« 18–24 nō ’Ēperēra. Exodo 18–20 : « Te mau parau ato’a tā Iehova i parau, e rave ïa mātou, ». Mai pe’e mai—nō te Ha’api’ira’a Sābati : Faufa’a ’Āpī 2022 (2021)
« 18–24 nō ’Ēperēra. Exodo 18–20 », Mai pe’e mai—nō te Ha’api’ira’a Sābati : 2022
Hō’ē mou’a i Aiphiti tei parauhia ē, ’o te mou’a nō Sinai.
18–24 nō ’Ēperēra
Exodo 18–20
« Te mau parau ato’a tā Iehova i parau, e rave ïa mātou »
’A tai’o i te Exodo 18–20, ’e ’a pāpa’i i te mau mana’o tā ’oe i fāri’i nō ni’a e nāhea ’ia tauturu i te mau pīahi ’ia ’apo mai i te ha’api’ira’a nā roto mai i teie mau pene. Noa atu e mau mana’o ’ōhie e nehenehe te reira e arata’i i te mau ’itera’a faufa’a roa nō te ha’api’ira’a mai.
Pāpa’i i te mau mana’o e tae mai
Tītau i te mana’o
Nō te tītau manihini i te mau pīahi ’ia fa’a’ite mai e aha tā rātou i ha’api’i mai, e pāpa’i i ni’a i te tāpura ’ere’ere 18, 19, ’e 20—te mau pene nō Exodo tā rātou i tai’o i teie hepetoma. E ani i te mau pīahi ’ia pāpa’i i pīha’i mai i te nūmera pene tāta’itahi i te nūmera o te mau ’īrava tā rātou e hina’aro e paraparau i roto i terā pene. E ani i te mau pīahi ’ia fa’a’ite mai i tō rātou mana’o, e ui i te tahi atu mau pīahi e mana’o ānei tō rātou nō ni’a i taua mau ’īrava ra.
Ha’api’i i te ha’api’ira’a tumu
E nehenehe tātou e tauturu i te « amo i te hōpoi’a » nō te ravera’a i te ’ohipa a te Fatu.
-
E fa’aitoito i te mau pīahi ’ia ’āparau nō ni’a i te a’ora’a tā Ietero i hōro’a ia Mose (hi’o Exodo 18:13–26) nā roto i te anira’a ia rātou ’ia feruri ē, tē tāu’a parau ra rātou i te hō’ē ta’ata tē mana’o ra ē, e mea « teimaha roa » tōna mau pi’ira’a i roto i te ’Ēkālesia, te mau hōpoi’a i te fare ’e te tahi atu mau hōpoi’a, ’e tē parau ra ’oia ē ’ua « pohe [’oia] i te teiaha » (Exodo 18:18). Nāhea te a’o i roto i te Exodo 18:13–26 e nehenehe ai e tauturu ? E aha te tahi atu mau parau a’o e nehenehe e hōro’a nō roto mai i tō tātou iho mau ’itera’a rau ?
-
’A paraparau nō ni’a i te Exodo 18:13–26, nō te hōro’a i te taime nō te ’āparau e nāhea te aupurura’a e nehenehe ai e tauturu ia tātou ’ia « māmā » nō tō tātou feiā fa’atere i roto i te ’ohipa a te Fatu (Exodo 18:22). E aha te mau huru tā Ietero i parau ia Mose ’ia mā’imi i roto i te feiā ’o te riro mai ’ei « feiā tāvana » nō te nuna’a ? (hi’o Exodo 18:21). Nō te aha e mea faufa’a roa te reira huru i roto i tā tātou mau tauto’ora’a nō te tāvini i te tahi ’e te tahi ? Nāhea te tāvinira’a i te mau melo o te ’utuāfare, i te mau melo o te ’Ēkālesia ’e i te tahi atu mau ta’ata i te tauturu ’ia « māmā » nō tō tātou feiā fa’atere o te ’Ēkālesia ? ’Ei tuha’a nō te ’āparaura’a, e nehenehe ’oe e fa’a’ite hō’ē o te mau video i fa’ahitihia i ni’a ministering.ChurchofJesusChrist.org.
Hōho’atāne e aroha rima ra i te hō’ē tamāhine’Ua riro te aupurua’a ia vetahi ’ē ’ei hō’ē rāve’a nō te ’āmui atu i roto i te ’ohipa a te Fatu.
E ti’a ia tātou e tu’u i te Fatu i mua roa i roto i tō tātou orara’a.
