Ua faaali atu Ieova ia Mose ma toeaina o Isaraelu

Ata tusi o Ieova ua faaali atu ia Mose ma toeaina e 70 o Isaraelu, saunia e Jerry Harston

25 Aperila–1 Me

Esoto 24; 31–34

“Tate O Atu Lava ma Au”

Faaaoga nei upu mai ia Elder Jeffrey R. Holland e taialaina lau sauniuniga e aoao atu: “O le tele o tagata e le o mai i le lotu e vaavaai mo na o ni nai mea moni fou o le talalelei. … Latou te o mai e saili se aafiaga faaleagaga. … Latou te mananao ia faamalosia lo latou faatuatua ma faafouina lo latou faamoemoe” (“O Se Faiaoga e Sau Mai le Atua,” Liahona, Me 1998, 27).

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai e tagata o le vasega ona vaai faalemafaufau faapea ua fai mai se uo, “Ou te le faitauina le Feagaiga Tuai; e le foliga mai e faatatau i lou olaga.” Fai atu ia i latou e tali atu e ala i le faasoa mai o se mea na latou maua e aoga i la latou suesuega talu ai o le Feagaiga Tuai.

aikona o le aoao atu

Aoao Atu le Aoaoga Faavae

Esoto 31:12–17

Tatou te faamamaluina le Sapati o se faailoga o lo tatou tuuto i le Alii.

• E mafai ona e amata i le fai atu i tagata o le vasega pe na i ai se taimi na tatau ai ona faamatala i se tasi o le aiga po o se uo pe aisea e ese ai lo latou taulimaina o le Aso Sa mai isi aso. Valaaulia i latou e faasoa mai mea na latou tau atu pe latou te ono tau atu i le lumanai. O le faitauina o le Esoto 31:12–17 po o fuaitau i le “Punaoa Faaopoopo” e mafai ona tuuina atu ia i latou nisi manatu. E faapefea e a tatou filifiliga i le Sapati ona faaalia ai lo tatou tuuto ia Iesu Keriso?

• E ui lava i faasalaga o faamatalaina i le Esoto 31;14–15 e le o faatatau i aso nei, ae latou te faaalia le taua tele o le lagona o le Alii i le Sapati. Aisea ua matua taua ai tele lenei poloaiga? O le talanoaina o nei mau e mafai ona fesoasoani: Esoto 31:12–17; Isaia 58:13–14; Mataupu Faavae ma Feagaiga 59:9–13.

  tagata o loo savavali i luma o le falelotu

  E ala i le faamamaluina o le Sapati, tatou te faailoa atu ai lo tatou alofa mo le Alii.

Esoto 32; 34:1–17

O le agasala le liliu ese mai le Atua, ae ua Ia ofoina mai se ala e toe foi mai ai.

• Ina ia fesoasoani i tagata o le vasega e mafaufau loloto ma faapatino le tala i le Esoto 32, fai muamua ia i latou e iloilo le mataupu taitoatasi pe i ni vaega. Ona fai atu lea i ni tagata o le vasega e faatino le matafaioi a Isaraelu ia na le onosai i le faatalitali mo Mose e toefoi mai ma filifili ai e faia se tupua auro. O a ni lagona na ono taitaia ai i latou e ifo i tupua? E mafai e isi tagata o le vasega ona taumafai e tauanau i latou e tumau le faamaoni i le Alii ma Lana perofeta. E mafai e tagata o le vasega ona talanoa i mea e uunaia ai i latou e tausia a latou feagaiga. O a mea e mafai ona tatou faia e fesoasoani ai ia i latou atonu o loo tauivi e tausia a latou feagaiga?

• Pe a faitau e tagata le Feagaiga Tuai, latou te ofo i nisi taimi i faasalaga mamafa na tuuina mai e le Alii mo le agasala. E mafai e leEsoto 34:1–9 ona fesoasoani ia i latou e vaai faapea a o le mafai ai e le Atua ona onosaia le agasala, e alofa mutimutivale foi o Ia, ma ofoina mai le faamagaloga ia i latou e salamo. Atonu e mafai e tagata o le vasega ona faitau lenei savali ma mafaufau loloto i fesili e pei o nei: O le a se mea ua tatou aoaoina e uiga i le Alii mai nei fuaiupu? Aisea e taua ai le iloa o nei mea e uiga ia te Ia? E mafai ona e faasino atu faapea o le Faaliliuga a Iosefa Samita, o le Esoto 34:7 (i le Esoto 34:7, vaefaamatalagau) ua faamanino ai faapea o le Atua o le a le “faasaoina e faatautee.” O le a le uiga o lenei mea? Atonu e mafai e tagata o le vasega ona faasoa mai le ala na latou molimauina ai le alofa mutimutivale o le Atua. E mafai faapefea mo le Atua ona atoatoa le alofa mutimutivale ma atoatoa le amiotonu? (tagai Alema 42:13–15).

• E mafai ona vaaia leEsoto 34: 6–17 o se faatonuga e fesoasoani i tagata o Isaraelu ia salamo i la latou agasala o le ifo i tupua (ua faamatalaina i le Esoto 32). O a ni mea tatou te maua i nei fuaiupu e mafai ona fesoasoani ia Isaraelu ia salamo? O le a se mea ua tatou aoaoina e uiga i le Alii ma le salamo mai lenei faatonuga?

Esoto 33:11–17

Tatou te manaomia le faatasi mai o le Atua i o tatou olaga.

• O le a faapefea ona e fesoasoani i tagata o le vasega e faaaoga mea na tau atu e le Alii ia Mose i le Esoto 33: 11–17? E mafai ona e amata i le iloiloina o le galuega na manaomia pea e le Atua e faataunuu e Mose (tagai Esoto 33:1–3). O a mea ua tatou maua i fuaiupu 11–17 semanu e faamalosia ma faamafanafanaina Mose? E mafai e tagata o le vasega ona mafaufau i se mea e finagalo le Atua latou te faia—e pei o le faataunuuina o se valaauga i le Ekalesia, se tiutetauave i le aiga, po o se avanoa faaleauaunaga. Ona mafai lea ona latou toe faitauina fuaiupu. O a ni malamalamaaga tatou te maua i le ala o le a lagolago ai i tatou e le Atua?

aikona o punaoa faaopoopo

Punaoa Faaopoopo

O le Sapati o se faailoga.

Na faamatala e Peresitene Russel M. Nelson: “A o ou laitiiti, sa ou suesue i lisi na faia e isi e faatatau i mea e fai ma mea e le faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi [tagai Esoto 31:13; Esekielu 20:12, 20]. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te au, ‘O le a le faailoga ou te manao e avatu i le Atua?’ O lena fesili e matua ta’u manino mai ai lava a’u filifiliga e uiga i le aso Sapati” (“O le Sapati o se Aso Fiafia,” Liahona, Me 2015, 130).

Faaleleia o Lo Tatou Aoao Atu

Aoao atu e ala i le Agaga. “O le faamoemoega autu o mea uma e faia e se faiaoga o le talalelei—o fesili uma, o mau uma, o gaoioiga uma—o le valaaulia o le Agaga e fausia le faatuatua ma valaaulia tagata uma e o mai ia Keriso” (Aoao Atu i le Ala a le Faaola, 10).