O Le Mea E Te Alu I Ai, saunia e Sandy Freckleton Gagon

6–12 Iuni

Ruta; 1 Samuelu 1–3

“Ua Olioli Lava Lou Loto ia Ieova”

E taua le saunia e aoao atu, ae ia mautinoa o au fuafuaga e aofia ai le tuuina atu o avanoa i tagata o le vasega e faasoa mai mea na latou aoaoina.

Tusi Faamaumau Ou Lagona Uunai

Valaaulia le Fefaasoaai

Ina ia uunaia tagata o le vasega e faasoa mai mea na latou aoaoina i lenei vaiaso, e mafai ona e valaaulia i latou e tusi i le laupapa se upu po o se fuaitau mai le Ruta 1–4 po o le 1 Samuelu 1–3 na uunaia i latou ao latou suesue taitoatasi pe faaleaiga. Faitau ni nai fuaitau leotele, ma fai i tagata o le vasega e faasoa mai pe na faapefea ona uunaia i latou e nei upu ma fuaitau.

Aoao Atu le Aoaoga Faavae

Ruta; 1 Samuelu 1–2

E mafai e Keriso ona liliu faalavelave i se manumalo.

• E ui atonu o i ai ni faigata o au tagata o le vasega taitoatasi e ese mai ia Ruta ma Hana, e mafai ona latou aoao mai ala na tali atu ai nei fafine faatuatua i le oti ma le lototiga. Ina ia fesoasoani ia i latou e faia lenei mea, e mafai ona e vaevae le vasega i ni vaega laiti ma valaaulia i latou e faitau se mataupu mai le Ruta 1–4 po o le 1 Samuelu 1. E mafai ona e tusia i le laupapa, fesili faapenei: O a faigata na feagai ma Ruta po o Hana? Na faapefea ona la faaalia lo la faalagolago i le Alii i na faigata? E mafai e vaega ona vaavaai mo tali i se tasi po o le sili atu o fesili ma faasoa mai mea latou te mauaina. O le a se mea e mafai ona tatou aoao mai i nei tala e uiga i auala e mafai ona fesoasoani mai ai le Alii i o tatou faigata?

  

  O le Tama Nei na Ou Tatalo Atu Ai, saunia e Elspeth Young

• E le o tagata uma e tatalo mo se tama e mauaina, ma e le o tagata uma e feoti taitoalua e toe faaipoipo. Ae o o tatou luitau patino, e tusa lava po o le a, e mafai ona avea ma ni avanoa e liliu atu ai i le Faaola ma faamalosia ai lo tatou faatuatua ia te Ia. E mafai ona e fai i tagata o le vasega e faitau le Ruta 2: 11–12 ma le 1 Samuelu 1:9–11 ma talanoa pe na faapefea ona aafia sootaga a Ruta ma Hana ma le Alii i o la faigata. E mafai foi e tagata o le vasega ona faasoa mai pe na faapefea ona faamalosia lo latou lava faatuatua ona sa latou liliu atu ia Iesu Keriso i taimi o faigata.

  Ina ia lagolagoina lenei talanoaga, e mafai ona e valaaulia se tasi po o le sili atu o tagata o le vasega ia o mai saunia e faasoa mai ni manatu mai se tasi o vaega nei: savali a Sister Reyna I. Aburto “I Mala i Manu, Iesu, Afio Mai!” (Liahona, Nov. 2019, 57–60); le vaega ua faaautu “O le Olioli o le Manumalo e Ala ia Keriso” mai le savali a Elder D. Todd Christofferson “O le O Le Olioli o le Au Paia” (Liahona, Nov. 2019, 16–17); po o upu a Peresitene Elaine S. Dalton i le “Punaoa Faaopoopo.” Fai i tagata o le vasega e faasoa mai mea na latou aoaoina i le ala e mafai ai e faigata ona avea ma avanoa mo le faatuatua sili atu ia Iesu Keriso.

1 Samuelu 2:18–36; 3

E tatau ona tatou faalogo ma usiusitai i le siufofoga o le Alii.

• Atonu e i ai ni tagata i lau vasega e, pei o Samuelu, na faalogo i le siufofoga o le Alii ae lei iloaina o Lona siufofoga lea. E mafai ona e valaaulia tagata o le vasega e iloilo le 1 Samuelu 3, ma vaavaai mo mea na fai e Samuelu e mafai ona fesoasoani ia i tatou ia tatou taumafaiga e faalogo ma usiusitai i le siufofoga o le Alii. E mafai foi ona e fai i ni tagata o le vasega se toalua e faatino le talanoaga i le va o Samuelu ma Eli.

• O nisi taimi tatou te oo ai i se tulaga e pei o Eli—tatou te maua ai se avanoa e fesoasoani i se tasi ia iloa le siufofoga o le Alii. Atonu e mafai ona faasoa mai tagata o le vasega pe na faapefea ona latou faia lea mea mo uo, tagata o le aiga, po o isi. O a mau po o aafiaga ua tatou faasoa atu e fesoasoani i isi ia malamalama i le ala e fesootai mai ai le Alii ia i tatou? (tagai mo se faataitaiga, Mataupu Faavae ma Feagaiga 6:22–23; 8:2–3; 9:7–9).

Punaoa Faaopoopo

E le o tuua na o i tatou.

Na aoao mai Peresitene Elaine S. Dalton:

“O le malaga o le olaga e avea i tatou i nisi taimi i ala e lei faamoemoeina. E i ai felavasai ma pioga i le auala e lei mafaufauina e se tasi o i tatou. Ae faatasi ai ma nei felavasai ma pioga o loo i ai foi se avanoa—avanoa e filifili ai la tatou tali ma la tatou fuafuaga o le faatinoga. O faigata i le olaga e mafai ona avea ma avanoa e fesoasoani ia i tatou e faalatalata atili ai i le Faaola ma faalagolago atili atoatoa ai ia te Ia. I le faagasologa o le ola latalata ia te Ia i aso taitasi, tatou te atiina ae ai ni uiga faaKeriso ma malosiaga. …

“E pei o Ruta ma Hana, o le a tatou aafia uma lava i le fili. Atonu tatou te le malamalama i taimi uma i le mamanu a le Alii mo o tatou olaga, ae o lau molimau e faapea e le tuua lava na o tatou. E faatasi mai pea o Ia ma i tatou, ma ua Ia folafola ia i tatou, “E le mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele” (Mataupu Faavae ma Feaigaiga 58:3).” (“Lesona mai ia Ruta ma Hana,” Ensign, Ape. 2006, 35, 37).

Tagai foi Ioane 14:18; Alema 38:5.

Faaleleia o Lo Tatou Aoao Atu

E le afaina le faapea atu “Ou te le iloa.” Ao tatau ai ona e faia le mea sili e tali ai fesili a tagata o lau vasega, e le faamoemoe le Alii ia te oe e iloa mea uma. Afai ua e le iloa le tali i se mea, tau sao atu ma tuu atu se molimau faamaoni o mea ua e iloa. (Tagai 1 Nifae 11:16–17; Aoao Atu i le Ala a le Faaola,24.)