Iosefa o Aikupito i le falepuipui

Ata o Iosefa o Aikupito i le falepuipui, tusia e Jeff Ward

7–13 Mati

Kenese 37–41

“Sa i ai Ieova ia Iosefa”

E le o faamoemoe e te aoaoina atu gaoioiga uma i lenei otootoga. A o e sauniuni e aoao atu, tatalo ina ia fesoasoani le Agaga ia te oe e iloa po o a gaoioiga (pe afai o i ai) i lenei otootoga e sili ona aoga i manaoga o lau vasega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai mea na latou aoaoina ia latou suesuega patino ma faaleaiga, e mafai ona e valaaulia i latou e sue se fuaitau i le Kenese 37–41 e faailoa mai ai se lesona po o se mataupu faavae latou te lagona e taua.

aikona o le aoao atu

Aoao Atu le Aoaoga Faavae

Kenese 37:1–28; 39; 40:1–19; 41:9–45

“Sa i ai Ieova ia Iosefa” i ona puapuaga.

• E pei o Iosefa, o tagata o lau vasega atonu na oo i ni tofotofoga faigata. Ina ia fesoasoani i le vasega e sue ni musumusuga i le faataitaiga a Iosefa, e mafai ona e vaevae i latou i ni vaega se tolu ma fai i vaega taitasi e iloilo se tasi o nei fuaitau o mau: Kenese 39; 40:1–19; po o le 41:9–45. Ona mafai lea e vaega taitasi ona faasoa mai auala na faatasi ai le Alii ma Iosefa i ona luitau. Pe a talafeagai ai, e mafai e tagata o le vasega ona faasoa mai ni aafiaga na faatasi ai le Alii ma i latou i ni tofotofoga faigata. E mafai faapefea ona tatou aoao ia sili atu le vaai i le faatasi mai o le Alii i o tatou olaga?

• O le lesona faatino e mafai ona fesoasoani e faaalia ai le ala e mafai ona tatou manumalo ai i faigata: tuu se mea māmā, e pei o se tamai polo momi, i le pito i lalo o se pesini e afa i le vai faatasi ma araisa mago po o ni fatu pi. Valaaulia se tasi e lūlū lemu le pesini seia alu ae le polo i le pito i luga. Na faapefea ona pei Iosefa o le polo? E mafai e tagata o le vasega ona faasoa mai ni faataitaiga o le Alii o loo fesoasoani ia Iosefa ia manumalo i faigata mai le Kenese 37:5–11; 39; 40:1–19; 41:9–45. E mafai foi ona latou faasoa mai ni taimi na fesoasoani ai le Alii ia i latou i ni auala faapea.

• E mafai ona e fai i tagata o le vasega e usu pe faitau upu o se viiga e uiga i le faia o filifiliga amiotonu, e pei o le “Fai Mea Tonu” (Viiga, nu. 148). Ona mafai lea e tagata o le vasega ona sue ni malamalamaaga po o fuaitau i le Kenese 37:1–28; 39; 40:1–19; 41:9–45 o loo faapupula mai ai savali o le viiga. Na faapefea ona faamanuiaina Iosefa, e ui lava i ona faigata, ina ua ia faia le mea sa’o? O anafea na faamanuiaina ai i tatou e le Alii i taimi faigata mo le faia o le mea sa’o?

Kenese 37:5–11; 40; 41:1–38

Afai tatou te faamaoni, o le a taialaina ma musuia i tatou e le Alii.

• E ui e le maua uma e tagata uma ni faaaliga patino e ala i miti, e i ai mea e mafai ona tatou aoao e uiga i faaaliga mai aafiaga o Iosefa, auauna a Farao, ma Farao. E mafai ona e valaaulia tagata o le vasega e iloilo le Kenese 37:5–11; 40:5–8; 41:14–25, 37–38 ma faasoa mai soo se mea latou te aoaoina e uiga i faaaliga. E mafai foi ona e valaaulia i latou e faasoa mai mea na fesoasoani ia i latou e saunia ai e taliaina, malamalama, ma faatino i luga o faaaliga.

