Mose ma le Laau Mumu, saunia e Harry Anderson

21–27 Mati

Esoto 1–6

“Ua Ou Manatua La’u Feagaiga”

A o e faitauina le Esoto 1–6, mafaufau i tagata e te faiaoga ai. O a upumoni o i nei mataupu e sili le taua ia i latou? O le a faapefea ona e fesoasoani ia i latou ia iloa nei upumoni?

Tusi Faamaumau Ou Lagona Uunai

Valaaulia le Fefaasoaai

O se tasi auala e uunaia ai tagata o le vasega e faasoa mai mea ua latou aoaoina o le tusi o se fesili i le laupapa: Ao e faitau i le Esoto 1–6, o le a se mea na e matauina e te lei matauina muamua? Valaaulia tagata o le vasega e faasoa mai a latou tali.

Aoao Atu le Aoaoga Faavae

Esoto 1–2

O Iesu Keriso o lo tatou Laveai.

• E ui lava o le Faaola e le o ta’ua le suafa i le Esoto 1–2, o lenei tala e mafai ona fesoasoani i tagata o le vasega e fausia le faatuatua i Lana misiona ia laveai i tatou mai le nofopologa. E mafai e tagata o le vasega ona maua upu po o fuaitau i le Esoto 1–2 e faamatala ai faigata na feagai ma tagata o Isaraelu. E faapefea ona tutusa nei faamatalaga i le nofopologa faaleagaga po o isi faigata tatou te feagai? Na faapefea ona sailia e le fanauga a Isaraelu le laveai, ma na faapefea ona tali mai le Atua ia i latou? (tagai foi Esoto 2:23–25; 3:7–8). E faapefea ona tatou faaaoga le mana o le Atua pe a tatou manaomia le laveaiga? O faapefea ona tali mai le Atua ia tatou olega mo se fesoasoani? E mafai e tagata o le vasega ona vaai mo manatu faaopoopo i le savali a Peresitene Russel M. Nelson “Mauaina o le Mana o Iesu Keriso i o Tatou Olaga” (Liahona, Me 2017, 39–42).

  

  Mose i totonu o le Ato Kome, © Providence Collection/licensed from goodsalt.com

Esoto 3–4

A o tatou faia le galuega a le Alii, e mafai ona tatou maua le mana o le Alii.

• O leotootoga o lenei vaiaso i le Sau, Mulimuli mai ia te Au—Mo Tagata Taitoatasi ma Aiga ua fautuaina le suesue i le Esoto 3–4 e sue ai le ala na tali atu ai le Alii i popolega o Mose e uiga i le galuega o le laveaiina o Isaraelu mai le nofopologa. Afai na faia e tagata o lau vasega lenei gaoioiga i le fale, valaaulia i latou e faasoa mai mea na latou aoaoina. Pe e mafai foi ona outou faia o se vasega lenei gaoioiga. E faapitoa lava, e mafai e tagata o le vasega ona suesue le Esoto 3:11–18; 4:1–17, ma vaavaai mo popolega o Mose ma tali a le Alii i mea taitasi. E mafai faapefea e tali a le Alii ona fesoasoani ia i tatou pe a i ai ni o tatou masalosaloga e uiga i o tatou gafatia e faia Lana galuega?

Esoto 3:5

E tatau ona tatou faaalia le faaaloalo mo nofoaga ma mea paia.

• E mafai faapefea ona e faaaogaina le faataitaiga a Mose e musuia ai se talanoaga e uiga i le ala e tatau ona tatou taulima ai mea paia? Mo se faataitaiga, a uma ona faitau faatasi le Esoto 3:5 e mafai ona e faaali atu ni mea paia po o ni ata o mea paia (e pei o tusitusiga paia po o malumalu) ma isi mea masani po o ata o mea masani (e pei o tusi aoga po o fale masani). E mafai e tagata o le vasega ona talanoa e uiga i isi mea latou te manatu e paia ma faasoa mai le ala latou te faaalia ai le faaaloalo mo na mea (tagai foi Levitiko 19:30; Mataupu Faavae ma Feagaiga 6:10–12). Aisea e finagalo ai le Faaola ia tatou taulimaina ma le faaaloalo ia mea paia?

Esoto 5:4–9, 20–23; 6:1–13

O le a faataunuuina faamoemoega o le Alii i Lana lava taimi.

• E mafai ona lagona le lotovaivai pe a le faataunuuina a tatou taumafaiga faamaoni e faia mea lelei—atonu e le tali mai se uo ia tatou taumafaiga faaletala’i po o a tatou tatalo mo se tamaitiiti faigata ua foliga mai e le o taliina. Ina ia aoao e uiga i se aafiaga faapea na oo ia Mose, e mafai e tagata o le vasega ona faitau le Esoto 5:4–9, 20–23. Na faapefea ona fesoasoani le Alii ia Mose e faatoilalo ona lagona o le lotovaivai? (tagai Esoto 6: 1–13). E mafai e tagata o le vasega ona faasoa mai aafiaga ina ua latou le vaai vave i ni taunuuga mai a latou taumafaiga e auauna atu i le Alii. O le a se mea o aoao mai ai tatou i le aafiaga o Mose i nei mataupu e uiga i le ala tatou te tali atu ai i tulaga faapea? (Tagai foi “Punaoa Faaopoopo.”)

Punaoa Faaopoopo

Tatou te auauna atu i isi mo le Alii.

Na tau mai e Peresitene Joy D. Jones le ala na la auauna atu ai ma le faamaoni ma lana tane i se tofiga tala’i ae lei vaai i se faamanuiaina mai a la’ua taumafaiga. Na tatalo le ulugalii ma manatunatu mo le taitaiga. I le toe faamatalaina o le tali ia la tatalo, na saunoa ai Peresitene Jones:

“Sa ma iloaina sa ma taumafai ma le faamaoni e auauna atu i lenei aiga ma ia auauna atu i la ma epikopo, ae sa tatau ona ma fesili ifo ia i maua lava pe na ma auauna moni atu ma le alofa i le Alii. Na faamanino mai e le Tupu o Peniamina lenei eseesega ina ua ia faapea mai, “Faauta ou te fai atu ia te outou ona ua ou fai atu ia te outou sa ou faaaoga oʼu aso e auauna atu ai ia te outou, ou te lē fia mitamitavale ona sa na o lo’u auauna atu lava lea i le Atua’ [Mosaea 2:16; faaopoopo le faamamafa].

“O lea la, o ai sa auauna moni i ai le Tupu o Peniamina? O le Tama Faalelagi ma le Faaola. I le iloaina o le o ai ma le aisea i le auauna atu i isi e fesoasoani ia i tatou ia malamalama ai i le faaalia aupito sili ona maualuga o le alofa o le tuuto atu lea i le Atua” (“Mo Ia,” Liahona, Nov. 2018, 50).

Faaleleia o Lo Tatou Aoao Atu

Faasoa ni aafiaga faaleagaga. O se tasi auala e valaaulia ai le uunaiga a le Agaga i totonu o lau vasega o le uunaia lea o tagata o le vasega e faasoa mai mea ua aoaoina ai i latou e le Agaga Paia a o latou suesueina mau i lenei vaiaso.