tuugamau ma le maa ua fulieseina mai le faitotoa

Ata o le tuugamau gaogao na tusia e Maryna Kriuchenko

11–17 Aperila

Eseta

“O Le a Ia Faatoilaloina le Oti i le Manumalo”

A o e sauniuni e aoao atu i le Aso Sa o le Eseta, mafaufau pe mafai faapefea ona e fesoasoani i tagata o le vasega ia maua se agaga faafetai loloto atu ma le molimau i le taulaga togiola ma le Toetu o Iesu Keriso.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Atonu e te manao e valaaulia tagata o le vasega e faasoa mai mea na latou faia po o latou aiga e faamalolosia ai lo latou faatuatua ia Iesu Keriso ma Lana Togiola i lenei vaitau o le Eseta.

aikona o le aoao atu

Aoao Atu le Aoaoga Faavae

Ona sa faatoilaloina e le Faaola le oti, o le a toe ola foi i tatou.

• Ona o le asō o le Aso Sa o le Eseta, mafaufau e iloilo le tala faaTusi Paia o le Uluai Eseta—le Toetu o Iesu Keriso (tagai Ioane 20:1–17). E mafai ona e valaaulia se tagata o le vasega e faamatala mai i ana lava upu le tala. E mafai foi ona e faaali atu le vitio “Ua Toetu o Ia” (ChurchofJesuChrist.org E mafai foi e tagata o le vasega ona fiafia e usuina viiga e uiga i le Faaola ma faitau mau fesootai (o mau fesootai ua lisiina i lalo o viiga taitasi i le Viiga). Ona mafai lea e tagata o le vasega ona faasoa mai fuaitau e fiafia i ai mai viiga ma o latou lagona e uiga i le Faaola.

• Ina ia fesoasoani i lau vasega e faafetaia le ala ua molimau mai ai le Feagaiga Tuai ia Iesu Keriso, e mafai ona e valaaulia i latou e iloilo mau i le koluma i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga, ma fuaitau foi i le Tusi a Mamona o loo maua i le lisi. O a mea ua tatou iloa e uiga i le Faaola ma Lana misiona mai i nei fuaitau? Aisea e taua ai le iloa o nei valoaga?

E mafai ona tatou maua le filemu ma le olioli e ala i le Togiola a le Faaola.

• O leotootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga e aofia ai se lisi o mau ua faamatalaina le filemu ma le olioli e oo mai ia Iesu Keriso. Afai e faitau e tagata o le vasega nei mau i le fale, uunaia i latou e faasoa mai o latou manatu ma lagona e faatatau i ai. Pe e mafai foi ona outou faitauina o se vasega ni nai mau ma talanoa e uiga i le filemu ma le olioli tatou te lagonaina ona o le Faaola ma Lana Togiola. E mafai faapefea ona tatou faasoa atu nei faamanuiaga i tagata atonu o loo tauivi e sue le filemu ma le olioli i o latou olaga? E mafai foi ona e valaaulia se tagata o le vasega e faitau le savali a Peresitene Russell M. Nelson “Olioli Ma le Ola Ai Faaleagaga” (Liahona, Nov. 2016, 81–84) i le aluga o le vaiaso ae lei faia le vasega ma ia o mai i le vasega ua saunia e faasoa mai ni mea ua aoao mai e lenei savali e uiga i le mauaina o le olioli i le Faaola.

• Atonu e te lagonaina le musuia e taitaia se talanoaga i le ala e fesoasoani ai i isi ia maua le filemu ma le olioli ia Keriso. E mafai ona e valaaulia tagata o le vasega e mafaufau i se tasi latou te iloa—atonu o se tasi o loo latou auauna i ai—atonu o loo manaomia ia latou lagolago, auaunaga, pe na o le faalogo lava i la latou molimau ia Keriso ma Lana Togiola. Uunaia tagata o le vasega e vaai i mau (e pei o na e i le “Punaoa Faaopoopo”) ao latou mafaufau i le auaunaga latou te ono tuuina atu po o molimau atonu latou te faasoa atu e faamalolosia ai i latou o siomia i latou. Valaaulia nisi o tagata o le vasega e faasoa mai o latou mafaufauga e uiga i le auauna atu e pei ona sa faia e Iesu.

Keriso i luga o le satauro

Aso Pogisa i Kolokota, saunia e J. Kirk Richards

E ala mai i Lana Togiola, ua i ai ia Iesu Keriso le mana e fesoasoani ai ia i tatou e faatoilalo le agasala, oti, tofotofoga, ma vaivaiga.

• O se tasi ala e fesoasoani ai i tagata o le vasega e mafaufau loloto i faamanuiaga e oo mai i le Togiola a le Faaola o le tusi i luga o le laupapa o autu Agasala, Oti, Tofotofoga, ma le Vaivaiga. E mafai e tagata taitasi o le vasega ona faitau se tasi o mau o lisi atu i le “Punaoa Faaopoopo” ma manatunatu loloto pe faapefea ona fesoasoani le Faaola ia i tatou e faatoilalo mea ua tusia i le laupapa. E mafai e tagata o le vasega ona tusi a latou mau fesootai i lalo o se tasi pe sili atu o autu i le laupapa ma faasoa mai a latou molimau i le Faaola ma Lana Togiola.

• E mafai ona fesoasoani tala ma talafaatusa tatou te malamalama ai i le Togiola a Iesu Keriso. Mo se faataitaiga, e mafai ona e valaaulia se tagata o le vasega e faasoa mai se tasi o tala po o talafaatusa i le savali a Elder Walter F. González “O Le Pa’i a le Faaola” (Liahona, Nov. 2019, 90–92) po o le savali a Sister Neill F. Marriott “Tumau i le Atua ma Faaleleia le Va” (Liahona, Nov. 2017, 10–12). O a mea ua aoao mai ai i tatou e nei tala ma talafaatusa e uiga i le Togiola a Keriso? Valaaulia tagata o le vasega e galulue i paga e mafaufau ia latou lava tala po o talafaatusa.

• O a mea ua tatou aoao mai i nei fuaiupu e uiga i le tau na totogi e Iesu Keriso mo lo tatou faaolataga: Isaia 53:3–5; Mosaea 3:7; Mataupu Faavae ma Feagaiga 19:16–19? O le a le tau na totogi e lo tatou Tama Faalelagi? (tagai Ioane 3:16).

aikona o punaoa faaopoopo

Punaoa Faaopoopo

Mau e uiga i le Togiola a Iesu Keriso

• Isaia 61:1–3.

• Esekielu 36:26–28

• Mataio 11:28–30

• Luka 1:46–55

• Roma 8:35–39

• Alema 7:10–13

• Alema 11:42–45

• Moronae 10:32–33

• Mataupu Faavae ma Feagaiga 19:15–19

• Mose 5:9–12

Faaleleia o Lo Tatou Aoao Atu

Faafetai atu i au tagata aoao. “Aua e te mafaufau tele i mea e te aoao atu e galo ai ona faafetai i tagata aoao mo lo latou sao. E manaomia ona latou iloa e te talisapaia lo latou naunautai e faasoa mai o latou malamalamaaga ma molimau” (Aoao Atu i le Ala a le Faaola,33).