  Iosefa i le falepuipui o loo faamatalaina miti

  Iosefa o loo Faamatalaina Miti a le Tautu Uaina ma le Fai Meaai, saunia e François Gérard

Kenese 39:1–20

Faatasi ai ma le fesoasoani a le Alii, e mafai ona tatou sosola ese mai faaosoosoga.

• E mafai ona e fai i tagata o le vasega e faasoa mai mea na latou aoaoina e uiga i le teena o faaosoosoga a o latou faitau i le Kenese 39 i lenei vaiaso. O le a le mea na fai e Iosefa na manumalo ai i le faaosoosoga? (tagai fuaiupu 7–12). Ua saunia e vitio “Leave the Party” ma le “Dare to Stand Alone” (ChurchofJesusChrist.org) ni faataitaiga o tagata na teena faaosoosoga. Mafaufau e fai i tagata o le vasega e fai se lisi o mea e mafai ona tatou faia e maua ai le mana o le Atua pe a tatou feagai ma faaosoosoga. (E mafai e tagata o le vasega ona maua manatu i le Mataio 4:1–11 po o mau i le “Faaosooso, Faaosoosoga” i le Taiala i Tusitusiga Paia [scriptures.ChurchofJesusChrist.org].)

• E mafai faapefea ona e faaaoga le faataitaiga a Iosefa e fesoasoani ai i tagata o le vasega e tetee i le faaosoosoga e fai le agasala tau feusuaiga? E faaopoopo atu i le iloiloina o le Kenese 39:1–20, e mafai e tagata o le vasega ona matamata le vitio “Chastity: What Are the Limits?” (ChurchofJesusChrist.org) pe iloilo le “Mamā A’ia’i i Feusuaiga” (i le Mo Le Malosi o le Autalavou [2011], 35–37). E mafai ona latou faasoa mai mea na latou aoaoina e uiga i le teena o mafaufauga, upu, ma faatinoga e taitai atu ai i le agasala tau feusuaiga. O le iloiloina o le “Salamo” (i le Mo Le Malosi o le Autalavou,, 28–29) e mafai ona fesoasoani i tagata o le vasega e malamalama ai i le avanoa ua ofoina mai e Iesu Keriso ia i tatou ia salamo.

Kenese 41:15–57

E tatau ona tatou saunia mo faigata e ono oo mai.

• E mafai ona e fai atu i se tasi o tagata o le vasega e faamatala mai miti a Farao (tagai Kenese 41:15–24) ma le isi e faasoa mai le faamatalaina e Iosefa (tagai fuaiupu 25–32). O le a le mea na fautua mai Iosefa e fai? (tagai fuaiupu 33–36, 47–49). O a lesona o loo i lenei tala mo tatou aso? (tagai i le fautuaga a Peresitene Gordon B. Hinckley i le “Punaoa Faaopoopo”).

aikona o punaoa faaopoopo

Punaoa Faaopoopo

Saunia mo taimi faigata.

Na saunoa mai Peresitene Gordon B. Hinckley: “Ou te uunaia outou ina ia faautauta i a outou tupe faaalu; ia pulea lelei outou lava i a outou faatauga ina ia aloese ai mai le aitalafu i le tele e mafai ai. Ia totogia aitalafu i le vave tou te mafai ai. … Ia i ai se tupe teu, e tusa lava pe itiiti” (“Mo Tama Talavou ma Tamā,” Liahona, Ian. 1999, 65).

Faaleleia o Lo Tatou Aoao Atu

O le faalogo o se faatinoga lea o le alofa. “Ole atu i le Tama Faalelagi e fesoasoani ia te oe e te malamalama ai i mea o loo fai mai ai tagata o lau vasega. A o e gauai atu ma le faaeteete i a latou savali faaleo pe le faaleoa, o le a e iloa ma malamalama atili i o latou manaoga” (Aoao Atu i le Ala a le Faaola,34).