Tavita talavou ma le maata

Tavita ma Koliata, saunia e Steve Nethercott

Iuni 13–19

1 Samuelu 8–10; 13; 15–18

“O Loo ia Ieova le Taua”

A o e saunia e aoao atu, manatua o tagata o le vasega atonu na oo i ni aafiaga taua i le suesueina o tusitusiga paia i le fale. O le a se mea e mafai ona e faia e atinae ai i luga o na aafiaga?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai mea na latou aoaoina i lenei vaiaso, tuu atu ia i latou se taimi e mafaufau ai i ni uunaiga na latou maua i le 1 Samuelu 8–10; 13; 15–18. Ona fai atu lea ia i latou e faasoa mai se fuaiupu na uunaia se lagona.

aikona o le aoao atu

Aoao Atu le Aoaoga Faavae

1 Samuelu 9:15–17; 10:1–12; 16:1–13

E valaaulia e le Atua le tagata i le valoaga e auauna atu i Lona malo.

• O tala i le filifilia e le Atua o Saulo ma Tavita e ala i le valoaga ma faaaliga e mafai ona fesoasoani i tagata o le vasega e malamalama ai i le ala e filifilia ai tagata e auauna atu i le Ekalesia i le asō. E mafai ona e valaaulia tagata o le vasega e faitau le 1 Samuelu 9:15–17; 10:1–12; ma le 16:1–13, ma vaavaai mo fuaitau na e mafai ona fesoasoani ia i latou e malamalama ai i le uiga o le “valaaulia e le Atua” (Mataupu Faavae o le Faatuatua 1:5). O le a le eseesega ua ia faia, mo tagata ua valaaulia ma i latou e lagolagoina i latou, ia iloa e filifilia e le Atua tagata e auauna atu i Lana Ekalesia?

  Ua faauuina Saulo e Samuelu

  Ata tusi o Samuelu o loo faauuina Saulo, © Lifeway Collection/licensed mai goodsalt.com

1 Samuelu 13:5–14; 15

“O le faalogo e sili lea i le taulaga.”

• Ina ia talanoaina pe aisea e taua ai le usiusitai i le Alii, e mafai ona e valaaulia le vasega e iloilo le 1 Samuelu 13:5–14 ma vaavaai mo uiga ma amioga na taitai atu i le pa’ū o Saulo. O le a se mea e mafai ona tatou aoao mai mea sese a Saulo?

• Ao tatou le iloa uma mafuaaga na poloaiina ai Saulo e fasioti uma sa Amalekia ma a latou manu, e i ai lesona e aoaoina mai lana tali i lena poloaiga. Ina ia fesoasoani i tagata o le vasega ia iloa nei lesona, e mafai ona e tusia i le laupapa O le faalogo e sili i le … ma valaaulia tagata o le vasega e mafaufau loloto i lenei fuaitau ao outou iloiloina faatasi mea na tutupu mai le 1 Samuelu 15. O a nisi o mea lelei tatou te faia i o tatou olaga tatou te filifilia i nisi taimi nai lo le usiusitai i le Atua? Aisea e sili atu ai i le Atua le usiusitai nai lo isi na mea lelei?

1 Samuelu 16:6–7

“E vaai Ieova i le loto.”

• A uma ona faitau le 1 Samuelu 16:6–7, e mafai e tagata o le vasega ona faasoa mai o latou manatu i le uiga o le vaai “i le loto” (fuaiupu 7). E mafai faapefea ona tatou aoao e vaai i le ala e silasila ai le Alii? E mafai e tagata o le vasega ona faasoa mai aafiaga na aoaoina ai i latou i le taua o le vaai i le loto nai lo le foliga o le tino.

1 Samuelu 17

E mafai e le Alii ona fesoasoani ia i tatou e faatoilalo soo se luitau.

• I le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga, atonu na mafaufau loloto tagata o le vasega i upu a tagata eseese i le 1 Samuelu 17. Mafaufau e fai i le vasega e faasoa mai mea na latou aoaoina mai lenei gaoioiga. E faapitoa lava, oa mea na latou aoaoina e uiga ia Tavita?

• O nisi tagata o lau vasega atonu o feagai ma ni luitau e ono foliga mamafatū e pei ona faia e Koliata ia Saulo ma lana autau. E mafai faapefea ona e faaaoga le tala ia Tavita ma Koliata e fesoasoani ai i tagata o le vasega e taulima o latou luitau ma le faatuatua i le Alii? E mafai ona e faaali atu se ata o Tavita ma Koliata (e pei o loo i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga.). Ona mafai lea e tagata o le vasega ona lisi i le laupapa nisi o mea e mafai ona avea ma ni “Koliata” i o tatou aso. Ona mafai lea ona sue fuaiupu i le 1 Samuelu 17 o loo faaalia ai le faatuatua o Tavita, na mafai ai ona ia faatoilalo Koliata (tagai foi i le faamatalaga i le “Punaoa Faaopoopo“). Atonu e mafai e tagata o le vasega ona fefaasoaai aafiaga na latou lagona ai le fesoasoani o le Alii e tau a latou taua.

aikona o punaoa faaopoopo

Punaoa Faaopoopo

Faatoilaloina o o tatou Koliata.

Na aoao mai Peresitene Gordon B. Hinckley:

“O loo i ai Koliata faataamilo ia oe, o ni sau’ai maualuluga ma ni faamoemoega leaga e faaumatia oe. E le oni alii tai iva-futu le uumi, ae o alii ma faapotopotoga e pulea mea matagofie ae leaga e ono luitau ma faavaivaia ma faaumatia ai oe. …

“… Ae e le tatau ona e fefe pe a i ai lau maatā o le upumoni i ou lima. … O loo ia te oe maa o le mamā a’ia’i ma le mamalu ma le amio sa’o e faaaoga i nei fili o ē mananao e pulea oe. E tusa ai ma lou malosi, e mafai ona e togi sao lava i latou ‘i le va o mata,’ e faaaoga ai le gagana faafaatusa. E mafai ona outou manumalo ia i latou e ala i le aotauina o outou lava e aloese mai ai. E mafai ona e fai atu ia i latou uma lava e pei ona fai atu Tavita ia Koliata, ‘Ua e sau ia te au ma le pelu ma le tao, ma le tao leoleo; ao au, ou te alu atu ia te oe i le suafa o Ieova o ‘au, o le Atua o le itu taua a Isaraelu ua e faifai i ai‘ [1 Samuelu 17:45]” (“Faataoilaloina o Koliata i o Tatou Olaga,” Ensign, Me 1983, 46, 51).

Faaleleia o Lo Tatou Aoao Atu

O lou valaauga ua musuia. I le avea ai ma se faiaoga, ua valaauina oe e le Alii e faamanuia Lana fanau. A o e ola agavaa i Lana fesoasoani, o le a Ia tuu atu ia te oe le faaaliga e te sailia. (Tagai Aoao Atu i le Ala a le Faaola, 5.)