Tepora ma autau

Ata na tusia o Tepora o loo taitaia autau a Isaraelu, © Lifeway Collection/licensed from goodsalt.com

30 Me–5 Iuni

Faamasino 2–4; 6–8; 13–16

“Ona Faatuina ai lea e Ieova o le Faaola”

Manatua o le faiaoga sili ona taua o le Agaga Paia. E mafai faapefea ona e fesoasoani i tagata o le vasega ina ia aoaoina e le Agaga Paia ao outou talanoaina upumoni mai le tusi o Faamasino?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tusi i le laupapa igoa o nisi o faamasino i le Faamasino 2–4; 6–8; 13–16 (e pei o Tepora, Parako, Kitiona, ma Samasoni). Tuu atu i tagata o le vasega ni nai minute e iloilo ai nei mataupu ma tusi i lalo o se tasi o igoa i le laupapa se upumoni na latou aoaoina mai le aafiaga a lena tagata.

aikona o le aoao atu

Aoao Atu le Aoaoga Faavae

Faamasino 2:11–19; 3:5–12; 4:1–16

Ua ofo mai e le Alii mo i tatou le faaola pe a tatou se ese.

• I le iloiloina o le taamilosaga o le fouvale o Isaraelu, faanoanoa, salamo, ma le faaolaina e mafai ona fesoasoani i tagata o le vasega e iloa le mana o le faaolaina a le Atua i o latou olaga. E mafai e tagata o le vasega ona galulue i ni vaega laiti e sue le taamilosaga ua ta’ua i le Faamasino 2:11–19; 3:5–12. Na faapefea ona faaolaina le aiga o Isaraelu mai lo latou taamilosaga o le agasala ma le puapuaga? O a mea ua tatou aoao mai le tusi o Faamasino i le ala e mafai ai ona tatou sosolaese mai le agasala ma le puapuaga? O a nisi o auala e faaolaina i tatou e le Atua? E mafai foi ona e valaaulia tagata o le vasega e sue ma faasoa mai mau o loo molimau i le Alii o lo tatou Faaola ma le Togiola (mo se faataitaiga, 2 Samuelu 22:1–3; Salamo 40:16–17; 1 Nifae 1:19–20; Mosaea 23:21–23; Mataupu Faavae ma Feagaiga 138:23).

• Ua faamauina i leFaamasino 2:19 faapea na liliuese soo Isaraelu mai le Atua i le ifo i tupua. Atonu e mafai e tagata o le vasega ona otootoina lenei fuaiupu o se lapataiga mo i latou lava. O a ala tatou te “ifo i ai” i “atua ese”? E mafai faapefea ona fesoasoani le Alii ia i tatou e suia lo tatou “faalogogata”?

• Ina ia amata se talanoaga i le ala na faasaoina ai e Tepora ma Parako Isaraelu mai sa Kanana, e mafai ona e fai atu i tagata o le vasega e otooto le tala mo le vasega (atonu e fesoasoani le faafesootai muamua o le tagata o le vasega i ni nai aso ina ia saunia o ia). E mafai e le vasega ona talanoa i uiga o Tepora na uunaia ai i latou. Na mafai faapefea e Tepora ona uunaia le aiga o Isaraelu e mulimuli i le Alii? Atonu e mafai ona outou faitau faatasi le Faamasino 4:14 ma talanoaina le uiga o le folafolaga faamaoni a Tepora: “E lei afio atu ea o Ieova i ou luma?” E faapefea ona afio atu le Alii i o tatou luma? (tagai foi Mataupu Faavae ma Feagaiga 84:87–88).

Faamasino 6–8

E mafai e le Alii ona galue vavega pe a tatou faalagolago i Ona ala.

• O le suesueina o le valaauga o Kitiona e auauna atu e mafai ona uunaia ai tagata o le vasega i a latou lava auaunaga. E mafai ona e fai atu ia i latou e faitau ma talanoaina le Faamasino 6:11–16. O le a se mea e mafai ona tatou aoao mai i lenei aafiaga? Ina ia fesoasoani ia latou aoao mai le Faamasino 7, e mafai ona e valaaulia se tasi pe sili atu o tagata o le vasega e faafoliga o fitafita a Kitiona ma faamatala le tala mai le vaaiga a fitafita. E mafai e isi tagata o le vasega ona fai ia i latou fesili e uiga i aafiaga a fitafita. O a ni mea tutusa tatou te vaaia i le va o lenei tala ma mea o loo tutupu i o tatou olaga? O le a se mea ua tatou aoaoina e uiga i le Alii mai lenei tala?

Faamasino 13–16

E oo mai le malosi i le faamaoni i a tatou feagaiga ma le Atua.

• E mafai faapefea ona e fesoasoani i tagata o le vasega ia iloa upumoni musuia ma lapataiga taua foi mai le tala ia Samasoni? O le tasi ala o le valaaulia o le afa o le vasega e iloilo le Faamasino 14–16 ma vaavaai mo fuaiupu e faaalia faapea o le Alii sa faatasi ma Samasoni. O le isi afa e mafai ona vaavaai mo fuaiupu e faaalia ai o Samasoni sa lei tuuto atoatoa i le Alii. Fai i tagata o le vasega e faasoa mai ni mea sa latou mauaina. O le a le mea ua tatou aoao mai le olaga o Samasoni e uiga i le tausia o feagaiga tatou te osia ma le Atua? Atonu e fesoasoani le saunoaga a Sister Ann M. Dibb i le “Punaoa Faaopoopo”.

  Samasoni o loo tuleiina pou

  Ua Tulei e Samasoni i Lalo Pou, saunia e James Tissot ma isi

aikona o punaoa faaopoopo

Punaoa Faaopoopo

O se lesona mai le olaga o Samasoni.

Na aoao mai Sister Ann M. Dibb: Sa fanau mai Samasoni ma se tulaga gafatia tele. Sa folafola atu i lona tina, “O ia e afua mai ona faaola ia Isaraelu ai lima o Filisitia.” [Faamasino 13:5]. Peitai, a o ola a’e Samasoni, sa tele ina vaavaai atu o ia i faaosoosoga a le lalolagi nai lo le taitaiga a le Atua. Sa ia faia filifiliga ona sa “lelei lava ia i [lona] manatu” [Faamasino 14:3] nai lo le faia o na filifiliga ona e sa’o. O loo faatele, ona faaaoga e tusitusiga paia le faaupuga ‘Ona alu ifo lea’ [Faamasino 14:7] a o faamatalaina ai malaga a Samasoni, o taga, ma filifiliga. Nai lo le tulai ma susulu atu e faatino lona gafatia tele, sa faatoilaloina Samasoni e le lalolagi, ua le maua lona mana na tuuina i ai e le Atua, ma sa vave ona maliu i se maliu matautia” (“Tutulai ma Susulu Atu,” Liahona, Me 2012, 118).

Faaleleia o Lo Tatou Aoao Atu

Faaavanoa se taimi e fefaasoaai ai le au a’oa’o. “A faasoa atu e tagata aoao mea na latou aoaoina, e le gata ina latou lagona le Agaga ma faamalosia a latou lava molimau, ae latou te uunaia isi tagata o le vasega ia iloa upumoni mo i latou lava. … Faaavanoa le taimi mo tamaiti aoga e fefaasoaa’i ai i lesona uma.” (Aoao Atu i le Ala a le Faaola, 30.)