Me 9–15.

Numera 11–14; 20–24

“Aua Lava nei Outou Fouvale ia Ieova, Aua Tou Te Matatau”

O se tasi o ala sili e iloa ai mea e taulai i ai i le taimi o le vasega o le fesili i tagata o le vasega po o a mea aoga na latou maua ao latou suesue i mau. O le a faailoa mai mea e taua ia i latou ma mea ua latou saunia e aoaoina.

Tusi Faamaumau Ou Lagona Uunai

Valaaulia le Fefaasoaai

O nisi taimi pau le mea e manaomia e uunaia ai tagata o le vasega e faasoa mai manatu mai a latou suesuega o le fai atu o se fesili faigofie e pei “O a mea na aoao ai oe e le Agaga Paia ao e faitau i tusitusiga paia i lenei vaiaso?’ Ona tuu atu lea o le taimi ia i latou e manatunatu loloto ai ma tali mai.

Aoao Atu le Aoaoga Faavae

Numera 12

O le fai upu tete’e i le perofeta a le Alii e faatiga i le Alii.

• O le faitau i le Numera 12 e mafai ona fesoasoani i tagata o le vasega e malamalama ai i le matautia o le fai upu i le perofeta a le Alii. E mafai ona e valaaulia tagata o le vasega e faitau lenei mataupu ma talanoa i lagona o le Alii i Ana auauna. E faavae i fuaiupu 1–2, o le a sou manatu i le uiga o le fai upu i le perofeta a le Alii? O a tulaga lamatia o le faia o lena mea? O a mea e mafai ona tatou aoao mai faatinoga a Mose ma Isaraelu i fuaiupu 13 ma le 15?

Numera 12:3

“Na matua agamalu lava le tagata nei o Mose.”

• O nisi tagata atonu e ofo i le faitau faapea o se taitai malosi e pei o Mose, lea na tulai i luma o Farao ma faia ni vavega maoae i le mana o le Atua, sa “matua agamalu lava” foi. E mafai ona e faaaoga le Numera 12:3 e amata ai se talanoaga i le uiga o le agamalu moni. E mafai ona e faasino i le uiga i le “Agamalu, Lotomaualalo” i le Taiala i Tusitusiga Paia (scriptures.ChurchofJesusChrist.org). E mafai foi ona outou vaavaai o se vasega, mo faailoga o le agamalu o Mose i le Numera 12.

• O a isi faamaoniga o le agamalu o Mose e mafai ona tatou aoao mai ai? (Mo se faataitaiga, Esoto 18:13–25; Numera 11:26–29; Eperu 11:24–27; Mose 1:10–11). E mafai foi ona outou faitau ma talanoaina le ala na faaalia ai e le Faaola le agamalu (tagai Mataio 11:29; 27:11–14; Luka 22:41–42; Ioane 13:4–5). O a mea ua aoaoina ai i tatou i faataitaiga a Mose ma le Faaola—po o tagata tatou te iloa—e uiga i le agamalu? Aisea ua finagalo ai le Atua ia tatou agamalu?

Numera 13–14

Faatasi ai ma le faatuatua i le Alii, e mafai ona tatou maua le faamoemoe mo le lumanai.

• A o outou talanoaina le tala e uiga i Isaraelu e 12 na asiasi atu i le nuu folafolaina ma tuuina mai a latou lipoti, mafaufau e fesili i tagata o le vasega i o latou lagona pe faapefea e lenei tala ona faatatau i tulaga ua latou feagai. Ina ia fesoasoani, e mafai ona e valaaulia tagata o le vasega e lisi ni mea mai le Numera 13:23--33 e mafai ona faatusatusa i se mea i o latou olaga. Mo se faataitaiga, e mafai ona suitulaga le nuu folafolaina i se mea e finagalo le Alii tatou te ausia, o fuifui vine e fai ma faamanuiaga, o tagata malolosi o ni luitau o le a tatou feagai, ma isi foi. Uunaia tagata o le vasega e faasoa mai o latou lagona i le mea e ono finagalo le Alii latou te aoao mai lenei tala.

  

  O le toasefulu o Isaraelu matavao na fefefe; na i ai le faatuatua o Iosua ma Kalepo. © Lifeway Collection/licensed from goodsalt.com

Numera 21:4–9

Afai tatou te vaai atu ia Iesu Keriso i le faatuatua, e mafai ona Ia faamaloloina i tatou faaleagaga.

• Ina ia fesoasoani i tagata o le vasega e talanoaina le tala i le Numera 21:4–9 ma fausia lo latou faatuatua i le Faaola, e mafai ona e tusia ni fesili faapenei i le laupapa: O le a le mea e suitulaga ai le gata apamemea? O a mea e ono suitulaga ai le utia e le gata? Aisea na mumusu ai nisi tagata e vaavaai i luga i le gata apamemea? E faapefea ona tatou “vaavaai” i ai i aso nei? E mafai e tagata o le vasega ona faasoa mai tali latou te maua ao latou faitau i le Numera 21:4–9; 1 Nifae 17:40–41; Alema 33:18–22; ma le Helamana 8:13–15. O a nisi o mea faigofie ua valaaulia i tatou e le Faaola e fai e maua ai Lana faamalologa? Aisea e faigata ai i nisi taimi le faia o na mea faigofie? (tagai “Punaoa Faaopoopo” mo nisi manatu i lenei vaega). Atonu e mafai e tagata o le vasega ona faasoa mai pe faapefea e le faia o nei mea ona aumaia le mana o le Faaola i o tatou olaga.

Punaoa Faaopoopo

“O mea laiti ma faatauvaa.”

Na faamatala e Elder L. Whitney Clayton se epikopo na fautuaina tagata o le uarota na feagai ma ni luitau eseese faigata i o latou olaga:

“O lana fautuaga masani lava i tagata o le uarota e aofia ai le toe foi i faatinoga faigofie o le faatuatua, e pei o le suesueina o le Tusi a Mamona[,] … totogiina o le sefuluai, ma le auauna atu i le Ekalesia ma le tuuto. Ae peitai, o le latou tali masani lava ia te ia o se tali le mautonu: ‘… O le a se mea e faatatau i le faia o na mea ma faafitauli o loo ou feagai ai?’

“… O i latou o e na faia ma le iloa ia “mea laiti ma faatauvaa” [Alema 37:6]—usiusitai i ni auala e foliga laiti—ua faamanuiaina i le faatuatua ma le malosi e sili atu nai lo faatinoga moni o le usiusitai lava ia ma, o le mea moni, e ono foliga e matua le fesootai lava i ai.(“So o Se Mea Lava e Fai Mai o Ia ia te Outou, Ia Outou Faia,” Liahona, Me 2017, 98).

Faaleleia o Lo Tatou Aoao Atu

Taulai atu i le mea e sili atu ona taua. E le mafai ona aoao uma lava tala po o mataupu faavae taitasi. Mulimuli i le Agaga, ma mafaufau i manaoga o tagata o le vasega ao e filifili pe faapefea ona faaalu le taimi o le vasega. Manatua o le aiga, ae le o le potuaoga, e tatau ona avea ma nofoaga autu o le aoaoina o le talalelei.