Mose, Arona, ma Farao

Ata o Mose ma Arona i le maota o Farao, tusia e Robert T. Barret

28 Mati–3 Aperila

Esoto 7–13

“Manatua Lenei Aso, na Outou O Ese ai Mai Aikupito”

O lou gafatia ona taialaina e le Agaga i lou aoao atu, o le a faalauteleina atili ao i ai ou lava aafiaga faaleagaga i le suesueina o le Esoto 7–13.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Mafaufau i se fesili pe lua o le a uunaia ai tagata o le vasega e faasoa o latou malamalamaaga ma aafiaga na latou oo i ai a o latou suesueina le Esoto 7–13 faaletagata lava ia ma faatasi ma o latou aiga. Mo se faataitaiga, e mafai ona e fesili, “O a mea na e faitauina i lenei vaiaso na faamalosia ai lou faatuatua ia Iesu Keriso?” po o le “O a mea na e faitauina sa avea ma se faamanuiaga i lou aiga?”

aikona o le aoao atu

Aoao Atu le Aoaoga Faavae

Esoto 7–12

E mafai ona tatou filifili e faamalūlū o tatou loto.

• Ina ia fesoasoani i tagata o le vasega e mafaufau i lo latou naunau e gauai atu o latou loto i le Atua, e mafai ona e fai ia i latou e faitau taitoatasi se tasi o nei fuaitau o mau: Esoto 7:14–25; 8:5–15; 8:16–19; 8:20–32; 9:1–7; 9:8–12; 9:22–26; 10:12–15; 10:21–29; 12:29–33. Ona mafai lea ona latou tusia i luga o le laupapa upu po o fuaitau e faamatala ai le ala na tali atu ai Farao i mala e sefulu na auina mai e le Atua i luga o Aikupito. (Atonu e te manao e tusia faapea o iloiloga o le Faaliliuga a Iosefa Samita ua faaalia ai na faama’a’a e Farao lona lava loto.) Mata aisea na tali atu ai Farao e pei ona ia faia? Aisea e faigata ai i nisi taimi ona gauai atu o tatou loto ma manatu i le Atua? E faapefea ona fesoasoani mai le Tama Faalelagi ma Iesu Keriso ia i tatou e faatoilalo nei faigata?

• E ala i le aumaia i le vasega o se mea malo ma se mea vaivai, e mafai ona e fesoasoani i tagata o le vasega ia malamalama i le uiga o le i ai o se loto ma’a’a po o se loto agavaivai. E mafai ona e faasoloa faataamilo na mea e lua i le vasega, ao faitau e se tasi faamatalaga o le loto o Farao i le Esoto 7–10 (e pei Esoto 9:22–35). Aisea e fetaui ai le “ma’a’a” e faamatala ai le loto o Farao? O a mea o aoao mai e nei fuaiupu i le uiga o le i ai o se loto agavaivai? (Afai e fesoasoani, e mafai e tagata o le vasega ona vaavaai mo manatu i se tasi pe sili atu o nei mau 1 Nifae 2:16; Mosaea 3:19; Alema 24:7–8; 62:41; Eteru 12:27.) E faapefea ona fesoasoani le Faaola ia i tatou e faamalūlū o tatou loto? O le vitio “A Change of Heart” (ChurchofJesusChrist.org) e mafai ona faaopoopo i lo latou malamalama.

• Ina ia fesoasoani i tagata o le vasega e mafaufau pe aisea na auina mai ai e le Alii mala i Aikupito, e mafai ona e valaaulia tagata taitoatasi o le vasega e filifili se tasi o mau fesootai mai le lisi lea ma sue ai ni mafuaaga talafeagai: Esoto 3:20; 7:5, 17; 9:14–16; 10:1–2. E mafai foi ona e valaaulia tagata o le vasega e faasoa mai mea na latou aoaoina faapea “e leai lava se tasi e tusa ma [le Tama Faalelagi ma Iesu Keriso] i le lalolagi uma” (Esoto 9:14).

