Fa’ahōho’ara’a nō Iehova i fāra’a ia Mose ’e i te mau peresibutero e 70 nō ’Īsera’ela, nā Jerry Harston

25 nō ’Ēperēra–1 nō Mē

Exodo 24 ; 31–34

« E nā piha’i ato’a iho vau ia ’oe »

E vaiiho i teie mau parau a Elder Jeffrey R. Holland e arata’i i tā ’outou fa’aineinera’a nō te ha’api’i : « ’Aita te rahira’a o te ta’ata e haere mai nei i te purera’a nō te ’imi noa i te tahi mau ’ohipa ’āpī nō ni’a i te ’evanelia… Tē haere mai nei rātou e ’imi i te hō’ē ’itera’a pae vārua… Tē hina’aro nei rātou ’ia ha’apūaihia tō rātou fa’aro’o ’e ’ia fa’a’āpīhia tō rātou ti’aturira’a » (« A Teacher Come from God », Ensign, Mē 1998, 26).

Pāpa’i i te mau mana’o e tae mai

Tītau i te mana’o

E nehenehe te mau melo o te piha e feruri ē, ’ua parau te hō’ē ē, « ’aita vau e tai’o nei i te Faufa’a Tahito ; e ’ere te reira i te mea tano roa nō tō’u orara’a ». E ani ia rātou ’ia pāhono nā roto i te fa’a’itera’a i te hō’ē mea tei ’itehia ia rātou e mea faufa’a i roto i tā rātou tuatāpapara’a i te Faufa’a Tahito ’aita i maoro a’e nei.

Ha’api’i i te ha’api’ira’a tumu

Exodo 31:12–17

Tē fa’atura nei tātou i te mahana sābati ’ei tāpa’o fa’a’ite i tā tātou fafaura’a i te Fatu.

• E nehenehe ’outou e ha’amata nā roto i te anira’a i te mau pīahi ē, ’ua tītauhia a’ena ānei ia rātou ’ia fa’ata’a i te hō’ē melo o te ’utuāfare ’aore rā, i te hō’ē hoa, nō te aha rātou e fa’ariro ai i te sābati ’ei mahana ta’a ’ē atu i te tahi atu mau mahana. E ani ia rātou ’ia fa’a’ite mai e aha tā rātou i parau ’aore rā, e aha tā rātou e parau i te mau mahana i muri nei. E nehenehe te tai’ora’a i te Exodo 31:12–17 ’aore rā, te fa’ahitira’a parau i roto i « Te tahi atu mau rāve’a tauturu » e hōro’a ia rātou i te tahi atu mau mana’o. Nāhea tā tātou mau mā’itira’a i te sābati i te fa’a’ite i tā tātou fafaura’a ia Iesu Mesia ?

• Noa atu ē, e’ita e tano te mau fa’autu’ara’a i fa’a’itehia i roto i te Exodo 31:14–15 nō teie tau, tē fa’a’ite nei rā te reira i te vai-tā’amu-ra’a pūai o te Fatu nō ni’a i te sābati. Nō te aha e mea faufa’a roa teie fa’auera’a ? E nehenehe te ’āparaura’a i teie mau pāpa’ira’a mo’a e tauturu : Exodo 31:12–17 ; Isaia 58:13–14 ; Te Parau Ha’api’ira’a ’e te mau Parau Fafau 59:9–13.

  

  Nā roto i te fa’aturara’a i te sābati, tē fa’a’ite nei tātou i tō tātou here i te Fatu.

Exodo 32 ; 34:1–17

E fāriu ’ē te hara i te Atua, terā rā, e hōro’a mai ’oia i te hō’ē rāve’a nō te ho’i mai.

• Nō te tauturu i te mau pīahi ’ia feruri ’e ’ia fa’aau ia rātou iho i te ’ā’amu i roto i te Exodo 32, ’a ani nā mua ia rātou ’ia hi’o fa’ahou i te pene ’ei ta’ata hō’ē ’aore rā, ’ei pupu. I muri iho, e ani i te tahi mau pīahi ’ia hauti mai i te ti’ara’a o te ’āti ’Īsera’ela tei tīa’i maoro i te ho’ira’a mai ’o Mose, ’e ’ua fa’aoti a’era e hāmani i te hō’ē tāfa ’auro. E aha te mau mana’o tei arata’i ia rātou ’ia ha’amori i te ’idolo? E nehenehe te tahi atu mau pīahi e tāmata i te tāparu ia rātou ’ia vai ha’apa’o noa i te Fatu ’e i tāna peropheta. E nehenehe te mau pīahi e ’āparau nō ni’a i te mau mea e fa’auru nei ia rātou ’ia ha’apa’o i tā rātou mau fafaura’a. E aha tā tātou e nehenehe e rave nō te tauturu i te feiā e ’aro nei nō te ha’apa’o i tā rātou mau fafaura’a ?

