Hiero nō Tijuana (Mēhiko)

28 nō Fepuare–6 nō Māti

Genese 28–33

« E riro tei i’ō nei Iehova »

’A fa’aineine ai ’oe nō te ha’api’i, ’a feruri nā roto i te pure e aha te mau parau tumu i roto i te Genese 28–33 e nehenehe e tauturu roa i te mau pīahi. ’Ua fa’aineinehia te mau mana’o i muri nei ’ei fa’ananeara’a i tā ’oe iho tuatāpapara’a ’e te fa’aurura’a.

Pāpa’i i te mau mana’o e tae mai

ītona fa’a’itera’a

Tītau i te mana’o

Hō’ē ha’amaita’ira’a nō te putuputura’a ’ei piha Ha’api’ira’a Sābati, ’oia ho’i, e nehenehe te mau melo e tauturu i te tahi ’e te tahi ’ia ’ite mai i te aura’a o te mau pāpa’ira’a mo’a. E fa’aitoito i te mau pīahi ’ia fa’a’ite i te ta’ata i pīha’i iho iāna e aha tā te Vārua Maita’i i ha’api’i ia rātou ’a tuatāpapa ai rātou i te mau pāpa’ira’a mo’a i teie hepetoma. E nehenehe e ani ia vetahi ’ia fa’a’ite mai i te piha i te mea tā rātou i paraparau. E nehenehe te reira e riro ’ei vāhi ha’amatara’a maita’i nō te tāu’ara’a parau a te piha ha’api’ira’a.

’ītona ha’api’ira’a

Ha’api’i i te ha’api’ira’a tumu

Genese 28:10–22

I roto i te hiero e rave tātou i te mau fafaura’a ’e te Atua.

• Nāhea ’oe i te tauturu i te mau pīahi ’ia ’ite i te aura’a nō te ’ohipa i tupu nō Iakoba i Betela, mai tei fa’ata’ahia i roto i te Genese 28:10–22 ? E nehenehe rātou e ha’amata nā roto i te hi’o-fa’ahou-ra’a i te Genese 27:41–45 ; 28:1–5 ’e i te ferurira’a i te orara’a o Iakoba i terā tau. E aha ra ïa te mana’o o Iakoba ? I muri iho, e nehenehe te mau pīahi e hi’o i te Genese 28:10–22. Nāhea teie ’itera’a i te ha’amaita’i ia Iakoba ? Nāhea ’oia i te tāmāhanahanara’ahia ? Nāhea te ’ohipa i tupu nō Iakoba e nehenehe ai e fa’auru ia tātou ’a ha’amori ai tātou i roto i te hiero ? E nehenehe ato’a te piha ha’api’ira’a e hīmene, e tai’o ’aore rā e fa’aro’o i te hīmene « ’Ei pīha’i iho vau i tō’u Fatu », tei fa’atumuhia i ni’a i teie mau ’īrava (Te mau Hīmene n°51). E nehenehe rātou e fa’ahiti i te mau parau o te hīmene ’aore rā i roto i te Genese 28:10–22 ’o te fa’aha’amana’o ia rātou i te mau ’ohipa tei tupu nō rātou, i te tāmatara’a rātou i te ha’afātata atu i te Fa’aora.

• Pinepine te ’ē’a pa’uma tā Iakoba i ’ite i roto i tāna moemoeā i te fa’aauhia i te mau fafaura’a o te hiero. Penei a’e e nehenehe ’oe e fa’a’ite ’aore rā e pāpa’i hōho’a i te hō’ē ’ē’a pa’uma ’e te hō’ē hiero. E nehenehe te mau pīahi e hi’o fa’ahou i te Genese 28:10–22 ’e e paraparau e aha tā te ’ē’a pa’uma nō te moemoeā o Iakoba e ha’api’i nei ia tātou nō ni’a i te hiero. E aha atu ā tā tātou e ’ite mai i roto i teie mau ’īrava ’o tē fa’aha’amana’o ia tātou i te mau ha’amaita’ira’a ’o tā tātou e fāri’i nei maoti tā tātou mau fafaura’a o te hiero ? (Hi’o « About the Temple Endowment [Nō ni’a i te ’ōro’a hiero] » ’e « About a Temple Sealing [Nō ni’a i te tā’atira’a hiero] » [temples.ChurchofJesusChrist.org].)

