Mose ’e te pū ’aihere auahi, nā Harry Anderson

21–27 nō Māti

Exodo 1–6

« ’Ua mana’o ho’i au i taua faufa’a nā’u ra »

’A tai’o ai ’oe i te Exodo 1–6, ’a feruri i te feiā tā ’oe e ha’api’i ra. E aha te mau parau mau i roto i teie mau pene e riro ’ei mea faufa’a rahi a’e nō rātou ? Nāhea ’oe i te tauturu ia rātou ’ia ’ite mai i teie mau parau mau ?

Pāpa’i i te mau mana’o e tae mai

Tītau i te mana’o

Hō’ē mana’o nō te fa’aitoito i te mau pīahi ’ia fa’a’ite mai i te mea tā rātou i ha’api’i mai, ’o te pāpa’ira’a ïa i te hō’ē uira’a i ni’a i te tāpura ’ere’ere : ’A tai’o ai ’outou i te Exodo 1–6, e aha tā ’outou e ’ite mai ’o tā ’outou i ’ore na i ’ite nā mua atu ? Ani i te mau pīahi ’ia fa’a’ite mai i tā rātou mau pāhonora’a.

Ha’api’i i te ha’api’ira’a tumu

Exodo 1–2

’O Iesu Mesia tō tātou Ta’ata fa’aora.

• Noa atu ē ’aita i fa’ahitihia te i’oa o te Fa’aora i roto i te Exodo 1–2, e nehenehe teie fa’ati’ara’a e tauturu i te mau pīahi ’ia patu i tō rātou fa’aro’o i roto i tāna misiōni nō te fa’aora ia tātou i te tītīra’a. E nehenehe te mau pīahi e ’ite mai i te mau parau ’aore rā i te mau pereota i roto i te Exodo 1–2 e fa’a’ite ra i te mau ’ati rahi ’o tā te mau ’āti ’Īserā’ela i fa’aruru. Mea nāhea teie mau fa’a’itera’a e tuea ai i te tītīra’a pae vārua ’aore rā i te tahi atu mau ’ati rahi ’o tā tātou e fa’aruru nei ? Nāhea te mau tamari’i a ’Īserā’ela i te ’imira’a i te fa’aorara’a, ’e nāhea tō te Atua pāhonora’a ia rātou ? (hi’o ato’a Exodo 2:23–25 ; 3:7–8). Nāhea i te huti mai i te mana o te Atua ’ia hina’aro ana’e tātou i te fa’aorara’a ? Nāhea te Atua i te pāhono mai i tā tātou mau pi’ira’a nō te tauturu ? E nehenehe te mau pīahi e hi’o i te tahi atu mau mana’o i roto i te a’ora’a a te peresideni Russell M. Nelson « Te hutira’a mai i te mana o Iesu Mesia i roto i tō tātou orara’a » (Liahona, Mē 2017, 39–42).

  

  Mose i roto i te mau ’ōpaero, © Providence Collection/licensed from goodsalt.com

Exodo 3–4

’A rave ai tātou i te ’ohipa a te Fatu, e nehenehe tātou e fāri’i i te mana o te Fatu.

• Tē parau nei te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare e ’imi i roto i te Exodo 3–4 nō te ’ite mai e mea nāhea tō te Fatu pāhonora’a i te mau māna’ona’ora’a ’o Mose nō ni’a i te ’ohipa e fa’aora i te mau ’āti ’Īserā’ela i te tītīra’a. Mai te mea ’ua rave te mau pīahi i teie ’ohipa ri’i i te fare, e ani ia rātou ’ia fa’a’ite mai i te mea tā rātou i ’apo mai. ’Aore rā e nehenehe ’oe e rave i teie ’ohipa ri’i i roto i te piha ha’api’ira’a. Te tanora’a, e ’imi mai te mau pīahi i roto i te Exodo 3:11–18 ; 4:1–17, i te mau māna’ona’ora’a ’o Mose ’e te mau pāhonora’a tāta’itahi a te Fatu . Nāhea te pāhonora’a a te Fatu i te tauturu ia tātou i te taime e fē’a’a ai tātou nō ni’a i tō tātou ’aravihi nō te rave i tāna ’ohipa ?

Exodo 3:5

E ti’a ia tātou e fa’a’ite i te fa’atura nō te mau mea mo’a ’e te mau vāhi mo’a.

