Tupu o Tavita ua Faapaleina, saunia e Jerry Miles Harston

Iuni 20–26

2 Samuelu 5–7; 11–12; 1 Tupu 3; 8; 11

“Ou te Faatumauina Lou Malo e Faavavau”

A o e suesueina tusitusiga paia, ia saili ma le agaga tatalo ia iloa po o a mataupu faavae o le a sili ona taua i tagata o lau vasega ina ia mafai ona e taulai atu i o latou manaoga.

Tusi Faamaumau Ou Lagona Uunai

Valaaulia le Fefaasoaai

Ina ia iloa po o a mea na maua e tagata o le vasega e aoga i la latou suesuega faaletusipaia, e mafai ona e fai ia i latou e tusi le mau fesootai mo se fuaitau na uunaia i latou i fasi pepa ona tuu lea o pepa i se fagu. Ona mafai lea e tagata o le vasega ona filifili pepa mai le fagu, ona faitau lea e le vasega ma talanoaina fuaitau.

Aoao Atu le Aoaoga Faavae

2 Samuelu 6:1–8

E tatau ona tatou faia le galuega a le Atua i Lana ala.

• E mafai ona e fai i tagata o le vasega e faitau le 2 Samuelu 6:1–8 ma mafaufau po o a lapataiga e ono i ai i lenei tala mo i tatou i aso nei. O le saunoaga a Polika Iaga i le “Punaoa Faaopoopo” e mafai ona fesoasoani. Oa nisi o auala e mafai ona tatou taumafaia e fai ai le galuega a le Alii i se ala e ese mai lea na Ia faasinoina? Aisea e lamatia ai lenei mea? Atonu e mafai e tagata o le vasega ona faasoa mai ni aafiaga na latou aoao ai e faalagolago i le faatonuga a le Alii ua tuuina mai mo le faataunuuina o Lana galuega.

2 Samuelu 11

E tatau ona tatou nofouta i taimi uma faasaga i le agasala.

• O le aoao mai filifiliga matautia a Tavita i le 2 Samuelu 11 e mafai ona fesoasoani ia i tatou e aloese ai mai measese faapena. Atonu e mafai e le vasega ona faitau faatasi le 2 Samuelu 11:1–17 ma faailoa filifiliga na faia e Tavita na taitaia o ia i le agasala. O le a se mea sa mafai ona ese le faia e Tavita? E mafai foi ona e fai i tagata o le vasega e tusi i lalo se fuaiupu e mafai ona fesoasoani e uunaia se tasi e aloese mai agasala, e faavae i mea na latou aoaoina mai le 2 Samuelu 11. Valaaulia ni nai tagata o le vasega e faasoa mai o latou manatu.

• E mafai ona e faaaogaina le 2 Samuelu 11 e talanoaina le lamatia o ponokalafi ma isi agasala feusuai. Ina ia faia lenei mea, e mafai e le vasega ona iloilo faatasi vaega o le savali a Elder L. Whitney Clayton “Amuia i Latou Uma e Loto Mama” (Liahona, Nov 2007, 51–53). O le a le fautuaga ua tuuina mai e Elder Clayton e uiga i le lamatia o ponokalafi? E mafai foi ona e matamata i le vitio “To Look Upon” (ChurchofJesuChrist.org). E mafai faapefea e le Faaola ona fesoasoani ia i tatou e faatoilalo nei faaosoosoga po o amioga?

  Atonu e mafai e tagata o le vasega ona faasoa mai ni manatu na latou maua e aoga ia latou taumafaiga e puipuia o latou aiga mai ponokalafi pe faatoilalo aafiaga o ponokalafi. E mafai ona fesoasoani le savali a Sister Linda S. Reeves, “Puipuiga mai Ponokalafi—o se Aiga e Taulai Atu ia Keriso” (Liahona, Me 2014, 15–17; tagai foi “Punaoa Faaopoopo”).

O le malumalu o le maota o le Alii.

1 Tupu 8:22–61

E aumaia e malumalu faamanuiaga.

• Ua faamatalaina e le1 Tupu 8 faamanuiaga na sailia e Solomona mo lona nuu ina ua maea le malumalu. E mafai ona e vaevae fuaiupu 22–61 i tagata o le vasega ma fai atu ia i laotu e faasoa mai se mea na latou maua ia latou fuaiupu ua uunaia ai i latou ia latou tapuaiga i le malumalu. E mafai e tagata o le vasega ona faasoa mai pe faapefea ona faamanuiaina o latou olaga i le tapuaiga i le maota o le Alii.

1 Tupu 8:61; 11:1–11

“Na le atoatoa lona loto ia Ieova.”

• O le a le uiga o le “ia atoatoa [o tatou] loto ia Ieova”? (1 Tupu 8:61). Pe ese lena mai a tatou faatinoga ua atoatoa? E faapefea? A o mafaufau loloto tagata o le vasega i nei fesili, e mafai ona latou faitau le 1 Tupu 11:1–11 ma iloa ai le fetalaiga a le Alii i le loto o Solomona. E faapefea ona tatou aloese mai measese na ia faia?

Punaoa Faaopoopo

Taofia o le atolaau.

Na aoao mai Peresitene Polika Iaga: “Tuu pea ia le Malo, tuu atu i le Alii e taofia le atolaau; afai e maluelue, ma foliga mai e manaomia le taofia, afai ua tifatō le ala i nisi taimi, ma ua foliga mai lava ua lamatia lona masaa, ia faaeteete i le ala e faaloaloa atu ai lou lima e taofia; aua tatou te soona aafia fua i mea tatou te le aia i ai; tuu ai pea, o le galuega lena a le Alii”(Discourses of Brigham Young, sel. John A. Widtsoe [1954], 66).

Puipuia o aiga mai ponokalafi.

Na aoao mai Sister S. Reeves: “E faapefea ona tatou puipuia a tatou fanau ma talavou? O faamama o ni meafaigaluega aoga, ae o le faamama silisili i le lalolagi, ma e na o le pau lea o le mea o le a iu ina aoga, o le faamama lea e i totonu o le tagata lava ia lea e oo mai i se molimau loloto ma tumau i le alofa o lo tatou Tama Faalelagi ma le taulaga togiola a lo tatou Faaola mo i tatou taitoatasi” (Puipuiga mai Ponokalafi—o se Aiga e Taulai Atu ia Keriso,” Liahona, Me 2014, 16; tagai foi Joy D. Jones, “Talanoaina o Ponokalafi: Puipui, Tali, ma Faamalolo,” Liahona, Oke. 2019, 22–27).

Faaleleia o La Tatou Aoao Atu

Ia mautinoa o e aoao atu aoaoga faavae moni. “Faaauau ona e fesili ia te oe lava, ‘E faapefea e mea o loo ou aoaoina ona fesoasoani i tagata o lau vasega e fausia le faatuatua ia Keriso, salamo, osia ma tausia feagaiga ma le Atua, ma maua le Agaga Paia?’ ” (Aoao Atu i le Ala a le Faaola, 20).