hōho’a nō te mau feti’a i roto i te ra’i nui ātea

27 nō Tītema–2 nō Tēnuare

Mose 1 ; Aberahama 3

« ’O teie ho’i ta’u ’ohipa ’e tō’u hanahana »

’Ia tai’o ’oe i te Mose 1 ’e te Aberahama 3, ’ia vai mahora noa te ferurira’a ’e te ’ā’au i te mau mana’o e tae mai nō ’ō mai i te Vārua. Nāna e fa’auru ia ’oe i te mau mana’o ’e te mau rāve’a ’o te tauturu ia ’oe ’ia fa’aineine nō te ha’api’i.

Pāpa’i i te mau mana’o e tae mai

ītona fa’a’itera’a

Tītau i te mana’o

Penei a’e, ’ua tupu te tahi ’ohipa fa’ahiahia i te mau melo i roto i tā ’oe piha ha’api’ira’a, ’a tai’o ai i te Mose 1 ’e te Aberahama 3 i te fare. Nāhea ’oe i te hōro’a i te mau pīahi te taime nō te fa’a’ite mai i te reira mau ’ohipa i tupu ? Penei a’e e mea ’ōhie ma te tahi uira’a mai teie te huru : E aha te mana’o tei tae mai ’a tai’o ai ’outou i te mau pāpa’ira’a mo’a i teie hepetoma ? E aha tā ’outou i māere ? E aha te mea i tāpe’a ia ’outou ’e e feruri ? E aha tei tauturu ia ’outou ’ia ’ite ’ua fātata atu ’outou i te Metua i te Ao ra ’e ia Iesu Mesia ?

’ītona ha’api’ira’a

Ha’api’i i te ha’api’ira’a tumu

Mose 1:1–10, 37–39 ; Aberahama 3:22–26

’Ei tamari’i nā te Atua, e hope’ara’a hanahana tō tātou.

• E nehenehe te mau parau mau tei heheuhia i roto i te mau ’ōrama o Mose ’e o Aberahama e fa’auru pūai i tā tātou mau mā’itira’a ’e tō tātou ’aravihi ’ia upo’oti’a i i ni’a i te mau tāmatara’a o te orara’a. Nāhea ’oe e nehenehe ai e tauturu i te mau melo o te piha ha’api’ira’a ’ia ’ite i teie mau parau mau i roto i te Mose 1 ’e te Aberaham 3 ? Te tahi mana’o, ’o te vāhira’a ïa i te piha ’ei piti pupu ’e e hōro’a i te pupu tāta’itahi i te hō’ē o te mau ’īrava i muri nei : Mose 1:1–10 ; Mose 1:37–39 ; Aberahama 3:22–26. E nehenehe te pupu tāta’itahi e hi’o i te pāhonora’a i te mau uira’a « ’O vai au ? » « Nō te aha vau i’ō nei ? » ’e « ’O vai tā te Atua e hina’aro ’ia riro vau ? » I muri iho i te tahi ma’a taime, e nehenehe nā pupu e fa’a’ite mai i tā rātou mau pāhonora’a. Nāhea teie mau pāhonora’a e nehenehe ai e fa’auru i tā tātou mau ’ohipa tāmahana ?

  Iesu Mesia i rotopū i te mau feti’a

  Te Mesia ’e te Poietera’a, nā Robert T. Barrett

Mose 1:12–23.

E ti’a ia tātou ’ia pāto’i i te ’umera’a a Sātane.

• I te fa’aūra’a Mose ia Sātane, mai tei ’itehia i roto i te Mose 1:12–23, e mau ha’api’ira’a tē nehenehe e tauturu i tā ’oe mau pīahi, ’a fa’aruru ai rātou i te ’umera’a ’ia hara ’aore rā te fa’ahemara’a a te ’enemi. E aha tā tātou e nehenehe e ’apo mai nā roto mai i te pāhonora’a a Mose ? E ti’a i te video ra « I Am a Son of God [E tamaiti au nā te Atua] » (ChurchofJesusChrist.org) e tauturu i te mau pīahi ’ia ’āparau i te hō’ē o te mau ravera’a a Sātane—te ’umera’a ia tātou ’ia fē’a’a i te mau ’itera’a pae vārua i tupu (hi’o ato’a « Te tahi atu mau rāve’a tauturu »). E mea maita’i mai te peu e fa’a’ite mai te mau pīahi i te mau mana’o ’e te fa’aitoitora’a nō te tauturu i te tahi ’e te tahi ’ia ’ite ’e ’ia pāto’i i te mau tauto’ora’a a Sātane.

• Hō’ē o te mau ha’api’ira’a nō roto mai i te ’itera’a i tupu nō Mose, ’oia ho’i, e ’ume Sātane ia tātou ’ia hara ma te mau fa’ahuru-’ē-ra’a i te parau mau ’e te mana o te Atua. Nō te tauturu i te mau pīahi ’ia hi’o mana’o i te reira, e nehenehe e ’āfa’i mai i te piha ha’api’ira’a i te tahi mau tao’a ha’avare, mai te hō’ē tumu rā’au ha’avare ’aore rā te hō’ē pēpe ha’avare. Nāhea tātou e ’ite ai, e mea ha’avare ? E aha te tahi mau fa’ahuru-’ē-ra’a tā Sātane e fa’a’ohipa nei nō te ’ume ia tātou ’ia hara ? Nāhea tātou ’ia ’ite mai i te reira ’e ’ia pāto’i i te reira ? (Nō te ha’api’i mai nāhea Mose i te ravera’a i te reira, hi’o Mose 1:13–18). Nāhea te Fatu i te tauturura’a ia tātou i roto i tā tātou mau tauto’ora’a (hi’o Mose 1:24–26).

