Miti ’Ute’ute

Te miti ’Ute’ute

4–10 nō ’Ēperēra

Exodo 14–17

« Pārahi noa, ’e e hi’o i te ora a Iehova »

’A feruri nāhea te mau ’ohipa i tupu nō te mau tamari’i a ’Īserā’ela e tano i te mau pīahi o tā ’oe piha ha’api’ira’a. E aha te mau ’itera’a rau e mea maita’i roa nā rātou ’ia paraparau ?

Pāpa’i i te mau mana’o e tae mai

ītona fa’a’itera’a

Tītau i te mana’o

’Ua ’ī roa Exodo 14–17 i te mau fa’ati’ara’a e’ita e mo’ehia. E nehenehe te hō’ē pīahi e pāpa’i hōho’a i te hō’ē ’ohipa tei tupu i roto i teie mau pene ’a tāmata ai vetahi atu mau pīahi ’ia feruri e aha tāna e pāpa’i hōho’a ra. E ui ia rātou ’ia fa’a’ite mai i te mea tā rātou i ha’api’i mai i roto i terā fa’ati’ara’a.

’ītona ha’api’ira’a

Ha’api’i i te ha’api’ira’a tumu

Exodo 14

E fa’aora te Metua i te Ao ra ia tātou ’a pe’e ai tātou i te Vārua.

• Mai te huru ra ē ’ua riro te miti ’Ute’ute ’ei hope’a purūmu nō te mau ’āti ’Īserā’ela, ’ua ’ite rā te Atua i te mau mea ’aita rātou i ’ite. E nehenehe te hi’o-fa’ahou-ra’a i te fa’ati’ara’a nō te haerera’a nā roto i te Miti ’Ute’ute e fa’aha’amana’o i te mau pīahi i te mau taime ’a fa’aora ai te Atua ia rātou i tō rātou mau tāmatara’a. E nehenehe e ani i te mau pīahi ’ia hi’o fa’ahou i te Exodo 14 ’e ’ia fa’a’ite mai e aha tei fa’auru rahi ia rātou nō ni’a i teie fa’ati’ara’a. E fa’aitoito ato’a ia rātou ’ia fa’a’ite mai i te ’ohipa tei tupu nō rātou i te fa’aorara’ahia rātou i te mau tāmatara’a, nā reira ato’a te mau ’īrava nō roto mai i te pene tei patu i tō rātou fa’aro’o ē, e ti’a i te Atua ’ia fa’aora ia tātou.

• E mea fa’ahiahia ato’a paha e tai’o ’āmui i Te Parau Ha’api’ira’a ’e te mau Parau Fafau 8:2–3. E aha tā teie mau ’īrava e haʼapiʼi nei nō ni’a ia Mose ? Nāhea teie mau ’īrava i te ha’aputapū i te huru tātou e feruri ai i te mau ’ohipa i tupu i roto i te Exodo 14 ? E aha tā rātou e parau nei e nāhea tātou i te ’imi i te fa’aorara’a i tō tātou mau tāmatara’a ? ’A feruri e aha te fa’ahitira’a parau i roto i « Te tahi atu mau rāve’a tauturu » e nehenehe e tu’u mai i roto i te ’āparaura’a.

e vahine e ’ohi ra i te māna

’Ua fa’a’amu te māna nō ’ō mai i te Atua ra ia ’Īserā’ela i te pae tino ; e hina’aro ato’a tātou i te mā’a pae vārua i te mau mahana ato’a. Hōho’a pēni rahi nā Leopold Bruckner

Exodo 15:23–27 ; 16:1–15 ; 17:1–7

E ha’apa’o te Fatu i tō tātou mau hina’aro ’a tere ai tātou i roto i te orara’a nei.

• Tē hōro’a nei te Exodo 15–17 e rave rahi mau fa’ati’ara’a ’o tē nehenehe e patu i te fa’aro’o nō te mana o te Fatu ’e i tōna ineine e pāhono i tō tātou mau hina’aro pae tino ’e pae vārua. Penei a’e e nehenehe te pīahi tāta’itahi e tuatāpapa hō’ē o te mau ’īrava i muri nei, ma te hi’o mai i te mau poro’i pae vārua : Exodo 15:23–27 ; 16:1–15 ; 17:1–7. Hōro’a i te tahi mau pīahi i te taime nō te fa’a’ite mai i te mea tā rātou i ’ite mai. Nāhea tātou e nehenehe ai e fa’a’ohipa i teie mau fa’ati’ara’a nō te fa’aitoito i te hō’ē ta’ata tei ’ore i pāhonohia te mau hina’aro pae tino ’e pae vārua ?

• E nehenehe ato’a te mau pīahi e tai’o i teie mau ’īrava ’e e fa’ata’a i te mau hi’ora’a nō te amuamura’a. Nāhea tātou i te fa’ata’a i te hō’ē ta’ata i te aura’a nō te amuamura’a ? E aha te tahi mau fa’ahope’ara’a nō te amuamura’a ’o tē fa’ariro i te reira ’ei ’ohipa ata’ata mau ? Penei a’e e nehenehe te mau pīahi e hōro’a mai i te tahi mau mana’o e nāhea i te ’ape i te fa’ahemara’a e amuamu i te Fatu, i te taime ’a ora ai tātou i mau tāmatara’a fifi rahi.

