Me 2–8

Esoto 35–40; Levitiko 1; 16; 19

“E Paia i le Alii”

Ao e maua ni aafiaga aoga i le suesueina o tusitusiga paia, o le a mafai ona e aoao atu ma molimau atu pe a outou fono ma tagata o le vasega i le Aso Sa. O le a se mea e mafai ona e faia e uunaia ai tagata o le vasega ia faia lea lava mea e tasi?

Tusi Faamaumau Ou Lagona Uunai

Valaaulia le Fefaasoaai

O mataupu i le faitauga o lenei vaiaso e faaaoga ai faailoga e aoao ai e uiga ia Iesu Keriso ma Lana taulaga togiola. E mafai ona e amata le vasega i le valaaulia o tagata o le vasega e tusi se mea na latou maua po o se ata i le laupapa mai le Esoto 35–40 po o le Levitiko 1; 16; 19 na aoaoina i latou e uiga i le Faaola. Valaaulia i latou e talanoa i mea na latou aoaoina.

Aoao Atu le Aoaoga Faavae

Esoto 35–40

E finagalo le Alii ia tatou paia e pei o Ia.

• A o suesue e tagata o le vasega le Esoto 35–40 i lenei vaiaso, atonu na latou mafaufau loloto i le ala na liliu ai o latou manatu e elemene o le falefetafa’i anamua ia Iesu Keriso. Afai na latou faia, uunaia i latou e faasoa mai o latou manatu. O le ata i le otootoga o lenei vaiaso i le Sau, Mulimuli Mai ia te Au—Mo Tagata Taitaoatasi ma Aigae mafai ona fesoasoani i lenei talanoaga. E mafai foi ona outou talanoa po o a mea ua aoao mai e nei faailoga e fesootai i le falefetafa’i e uiga i le avea ma e sili atu ona paia. E faapefea ona fesoasoani Iesu Keriso ia i tatou ia avea ma e sili atu ona paia?

• Mo le toatele, o le manatu e avea ma e sili atu ona paia e foliga mai e mamao lava. O le a faapefea ona e fesoasoani i tagata o le vasega ia malamalama o le avea ma e paia o se vaega o le fuafuaga a le Tama Faalelagi mo i tatou? E mafai ona outou faitau faatasi le saunoaga a Peresitene Henry B, Eyring i le “Punaoa Faaopoopo.” O le a le uiga o le avea ma e paia? Ua faapefea ona fesoasoani o tatou malumalu o aso e gata ai ma galuega tatou te faia iina ia i tatou ia avea ma e sili atu le paia? (tagai foi Mataupu Faavae ma Feagaiga 84:19–24; 109:6–26; 128:15–18). Ona mafai lea ona e fai i tagata o le vasega e faasoa mai pe faapefea e nei mea ona fesoasoani ia i latou—po o isi latou te iloa—ia avea ma e sili atu le paia.

• O le falefetafa’i a Isaraelu i le vao e tutusa i le tele o ala ma a tatou malumalu o aso e gata ai. E mafai ona e valaaulia tagata o le vasega e lisi mea na latou aoaoina e uiga i le falefetafa’i i le Esoto 35–40 e faamanatu mai ai ia i latou o tatou aafiaga i totonu o le malumalu. Afai latou te manaomia le fesoasoani, e mafai ona e faasino i latou i fuaiupu i le Esoto 40 e faatatau i se ie puipui, fatafaitaulaga, ofu sa, mulumuluga, ma faauuga. E faapefea ona fesoasoani le malumalu ia i tatou e o mai ia Keriso? O le a se mea e mafai ona tatou faia e taulai atu ai lo tatou taimi i totonu o le malumalu ia te Ia?

Levitiko 1:1–9; 16

E ala i le Togiola a Iesu Keriso, e mafai ai ona faamagaloina i tatou.

