aore rā, i te taime ’a tāvini ai rātou nā muri i te tahi mau ta’ata i roto i te ’Ēkālesia ’aore rā te huira’atira. E aha tā te mau ta’ata i rave nō te fa’atupu i te tāhō’ēra’a i roto i terā huru ’ohipa ? E aha tā tātou e ha’api’i mai nō ni’a ia Ziona ’e te tāhō’ēra’a nā roto mai i te Mose 7. ? (hi’o ta’a ’ē i te mau ’īrava 16–21, 27, 53, 62–69). Teie te tahi atu mau ’īrava ’o tē nehenehe e tauturu : Philipi 2:1–4 ; 4 Nephi 1:15–18 ; Te Parau Ha’api’ira’a ’e te mau Parau Fafau 97:21 ; 105:5.

Mose 7:28–44

Tē ta’i nei te Atua nō tāna mau tamari’i.

• E hi’o paha te tahi mau ta’ata i te Atua ’ei Atua e hi’o nā te ātea noa mai, ’ei Atua e’ita e nehenehe e ha’afātata atu ’e ’ei Atua tāu’a ’ore. Nāhea ’oe i te fa’a’ohipa i te ’ōrama a Enoha nō te tauturu i te piha ha’api’ira’a ’ia māramarama ē, tei roto te Atua i tō tātou orara’a ’e tē ha’apa’o nei ’oia ia tātou ? E nehenehe ’oe e ani i te mau pīahi ’ia tai’o i te Mose 7:28–44 ’e e tāpura mai i te tahi o te mau tumu ’ua ta’i te Atua. E aha tā teie mau ’īrava e ha’api’i nei ia ’outou nō ni’a i te mana’o o te Atua nō tāna mau tamari’i ? E nehenehe te fa’ahitira’a parau i roto i « Te tahi atu mau rāve’a tauturu » e tauturu i teie ’āparaura’a.

• Tē vauvau nei te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare i te mana’o e feruri e aha tā Mose 7:28–31, 35 e ha’api’i nei nō ni’a i te Atua. Te feiā tei rave i te reira i te ’utuāfare, ’ua ineine paha rātou nō te fa’a’ite mai i tō rātou mana’o i te piha ha’api’ira’a. ’Aore rā e nehenehe ’oe e ani i te mau pīahi ’ia feruri i teie mau ’īrava ’e ’ia ’āparau i te reira i roto i te piha ha’api’ira’a.

Mose 7:59–67

E ho’i fa’ahou mai te Fatu i te mau mahana hope’a nei.

• Nāhea ’oe i te tauturu i tā ’oe mau pīahi ’ia ’ite mai e aha tā Mose 7:59–67 e ha’api’i nei nō ni’a i te tae-piti-ra’a mai o te Fa’aora ? Penei a’e e nehenehe ’oe e tāpura e piti ’aore rā e toru parau mau ’aore rā mau ’ohipa tei tupu nō roto mai i teie mau ’īrava i ni’a i te tāpura ’ere’ere ’e e ani atu i te mau pīahi ’ia ’imi i te mau ’īrava ’e e tu’u atu i roto i te tāpura. Nō te aha e ha’amaita’ira’a te roa’ara’a te hō’ē parau pāpa’i nō te ’ōrama a Enoha—hō’ē o te mau tohura’a mātāmua roa nō te Tae-piti-ra’a mai ?

Te tahi atu mau rāve’a tauturu

Tē ta’i nei te Atua nō tāna mau tamari’i.

’Ua ha’api’i Elder Jeffrey R. Holland :

« I roto i te hō’ē ’ōrama rahi i te ta’ata nei, ’ua vēteahia mai te ra’i ia Enoha, ’e ’ua ’ite atu ’oia i te mau ha’amaita’ira’a ’e te mau tāmatara’a nō te orara’a tāhuti nei, ’e ’ua hi’o atu ’oia i te Metua ma te māere i te mea tē ’oto ra ’oia. ’E tē nā ’ō ra tāna parau nō ni’a i te Atua o te ao nei : ‘E aha ho’i e ti’a ai ia ’oe ’ia ’oto ?’ […]

« I te hi’ora’a ’oia i te mau mea e tupu nei i teie ’anotau, teie ïa tā te Atua pāhonora’a : ‘’A hi’o i tō mau taea’e ’o tā’u ïa i hāmani i tō’u nei rima… ’Ua hōro’a ato’a atu [vau] i te fa’auera’a ’ia aroha rātou rātou iho ’e ’ia mā’iti rātou iā’u tō rātou Metua : inaha rā ’aore tō rātou e aroha, ’e ’ua au ’ore rātou i tō rātou iho taea’e… Nō reira, e ’ere ānei ïa i te mea ti’a ’ia ’oto te mau ra’i i te ’itera’a ē, e māuiui rātou ?’[Mose 7:29–33, 37].

« ’Ua riro taua ’ohipa faufa’a rahi i tupu ’ei ha’api’ira’a ia tātou i te huru mau o te Atua, noa atu ā te tahi atu mau huru ha’api’ira’a a te ta’ata nei… Tē fa’a’ite nei teie parabole i tō te Atua hina’aro ’ia tauturu i tō tātou orara’a ! Tē ’oto nei ’oia nō tāna mau tamari’i ’o tei ’ore i hina’aro ’ia pe’e iāna ’e ’aore rā i te ‘evanelia [tā] te Atua’ i hōro’a mai ![Roma 1:1]. E mea ’ōhie roa ’ia here i te Atua o tei here mai ia tātou ! »(« Te hanahana rahi o te Atua », Liahona, Nov. 2003, 72).

Haʼamaitaʼiraʼa i tā tatou haʼapiʼiraʼa

ʼA faʼaitoito i te mau pīahi ’ia tuatāpapa i te mau pāpaʼiraʼa moʼa i te fare. Te hōʼē rāveʼa e nehenehe ai ʼoutou e faʼaitoito i te tuatāpaparaʼa i te pāpaʼiraʼa moʼa i te fare o te hōroʼaraʼa ïa i te taime i te mau pīahi ’ia faʼaʼite mai i te mau ʼite ʼe te mau manaʼo nō roto mai i tā rātou iho tuatāpaparaʼa ʼe te tuatāpaparaʼa ʼutuāfare. (Hi’o Ha’api’ira’a mai tā te Fa’aora, 29.)