mauga

O se mauga i Aikupito na talitonuina faaleaganuu faapea o le Mauga o Sinai.

18–24 Aperila

Esoto 18–20

“O Le a Tatou Faia Mea Uma e Fetalai Mai ai le Alii”

Faitau le Esoto 18–20, ma tusifaamaumau ni lagona e te maua e uiga i le ala e fesoasoani ai i tagata o lau vasega ia aoao mai nei mataupu. E oo lava i uunaiga faigofie e mafai ona taitai atu i ni aafiaga aoga e aoao ai.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia valaaulia tagata o le vasega e faasoa mai mea na latou aoaoina, e mafai ona e tusi i le laupapa le 18, 19 ma le 20—o mataupu na latou faitauina i le Esoto i lenei vaiaso. Fai i tagata o le vasega e tusi i tafatafa o numera o mataupu taitasi ia numera o fuaiupu latou te mananao e talanoaina mai lena mataupu. A o faasoa mai e tagata o le vasega o latou malamalamaaga, fai i isi tagata o le vasega pe i ai ni o latou manatu e uiga i na lava fuaitau.

aikona o le aoao atu

Aoao Atu le Aoaoga Faavae

Esoto 18:13–26

E mafai ona tatou fesoasoani e “faamāmā ai” le faiga o le galuega a le Alii.

• E mafai ona e uunaia lau vasega e talanoaina le fautuaga na tuuina atu e Ietero ia Mose (tagai Esoto 18:13–26) i le fai atu i ai e vaai faalemafaufau faapea o loo latou faia se talanoaga ma se tasi ua lagonaina o ona valaauga i le Ekalesia, tiute faaleaiga, po o isi tiutetauave ua “mafatia” ai ma o le a “le lavā” ai o ia (Esoto 18:18). E ono fesoasoani faapefea le fautuaga o i le Esoto 18:13–26 ? O a isi fautuaga mai o tatou aafiaga patino e mafai ona tatou faasoa atu?

• O le talanoa e uiga i le Esoto 18:13–26 e mafai ona ofoina atu ai se avanoa e talanoaina ai le ala e mafai ai e le auaunaga ona fesoasoani ia i tatou e “faamāmā ai” i o tatou taitai i le galuega a le Alii (Esoto 18:22). O a uiga na fautuaina atu e Ietero ia Mose e vaai i ai mo i latou o le a auauna atu o ni “pule” o tagata? (tagai Esoto 18:21). Aisea e taua ai na uiga ia tatou taumafaiga e auauna atu i le tasi ma le isi? E faapefea e le auauna atu i tagata o le aiga, tagata o le Ekalesia, ma isi ona fesoasoani e “faamāmā ai” le avega a o tatou taitai i le Ekalesia? I le avea ai o se vaega o le talanoaga, e mafai ona e faaali atu se tasi o vitio e fesootai i le ministering.ChurchofJesusChrist.org.

  tamaloa o loo faatalofa ma se fafine

  O le auauna atu i isi o se tasi auala lea e mafai ai ona tatou auai i le galuega a le Alii.

Esoto 20:2–11

E tatau ona tatou faamuamua le Alii i o tatou olaga.

• E mafai ona e mafaufau i se galuega e sili atu le lelei pe a tatou faataunuu muamua le laasaga e sili ona taua? (O faataitaiga e ono aofia ai le faia o se numera matematika po o le mulimuli i se fua o meaai). Faasoa atu i le vasega nisi faataitaiga e te masani ai, ma valaaulia i latou e mafaufau ia latou lava faataitaiga. E faapefea e le faataunuuina muamua o le laasaga e sili ona taua ona fesootai i poloaiga o i le Esoto 20:2–11? O a mea ua aoaoina ai i tatou e poloaiga e uiga i le faamuamua o le Atua i o tatou olaga? O a ni mea atonu e faaosoosoina ai i tatou e faamuamua i lo Ia? (Mo ni faataitaiga, tagai i le fuaitau i le “Punaoa Faaopoopo.”) O le iloiloina o le Esoto 20:2–11 e mafai ona fesoasoani i tagata o lau vasega e manatua ai lo latou naunautai e faamuamua le Atua.

Esoto 20:2–17

E alofa mutimutivale le Atua.

• E mafai faapefea ona e fesoasoani i tagata o lau vasega ia malamalama i le taua o Poloaiga e Sefulu i o tatou aso? E mafai ona e vaevae le vasega i ni paga ma valaaulia i latou e faitau le Esoto 20:2–17 ona talanoaina lea o le ala e faamanuiaina ai i latou, o latou aiga, ma tagata o siomia ai i latou i le usiusitai i poloaiga taitasi. E mafai foi ona e faaali atu le vitio “Obedience to the Ten Commandments” (ChurchofJesusChrist.org). O a faamanuiaga ua folafolaina mai e le Tama Faalelagi ia i tatou mo le usiusitai i Ana poloaiga? (tagai, mo se faataitaiga, Mosaea 2:41). E faapefea e nei poloaiga ona faaalia le alofa o le Atua mo i tatou?

additional resources icon

Punaoa Faaopoopo

Leai nisi atua.

Na aoao mai Peresitene Spencer W. Kimball e faapea e i ai sootaga i le va o le tapuai anamua i faatusa ua ta ma amioga a tagata i aso nei. Sa Ia saunoa:

“O le ifo i tupua o loo i ai i totonu o agasala e sili ona ogaoga. …

“O tupua faaonapo nei po o atua sese ua mafai ona foliga mai i lavalava, fale, pisinisi, masini, taavale, vaa e tafafao ai, atoa ma isi lava mea e tele e mafai ona punitia ai le ala e tau atu i le tulaga faale-atua. …

“O mea e leai ni tino e pei lava foi o ni atua ua saunia. O tikeri ma mataitusi ma faalagiga e mafai ona avea ma tupua. …

“O le tele o tagata e fausia ma faameafale se fale ma faatau le taavale muamua—ona latou iloa ai lea ua latou ‘le mafai” ona totogi le sefuluai. O ai o loo latou tapuai i ai? E mautinoa lava e le o le Alii o le lagi ma le lalolagi. …

“O le toatele ua tapuai i tuligamanu, malaga mo se fagotaga, o faigamalologa, o tafaoga ma evaga i faaiuga o vaiaso. O isi foi ua avea ma a latou tupua ia taaloga, pesipolo, lakapi, fetauaiga ma pulu, po o tagapolo. …

“Ma o le isi lava mea e tapuai i ai tagata o le pule ma le mamalu. … O nei atua o le pule, tamaoaiga, ma faatosinaga e sili atu ona manaomia tele, ma e fai lava foi si mo’i e pei o tamai povi auro a le fanauga a Isaraelu i le vao” (Aoaoga a Peresitene o le Ekalesia: Spencer W. Kimball [2006], 146–47).

Faaleleia o Lo Tatou Aoao Atu

Taulai atu i ni nai mataupu faavae. “E tele naua mea e talanoaina i lesona taitasi, ae e le manaomia ona faia le lesona atoa i se vasega se tasi ina ia ootia ai se loto o se tasi—o le tele o taimi e lava le tasi pe lua ni vaega autu” (Aoao Atu i le Ala a le Faaola,7).