Esoto 12

Ua aoao mai e le Paseka ma le faamanatuga e uiga i le laveaiga e ala mai ia Iesu Keriso.

• O le faamanatuina o le Tausamiga o le Paseka na fesoasoani i le fanauga a Isaraelu e manatua ai na laveaiina i latou e le Alii mai le nofopologa. Ina ia fesoasoani i tagata o le vasega ia malamalama i le faatusa o le Paseka, e mafai ona e tusia ni koluma se lua i le laupapa e taua o le Faatusa ma le Uiga Talafeagai, faatasi ma se ata o Iesu Keriso i luga a’e o koluma. E mafai e tagata o le vasega ona suesue le Esoto 12:1–13 ma tusi i le laupapa soo se mea mai nei fuaiupu e mafai ona faatusa i lo tatou laveaiga e ala ia Iesu Keriso. Ona mafai lea ona latou talanoaina mea ua aoaoina mai i tatou e nei faatusa e uiga i le Togiola a le Faaola (tagai i le ata i le “Punaoa Faaopoopo” mo ni nai manatu). O le vitio “The Passover” (ChurchofJesusChrist.org) e mafai ona fesoasoani ia i latou e vaai ai faalemafaufau i mea latou te faitauina i le Esoto 12.

  people taking the sacrament

  E pei o le tausamiga o le Paseka, e fesoasoani le faamanatuga ia i tatou e manatua ai lo tatou Laveai, o Iesu Keriso.

• Mo nisi tagata, o le faamanatuga e le masani ona faaleagaga e pei ona tatau ai. Mafaufau pe faapefea e se talanoaga o le Esoto 12 ona fesoasoani i tagata uma o le vasega ia maua ai le faauigaga e sili atu ona loloto i le faamanatuga. Mo se faataitaiga, a uma ona iloilo e tagata o le vasega le Esoto 12, e mafai ona e valaaulia i latou e faasoa mai po o a tala e fai atu e Isaraelu mai i lena taimi pe a fesili atu se atalii po o se afafine ia i latou po o le a le uiga o le Paseka ia i latou. Ona mafai lea ona talanoaina e tagata o le vasega mea e mafai ona latou fai atu ai pe a fesili mai se tasi po o le a le uiga o le faamanatuga ia i latou, e aofia ai soo se manatu latou te maua mai le Paseka. E mafai ona e tuuina atu i tagata o le vasega se taimi e mafaufau loloto ai i mea e mafai ona latou faia e manatua ai le Faaola i aso taitasi. E mafai ona fesoasoani ia i latou le vitio “Always Remember Him” (ChurchofJesusChrist.org).

additional resources icon

Punaoa Faaopoopo

Ua aoao mai le Paseka e uiga i le Faaola.

Faatusa	Uiga Talafeagai
Faatusa O le tamai mamoe (Esoto 12:3–5)	Uiga Talafeagai Iesu Keriso
Faatusa Toto i luga o pou o le faitotoa (Esoto 12:7)	Uiga Talafeagai O le toto togiola o Iesu Keriso, o lē e faaolaina i tatou
Faatusa Aai i le tamai mamoe (Esoto 12:8)	Uiga Talafeagai O Le Avea o le Faaola ma vaega o o tatou olaga
Faatusa Laau oona (Esoto 12:8)	Uiga Talafeagai O le oona o le nofopologa (agasala)

Faaleleia o Lo Tatou Aoao Atu

Faalogo. “O le faalogo o se faatinoga lea o le alofa. … Ole atu i le Tama Faalelagi e fesoasoani ia te oe e te malamalama ai i mea o loo fai mai ai tagata o lau vasega. Ao e gauai atu ma le faaeteete i a latou savali faaleo pe le faaleoa, o le a e iloa ma malamalama atili i o latou manaoga, o latou atugaluga, ma o latou naunautaiga” (Aoao Atu i le Ala a le Faaola,34).