Fa’ahōho’ara’a nō Mose ’e Aarona i roto i te aora’i nō Pharao, nā Robert T. Barrett

28 nō Māti–3 nō ’Ēperēra.

Exodo 7–13

« E ha’amana’o ’outou i teie mahana, i tae mai ai ’outou mai te fenua mai ra mai Aiphiti »

E ha’amaita’i-rahi-roa-hia atu ā tō ’oe ’aravihi ’ia arata’ihia ’oe e te Vārua i roto i tā ’oe ha’api’ira’a, i te fāri’ira’a i tō ’oe iho mau ’itera’a ma te tuatāpapara’a i te Exodo 7–13.

Pāpa’i i te mau mana’o e tae mai

Tītau i te mana’o

’A feruri i te hō’ē uira’a ’aore rā e piti ’o tē fa’aitoito i te mau pīahi ’ia parau mai i tō rātou mau mana’o ’e te mau ’ohipa i tupu nō rātou ’a tuatāpapa ai i te Exodo 7–13 ’ei ta’ata hō’ē ’e ’ei ’utuāfare. ’Ei hi’ora’a, e nehenehe ’oe e ui : « E aha tā ’outou i tai’o i teie hepetoma tei ha’apūai i tō ’outou fa’aro’o ia Iesu Mesia ? » ’aore rā « E aha tā ’outou i tai’o tei riro ’ei ha’amaita’ira’a nō tō ’outou ’utuāfare ? »

Ha’api’i i te ha’api’ira’a tumu

Exodo 7–12

E nehenehe tātou e mā’iti e tāmarū i tō tātou ’ā’au.

• Nō te tauturu i te mau pīahi ’ia feruri i ni’a i tō rātou hina’aro e hōro’a i tō rātou ’ā’au i te Atua, e nehenehe e ani ia rātou ’ia tai’o tāta’itahi i te hō’ē o te mau ’īrava i muri nei : Exodo 7:14–25 ; 8:5–15 ; 8:16–19 ; 8:20–32 ; 9:1–7 ; 9:8–12 ; 9:22–26 ; 10:12–15 ; 10:21–29 ; 12:29–33. I muri iho, e nehenehe rātou e pāpa’i i ni’a i te tāpura ’ere’ere i te mau ta’o ’aore rā i te mau pereota e fa’a’ite nei nāhea Pharao i te pāhonora’a i nā ’ahuru pohe tei tonohia mai e te Atua i ni’a i te mau ’āti Aiphiti. ( E nehenehe e tāpa’o ē, tē fa’a’ite nei te ’īritira’a a Iosepha Semita ē, ’ua fa’a’eta’eta Pharao i tōna ’ā’au.) Nō te aha Pharao i pāhono ai mai tāna i rave ? Nō te aha e mea fifi i te tahi taime ’ia hōro’a i tō tātou ’ā’au ’e tō tātou hina’ao i te Atua ? Nāhea te Metua i te Ao ra ’e Iesu Mesia i te tauturu ia tātou ’ia fa’a’oroma’i i teie mau fifi ?

• Ma te ’āfa’ira’a mai i roto i te piha ha’api’ira’a i te hō’ē tao’a pa’ari ’e te tahi tao’a marū, e nehenehe ’oe e tauturu i te mau pīahi ’ia māramarama e aha te huru te ’ā’au ’eta’eta ’e te ’ā’au marū. E nehenehe e fa’ahaere i nā tao’a e piti nā roto i te piha, ’a taiō noa ai te hō’ē ta’ata i te hō’ē o te mau fa’a’itera’a nō te ’ā’au o Pharao e ’itehia i roto i te Exodo 7–10 (mai te Exodo 9:22–35). Nō te aha e mea tano te parau « ’eta’eta » nō te ’ā’au o Pharao ? E aha tā teie mau ’īrava e ha’api’i nei nō ni’a e aha te aura’a ’ia roa’a te ’ā’au marū ? (Mai te mea e tauturu te reira, e nehenehe te mau pīahi e ’imi mai i te mau mana’o i roto i te hō’ē ’aore rā hau atu o teie mau pāpa’ira’a mo’a : 1 Nephi 2:16 ; Mosia 3:19 ; Alama 24:7–8 ; 62:41 ; Etera 12:27.) Nāhea te Fa’aora i te tauturu ia tātou ’ia tāmarū i tō tātou ’ā’au ? E nehenehe te video « A Change of Heart [Hō’ē tauira’a o te ’ā’au] (ChurchofJesusChrist.org) e fa’ahau atu i tō rātou māramarama.

• Nō te tauturu i te mau pīahi ’ia feruri i te tumu te Fatu i tono ai i nā pohe i ni’a ia Aiphiti, e nehenhe e ani i te mau pīahi tāta’itahi ’ia mā’iti i te hō’ē ’īrava i roto i te tāpura i muri nei ’e ’ia hi’o mai i te mau tumu e ti’a ai : Exodo 3:20 ; 7:5, 17 ; 9:14–16 ; 10:1–2. E nehenehe ato’a e ani i te mau pīahi ’ia fa’a’ite mai nāhea rātou i te ’apora’a mai ē, « ’aore [tō te Metua i te Ao ra ’e tō Iesu Mesia] e fāito i te ao ato’a nei » (Exodo 9:14).

