Iosepha nō Aiphiti i roto i te fare tāpe’ara’a

Fa’ahōho’ara’a nō Iosepha nō Aiphiti i roto i te fare tāpe’ara’a, nā Jeff Ward

7–13 nō Māti

Genese 37–41

« Tei ia Iosepha ra Iehova »

’Aita ’oe e tītauhia ’ia ha’api’i i te mau ’ohipa ri’i ato’a i roto i teie arata’i ha’api’ira’a. ’A fa’aineine ai ’oe nō te ha’api’i, ’a pure ’ia tauturu mai te Vārua ia ’oe ’ia ’ite e aha te mau ’ohipa ri’i (mai te mea tē vai ra) i roto i teie arata’i ha’api’ira’a, e pāhono maita’i a’e i te mau hina’aro o te piha ha’api’ira’a.

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te fa’aitoito i te mau pīahi ’ia fa’a’ite mai e aha tā rātou i ’apo mai i roto i tā rātou tuatāpapara’a ta’ata hō’ē ’e te ’utuāfare, e nehenehe ’oe e ani ia rātou ’ia ’imi mai i te hō’ē pereoda i roto i te Genese 37–41 ’o tē hōhora nei i te hō’ē ha’api’ira’a ’aore rā i te hō’ē parau tumu tā rātou e mana’o nei e mea faufa’a rahi.

’ītona ha’api’ira’a

Ha’api’i i te ha’api’ira’a tumu

Genese 37:1–28 ; 39 ; 40:1–19 ; 41:9–45

« Tei ia Iosepha ra Iehova » i roto i tōna ’ati.

• Mai ia Iosepha te huru, tē fa’aruru nei paha te mau pīahi i te mau fifi rahi. Nō te tauturu i te piha ha’api’ira’a ’ia ’ite mai i te fa’aurura’a i roto i te hi’ora’a o Iosepha, e nehenehe ’oe e vāhi i te piha ’ei toru pupu ’e e ani i te pupu tāta’itahi ’ia hi’o fa’ahou hō’ē o te mau tai’ora’a ’īrava i muri nei : Genese 39 ; 40:1–19 ; ’aore rā 41:9–45. I muri iho te pupu tāta’itahi e fa’a’ite mai ai i te huru tei ia Iosepha ra te Fatu, i roto i tōna mau tāmatara’a. ’Ia tano ana’e, e nehenehe te mau pīahi e fa’a’ite mai i te mau ’itera’a, ’a vai ai te Fatu ia rātou ra i roto i te hō’ē fifi rahi. Nāhea tātou i te ha’api’i mai ’ia ’ite maita’i a’e tei roto te Fatu i tō tātou orara’a ?

• E tauturu teie ha’api’ira’a tao’a i te fa’ahōho’ara’a e nāhea tātou i te fa’a’oroma’i i te ’ati : E tu’u i te hō’ē tao’a māmā, mai te hō’ē pōpō ’ūrina, i raro a’e roa i roto i te hō’ē fa’ari’i tei fa’a’ī-’āfa-hia i te raiti marō ’aore rā i te pipi. E ani i te hō’ē ta’ata e ueue marū i te fa’ari’i ē tae roa e fāura mai te pōpō i ni’a. Nāhea Iosepha e tū’ati ai i te pōpō ? ’Ua nehenehe i te mau pīahi e fa’a’ite mai i te mau hi’ora’a ’a tauturu ai te Fatu ia Iosepha ’ia fa’a’oroma’i i te ’ati nā roto mai i te Genese 37:5–11 ; 39 ; 40:1–19 ; 41:9–45. E nehenehe ato’a ia rātou e fa’a’ite mai i te mau taime ’a tauturu ai te Fatu ia rātou mai te reira.

• E ani na i te mau pīahi ’ia hīmene ’aore rā ’ia tai’o i te mau parau o te hō’ē hīmene nō ni’a i te ravera’a i te mau mā’itira’a tano, mai te hīmene « ’A ha’apa’o » (Te mau Hīmene n°143). I muri iho e ’imi mai te mau pīahi i te mau mana’o ’aore rā te mau pereota i roto i te Genese 37:1–28 ; 39 ; 40:1–19 ; 41:9–45 e fa’ahōho’a i te mau parau o te hīmene. Nāhea Iosepha i te ha’amaita’ira’ahia, noa atu tōna ’ati, ’a rave ai ’oia i te ’ohipa ti’a ? Ahea ra tō te Fatu ha’amaita’ira’a ia tātou i roto i te mau taime ’ati nō te ravera’a i te ’ohipa ti’a ?

Genese 37:5–11 ; 40 ; 41:1–38

Mai te peu e vai ha’apa’o maita’i tātou, e arata’i te Fatu ’e e fa’auru ia tātou.

• Noa atu ē ’aita te mau ta’ata ato’a e fāri’i i te heheura’a o te ta’ata iho nā roto i te moemoeā, tē vai ra te mau mea ’o tā tātou e nehenehe e ha’api’i mai nō ni’a i te heheura’a, nā roto mai i te mau ’ohipa i tupu nō Iosepha, te mau tāvini a Pharao, ’e ’o Pharao. E nehenehe e ani i te mau pīahi ’ia hi’o fa’ahou i te Genese 37:5–11 ; 40:5–8 ; 41:14–25, 37–38 ’e ’ia fa’a’ite mai i te mea ato’a tā rātou i ha’api’i mai nō ni’a i te heheura’a. E ani ato’a ia rātou ’ia fa’a’ite mai e aha tei tauturu ia rātou ’ia fa’aineine nō te fāri’i, nō te māramarama ’e nō te ’ohipa mai te au i te heheura’a.

