“4–10 Aperila. Esoto 14–17: “Ia Outou Laulau Tutu, ma Vaai Atu i le Olataga Mai ia Ieova” Sau, Mulimuli Mai ia te Au—Mo Le Aoga Sa: Feagaiga Tuai 2022 (2021)
“4–10 Aperila. Esoto 4–17,” Sau, Mulimuli Mai ia te A’u—Mo Le Aoga Sa: 2022
O Le Sami Ulaula
4–10 Aperila
Esoto 14–17
“Ia Outou Laulau Tutu, ma Vaai Atu i le Olataga Mai ia Ieova”
Mafaufau pe faapefea ona aoga ia aafiaga o le fanauga a Isaraelu i tagata o lau vasega. O a aafiaga o le a sili ona aoga mo i latou e talanoaina?
Tusi Faamaumau Ou Lagona Uunai
Valaaulia le Fefaasoaai
O leEsoto 14–17 ua tumu i tala faamemelo. E mafai e se tagata o le vasega ona tusi se ata o se mea na tupu mai nei mataupu ao mate e isi tagata o le vasega le mea o loo ia tusia. Fai atu ia i latou e faasoa mai mea na latou aoaoina mai le tala.
Aoao Atu le Aoaoga Faavae
E laveai e le Tama Faalelagi i tatou ao tatou mulimuli i le Agaga.
-
Na foliga mai o le Sami Ulaula o le iuga lea ia Isaraelu, ae na silafia e le Atua mea latou te lei iloaina. O le iloiloina o le tala i le sopoiaina faavavega o le Sami Ulaula e mafai ona faamanatu ai i tagata o le vasega taimi na laveaiina ai i latou mai o latou tofotofoga. E mafai ona e fai i tagata o le vasega e iloilo le Esoto 14 ma faasoa mai le mea na sili ona musuia ai i latou i lenei tala. Ia uunaia foi i latou e faasoa mai o latou aafiaga i le laveaiina mai tofotofoga, faatasi ai ma fuaiupu mai le mataupu e fausia ai lo latou faatuatua faapea e mafai e le Atua ona laveaiina i tatou.
-
Atonu foi e manaia le faitau faatasi o le Mataupu Faavae ma Feagaiga 8:2–3. O a mea ua aoao mai e nei fuaiupu e uiga ia Mose? E faapefea e nei fuaiupu ona aafia ai le ala tatou te mafaufau ai e uiga i mea na tutupu i le Esoto 14? O le a se latou fautuaga e uiga i le ala tatou te sailia ai le laveaiina mai o tatou tofotofoga? Mafaufau po o le a le fuaitau i le “Punaoa Faaopoopo” e mafai ona faaopoopo i la outou talanoaga.
O le manai mai le Atua na fafagaina faaletino ai Isaraelu; tatou te manaomia foi le fafagaina faaleagaga i aso taitasi. Fresco saunia e Leopold Bruckner
Esoto 15:23–27; 16:1–15; 17:1–7
O le a saunia e le Alii mea tatou te manaomia ao tatou malaga i le olaga.
-
Ua tuuina mai i leEsoto 15–17 ni tala se tele e mafai ona fausia ai le faatuatua o tagata o le vasega i le mana o le Alii ma le naunau e saunia mea mo o tatou manaoga faaletino ma faaleagaga. Atonu e mafai e tagata taitoatsi o le vasega ona suesue se tasi o nei fuaitau, ma vaavaai mo savali faaleagaga: Esoto 15:23–27; 16:1–15; 17:1–7. Tuu atu i ni nai tagata o le vasega se avanoa e faasoa mai ai mea sa latou mauaina. E faapefea ona tatou faaaogaina nei tala e faamalosiau ai i se tasi e lei ausia manaoga faaletino ma faaleagaga?