• Nō te tauturu i te mau melo ’ia feruri i ni’a i te mau parau fafau a Aberahama, ’o tā te Fatu i fa’a’āpī ’e ’o Iakoba, e nehenehe e ani ia rātou ’ia tai’o i te Genese 28:10–15 ’e ’ia paraparau e nāhea tātou e nehenehe ai e fāri’i i teie mau ha’amaita’ira’a i teie mahana (hi’o ato’a Genese 12:2–3). E nehenehe ato’a rātou e tai’o i te fa’ahitira’a parau a te peresideni Russell M. Nelson i roto i « Te tahi atu mau rāve’a tauturu », ma te ’imi i te mau ha’amaita’ira’a ’o tē tae mai nā roto i te ravera’a ’e te ha’apa’ora’a i te mau fafaura’a. Nāhea Iakoba i te ha’amaita’ira’ahia i te fāri’ira’a i te mau parau fafau e ’itehia i roto i te Genese 28:10–15 ? E aha te mau tū’atira’a tā tātou e ’ite nei i roto i te mau ’ohipa i tupu i roto i teie mau ’īrava ’e te mau ’ohipa i tupu i roto i te Genese 29 ’e te 30 (te fa’aipoipora’a Iakoba ’e te fānaura’a o tāna mau tamari’i) ? Nāhea te Fatu i te ha’amaita’i ia tātou ’a rave ai tātou ’e ’a ha’apa’o ai i te mau fafaura’a mo’a ?

te tauahira’a Iakoba ’e ’o Esau

Fa’ahōho’ara’a nō te tauahira’a Iakoba ’e ’o Esau, nā Robert T. Barrett

Genese 32–33

E nehenehe te Fa’aora e tauturu ia tātou ’ia upo’oti’a i te ’āmahamahara’a i roto i te ’utuāfare.

• E nehenehe te Genese 32–33 e fa’auru i te mau pīahi ’o tē hina’aro nei e ’ite i te rāve’a fa’aora i roto i tō rātou mau tā’amura’a ’utuafare. E mea maita’i paha e ani i te hō’ē pīahi ’ia ha’apoto mai i te mau ’ohipa i tupu i roto i te Genese 27. Tē vai nei i roto i te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare te mau uira’a nō te feruri ’a tuatāpapa ai i te Genese 32–33. Penei a’e e nehenehe te mau pīahi e mā’iti hō’ē o teie mau uira’a ’e ’ia ’imi mai i te mau pāhonora’a i roto i teie mau pene. E nehenehe ato’a mai te mea e hina’aro rātou, e fa’a’ite mai i te ’ohipa i tupu nō rātou i te ha’apūaira’a i te mau tā’amura’a huru fifi i roto i te ’utuāfare. E fa’aitoito ia rātou ’ia parau mai e mea nāhea te Metua i te Ao ra i te tauturura’a ia rātou.

ītona te tahi atu mau rāve’a tauturu

Te tahi atu mau rāve’a tauturu

E mau tamari’i tātou nō te fafaura’a.

’Ua ha’api’i te peresideni Russell M. Nelson ē :

« I te bāpetizora’a, ’ua fafau tātou ’ia tāvini i te Fatu ’e ’ia ha’apa’o i tāna mau fa’auera’a. ’Ia rave ana’e tātou i te ’ōro’a, tē fa’a’āpī ra ïa tātou i taua fafaura’a ra ’e tē fa’a’ite ra tātou i tō tātou ineine e rave i ni’a iho ia tātou i te i’oa o Iesu Mesia. Nō reira, ’ua fa’a’amuhia tātou ’ei mau tamāroa ’e e mau tamāhine nāna ’e ’ua ’itehia ’ei mau taea’e ’e ’ei mau tuahine. ’O ’oia te metua nō tō tātou orara’a ’āpī. I te pae hope’a, i roto i te hiero mo’a, e nehenehe tātou e riro ’ei fatu ’āi’a nō te mau ha’amaita’ira’a nō te hō’ē ’utuāfare mure ’ore, mai tei fafauhia ia Aberahama, Isaaka, Iakoba ’e tō rātou hua’ai. Nō reira, te fa’aipoipora’a tiretiera, ’o te fafaura’a ïa nō te fa’ateiteira’a.

« ’Ia ’ite ana’e tātou ē e mau tamari’i tātou nō te fafaura’a, e ’ite ïa tātou ’o vai tātou ’e e aha tā te Atua e tīa’i nei ia tātou. ’Ua pāpa’ihia tāna ture i roto i tō tātou ’ā’au. ’O ’Oia tō tātou Atua ’e ’o tātou tōna nūna’a. E vai ’āueue ’ore noa te mau tamari’i nō te fafaura’a, i roto ato’a i te mau taime tāmatara’a. ’Ia tanu-hōhonu-ana’e-hia taua ha’api’ira’a tumu ra i roto i tō tātou ’ā’au, e tāmarūhia te tara o te pohe, ’e e ha’apūaihia tō tātou pūai pae vārua » (Te mau fafaura’a », Liahona, Nov. 2011, 88).

Ha’amaita’ira’a i tā tātou ha’api’ira’a

Tauturu i te mau pīahi ’ia rave mai te au i te mau muhumuhu. « E ’ere te fa’afāriura’a mau i te ’ite-noa-ra’a i te Vārua e ha’apāpū mai i te parau mau i tō tātou vārua ; e mea ti’a roa ato’a rā ia tātou ’ia ’ohipa mai te au i taua mau parau mau ra. Ta’a ’ē noa atu te tauturura’a i te mau pīahi ’ia fāri’i ’e ’ia ’ite i te Vārua, ’a tauturu ia rātou ’ia ha’a mai te au i te mau muhumuhu tā rātou e fāri’i » (Ha’api’ira’a mai tā te Fa’aora, 10).