  Iosepha i roto i te fare tāpe’ara’a e tātara ra i te mau moemoeā

  Tē tātara nei Iosepha i te moemoeā o te ta’ata fa’atere fare ’e o te ta’ata tunu faraoa, nā François Gérard

Genese 39:1–20

Nā roto i te tauturu a te Fatu, e nehenehe tātou e horo ’ē i te fa’ahemara’a.

• E ani i te mau pīahi ’ia fa’a’ite mai e aha tā rātou i ’apo mai nō ni’a i te pāto’ira’a i te fa’ahemara’a ’a tai’o ai rātou i te Genese 39 i teie hepetoma. E aha tā Iosepha i rave nō te ’upo’oti’a i ni’a i te fa’ahemara’a (hi’o mau ’īrava 7–12). E hōro’a mai te mau video « Leave the Party [Fa’aru’e i te fa’a’oa’oara’a] » ’e « Dare to Stand Alone [’Ia itoito nō te ti’a ’o ’oe ana’e] »(ChurchofJesusChrist.org) i te mau hi’ora’a nō te feiā tei upo’oti’a i ni’a i te fa’ahemara’a. ’A feruri e ani i te mau pīahi ’ia hāmani i te hō’ē tāpura nō te mau mea tā tātou e nehenehe e rave nō te huti mai i te mana o te Atua ’a fa’aruru ai tātou i te mau fa’ahemara’a. (E nehenehe te mau pīahi e ’ite mai i te mau mana’o i roto i te Mataio 4:1–11 ’aore rā i roto i te mau pāpa’ira’a mo’a i raro a’e i te parau « Fa’ahemara’a » i roto i te Guide to the Scriptures [Arata’i nō te mau pāpa’ira’a mo’a][scriptures.ChurchofJesusChrist.org].)

• Nāhea ’oe i te fa’a’ohipa i te hi’ora’a o Iosepha nō te tauturu i te mau pīahi ’ia pāto’i i te fa’ahemara’a e rave i te hara pae ’āpeni ? Ta’a ’ē noa atu i te hi’o-fa’ahou-ra’a i te Genese 39:1–20, e nehenehe te mau pīahi e māta’ita’i i te video « Chastity: What Are the Limits [Te vi’ivi’i ’ore, e aha te mau ’ōti’a] ? »(ChurchofJesusChrist.org) ’aore rā e hi’o fa’ahou « Te vi’i’ivi’i ore i te pae nō te ’āpeni » (i roto Nō te Pūai o te Feiā ’Āpī [2011], 35–37). E nehenehe rātou e fa’a’ite mai e aha tā rātou i ha’api’i mai nō ni’a i te pāto’ira’a i te mau mana’o, te mau parau ’e e te mau ’ohipa ’o te arata’i i te hara pae ’āpeni. E tauturu te hi’o-fa’ahou-ra’a « Te tātarahapa » (i roto Nō te Pūai o te Feiā ’Āpī, 28–29) i te mau pīahi ’ia māramarama i te rāve’a tā Iesu Mesia i pūpū nō tātou nō te tātarahapa.

Genese 41:15–57

E ti’a ia tātou e fa’aineine nō te mau tau fifi.

• E nehenehe ’oe e ani i te hō’ē pīahi ’ia hōhora mai i te mau moemoeā o Pharao (hi’o Genese 41:15–24) ’e i te hō’ē atu pīahi ’ia hōro’a mai i te tātarara’a a Iosepha (hi’o mau ’īrava 25–32). E aha tā Iosepha e parau nei e rave ? (hi’o mau ’īrava 33–36, 47–49). E aha te mau ha’api’ira’a i roto i teie fa’ati’ara’a e vai ra nō tō tātou ’anotau ? (hi’o i te a’ora’a a te peresideni Gordon B. Hinckley i roto i « Te tahi atu mau rāve’a tauturu »).

ītona te tahi atu mau rāve’a tauturu

Te tahi atu mau rāve’a tauturu

Fa’aineine nō te mau tau fifi.

’Ua parau te peresideni Gordon B. Hinckley ē : « Tē a’o atu nei au ia ’outou ’ia fa’aiti i tā ’outou ha’amāu’ara’a ; ’ia ha’avī ia ’outou iho i roto i tā ’outou mau ho’ora’a mai nō te ’ape i te mau tārahu e ti’a ai. ’A ’aufau vitiviti i tā ’outou mau tārahu mai te mea e ti’a ia ’outou… ’Ia vai te ha’aputura’a mā’a, noa atu ā te na’ina’i » (« To the Boys and to the Men », Ensign, Nov. 1998, 54).

Ha’amaita’ira’a i tā tātou ha’api’ira’a

Te fa’aro’ora’a ’o te hō’ē ïa ’ohipa nō te here. « E ani i te Metua i te Ao ra ’ia tauturu mai ia ’oe ’ia māramarama i te mea tā te mau pīahi e parau ra. ’Ia ha’apa’o maita’i ana’e ’oe i tā rātou mau poro’i i parau-vaha-hia mai ’aore rā ’aita i parauhia, e roa’a ia ’oe ’ia māramarama maita’i a’e i tō rātou mau hina’aro » (Ha’api’ira’a mai tā te Fa’aora,34).