3–9 nō Tēnuare

Genese 1–2 ; Mose 2–3 ; Aberahama 4–5

« Hāmani ihora te Atua i te ra’i ’e te fenua i te mātāmua ra »

Nō te fa’aineine i te ha’api’i i te ta’ata, e tai’o ’e e feruri nā mua i te Genese 1–2 ; te Mose 2–3 ; ’e te Aberahama 4–5, ’e ’a pāpa’i i te mau mana’o pae vārua e tae mai. E nehenehe te Mai, peʼe mai—nō te ta’ata hō’ē ’e te ’utuāfare, nā reira ato’a te mau mana’o i raro nei, e tauturu ia ’oe ’ia māramarama ’e ’ia ha’api’i i te ha’api’ira’a tumu o teie mau pene.

Pāpa’i i te mau mana’o e tae mai

Tītau i te mana’o

’Ua tāmau noa te Atua i te parau ē, te mea tāna i hāmani i roto i te Poietera’a, « e mea maita’i » ïa (hi’o Mose 2:4, 10, 12, 18, 21, 25, 31). E ani i te mau pīahi ’ia fa’a’ite mai i te mau mea maita’i tā rātou i ’ite i te tai’ora’a rātou i te mau pāpa’ira’a mo’a i te fare i teie hepetoma. E aha te maita’i o te mau mea tā rātou i ’ite mai ?

Ha’api’i i te ha’api’ira’a tumu

Genese 1 ; Mose 2 ; Aberahama 4

« Hāmani ihora te Atua i te ra’i ’e te fenua ».

• ’Ua ’ite paha te mau pīahi i te tahi mau tū’atira’a ’e te tahi mau ta’a-’ē-ra’a i roto i te fa’ati’ara’a o te Poietera’a i roto i te mau buka nō Genese, Mose ’e Aberahama. E fa’aitoito i te mau pīahi ’ia fa’a’ite mai e aha tā te ’īritira’a a Iosepha Semita i roto i te Mose 2 i tu’u mai i tō tātou māramaramara’a nō te fa’ati’ara’a o te Poietera’a i roto i te Genese 1. E aha te tahi atu mau mana’o tā tātou i fāri’i mai i roto i te Aberahama 4 ? Nō te fa’ati’a i te tahi atu ā mau ta’ata ’ia fa’a’ite mai i tō rātou mana’o, e nehenehe ’oe e fa’aitoito i te piha ha’api’ira’a ’ia rave ’āpipiti ’aore rā ’ei pupu na’ina’i i teie fa’aaura’a. (Te tahi o te mau ’īrava tē vai nei te ta’a-’ē-ra’a rahi, tei roto ïa i « Te tahi atu mau rāve’a tauturu ».) Nāhea tātou i te fāna’ora’a e rave rahi fa’ati’ara’a ? E aha tā teie mau fa’ati’ara’a e parau nei nō ni’a i te mea tā te Atua e hina’aro nei ’ia ’ite tātou nō ni’a i te Poietera’a ?

• I te hāmanira’a te Atua ia Adamu ’e ia Eva, ’ua hōro’a ’oia ia rāua i te mana i ni’a i te fenua ’e tāna mau poietera’a i reira (hi’o Genese 1:28 ; Mose 2:28 ; Aberahama 4:28). Nāhea Te Parau Ha’api’ira’a ’e te mau Parau Fafau 59:16–21 ’e te 104:13–18 i te tauturu ia tātou ’ia māramarama maita’i a’e i te aura’a nō te fa’a’ohipara’a i te mana parauti’a i ni’a i te fenua nei ?

• Ma’a mahana nā mua atu i te piha ha’api’ira’a, e nehenehe ’oe e ani i te mau pīahi ’ia ’āfa’i mai i te tahi mau hōho’a tā rātou i pata ’aore rā e vai ra i tō rātou fare, ’o tē fa’aha’amana’o ia rātou i te nehenehe o te mau poietera’a a te Atua. E aha tā te ha’api’ira’a mai nō ni’a i te ’ohipa poietera’a a te Fatu e fa’atupu mai te mana’o nō ni’a iāna, ia tātou iho ’e te ao nei ? E nehenehe ato’a te mau pīahi e fa’a’ite mai e aha te mau poro’i tā rātou e mana’o nei tē vai ra tā te Atua nō tātou i roto i teie mau fa’ati’ara’a o te Poietera’a, i roto i te Genese 1 ; Mose 2 ; ’e Aberahama 4. E nehenehe te hīmenera’a ’aore rā te fa’aro’ora’a i te hīmene nō ni’a i te Poietera’a, mai te hīmene ra « Nehenehe te ao nei » (Te mau Hīmene, n°35) e tauturu i te mau pīahi ’ia putapū i te māuruuru nō te mau poietera’a a te Atua.

