Tamnein Iotebwa mai Aikubita n te karabuuti, iroun Jeff Ward

Maati 7–13

Karikani Bwai 37–41

“E Memena Iehova iroun Iotebwa”

E aki kantaningaaki bwa kona reirei ni kabane waaki n te karinan aei. Ngkai ko katauraoi n reirei, tataro bwa te Tamnei e na buokiko n ataia bwa te waaki raa (ngkana iai) n te karinan aei ae katoka kainnanoia kaain am kiraati.

Korei Am Namakin

Kaunga te Tibwatibwa

Ni kaungakiia kaain te kirati bwa a na tibwai bwaai ake a tia n reiakin ibon irouia n aia kamatebwai ao n te utu, ko konani kaoia bwa a na kakaea te kibu man Karikani Bwai 37–41 are e kaota te reirei ke te tua are a namakinna bwa e kakaawaki.

Reirei te Reirei

Karikani Bwai 37:1–28; 39; 40:1–19; 41:9–45

“E Memena Iehova iroun Iotebwa” inanon ana kangaanga.

• N aron Iotebwa, tao a bae n tia kaain am kiraati n rinanon kangaangan te kataaki. Ni buokiia kaain te kiraati ni karekei kaunganano man ana banna ni katoto Iotebwa, ko kona ni bwenauaia inanon teniua te kurubu ao n tuangiia kurubu nako bwa a na rinanon kibu n koroboki aika a tabu aikai: Karikani Bwai 39; 40:1–19; ke 41:9–45. Ni katoa kurubu nako a kona ngkanne n tibwai aro ngke e memena te Uea iroun Iotebwa inanon ana kangaanga. N riaina, kaain te kiraati a kona n tibwai taneiai ngke e memena te Uea irouia inanon aia tai ni kataaki. Tina kanga n reiakinna n noora raonakira iroun te Uea inanon maiura?

• Te reirei n te kantaninga aei e kona n ibuobuoki n arora ni kona n tokanikai iaon kangaanga: katoka te bwai ae beebete, n aron te booro te buraetitiki ae uarereke, i kabin te kaonteina ae kanoaki n te raiti ae mwau ke te biin ae koronuuka. Kaoa temanna bwa e na ioioa te kaonteina ni karaurau ni karokoa e otirake te booro n toka i eta. E kanga Iotebwa n riki n ai aron te booro? Kain te kiraati a kona n tibwa te katoto ni buokakin Iotebwa n toka iaon kakaewenako man Karikani Bwai 37:5–11; 39; 40:1–19; 41:9–45. A kona naba n tibwai taai are e ibuobuoki iai te Uea nakoia n aekakin aro akanne.

• Ko kona n tuangiia kaain te kiraati bwa a na anene ke ni wareka taekan te kuna iaon karaoakin rinerine aika raraoi, n aron “Karaoa Ae Raoiroi” (Anene n Taromauri, nambwa. 237). Ngkanne kaain te kiraati a kona ni kakaai iango ke kibu man Karikani Bwai 37:1–28; 39; 40:1–19; 41:9–45 are e kabwarabwa rongorongon te kuna anne. E kanga ni kakabwaiaki Iotebwa, ibuakon ana kangaanga, ngke e karaoa ae eti? Nninga ae e kakabwaiaira iai te Uea n te kangaanga ibukin karaoan te bwai ae eti?

Karikani Bwai 37:5–11; 40; 41:1–38

Ngkana ti kakaonimaki, te Uea e na kairiira ao e na kaungai nanora.

• E ngae ngke tiaki ni kabane ae a na karekei kaotioti rinanon mii, iai bwaai aika ti kona n reiakin ibukin te kaotioti man te bwai are e rinanona Iotebwa, ana toro Bwarao, ao Bwarao. Ko kona ni kaoia kaain te kiraati bwa a na rinanon Karikani Bwai 37:5–11; 40:5–8; 41:14–25, 37–38 ao n tibwai bwaai ake a reiakin n taekan te kaotioti. Ko kona naba ni kaoia bwa a na tibwai bwaai ake a tia ni buokiia ni katauraoi bwa a na karekei, ota iai, ao ni karaoa nanon te kaotioti.

