Fa’ahōho’ara’a nō te menema ’aore e ta’ata nā Maryna Kriuchenko

11–17 nō ’Ēperēra

Pāsa

« E nāna e ha’amou roa i te pohe »

’A fa’aineine ai ’oe nō te ha’api’i i te sābati Pāsa, ’a feruri nāhea ’oe i te tauturu i te mau pīahi ’ia noa’a te māuruurura’a ’e te ’itera’a pāpu hōhonu nō te tusia tāra’ehara ’e te Ti’afa’ahoura’a a Iesu Mesia.

Pāpa’i i te mau mana’o e tae mai

Tītau i te mana’o

Penei a’e e nehenehe ’oe e ani i te mau pīahi ’ia fa’a’ite mai e aha tā rātou ’aore rā tā tō rātou ’utuāfare i rave nō te ha’apūai i tō rātou fa’aro’o ia Iesu Mesia ’e i tāna tāra’ehara i roto i teie tau Pāsa.

Ha’api’i i te ha’api’ira’a tumu

Nō te mea ’ua upo’oti’a te Fa’aora i ni’a i te pohe, e ora fa’ahou ato’a tātou.

• Nō te mea e mahana Pāsa teie, ’a feruri e hi’o fa’ahou i te fa’ati’ara’a i roto i te mau pāpa’ira’a mo’a nō te Pāsa mātāmua—te Ti’afa’ahoura’a o Iesu Mesia (hi’o Ioane 20:1–17). E nehenehe ’oe e ani i te hō’ē pīahi ’ia fa’ati’a mai i te ’ā’amu nā roto i tāna iho mau parau. E fa’a’ite ato’a i te video « ’Ua ti’afa’ahou mai ’oia » (ChurchofJesusChrist.org). E ’oa’oa ato’a te mau pīahi e hīmene i te mau hīmene nō ni’a i te Fa’aora ’e e tai’o i te mau ’īrava e tū’ati i te reira (tē vai nei te fa’ahorora’a i raro roa i te mau hīmene tāta’itahi i roto i te buka Te mau Hīmene). I muri iho, e fa’a’ite mai te mau pīahi i tā rātou pereota au roa a’e nō roto mai i te hīmene ’e tō rātou mana’o nō ni’a i te Fa’aora.

• Nō te tauturu i te mau pīahi ’ia māuruuru i te huru nō tō te Faufa’a Tahito fa’a’ite-pāpū-ra’a nō Iesu Mesia, e ani ia rātou ’ia hi’o fa’ahou i te mau pāpa’ira’a mo’a i roto i te tāpura i roto i te arata’i ha’api’ira’a nō teie hepetoma o te Mai, pe’e mai—nō te ta’ata hō’ē ’e te ’utuāfare, nā reira ato’a te mau tuha’a o te Buka a Moromona e ’āpe’e i te reira. E aha tā tātou i ’apo mai nō ni’a i te Fa’aora ’e tāna misiōni nā roto mai i teie mau tuha’a ? Nō te aha e mea faufa’a ’ia ’ite i ni’a teie mau parau tohu ?

E nehenehe tātou e ’ite mai i te hau ’e te ’oa’oa nā roto i te tāra’ehara a te Fa’aora.

• Tē vai ra i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare te hō’ē tāpura o te pāpa’ira’a mo’a e fa’a’ite nei i te hau ’e te ’oa’oa e tae mai nā roto ia Iesu Mesia. Mai te mea e tai’o te mau pīahi i teie mau pāpa’ira’a mo’a i te fare, e fa’aitoito ia rātou ’ia fa’a’ite mai i tō rātou mau mana’o ’e tō rātou mau putapūra’a nō ni’a i te reira. ’Aore rā, e nehenehe ’outou e tai’o i te tahi mau pāpa’ira’a mo’a i roto i te piha ha’api’ira’a ’e e ’āparau atu ai nō ni’a i te hau ’e te ’oa’oa tā tātou e putapū nei maoti te Fa’aora ’e tāna tāra’ehara. Nāhea tātou i te ’ōpere atu i teie mau ha’amaita’ira’a i te ta’ata e fifi nei paha nō te ’ite mai i te hau ’e te ’oa’oa i roto i tō rātou orara’a ? E nehenehe ato’a e ani i te hō’ē pīahi ’ia tai’o i te a’ora’a a te peresideni Russell M. Nelson « Te ’oa’oa nō te oraora i te pae vārua » (Liahona, Nov. 2016, 81–84) i roto i te hepetoma nā mua a’e i te ha’api’ira’a ’e ’ia haere mai ma te ineine nō te fa’a’ite mai e aha tā teie a’ora’a e ha’api’i nei nō ni’a i te ’oa’oa i roto i te Fa’aora.