-
’A feruri i te hō’ē ’ohipa e tere maita’i a’e, ’a rave ai tātou nā mua roa i te mau ta’ahira’a faufa’a roa a’e ? (E nehenehe te mau hi’ora’a e riro mai te tātarara’a i te hō’ē nūmerara’a ’aore rā te pe’era’a i te hō’ē fa’anahora’a tunura’a mā’a). ’A fa’a’ite atu i te piha ha’api’ira’a i te tahi mau hi’ora’a tā ’oe i mātau, ’e e ani ia rātou ’ia feruri i tā rātou iho. Nāhea te ravera’a i te mau ta’ahira’a faufa’a roa a’e e tū’ati i te mau fa’auera’a i roto i te Exodo 20:2–11 ? E aha tā te mau fa’auera’a e ha’api’i nei ia tātou nō ni’a i te tu’ura’a i te Atua i mua roa i roto i tō tātou orara’a ? E aha te mau mea e nehenehe e fa’ahema ia tātou ’ia tu’u i mua hou ’ōna ? (Nō te tahi hi’ora’a, hi’o i te fa’ahitira’a parau i roto i « Te tahi atu mau rāve’a tauturu ».) E nehenehe te hi’o-fa’ahou-ra’a i te Exodo 20:2–11 e tauturu i te mau pīahi ’ia feruri i tā rātou fafaura’a e tu’u i te Atua i mua roa.
E mea aroha te Atua.
-
Nāhea ’oe i te tauturu i te mau pīahi ’ia māramarama i te faufa’a rahi o nā ture hō’ē ’ahuru i tō tātou nei ’anotau ? E tu’u piti piti i te mau pīahi ’e e ani ia rātou ’ia tai’o i te Exodo 20:2–17 ’e i reira e ’āparau atu ai nāhea te ha’apa’ora’a i te fa’auera’a tāta’itahi i te ha’amaita’i ia rātou, tō rātou ’utuāfare ’e te ta’ata ’ati a’e ia rātou. E nehenehe ato’a e fa’a’ite i te video « Obedience to the Ten Commandments [Ha’apa’o i nā ture hō’ē ’ahuru] » (ChurchofJesusChrist.org). E aha te mau ha’amaita’ira’a tā te Metua i te Ao ra i parau fafau ia tātou nō te ha’apa’ora’a i tāna mau fa’auera’a ? (hi’o, ’ei hi’ora’a, Mosia 2:41). Nāhea teie mau fa’auera’a i te fa’a’ite mai i te here o te Atua nō tātou ?
Te tahi atu mau rāve’a tauturu
’Eiaha e Atua ’ē atu.
’Ua ha’api’i te peresideni Spencer W. Kimball ē, tē vai nei te tū’atira’a i roto i te ha’amorira’a hōho’a tarai nō tahito ra ’e te ravera’a a te ta’ata i teie mahana. ’Ua nā ’ō ’oia :
« Te ha’amorira’a idolo, ’o te hō’ē ïa o te mau hara ’ino roa a’e…
« E nehenehe te mau idolo ’āpī ’aore rā te mau atua ha’avare e riro ’ei ’ahu, te mau fare, te mau ’imira’a moni, te mau mātini, te mau pere’o’o uira, te mau poti fa’aori haere, ’e e rave rahi atu ā mau mea nō te tino e fa’aātea ’ē atu i te ’ē’a e tae atu i te atuara’a…
« E nehenehe te mau mea i ’ore e noa’a i te fāfāhia i te rima e riro ’oi’oi noa ’ei mau atua. E nehenehe te mau parau tū’ite, te mau rē ’e te mau ti’ara’a e riro ’ei mau idolo…
« E rave rahi mau ta’ata e patu nei ’e e fa’anehenehe nei i te hō’ē fare ’e e ho’o mai nei i te pere’o’o uira nā mua roa—’e nō te ’ite i muri iho e’ita e nehenehe ia rātou ’ia ’aufau i te tuha’a ’ahuru. ’O vai tā rātou e ha’amori ra ? E mea pāpū roa e ’ere te Fatu nō te ra’i ’e te fenua…
« E rave rahi ’o tē ha’amori nei i te haerera’a e pūpuhi i te mau ’animara, te tere tai’a, te tere ori fa’afa’aea, te mau tere hopu miti ’e te mau tere ori i te hope’a hepetoma. Tō vetahi ’ē mau idolo e mau ha’utira’a tū’aro ïa, te taorara’a pōpō, te tu’era’a pōpō, te ’arora’a pua’atoro, ’aore rā te huira’a pōpō…
« Tē vai ato’a ra te tahi atu hōho’a tā te ta’ata e ha’amori nei ’o te hōho’a ïa nō te mana ’e te ro’o… E tītau rahi roa teie nei mau atua i te mana ’e te moni ’e te ’umera’a i tō tātou taime ’e e mea mau rātou mai te mau pua’atoro ’auro tā te mau tamari’i nō ’Īserā’ela i roto i te medebara ra » Te Mau Ha’api’ira’a a te mau Peresideni o te ’Ēkālesia [2006], 177–78).
Ha’amaita’i i tā tātou ha’api’ira’a
Rōtahi i ni’a i te tahi mau parau tumu ri’i. « E rave rahi te mau mea e ’āparau i roto i te ha’api’ira’a tāta’itahi, e’ita rā e tītauhia ’ia ha’api’i i te tā’āto’ara’a i roto i te ārea o te hō’ē ha’api’ira’a nō te ha’aputapū i te ’ā’au o te ta’ata—te rahira’a o te taime, e nava’i noa hō’ē ’aore rā e piti tumu parau rahi ». (Ha’api’ira’a mai tā te Fa’aora, 7).