Ata o Iosefa o Aikupito, tusia e Robert T. Barret

14–20 Mati

Kenese 42–50

“A o le Atua na Finagalo o Ia ia Iu i le Lelei”

Na saunoa mai Elder David A. Bednar, “O le malamalama faaleagaga e faamanuiaina ai oe ma au ia maua … e le mafai lava ona tuuina atu i se isi tagata” (“Saili e Aoao e Ala i le Faatuatua,” Liahona, Set. 2007, 67). O le a faapefea ona e fesoasoani i tagata o le vasega ia maua le malamalama faaleagaga mo i latou lava?

Tusi Faamaumau Ou Lagona Uunai

Valaaulia le Fefaasoaai

Ina ia tuuina atu i tagata o le vasega se avanoa e faasoa ai se mea na latou maua e aoga ia latou suesuega patino pe faaleaiga, e mafai ona e fai atu fesili e pei o nei i le amataga o le vasega: O le a le fuaiupu i nei mataupu na ta’ina i ai lau taulai? O le a le fuaiupu na e mauaina e oe lava ua faitauina e silia ma le faatasi? O le a se fuaiupu na e faasoa atu i se tasi? O le a se fuaiupu na taitai atu ai i se talanoaga anoa ma lou aiga po o uo?

Aoao Atu le Aoaoga Faavae

Kenese 45:1–15; 50:15–21

O le faamagaloga e aumaia le filemu.

• Ae lei amataina se talanoaga e uiga i mea ua aoao mai i aafiaga o Iosefa e uiga i le faamagaloga, e mafai ona fesoasoani pe a faamatala faapuupuu mai e se tasi le tala i le Kenese 37; 39–45. Aisea na ono faigata ai mo Iosefa ona faamagalo ona uso? O a aafiaga po o uiga na ono tuuina atu ai ia Iosefa le malosi e faamagalo ai? (tagai, mo le faataitaiga, Kenese 45:1–15 po o le 50:15–21). E mafai faapefea e le faataitaiga a Iosefa ona fesoasoani ia i tatou ia sili atu le faamagalo atu?

  Ua saunia e le vitio “Forgiveness: My Burden Was Made Light” (ChurchofJesusChrist.org) se isi faataitaiga musuia o le faamagaloga. E faapefea ona fesoasoani le Faaola ia i tatou ia faamagalo atu i isi?

• O a faamanuiaga na maua mai le faamagaloga e Iosefa o ona uso? Atonu e malie le faatusatusa o sootaga i le aiga o Iakopo i le amataga o le tala (tagai, mo se faataitaiga, Kenese 37:3–11) ma lo latou tulaga i le faaiuga (tagai Kenese 45:9–15; 50:15–21). O le a le matafaioi na faia e le faamagalo atu i le suiga o le aiga o Iosefa? E ono faapefea ona ese le iuga pe ana faapea e le naunau Iosefa e faamagalo atu? E mafai ona e valaaulia tagata o le vasega e fautua mai ni auala e mafai ai e lenei tala ona fesoasoani i aiga i le asō e faatoilalo le fefinauai ma le lotoleaga.

Kenese 45:5–11; Faaliliuga a Iosefa Samita, Kenese 50:24–38 (i le faaopoopoga i le Tusi Paia)

Ua molimau mai galuega a Iosefa, Mose, ma Iosefa Samita i le misiona a Iesu Keriso.

• Faatasi ai ma le malamalama faaopoopo o le talalelei toefuataiina, ua tatou iloa o Iosefa, lea na faasaoina lona aiga mai le oge, na vavalo foi i faamanuiaga sili o le oo mai i se aso e ala mai ia Mose ma Iosefa Samita. Ma o perofeta uma nei na faasino atu i tatou i lo tatou Faaola Sili, o Iesu Keriso. Ina ia fesoasoani i tagata o le vasega ia vaai i le Faaola i galuega talai a nei perofeta e toatolu, e mafai ona e tusia se siata i luga o le laupapa e pei o lena e i le “Punaoa Faaopoopo.” E mafai e tagata o le vasega ona galulue faatasi e faatumu. Ona mafai lea ona latou faaopoopo ni koluma e faamatala ai le galuega a Iosefa i Aikupito, Mose, ma Iosefa Samita, e faaaoga ai mea na latou aoao mai le Kenese 45:5–11 ma le Faaliliuga a Iosefa Samita, Kenese 50:24–38 (i le faaopoopoga o le Tusi Paia). E faapefea ona molimau mai galuega talai a nei perofeta ma faasino atu i le misiona a le Faaola? (Mo nisi o faataitaiga o mea e tutusa ai le olaga o Iosefa o Aikupito ma le soifuaga o le Faaola, tagai Kenese 37:3 ma le Mataio 3:17; Kenese 37:26–28 ma le Mataio 26:14–16; Kenese 45:5–7 ma le Luka 4:18; ma le Kenese 47:12 ma le Ioane 6:35; tagai foi Mose 6:63.)

  

  Ata o Iosefa o Aikupito, na tusia e Paul Mann

Kenese 50:19–21

E mafai ona fesoasoani le Atua ia i tatou ina ia maua se faauigaga i o tatou tofotofoga.

• E ui atonu e lei manino mai ao ia feagai ma ona tofotofoga ogaoga, na iu lava ia mafai ona toe tepa i tua i ona puapuaga i Aikupito ma vaai ai faapea “Ao le Atua na finagalo o ia ia iu i le lelei” (Kenese 50:20). Ana mafai ona tatou asiasi ia Iosefa ao i ai i le lua po o totonu o le falepuipui, semanu pe faapefea ona tatou faamafanafanaina o ia? E mafai faapefea e le manatu i le Kenese 50: 19–21 ona fesoasoani ia i tatou i taimi o tofotofoga? Atonu o le a loto tagata o le vasega e talanoa i auala na faamanuiaina ai i latou e le Atua, e oo lava i aafiaga faigata na latou oo i ai. Mo se tasi faataitaiga, tagai i le vitio “Unto All the World: The Sam Family” (ChurchofJesusChrist.org). O le a le mea ua faaopoopo e le Mataupu Faavae ma Feagaiga 122 i lo tatou malamalama i lenei mataupu faavae?

Punaoa Faaopoopo

Ua molimau mai olaga o perofeta ia Iesu Keriso ma Lana misiona.

O olaga o Iosefa o Aikupito, Mose, ma Iosefa Samita e mafai ona faamanatu mai ai ia i tatou Iesu Keriso. E mafai e tagata o le vasega ona faatumu lenei kata ona faaopoopo lea o koluma mo Iosefa i Aikupito (tagai Kenese 45:5–11), Mose (tagai Faaliliuga a Iosefa Samita, Kenese 50:24, 29, 34–36 [i le faaopoopoga o le Tusi Paia]), ma Iosefa Samita (tagai Faaliliuga a Iosefa Samita, Kenese 50:26–28, 30–33 [i le faaopoopoga i le Tusi Paia]).

	Iesu Keriso
O ai na laveaiina mai?
O le a le mea na laveaiina mai ai i latou?
O le a se mea na faia na laveaiina ai i latou?

Faaleleia o Lo Tatou Aoao Atu

Fai ni fesili e valaaulia ai molimau. O le faia o fesili e uunaia ai tagata aoao e tuu mai a latou molimau e mafai ona avea o se ala lelei e valaaulia ai le Agaga. Mo se faataitaiga, pe a aoao atu le Kenese 45:1–15, e mafai ona e fai atu se fesili e pei “O a faamanuiaga ua e oo i ai ona o le faamagaloina o se tasi?” (tagai Aoao Atu i le Ala a le Faaola, 32).