• ’Ia tai’o ana’e te ta’ata i te Faufa’a Tahito, e māere rātou i te tahi taime i te mau fa’autu’ara’a ’eta’eta tā te Fatu i fa’ata’a nō te hara. E nehenehe te Exodo 34:1–9 e tauturu ia rātou ’ia ’ite ē, noa atu ’aita te Atua e fāri’i i te hara, e aroha ato’a rā tōna, ma te hōro’a i te fa’a’orera’a hara i te feiā e tātarahapa. Penei a’e e nehenehe te mau pīahi e tai’o i teie tuha’a ’īrava ’e e feruri i te uira’a mai teie : E aha tā tātou e ha’api’i mai nō ni’a i te Fatu i roto i teie mau ’īrava ? Nō te aha e mea faufaʼa ’ia ʼite tātou i teie mau mea nō ni’a iāna ? E nehenehe ’outou e fa’a’ite ē, tē ha’amāramarama nei te ’īritira’a a Iosepha Semita i te Exodo 34:7 (i roto i te Exodo 34:7, nota i raro i te ’api e) e’ita te Atua e fa’ariro i « te ta’ata ’ōrurehau ’ei ta’ata hapa ’ore ». E aha te aura’a nō teie parau ? Penei a’e e nehenehe te mau pīahi e fa’a’ite mai e mea nāhea tō rātou ’itera’a i te aroha o te Atua. Nāhea e ti’a ai i te Atua ’ia riro ’ei Atua aroha mau ’e ’ei Atua ti’a mau ? (hi’o Alama 42:13–15).

• E nehenehe te Exodo 34:6–17 e fa’ariro ’ei arata’ira’a nō te tauturu i te ’āti ’Īsera’ela ’ia tātarahapa i tā rātou hara ha’amori ’idolo (fa’ata’ahia i roto i te Exodo 32). E aha tā tātou e ’ite nei i roto i teie mau ’īrava ’o tē nehenehe e tauturu i te ’āti ’Īsera’ela ’ia tātarahapa ? E aha tā tātou i ha’api’i mai nō ni’a i te Fatu ’e te tātarahapa nā roto mai i teie arata’ira’a ?

Exodo 33:11–17

E tītau tātou ’ia vai mai te Atua i roto i tō tātou orara’a.

• Nāhea ’outou i te tauturu i te mau pīahi ’ia fa’a’ohipa i te mea tā te Fatu i parau ia Mose i roto i te Exodo 33:11–17 ? E nehenehe ’outou e ha’amata nā roto i te hi’o-fa’ahou-ra’a i te ’ohipa tā te Atua i tīa’i noa ia Mose ’ia fa’aoti (hi’o Exodo 33:1–3). E aha tā tātou e ’ite mai i roto i te mau ’īrava 11–17 ’o tei ha’apūai ’e tei tāmāhanahana ia Mose ? E nehenehe te mau pīahi e feruri i te hō’ē mea tā te Atua i hina’aro ’ia rave rātou—mai te rave-fa’aoti-ra’a i te hō’ē pi’ira’a i roto i te ’Ēkālesia, hō’ē hōpoi’a nō te ’utuāfare, ’aore rā, hō’ē rāve’a nō te aupuru. I muri iho, e nehenehe rātou e tai’o fa’ahou i te mau ’īrava. E aha te mau mana’o i roa’a mai ia tātou nō ni’a e nāhea te Atua i te pāturura’a ia tātou ?

Te tahi atu mau rāve’a tauturu

E tāpa’o te sābati.

’Ua fa’ata’a mai te peresideni Russell M. Nelson : « I te mau matahiti o tō’u ’āpīra’a, ’ua tuatāpapa vau i te ’ohipa a vetahi ’ē tei ha’aputu i te mau tāpura nō te mau mea e rave ’e te mau mea ’eiaha e rave i te sābati. I muri roa iho tō’u ha’api’ira’a mai i roto i te mau pāpa‘ira’a mo’a ē, ’ua riro tā’u mau peu ’e tō’u huru i te sābati ’ei tāpa’o i rotopū iā’u ’e i te Metua i te ao ra [hi’o Exodo 31:13 ; Ezekiela 20:12, 20]. Nā roto i taua ’itera’a ra, ’aita vau i hina’aro fa’ahou i te tāpura i te mau mea e rave ’e ’eiaha e rave. ’Ia tītau-ana‘e-hia iā‘u ’ia fa’aoti e tano ānei te hō’ē ’ohipa nō te sābati, e ui noa vau iā’u iho, ‘e aha te tāpa’o tā’u e hina’aro e hōro’a i te Atua ?’ Nā taua uira’a ra e fa’ariro i tā’u mau fa’aotira’a nō ni‘a i te mahana sābati ’ei mau fa’aotira’a māramarama maita’i » (« Te sābati e mea hina’arohia », Liahona, Mē 2015, 130).

Ha’amaita’ira’a i tā tātou ha’api’ira’a

Ha’api’i nā roto i te Vārua. « Te fā hope’a o te mau mea ato’a tā te hō’ē ’orometua ha’api’i ’evanelia e rave—te mau uira’a ato’a, te mau ’īrava pāpa’ira’a mo’a ato’a, te mau ’ohipara’a ato’a—’o tē tītau i te Vārua ’ia patu i te fa’aro’o, ’e ’ia ani i te mau ta’ata ato’a ’ia haere mai i te Mesia ra »(Ha’api’ira’a mai tā te Fa’aora, 10).