• E ui lava o le manatu o le taulaga i manu atonu e foliga ese ia i tatou i le aso, e tele naua mea e mafai ona tatou aoao mai lenei faatinoga e uiga i le taulaga togiola a Iesu Keriso. Ina ia amata se talanoaga, e mafai ona e faaali atu ni nai ata o le Faaola i Ketesemane ma luga o le satauro (tagai Tusi Ata o le Talalelei, nu. 56, 57). E mafai e tagata o le vasega ona faasoa atu ni upu latou te lagona e fesootai i le taulaga togiola a Iesu Keriso. Ona valaaulia lea o tagata o le vasega e iloilo le Levitiko 1:1–9 po o Levitiko 16, lea e faamatala mai ai taulaga i manu, ma sue upu latou te lagona e fesootai foi i le taulaga a le Faaola. E mafai faapefea e nei taulaga anamua ona fesoasoani ia i tatou e malamalama atili ai i le Togiola a Iesu Keriso? E mafai e tagata o le vasega ona usu se viiga e uiga i le Faaola ma faasoa mai o latou lagona e uiga ia te Ia.

  

  Na tuuina mai e le fanauga a Isaraelu taulaga mo le falefetafa’i faatasi ma “le manatu i ai i lona loto” Esoto 35:5). Ata na tusia e Corbert Gauthier, © Lifeway Collection/licensed from goodsalt.com

• Atonu e aoga mo tagata o le vasega le faatusatusa o taulaga na manaomia e le Alii i taimi o le Feagaiga Tuai ma taulaga ua Ia finagalo tatou te faia i aso nei. mo se faataitaiga, e mafai ona latou lisiina auala tatou te faia ai taulaga mo le Alii ma Lana galuega, e pei o le auauna i ni valaauga, totogi taulaga anapogi, fai galuega o talafaasolopito o aiga, po o le auauna atu i le tasi ma le isi. Ona mafai lea ona outou faitau faatasi le Levitiko 1:1–9 ma valaaulia tagata o le vasega e vaavaai mo elemene o taulaga ua taua i nei fuiaupu e mafai ona fesootai i taulaga ua finagalo le Alii tatou te tuuina atu i le asō (tagai 3 Nifae 9:19–20; Mataupu Faavae ma Feagaiga 64:34). O a mea e mafai ona tatou aoao mai le Mose 5:7 i le ala e tatau ona tatou vaai ai ia tatou taulaga mo le galuega a le Alii?

Punaoa Faaopoopo

E mafai e le Atua ona faia i tatou ia paia.

Na aoao mai Peresitene Henry B. Eyring:

“E oo mai le fiafia sili mai le paia faaletagata sili atu. … Ua aoao mai tusitusiga paia ia i tatou e faapea, faatasi ma isi mea, e mafai ona faapaiaina i tatou pe sili atu ona paia pe a tatou faatinoina le faatuatua ia Keriso, faaalia lo tatou usiusitai, salamo, ositaulaga mo Ia, mauaina o sauniga paia, ma le tausia o a tatou feagaiga ma Ia. …

“O le viiga ‘Faapa’ia Mai Au’ [Viiga, nu. 70] ” ua fautuaina mai ai se auala e tatalo ai mo se fesoasoani ina ia avea atili ma tagata paia. O lē na tusia ua fautua mai ma le atamai faapea o le paia tatou te sailia o se meaalofa mai se Atua alofa, e tuuina mai lava, pe a mavae mea uma tatou te mafaia” (“O le Paia ma le Fuafuaga o le Fiafia,” Liahona, Nov. 2019, 100–101, 103).

Faaleleia o Lo Tatou Aoao Atu

Faaaoga musika paia. O savali i totonu o viiga e mafai ona faamalosia ai le aoaoga faavae i tusitusiga paia. Mo se faataitaiga, o le usuina o se viiga e pei o le “Faapaia Mai Au” po o le “Ou Te Tu Ma Ofo” (Viiga, nu. 70, 107) e mafai ona faamalosia nisi o savali ua aoaoina i le Levitiko 16 ma le 19.