Exodo 12

Tē ha’api’i nei te Pāsa ’e te ’ōro’a mo’a nō ni’a i te fa’aorara’a nā roto ia Iesu Mesia.

• ’Ua tauturu te fa’ahanahanara’a i te ’ōro’a nō te Pāsa i te mau tamari’i a ’Īserā’ela ’ia ha’amana’o ē, ’ua fa’aora te Fatu ia rātou i te tītīra’a. Nō te tauturu i te mau pīahi ’ia māramarama i te tāpa’o nō te Pāsa, e nehenehe e pāpa’i e piti ’āna’ira’a i ni’a i te tāpura ’ere’ere, tei ni’a te upo’o parau Tāpa’o ’e Te aura’a e ti’a, ma te hōho’a nō Iesu Mesia i ni’a a’e i nā ’āna’ira’a. E nehenehe te mau pīahi e tuatāpapa i te Exodo 12:1–13 ’e ’ia pāpa’i i ni’a i te tāpura ’ere’ere i te mau mea ato’a i roto i teie ’īrava ’o tē nehenehe e fa’ahōho’a i tō tātou fa’aorara’ahia nā roto ia Iesu Mesia. ’Ei reira rātou e nehenehe ai e tāu’aparau e aha tā teie mau tāpa’o e ha’api’i nei ia tātou nō ni’a i te tāra’ehara a te Fa’aora (hi’o i te tāpura i roto i « Te tahi atu mau rāve’a tauturu » nō te tahi mau mana’o ri’i). E nehenehe te video « The Passover [Te Pāsa] » (ChurchofJesusChrist.org) e tauturu ’ia hi’o mana’o e aha te mea tā rātou e tai’o nei i roto i te Exodo 12.

  

  Mai te mā’a i te Pāsa, e nehenehe te ’ōro’a mo’a e tauturu ia tātou ’ia ha’amana’o i tō tātou Fa’aora, ia Iesu Mesia.

• Nō te tahi mau ta’ata, e ’ere ri’i te ’ōro’a mo’a i te ’ohipa pae vārua e nehenehe i te riro mai. ’A feruri e nāhea te hō’ē tāu’ara’a parau nō ni’a i te Exodo 12 e nehenehe e tauturu i te mau pīahi ato’a ’ia ’ite mai i te mana’o hōhonu a’e i roto i te ’ōro’a mo’a. ’Ei hi’ora’a, i muri mai i tō te mau pīahi hi’o-fa’ahou-ra’a i te Exodo 12, e ani ia rātou e fa’a’ite mai e aha pa’i tā te mau ’āti ’Īserā’ela i terā tau e parau mai mai te mea e ui mai te hō’ē tamaiti ’aore rā te hō’ē tamāhine e aha te aura’a o te Pāsa nō rātou. ’Ei reira te mau pīahi e ’āparau ai i te mea tā rātou e nehenehe e parau mai te mea e ui mai te hō’ē ta’ata ē, e aha te aura’a o te ’ōro’a mo’a nō rātou, nā reira ato’a te mau mana’o i noa’a mai ia rātou nō ni’a i te Pāsa. E hōro’a i te mau pīahi te tahi taime nō te feruri e aha tā rātou e nehenehe e rave nō te ha’amana’o i te mau mahana ato’a i te Fa’aora. E nehenehe te video « Always Remember Him [Ha’amana’o noa iāna] » (ChurchofJesusChrist.org) e tauturu ia rātou.

Te tahi atu mau rāve’a tauturu

Tē ha’api’i nei te Pāsa nō ni’a i te Fa’aora.

Tāpa’o	Te aura’a ti’a
Tāpa’o Te ’ārenio (Exodo 12:3–5)	Te aura’a ti’a Iesu Mesia
Tāpa’o Te toto i ni’a i te pou ’ūputa (Exodo 12:7)	Te aura’a ti’a Te toto tāra’ehara a Iesu Mesia, tei fa’aora ia tātou
Tāpa’o ’Amu i te ’ārenio (Exodo 12:8)	Te aura’a ti’a Fa’ariro i te Fa’aora ’ei tuha’a nō tō tātou orara’a
Tāpa’o Rā’au ri’i maramara (Exodo 12:8)	Te aura’a ti’a Te maramara o te tītīra’a (te hara)

Ha’amaita’ira’a i tā tātou ha’api’ira’a

’A fa’aro’o. « Te fa’aro’ora’a ’o te hō’ē ïa fa’a’itera’a i te here… Ani i te Metua i te Ao ra e tauturu ia ’outou ’ia māramarama i te mea tā te mau pīahi e parau ra. ’Ia ha’apa’o maita’i ana’e ’outou i tā rātou mau poro’i tei parau-vaha-hia mai ’aore rā ’aita i parauhia, e māramarama ’outou i tō rātou mau hina’aro, tō rātou mau māna’ona’ora’a ’e tō rātou mau hia’ai » (Ha’api’ira’a mai tā te Fa’aora,34).