Aberahama 3:22–28

’Ua riro teie orara’a ’ei taime nō tātou ’ia fa’a’ite ē, e rave tātou i te mea tā te Atua i fa’aue mai.

• Nāhea ’oe i te tauturu i te mau pīahi ’ia hi’o i tō rātou orara’a ’ei taime nō te fa’a’ite i tō rātou ha’apa’o maita’i i te mau fa’auera’a a te Atua ? E nehenehe ’oe e ha’amata nā roto i te uira’a ia rātou ’ia paraparau mai nō ni’a i te mau ’itera’a ’a tītauhia ai rātou ’ia fa’a’ite i tō rātou ’aravihi i roto i te tahi ’ohipa—’ei hi’ora’a, i te fare ha’api’ira’a, i te ’ohipa ’aore rā i roto i te hō’ē pupu tū’aro. E nehenehe rātou e paraparau nō ni’a i te mea tei tītauhia ia rātou ’ia rave nō te fa’a’ite i tō rātou ’aravihi. E aha te tū’atira’a o te reira ’itera’a ’e te mea e fa’a’itehia nei i roto i te Aberahama 3:24–26 ? E aha te ta’a-’ē-ra’a ? Nāhea tātou i te fa’aō mai i te Metua i te Ao ra ’e i te Fa’aora i roto i tā tātou mau tauto’ora’a e « fa’a’ite » i tō tātou ’aravihi ?(Aberahama 3:25). Nāhea te ’itera’a ē, tei ’ō nei tātou nō te fa’a’ite e mea ha’apa’o maita’i tātou, i te fa’atupu mai i ni’a i te huru tātou e pāhono ai i te mau tāmatara’a o te orara’a ?

• E aha atu ā tā tātou e ’apo mai nā roto mai i te Aberahama 3:22–28 nō ni’a i te orara’a hou te tāhuti nei, ’aore rā tō tātou « ’āi’a mātāmua » ? (’īrava 26). Nō te aha e mea faufa’a teie mau parau mau nō tātou ?

ītona te tahi atu mau rāve’a tauturu

Te tahi atu mau rāve’a tauturu

’Eiaha e fē’a’a i te mea tei heheuhia ia ’outou.

’Ua hōro’a Elder Jeffrey R. Holland i teie ha’api’ira’a nō ni’a i te ’itera’a i tupu o Mose i roto i te Mose 1 : « Te poro’i a Mose ia ’outou i teie mahana ’oia ho’i : ’Eiaha e ha’apae i te vai-ara-ra’a. ’Eiaha e mana’o ē, te heheura’a rahi, te tahi taime fa’ahiahia ’e te māramarama, te ha’amatara’a i te hō’ē ’ē’a fa’auru, ’o te hope’a ato’a ïa… I te taime ’ua tūramahia mai ’outou, ’a hi’o maita’i i te fa’ahemara’a ’ia ’ōtohe mai ’outou i taua mea maita’i ra. Mai te peu e mea ti’a te reira i te taime ’a pure ai ’outou, ’e ’a ti’aturi ai ’outou i te reira ’e ’a ora ai ’outou i te reira, e mea ti’a ato’a ïa i teienei. ’Eiaha e fa’aru’e ’ia rahi noa atu te ’ume’umera’a. Pāpū roa ē, ’eiaha e tu’u i mua i terā ta’ata tei hina’aro roa e vāvahi i tō ’outou ’oa’oa. ’A fa’aruru i tō ’outou mau fē’a’ara’a. ’A ha’avī i tō ’outou mau mata’u. ‘Nō reira, ’eiaha e fa’aru’e atu i tō ’outou ti’aturira’a’ [Hebera 10:35]. ’A tāpe’a noa i te ’ē’a ’e ’a hi’o i te nehenehe o te orara’a ’o tē hōhorahia atu i mua ia ’outou » (« Cast Not Away Therefore Your Confidence », Ensign, Māti 2000, 7, 9).

Ha’amaita’i i tā tātou ha’api’ira’a

Tauturu i te pīahi ’ia ’ite mai i te mau parau mau i roto i te mau pāpa’ira’a mo’a. Hou ’a ani ai i te tahi pīahi e tai’o i te tahi ’īrava pāpa’ira’a mo’a, ’a hōro’a ia rātou i te tahi mea ta’a ’ē nō te hi’o ’aore rā nō te feruri. ’Ei hi’ora’a, e nehenehe rātou e hi’o mai i te tahi ha’api’ira’a nō ni’a i te Fa’aora ’aore rā te tahi mea tā rātou e hina’aro e parau i te hō’ē melo o te ’utuāfare. (Hi’o Ha’api’ira’a mai tā te Fa’aora, 21.)