-
E mafai foi e tagata o le vasega ona faitau nei fuaiupu ma faailoa mai faataitaiga o le muimui. E mafai faapefea ona tatou faamatalaina i se tasi le uiga o le muimui? O a nisi o taunuuga o le muimui e avea ai ma se mea matautia tele? Atonu e mafai e tagata o le vasega ona faasoa mai se fautuaga i le ala e aloese ai mai le faaosoosoga e muimui i le Alii pe a tatou aafia i ni tofotofoga faigata.
-
E mafai ona fesoasoani i tagata o le vasega e faatusatusa le manai i le Esoto 16 ma le fafagaina o manaoga o o tatou agaga. O a ni mea e tutusa ai ua tatou vaaia? O a ni lesona faaleagaga atonu e finagalo le Alii e aoao ia Isaraelu e ala i le auina atu o le manai i le ala na Ia faia ai? (tagai Ioane 6:31–35, 48–58). E mafai foi ona e faaali atu se tasi pe sili atu o vitio i le “Punaoa Faaopoopo.”
E faamanuiaina i tatou a o tatou lagolagoina o tatou taitai.
-
O le tala ia Arona ma Huro o loo sisiiina i luga lima o Mose e faaalia ai le taua o le lagolagoina o i latou ua valaaulia e taitaia i tatou. E mafai ona e valaaulia ni nai tagata o le vasega e faatino le aafiaga ao faitau leotele e le isi tagata o le vasega. E faapefea e taumafaiga a Arona ma Huro e sisii i luga lima o Mose ona tutusa ma a tatou taumafaiga e lagolago o tatou taitai? E faapefea ona tatou faaalia lo tatou lagolago mo o tatou taitai?
Punaoa Faaopoopo
E mafai ona e maua le taitaiga patino.
Na aoao mai Sister Michelle Craig:
“I le avea ai ma soo faamaoni [o le Faaola], e mafai ona e maua musumusuga ma faaaliga faaletagata lava ia, e ogatusa ma Ana poloaiga, e faapitoa ia te oe. Ua ia te oe ni misiona tulagaese ma ni matafaioi e faatino i le olaga ma o le a tuuina atu le taitaiga tulagaese e faataunuuina ai.
“O Nifae, le uso o Iareto, e oo lava ia Mose sa i ai uma se vaega tele o vai e sopoia—ma sa eseese uma auala na faia ai. Na galue Nifae e ‘ta laau i gaosiga uiga eseese’ [1 Nifae 18:1]. Na fausia e le uso o Iareto ni vaa na “malu lelei e pei o se ipu” [tagai] Eteru 6:5–8]. Ma sa ‘savali Mose i le iliti tai matutu i totonu o le sami’ [Esoto 14:29].
“Na tofu maua e i latou taitoatasi faatonuga patino, na faapitoa mo i latou, ma sa faatuatuaina ma galulue i latou taitoatasi. E silafia e le Alii i latou o e usiusitai ma, i upu a Nifae, ‘o le a saunia e ia se ala mo [i tatou] ina ia mafai ai ona faataunuuina o le mea ua ia poloaiina’ [1 Nifae 3:7]. Ia matau na fai mai Nifae, ‘se ala’—e lē ‘o le ala.’
“Pe o tatou misia pe o faamisi foi ni feau patino mai le Alii ona ua Ia saunia “se ala” e ese mai le mea na tatou faamoemoe i ai?” (“Gafatia Faaleagaga,” Liahona, Nov. 2019, 21).
Vitio
I vitio “Daily Bread: Pattern,” “Daily Bread: Experience,” ma le “Daily Bread: Change” (ChurchofJesusChrist.org), ua faasoa mai ai e Elder D. Todd Christofferson ni manatu e uiga i le vavega o le mana.
Faaleleia o Lo Tatou Aoao Atu
Valaaulia isi e molimau atu. O le tele o i latou e te aoaoina o loo i ai ni molimau mamana patino o le upumoni e faasoa mai. Valaaulia i latou e faasoa mai a latou molimau i le faia o fesili faigofie, e pei o le, “Ua faapefea ona faamanuiaina oe i le mulimuli i le perofeta?” (Tagai foi i le Aoao Atu i le Ala o le Faaola,11.)