• E fa’auruhia paha ’oe e arata’i i te hō’ē ’āparaura’a nō ni’a e nāhea i te tauturu ia vetahi ’ē ’ia ’ite mai i te hau ’e te ’oa’oa i roto i te Mesia. E nehenehe e ani i te mau pīahi ’ia feruri i te hō’ē ta’ata tā rātou i mātau—penei a’e e ta’ata tā rātou e aupuru ra—’o tei hina’aro i tā rātou pāturura’a, te tāvinira’a ’aore rā ’ia fa’aro’o noa i tō rātou ’itera’a pāpū nō te Mesia ’e nō tāna tāra’ehara. E fa’aitoito i te mau pīahi ’ia hi’o i te mau pāpa’ira’a mo’a (mai teie i roto i te « Te tahi atu mau rāve’a tauturu ») ’a feruri ai rātou i te ’ohipa tāvinira’a ’aore rā te ’itera’a pāpū tā rātou e hōro’a atu nō te ha’apūai i te feiā ’ati a’e ia rātou. ’A ani i te tahi mau pīahi ’ia fa’a’ite mai i tō rātou mana’o nō ni’a i te tāvinira’a mai tā Iesu i rave.

Mahana rumaruma i Golagota, nā J. Kirk Richards

Maoti tāna tāra’ehara, e mana tō Iesu Mesia nō te tauturu ia tātou ’ia upo’oti’a i ni’a i te hara, te pohe, te tāmatara’a ’e te mau paruparu.

• Hō’ē rāve’a nō te tauturu i te mau pīahi ’ia feruri i te mau ha’amaita’ira’a e tae mai nā roto i te tāra’ehara a te Fa’aora, ’o te pāpa’ira’a i ni’a i te tāpura ’ere’ere i te mau upo’o parau Hara, Pohe, Tāmatara’a ’e Paruparu. E tai’o te pīahi tāta’itahi i te hō’ē o te mau pāpa’ira’a mo’a i roto i « Te tahi atu mau rāve’a tauturu » ’e ’ia feruri nāhea te Fa’aora i te tauturu ia tātou ’ia upo’oti’a i ni’a i te mau mea i pāpa’ihia i ni’a i te tāpura ’ere’ere. E nehenehe te mau pīahi e pāpa’i i tā rātou mau fa’ahorora’a pāpa’ira’a mo’a i raro a’e i te hō’ē o te mau upo’o parau i ni’a i te tāpura ’ere’ere ’e e fa’a’ite mai i tō rātou ’itera’a pāpū nō te Fa’aora ’e tāna tāra’ehara.

• E tauturu te mau ’ā’amu ’e te mau fa’aaura’a ia tātou ’ia māramarama i te tāra’ehara a Iesu Mesia. ’Ei hi’ora’a, e ani i te hō’ē pīahi ’ia fa’a’ite mai i te hō’ē o te mau ’ā’amu ’aore rā te hō’ē fa’aaura’a i roto i te a’ora’a a Elder Walter F. González « Te fa’ati’a’ia a te Fa’aora » (Liahona, Nov. 2019, 90–92) ’aore rā te a’ora’a a te tuahine Neill F. Marriott « ’Ei roto i te Atua e pārahi ai ’e e tātā’i ai i te ’amahara’a » (Liahona, Nov. 2017, 10–12). E aha tā teie mau ’ā’amu ’e mau fa’aaura’a e ha’api’i nei ia tātou nō ni’a i te tāra’ehara a te Mesia ? ’A ani i te mau pīahi ’ia ’ohipa ’āpiti nō te feruri i tā rātou iho ’ā’amu ’e tā rātou iho fa’aaura’a.

• E aha tā tātou i ha’api’i mai nā roto mai i te mau ’īrava i muri nei nō ni’a i te ho’o tei ’aufauhia nō tō tātou fa’aorara’a : Isaia 53:3–5 ; Mosia 3:7 ; Te Parau Ha’api’ira’a ’e te mau Parau Fafau 19:16–19 ? E aha te ho’o tā tō tātou Metua i te Ao ra i ’aufau ? (hi’o Ioane 3:16).

Te tahi atu mau rāve’a tauturu

Mau pāpa’ra’a mo’a nō ni’a i te tāra’ehara a Iesu Mesia.

• Isaia 61:1–3

• Ezekiela 36:26–28

• Mataio 11:28–30

• Luka 1:46–55

• Roma 8:35–39

• Alama 7:10–13

• Alama 11:42–45

• Moroni 10:32–33

• Te Parau Ha’api’ira’a ’e Te Mau Parau Fafau 19:15–19

• Mose 5:9–12

Ha’amaita’ira’a i tā tātou ha’api’ira’a

ʼA haʼamaūruru i tā ʼoutou mau pīahi. « ’Eiaha e ha’apa’o rahi roa i te ha’api’ira’a ’a mo’ehia ia ’oe i te ha’amāuruuru i te mau pīahi nō tō rātou mau mana’o. E hinaʼaro rātou ’ia ʼite ē, tē māuruuru ra ānei ʼoe nō tō rātou ineine ’ia faʼaʼite i tō rātou mau manaʼo ʼe te ʼiteraʼa pāpū » (Haʼapiʼiraʼa mai tā te Faʼaora, 33).