• Nāhea ’oe i te fa’a’ohipa i te hi’ora’a o Mose nō te fa’auru i te hō’ē ’āparaura’a nō ni’a i te huru tātou e fa’ariro ai i te mau ’ohipa mo’a ? ’Ei hi’ora’a, i muri iho i te tai’o-’āmui-ra’a i te Exodo 3:5, e nehenehe e pia i te mau tao’a mo’a ’aore rā te mau hōho’a nō te mau ’ohipa mo’a (mai te mau pāpa’ira’a mo’a ’aore rā te mau hiero), ’e te mau tao’a mātauhia ’aore rā te hōho’a o te mau ’ohipa mātauhia (mai te tahi atu mau buka ’aore rā te tahi atu mau fare patu). E nehenehe te mau pīahi e paraparau nō ni’a i te tahi atu mau mea tā rātou e hi’o nei ’ei mea mo’a, ’e ’ia parau mai nāhea rātou i te fa’a’ite i te fa’atura nō taua mau mea ra (hi’o ato’a Levitiko 19:30 ; Te Parau Ha’api’ira’a ’e te mau Parau Fafau 6:10–12). Nō te aha te Fa’aora e hina’aro ai ’ia rave tātou i te mau mea mo’a ma te fa’atura ?

Exodo 5:4–9, 20–23 ; 6:1–13

E fa’atupuhia te mau ’ōpuara’a a te Fatu i tōna iho taime.

• E riro paha e mea fa’atarapape ’ia ’ore ana’e tā tātou mau tauto’ora’a mau nō te rave i te maita’i e tupu maita’i—penei a’e ’aita te hō’ē hoa e pāhono mai i tā tātou mau tauto’ora’a aupurura’a ’aore rā ’aita tā tātou mau pure nō te hō’ē tamari’i tei hahi ’ē e pāhonohia ra. Nō te ha’api’i mai nō ni’a i te hō’ē ’ohipa mai te reira tei tupu nō Mose, e nehenehe te mau pīahi e tai’o i te Exodo 5:4–9, 20–23. Nāhea te Fatu i te tauturura’a ia Mose ’ia ’upo’oti’a i tōna mau mana’o fa’atarapape ? (hi’o Exodo 6:1–13). E nehenehe te mau pīahi e fa’a’ite mai i tō rātou mau ’itera’a ’a ’ore ai rātou i ’ite ’oi’oi i te mau fa’ahope’ara’a nō tā rātou mau tauto’ora’a nō te tāvini i te Fatu. E aha tā te mau ’itera’a ’o Mose i roto i teie mau pene e ha’api’i nei ia tātou nō ni’a i te huru e ti’a ia tātou e pāhono i roto i teie ā mau huru ’ohipa ? (Hi’o ato’a i « Te tahi atu mau rāve’a tauturu »)

Te tahi atu mau rāve’a tauturu

E tāvini tātou ia vetahi ’ē nō te Fatu.

’Ua parau te peresideni Joy D. Jones nāhea ’oia ’e tāna tāne fa’aipoipo i te tāvini-ha’apa’o-maita’i-ra’a i roto i te hō’ē fa’auera’a aupurura’a, e au rā ho’i ’aita tā rāua mau tauto’ora’a i manuia. ’Ua feruri nā ta’ata fa’aipoipo ’e ’ua pure nō te arata’ira’a. I te fa’ati’ara’a nō ni’a i te pāhonora’a o tā rāua pure, ’ua nā ’ō te peresideni Jones :

« ’Ua ’ite a’era māua ē, ’ua tāmata mau māua i te tāvini i teie ’utuāfare ’e i te tāvini i tō māua ’episekōpo, ’ua uiui rā māua ia māua ē, te tāvini mau rā ānei māua ma te here nō te Fatu. ’Ua ha’apāpū mai te ari’i Beniamina i teie ta’a-’ē-ra’a ’a parau ai ’oia, ‘inaha, e parau atu vau ia ’outou na i taua mau mea nei, ’ia ’ite ’outou i te pa’ari ; ’ia ’ite ho’i ’outou ē, ’ua hope ō’u pu’e mahana i te tāvinira’a ia ’outou ra ’aita rā vau i hina’aro i te fa’aahaaha, tē tāvini noa ra ho’i au i te Atua ra’ [Mosia 2:16 ; reta tei fa’ahuru-’ē-hia].

« ’O vai mau tā te ari’i Beniamina e tāvini ra ? Te Metua i te Ao ra ’e te Fa’aora. Te ’itera’a ’o vai ’e nō te aha e tāvini ai ia vetahi ’ē, e tauturu te reira ia tātou ’ia hāro’aro’a ē, te fa’a’itera’a teitei roa a’e nō te here, ’o te hōro’ara’a ïa ia ’oe iho i te Atua » (« Nōna », Liahona, Nov. 2018, 50).

Ha’amaita’i i tā tātou ha’api’ira’a

Fa’a’ite i te mau ’itera’a pae vārua. Hō’ē rāve’a nō te tītau manihini i te mana o te Vārua i roto i tā ’outou piha ha’api’ira’a, ’o te fa’aitoitora’a ïa i te mau pīahi ’ia fa’a’ite mai e aha tā te Vārua Maita’i i ha’api’i ia rātou ’a tuatāpapa ai rātou i te mau pāpa’ira’a mo’a i teie hepetoma.