tē haere ’āpiti ra Adamu ’e ’o Eva

Adamu ’e ’o Eva, nā Douglas M. Fryer

10–16 nō Tēnuare

Genese 3–4 ; Mose 4–5

Te hi’ara’a ’o Adamu ’e ’o Eva

’A fa’aineine ai ’oe nō te ha’api’i i te Genese 3–4 ’e te Mose 4–5, ’a feruri e aha te mau uira’a ’aore rā te mau ’ohipa ri’i e nehenehe e tauturu i te mau pīahi ’ia māramarama maita’i a’e i te hi’ara’a ’o Adamu ’e ’o Eva.

Pāpa’i i te mau mana’o e tae mai

ītona fa’a’itera’a

Tītau i te mana’o

E nehenehe te mau pīahi e hi’o poto mai i te Genese 3–4 ’aore rā te Mose 4–5, e mā’iti i te hō’ē ’īrava auhia e rātou ’e e fa’a’ite i te reira i te ta’ata i pīha’i iho iāna. ’Ei reira, e nehenehe te tahi mau ta’ata e fa’a’ite mai i te hō’ē mana’o i te piha ha’api’ira’a.

’ītona ha’api’ira’a

Ha’api’i i te ha’api’ira’a tumu

Mose 4:1–13 ; 5:1–12

E hina’aro tātou i te ti’amāra’a nō te mā’iti i nā pae e piti o te mau mea ato’a nō te tupu i te rahi.

• Nō te ti’amāra’a e mā’iti—te ti’ara’a tei hōro’ahia mai e te Atua nō te rave i te mau mā’itira’a—’o te hō’ē tuha’a tumu nō te orara’a tāhuti nei, ’o tā tātou e mana’o nei ē ’ua roa’a ia tātou. Nō te fa’ahōhonu i te fa’ahiahia o te mau pīahi nō teie hōro’a, e nehenehe rātou e tai’o ’e e tāu’aparau i te Mose 4:1–4. E aha tā teie mau ’īrava e ha’api’i nei nō ni’a i te faufa’a rahi o te ti’amāra’a ’ia mā’iti ? Nō te aha e nehenehe te fa’anahora’a a te Atua e mou ’āhani ’aita te ti’amāra’a ’ia mā’iti ? E nehenehe te fa’ahitira’a i roto i « Te tahi atu mau rāve’a tauturu » e hōro’a mai i te tahi mana’o.

• Penei a’e ’ua tuatāpapa te mau pīahi i te a’ora’a a te peresideni Dallin H. Oaks « Nā pae e piti o te mau mea ato’a ra » (Liahona, Mē 2016, 114–17) ’ei tuha’a nō tā rātou tuatāpapara’a ta’ata hō’ē ’aore rā tuatāpapara’a ’utuāfare i teie hepetoma. I roto i te hepetoma, e nehenehe ’oe e feruri e ani manihini i te tahi mau ta’ata ’ia haere mai ma te ineine nō te fa’a’ite i te hō’ē mea nō roto mai i tāna poro’i tei tauturu ia rātou ’ia māramarama i te hi’ara’a ’o Adamu ’e ’o Eva (hi’o ta’a ’ē i te mau tuha’a I ’e te II). Nō te aha te Metua i te Ao ra e fa’ati’a ai ’ia ’ite tātou i « nā pae e piti o te mau mea ato’a ra » (hi’o 2 Nephi 2:11–16). E nehenehe e ani i te mau pīahi ’ia tai’o i Te Parau Ha’api’ira’a ’e te mau Parau Fafau 29:39–40 ’e e ’āparau nō te aha e tītauhia te mau tāmatara’a a Sātane i roto i te fa’anahora’a a te Atua. Nāhea te Metua i te Ao ra ’e Iesu Mesia i te tauturu ia tātou i te taime e fa’aruru ai tātou i te tāmatara’a ?

  tē tāpe’a ra Eva i te hotu

  Fa’aru’era’a ia Edene, nā Annie Henrie Nader

Mose 4:4–12 ; 5:13–33

Tē ’imi nei Sātane « ’ia ha’avare ’e ’ia ha’amatapō » ia tātou.

• E nehenehe te Mose 4:4–12 ; 5:13–33 e tauturu i tā ’oe mau pīahi ’ia ’ite i te tahi mau rāve’a e tāmata ai Sātane ia tātou ’ia rave i te ’ino. E nehenehe ’oe e ani i te ’āfara’a o te piha ’ia tai’o i te Mose 4:4–12 ’e i te tahi ’āfara’a ’ia tai’o i te Mose 5:13, 18–33. ’A tai’o ai rātou, e nehenehe rātou e tāpura i te mau rāve’a e tāmata ai Sātane i te ’ume ia Adamu, ia Eva ’e tāna mau tamari’i ’ia hara. Nāhea ’oia i te rave i teie mau mea i teie mahana ? Nāhea te Metua i te Ao ra i te tauturu ia tātou ’ia pāto’i i te mau fa’ahemara’a a Sātane ?

