Ata tusi o Mose o loo faauuina Iosua, saunia e Darrell Thomas

Me 23–29

Iosua 1–8; 23–24

“Ia E Faamalosi ma Lototele”

Ao e faitau i le Iosua 1–8 ma le 23–24, mafaufau i le fautuaga ia “mafaufau i ai i le ao atoa ma le po” (Iosua 1:8). Ia taulai atu i uunaiga e oo mai. E mafai foi ona latou taitai atu i manatu faafaiaoga mo lau vasega.

Tusi Faamaumau Ou Lagona Faagae’etia

Valaaulia le Fefaasoaai

Valaaulia tagata o le vasega e faasoa mai se fuaitau mai le latou faitauga i lenei vaiaso na faateleina ai lo latou faatuatua ia Iesu Keriso. Mo se faataitaiga, atonu na latou mafaufau loloto i ala na faamanatu mai ai e le misiona a Iosua ia i latou le misiona a Iesu Keriso. Aisea tatou te faafetai ai mo tala i le tusi o Iosua?

Aoao Atu le Aoaoga Faavae

Iosua 1:1–9

“Ia e faamalosi, ma lototele”

• E tele taimi na tau atu ai ia Iosua “Ia e faamalosi ma ia e lototele” (tagai Teuteronome 31:7, 23; Iosua 1:6–7, 9). Atonu o le aoga i tagata o le vasega le talanoaina o le uiga a le Alii i lenei fuaitau. E mafai ona latou suesue le Iosua 1:1–9 mo le fautuaga na tuuina atu e le Alii ia Iosua e fesoasoani ia te ia ia faamalosi ma lototele. E mafai foi ona latou faasoa mai ni faataitaiga o tagata latou te iloa e i ai nei uiga. Na faapefea ona faaalia e Iosua le faamalosi ma le lototele i tala i le tusi o Iosua? (mo se faataitaiga, tagai mataupu 3, 6, ma le 8). E mafai e tagata o le vasega ona faasoa mai pe o faapefea ona latou taumafai ia faamalolosi ma lototetele mo Keriso.

Iosua 1:8

E mafai e le afioga a le Atua ona faamanuiaina lo tatou ala.

• Ina ia uunaia tagata o le vasega i la latou suesuega patino ma faaleaiga o tusitusiga paia, e mafai ona e faitau i le Iosua 1:8 o se vasega. O le a se mea e mafai ona tatou aoao mai i lenei fuaiupu e uiga i le auala e suesue ai tusitusiga paia? Atonu e mafai e tagata o le vasega ona faasoa mai mea na latou faia e “mafaufau” ai i tusitusiga paia “i le ao atoa ma le po.” Ua faapefea e le Alii ona faia ia “manuia o [tatou] ala” ma tuuina mai le “manuia” ao tatou suesue Lana afioga?

  

  E mafai e le afioga a le Atua ona faia ia “manuia ia i [tatou o tatou] ala” (Iosua 1:8).

Iosua 3–4

E mafai ona tatou aafia i “vavega” a le Atua.

• Atonu e aoga i tagata o le vasega se iloiloga puupuu o le tala ia Isaraelu ua sopoia le Vai o Ioritana. E mafai ona e vaevae le vasega i ni paga ma valaaulia paga taitasi e faamatala mai le tala i le tasi, ma feauauai i le faia o se fuaiupu e tasi i le taimi (uunaia i latou e vaai i le Iosua 3 pe a latou manaomia le fesoasoani i le manatuaina o le tala). Ona, mafai lea ona latou talanoaina, o se vasega, ni faamatalaga na tulaga ese ia i latou. Oa mea ua tatou aoao mai lenei tala e mafai ona fesoasoani ia i tatou e aafia ai i “vavega” a le Alii i o tatou olaga? (fuaiupu 5). Oa “vavega” ua Ia faia mo i tatou? Aisea e taua ai le i ai o aafiaga faaleagaga a tupulaga taitasi e aoaoina ai i latou faapea “e malosi … Ieova”? (Iosua 4:24).

• E ui lava tatou te manaomia uma ia i ai a tatou lava aafiaga faatupu-faatuatua, o le manatuaina o mea ua faia e le Alii mo o tatou tuaa e taua foi. E tusa ai ma le Iosua 4, oa mea na faia e Isaraelu e fesoasoani ai i tupulaga i le lumanai ia manatua le sopoia o le Vai o Ioritana? (tagai Iosua 4:1–7). O a ni mea o tatou faia e mautinoa ai o a tatou aafiaga e le galo i tupulaga i le lumanai?

Iosua 6–8

O le usiusitai ua aumaia le mana o le Atua i lo’u olaga.

• O le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ua fautuaina mai le faatusatusa o taua a Isaraelu ma sa Kanana i le Iosua 6–8 ma o tatou lava taua patino ma faaosoosoga. Atonu e te fesili atu i tagata o le vasega po o a manatu ma uunaiga na latou maua ao latou faitau i nei mataupu faatasi ma lenei faatusatusaga i le mafaufau. Pe mafai ona e faasino i latou i fuaiupu faapitoa e foliga talafeagai i a tatou taua e aloese mai le agasala, ma e mafai ona latou talanoa i mea ua aoao mai e na fuaiupu i le mauaina o le mana o le Atua i o tatou olaga. O nisi o nei fuaiupu e ono aofia ai le Iosua 6:1–5, 18, 20; 7:11–13.

Iosua 23–24

“Ina filifilia outou i le aso nei po o ai tou te auauna i ai.”

• Atonu o le a fesoasoani i tagata o le vasega le faaaoga o le Iosua 23–24 ia i latou lava pe a latou vaai faalemafaufau faapea o i latou o Isaraelu ua faalogo ia Iosua o tuuina mai lenei fautuaga i le taimi mulimuli o lona olaga. E mafai ona e tuuina atu ia i latou ni nai fuaiupu e faitau lē leoa ona fai atu lea ia i latou e faasoa mai se mea mai na fuaiupu atonu e uunia i latou ia tumau i le faatuatua i le Alii. E mafai foi ona latou faasoa mai le ala na latou faia ai patino le filifiliga “po o ai [latou] te auauna i ai” (Iosua 24:15). Aisea na latou faia ai lenei filifiliga?

• E mafai ona e valaaulia tagata o le vasega e filifili se fuaitau mai le Iosua 23–24 e uunaia i latou e filifili e auauna i le Atua ona fatu lea o se pepa lautele o i ai se savali po o se ata o i ai lenei fuaitau e faapipi’i i le fale po o luga o aga fesootai.

Faaleleia o Lo Tatou Aoao Atu

O le tuputupu ae faaleagaga e tupu i le aiga. E tatau ona maua aafiaga faaleagaga a tagata lava ia o le vasega i fafo o le vasega ina ia tumau le malosi faaleagaga. Saili auala e faaaoga ai lou taimi puupuu ma i latou e uunaia ai i latou e saili le faafaileleina faaleagaga i tusitusiga paia i le fale—faaletagata lava ia ma faatasi ma o latou aiga. (Tagai Aoao Atu i le Ala a le Faaola,18).