• E mea maita’i paha nō te mau pīahi ’ia fa’aau i te māna tei fa’a’itehia i roto i te Exodo 16 i te mā’a tei tītauhia nō tō tātou vārua. E aha te mau tū’ati’atira’a tā tātou e ’ite nei ? E aha te mau ha’api’ira’a pae vārua tā te Fatu i hina’aro e ha’api’i i te mau ’āti ’Īserā’ela nā roto i te hōro’ara’a mai i te māna mai tāna i rave ? (hi’o Ioane 6:31–35, 48–58). E nehenehe ato’a ’oe e fa’a’ite i te hō’ē video ’aore rā hau atu, e ’itehia i roto i « Te tahi atu mau rāve’a tauturu ».

Exodo 17:8–16

E ha’amaita’ihia tātou ’a pāturu ai tātou i tō tātou feiā fa’atere.

• Tē fa’ahōho’a nei te fa’ati’ara’a nō Aarona ’e ’o Hura e tāpe’a ra i te rima o Mose, i te faufa’a rahi nō te pāturura’a i te feiā tei pi’ihia nō te arata’i ia tātou. E nehenehe e ani i te tahi mau pīahi ’ia ha’uti ta’ata ora i te ’ohipa i tupu ’a tai’o pūai ai te hō’ē pīahi i te reira. E aha te tū’atira’a i roto i te mau tauto’ora’a a Aarona ’e a Hura nō te turu i te rima o Mose i ni’a ’e tā tātou mau tauto’ora’a e pāturu i tō tātou mau feiā fa’atere ? Nāhea tātou i te fa’a’ite ē tē pāturu nei tātou i tō tātou feiā fa’atere ?

ītona te tahi atu mau rāve’a tauturu

Te tahi atu mau rāve’a tauturu

E ti’a ia ’oe ’ia fāri’i i te arata’i nō ’oe iho.

’Ua ha’api’i te tuahine Michelle Craig ’e :

« ’Ei pipi ha’apa’o maita’i nā [te Fa’aora], e nehenehe ’outou e fāri’i i te fa’aurura’a ’e te heheura’a nō ’outou iho mai te au i tāna mau fa’auera’a tei fa’ata’ahia nā ’outou. E misiōni ’e e ’ohipa ta’a ’ē tā ’outou e rave i roto i te orara’a, ’e e fāri’i ’outou i te arata’ira’a ta’a ’ē nō te fa’aoti i te reira.

« Mai ia Nephi, te taea’e o Iareda, ’e tae noa atu ia Mose, e moana rahi tā rātou pā’āto’a i rātere nā ni’a iho—’e e mea ta’a ’ē tā te tahi rāterera’a i tā te tahi. ’Ua tarai ’o Nephi i ‘te mau rā’au, o te ’ohipa huru ’ē’ [1 Nephi 18:1]. ’Ua hāmani te taea’e o Iareda i te mau pahī ‘piri maita’i mai te besine ra’ [hi’o Etera 6:5–8]. ’E ’o Mose ‘’ua haere noa… nā rōpū i taua moana ra nā ni’a i te repo marō’ [Exodo 14:29].

« ’Ua fāri’i rātou tāta’itahi i tā rātou iho arata’ira’a, tei fa’ata’ahia nō rātou, ’e ’ua ti’aturi ’e ’ua ’ohipa rātou tāta’itahi. E ha’ape’ape’a te Fatu nō te feiā ’o te ha’apa’o i tāna parau, ’e, ’ia au i te mau parau a Nephi, ‘e fa’aineine ’oia i te hō’ē rāve’a nō [tātou], e ti’a ai ia [tātou] i te rave i te mea tāna i fa’aue mai ia rātou ra’ [1 Nephi 3:7]. ’A ha’apa’o maita’i na i te parau a Nephi, ‘hō’ē rāve’a’—e ’ere ‘te rāve’a’.

« E ma’iri ānei tātou ’aore rā e fa’a’ore ānei tātou i tā tātou mau ’ohipa nō ō mai i te Fatu ra nō te mea ē, ’ua fa’aineine ’oia i te ‘hō’ē rāve’a’ ta’a ’ē atu i tā tātou e tīa’i nei ? » (« Te ’aravihi pae vārua », Liahona, Novema 2019, 21).

Mau video

I roto i te mau video « Daily Bread: Pattern [Faraoa tāmahana : Hōho’a] », « Daily Bread: Experience [Faraoa tāmahana : Te ’ite] », ’e « Daily Bread: Change [Faraoa tāmahana : Taui] (ChurchofJesusChrist.org), tē fa’a’ite nei Elder D. Todd Christofferson i te tahi mau mana’o nō ni’a i te temeio o te māna.

Ha’amaita’ira’a i tā tātou ha’api’ira’a

Fa’aitoito ia vetahi ’ē ’ia fa’a’ite mai i te ’itera’a pāpū. E rave rahi o rātou tā ’oe e ha’api’i ra, e ’itera’a pūai tō rātou nō te parau mau nō te fa’a’ite mai. E ani ia rātou ’ia fa’a’ite mai i tō rātou ’itera’a ma te uira’a i te mau uira’a ’ōhie, mai teie : « Nāhea ’outou i te ha’amaita’ira’ahia maoti i te pe’era’a i te peropheta ? » (Hi’o ato’a Ha’api’ira’a mai tā te Fa’aora,11.)