  

  Poietera’a, nā Joan Hibbert Durtschi

Genese 1:26–28 ; Mose 2:26–28 ; Aberahama 4:26–28

’Ua hāmanihia tātou i te hōho’a ’o te Atua.

• Nō te aha e mea faufa’a nō tātou ’ia māramarama ē, ’ua hāmanihia tātou i te hōho’a (o te Atua ? Nāhea ’oe i te tauturu i te mau pīahi ’ia feruri i teie parau mau ? E nehenehe rātou e tai’o i te Genese 1:26–28 ; Mose 2:26–28 ; Aberahama 4:26–28 ; ’aore rā te paratarafa piti o « Te ’Utuāfare : E Poro’i i tō te Ao nei » (ChurchofJesusChrist.org). Nāhea teie parau mau i te ha’aputapū i te huru tātou e hi’o ai ia tātou iho, ia vetahi ’ē ’e i te Atua ? ’Ua ’itehia mai paha i te mau pīahi i te tahi atu mau mana’o i roto i te mau hīmene mai te « Tō’u Metua » ’aore rā « E tamari’i au nā te Atua » (Te mau hīmene, n°178, 185).

• I roto i te video « God’s Greatest Creation [Te poietera’a rahi roa a’e a te Atua] » (ChurchofJesusChrist.org), tē fa’a’ite pāpū nei te peresideni Russell M. Nelson nō te temeio o te tino ta’ata nei (hi’o ato’a « Māuruuru i te Atua », Liahona, Mē 2012, 77–80). ’A feruri e fa’a’ite i teie video hou ’a tai’o ai i te Genese 1:26–28 ; Mose 2:26–28 ; ’aore rā Aberahama 4:26–28 i te piha. Nāhea te ’itera’a pāpū o te peresideni Nelson i te fa’ahōhonu i tō tātou māuruuru nō te mau parau mau i roto i teie mau ’īrava ?

Genese 1:27–28 ; Mose 3:18, 21–25 ; Aberahama 5:14–19

’Ua ha’apa’ohia e te Atua te fa’aipoipora’a i rotopū i te tāne ’e te vahine.

• E rave rahi mana’o nō ni’a i te fa’aipoipora’a i roto i te ao nei ’o tei ta’a ’ē i te parau mau mure ’ore. Nō te tauturu i tā ’oe piha ha’api’ira’a ’ia ha’api’i mai nō ni’a i te hi’ora’a o te Atua i te fa’aipoipora’a, e nehenehe ’oe e ani ia rātou ’ia tai’o mai i te Genese 1:27–28 ; Mose 3:18, 21–25 ; ’aore rā Aberahama 5:14–19 ’e e pāpa’i i ni’a i te tāpura ’ere’ere i te mau parau mau tā rātou i ’ite mai. E nehenehe rātou e ’āmui atu i tā rātou tāpura i te mau parau mau tā rātou i ’ite mai i roto i « Te ’Utuāfare : E Poro’i i tō te Ao nei » (ChurchofJesusChrist.org). Nō te aha e mea faufa’a teie mau parau nō tātou ?

Te tahi atu mau rāve’a tauturu

Fa’aau i te mau ’ā’amu o te Poietera’a.

Genese	Mose	Aberahama
Genese Genese 1:1	Mose Mose 2:1	Aberahama Aberahama 4:1
Genese Genese 1:16	Mose Mose 2:16	Aberahama Aberahama 4:16
Genese Genese 1:26–27	Mose Mose 2:26–27.	Aberahama Aberahama 4:26–27
Genese Genese 1:30	Mose Mose 2:30	Aberahama Aberahama 4:30
Genese Genese 2:5	Mose Mose 3:5	Aberahama Aberahama 4:30
Genese Genese 2:5	Mose Mose 3:5	Aberahama Aberahama 5:5
Genese Genese 2:7	Mose Mose 3:7	Aberahama Aberahama 5:7
Genese Genese 2:9	Mose Mose 3:9	Aberahama Aberahama 5:9
Genese Genese 2:17–19	Mose Mose 3:17–19.	Aberahama Aberahama 5:13–14

Ha’amaita’ira’a i tā tātou ha’api’ira’a

Tauturu i te mau pīahi ’ia fa’aau i te mau pāpa’ira’a mo’a ia rātou iho. « E nehenehe teie ā mau parau mau o te ’evanelia tei fa’auru ’e tei pāturu ia Aberahama, Esetera, Lehi ’e Iosepha Semita, e tauturu i te feiā tā ’oe e ha’api’i ra ’ia fa’aruru i te mau tāmatara’a o tō tātou nei ’anotau » (Ha’api’ira’a mai tā te Fa’aora, 21). E fa’aitoito i te mau pīahi ’ia fa’a’ohipa i te mau parau tumu tā rātou i ’ite mai i roto i te mau pāpa’ira’a mo’a nō tō rātou iho huru orara’a.