Genese 3:1–7 ; Mose 4:22–31 ; 5:4–15

Tē pūpū nei te tāra’ehara a Iesu Mesia i te tīa’ira’a ’e te tāra’ehara nō te hi’ara’a.

• Rahi atu ā tō tātou māramarama i te mau fa’atupura’a o te hi’ara’a, rahi noa ato’a atu tātou i te māuruuru nō te tāra’ehara a Iesu Mesia. E nehenehe te mau pīahi e ’imi i te mau fa’atupura’a o te hi’ara’a i roto i te Genese 3:1–7 ; Mose 4:22–31 ’e e pāpa’i i tā rātou i ’ite mai i ni’a i te tāpura ’ere’ere. I muri iho, e ’imi mai rātou Mose 5:4–12, 14–15 nō te ha’api’i mai nō ni’a i te fa’anahora’a a te Atua nō te fa’aora ia tātou i te reira mau fa’atupura’a (hi’o ato’a 2 Nephi 2:19–25 ; Alama 12:22–34) ’e e pāpa’i i ni’a i te tāpura ’ere’ere te mea tā rātou e ’ite mai. E nehenehe ato’a rātou e fa’a’ite mai e aha tā rātou e fa’ahiahia nei nō ni’a i te mau ’itera’a pāpū ’o Adamu ’e ’o Eva nō Iesu Mesia, i roto i te mau ’īrava 10–12. E aha tō tātou mau putapūra’a nō ni’a i te fa’anahora’a a te Atua i muri mai i te tai’ora’a i teie mau ’īrava ?

• E nehenehe te ’ā’amu ’o Adamu ’e ’o Eva nō te tīa’ira’a ’e te fa’aorara’a e fa’aitoito i te mau pīahi, i te taime e mea fifi te orara’a. ’A feruri e ani ia rātou ’ia ’ite mai i te mau parau ’e te mau pereoda i roto i te Mose 5:7–12 ’o tē fa’a’ite nei i te tīa’ira’a ’o tā Adamu ’e Eva i putapū ’a ha’api’i mai ai rāua ē, e nehenehe te Fa’aora e fa’aora ia rāua. E aha te taime tātou i putapū ai i te tīa’ira’a mai tā Adamu ’e Eva i putapū ? ’A feruri e ani i te mau pīahi ’ia fa’a’ite mai i tā rātou mau hīmene au roa a’e nō ni’a i te tīa’ira’a e tae mai nā roto i te tāra’ehara a te Fa’aora. E nehenehe ’outou e hīmene ’āmui i te tahi o te reira.

ītona te tahi atu mau rāve’a tauturu

Te tahi atu mau rāve’a tauturu

E nehenehe tātou e mā’iti nō tātou iho.

’Ua ha’api’i Elder Dale G. Renlund :

« Te fā a tō tātou Metua i te Ao ra ’ei ti’ara’a metua, e ’ere i te ravera’a tāna mau tamari’i i te maita’i : ’o tē mā’itira’a ra rātou ’ia rave i te maita’i ’e ’ia riro mai iāna te huru i te hope’a. Mai te mea ’ua hina’aro noa ’oia ’ia ha’apa’o tātou, e fa’a’ohipa ïa ’oia i te mau utu’a maita’i ’e te mau utu’a ’ino nō te fa’ataui i tō tātou haere’a.

« ’Aita te Atua e ’ana’anatae rā i te fa’arirora’a i tāna mau tamari’i ’ei ‘’ūrī’ rata ’e te fa’aro’o, ’o tē ’ore e ’amu i tōna tia’a i te fa’aeara’a tiretiera. ’Aita, ’ua hina’aro te Atua i tāna mau tamari’i ’ia pa’ari i te pae vārua ’e ’ia ’āmui iāna i roto i te ’ohipa a te ’utuāfare » (« E mā’iti na ’outou i teienei mahana », Liahona, Nov. 2018, 104).

Ha’amaita’i i tā tātou ha’api’ira’a

Ha’amara’a i te ’āmuira’a mai o te mau pīahi. E rave rahi ’ohipa ri’i tē nehenehe e rave ’ei piha ha’api’ira’a, ’ei pupu na’ina’i ’aore rā ’ei ’āpiti. ’A fa’a’ohipa i te mau rāve’a rau nō te fa’ati’a i te mau ta’ata ’o tē ’ore nei paha e fāna’o ’ia ’āmui mai. (Hi’o Ha’api’ira’a mai tā te Fa’aora, 33–34.)