  

  Joseph Interpreting the Butler and Baker’s Dreams (Iotebwa ngke e raira nanon miin te Tia Taraa Niman te Uea ae Barao ao te Tia Umuum), iroun François Gérard

Karikani Bwai 39:1–20

N ana ibuobuoki te Uea, ti kona ni birinako man te kariiri.

• Kona bae n tuangiia kaain te kiraati bwa a na tibwa te bwai are a reiakinna ibukin totokoan te kariiri ngkai a wareka Karikani Bwai 39 n te wiiki aei. Tera ae e karaoia Iotebwa bwa e na tokanikai iaon te kariiri? (taraa kibu 7–12). Te witeo “Leave the Party” ao “Dare to Stand Alone” (ChurchofJesusChrist.org) e katauraoi aia katoto aomata ake a totokoa te kariiri. Iangoia n tuangiia kaain te kiraati bwa a na korei rinanin bwaai ake ti kona ni karaoi ni karekea mwaakan te Atua ngkana ti kaitarai kariiri. (Kain te kiraati a kona ni karekei iango inanon Mataio 4:1–11 ke n koroboki aika a tabu aika a karinanaki iaan “Tempt, Temptation” in Guide to the Scriptures [scriptures.ChurchofJesusChrist.org].)

• Kona kanga ni kabongana ana banna ni katooto Iotebwa ni buokiia kaain te kiraati n totokoa te kariiri n te wene ni bure? N raonaki ma rinanoan Karikani Bwai 39:1–20, a kona kaain te kiraati n rinanoa (ChurchofJesusChrist.org) ke rinanoa “Itiaki man te Wenenibure” (inanon Ibukin Kakorakoraia Kairake [2011], 35–37). A kona n tibwa te bwai are a reiakinna iaon totokoan iango, taetae, ao mwakuri ake a kona ni kairi nakon te wene ni bure. Rinanoa “Rairannano” (inanon Ibukin Kakorakoraia te Roronrikirake, 28–29) e kona ni buokiia kaain te kiraati n ota n te tibwanga are e anga Iesu Kristo nakoira n te rairannano.

Karikani Bwai 41:15–57

Ti riai n tauraoi imwain kangaanga aika a kona n riki.

• Ko kona n tuanga temanna kaain te kiraati bwa e na kabwarabwara miin Bwarao (taraa Karikani Bwai 41:15–24) ao temanna bwa e na kabwarabwara ana kabwarabwara Iotebwa (taraa kibu 25–32). Tera ae e tua Iotebwa bwa e na karaoia? (tarai kiibu 33–36, 47–49). Tera reirei n te rongorongo aei ae a karekea n ara bong? (taraa ana reirei Beretitenti Gordon B. Hinckley inanon “Bwaai ni Ibuobuoki riki Tabeua”).

Bwaai n Ibuobuoki Riki Tabeua

Katauraoi imwain taai ni kangaanga.

Beretitenti Gordon B. Hinckley e taku: “I kaungai ngkami bwa kam na taratara raoi n ami kabanemwane, boai ngkami n ami bobwa n totokoi taarau nakon are kam kona. Kabwarai taarua n te tai ae waekoa are ko kona. … Karekea te kawakinmwane, e ngae ngke te mwaiti ae uarereke” (“To the Boys and to the Men,” Ensign, Nov. 1998, 54).

Kanakoraoan Ara Anga reirei

“Te kakauongo bon te mwakuri n tangira. “Butia Tamam are i Karawa bwa e na buokiko ni kaotako n te bwai ae a taekinna kaain am kiraati. Ngkana ko kakauongo raoi nakon aia rongorongo aika a taekinaki ao aika aki taekinaki, ko na kona n atai raoi riki kainnanoia” (Reirei n ana Kawai te Tia Kamaiu, 34).