Fa’ahōho’ara’a nō te fa’atōro’ara’a Mose ia Iosua, nā Darrell Thomas.

23-29 nō Mē

Iosua 1–8 ; 23–24

« Fa’a’eta’eta ’e ’ia itoito roa »

’A tai’o ai ’outou i te Iosua 1–8 ’e 23–24, ’a feruri i te parau a’o « ’ia ha’amana’o māite i te reira i te ru’i ’e te ao » (Iosua 1:8). ’A ha’apa’o maita’i i te mau muhumuhu e tae mai. E nehenehe te reira e arata’i i te mau mana’o ha’api’ira’a nō tā ’outou piha ha’api’ira’a.

Pāpa’i i te mau mana’o e tae mai

Tītau i te mana’o

’A ani i te mau pīahi ’ia fa’a’ite mai i te hō’ē tuha’a pāpa’ira’a i roto i tā rātou tai’ora’a i teie hepetoma tei fa’arahi i tō rātou fa’aro’o ia Iesu Mesia. ’Ei hi’ora’a, ’ua feruri paha rātou i te huru o te misiōni a Iosua tei fa’aha’amana’o ia rātou i te misiōni a Iesu Mesia. Nō te aha tātou e māuruuru ai i te mau ’ā’amu i roto i te buka a Iosua ?

Ha’api’i i te ha’api’ira’a tumu

Iosua 1:1–9

« Fa’a’eta’eta ’e ’ia itoito roa »

• ’Ua parauhia ia Iosua, ’ia « fa’a’eta’eta ’e ’ia itoito roa » e rave rahi taime (hi’o Deuteronomi 31:7, 23 ; Iosua 1:6–7, 9). Penei a’e e fāna’o te mau pīahi ’ia paraparau mai i te aura’a o teie parau a te Fatu. E nehenehe rātou e mā’imi mai Iosua 1:1–9 nō te parau a’o tā te Fatu i hōro’a ia Iosua nō te tauturu iāna ’ia fa’a’eta’eta ’e ’ia itoito. E nehenehe ato’a rātou e fa’a’ite mai i te mau hi’ora’a o te mau ta’ata tā rātou i ’ite tei roto ia rātou te reira huru. E mea nāhea tō Iosua fa’a’itera’a i te pūai ’e te itoito i roto i te mau ’ā’amu e ’itehia i roto i te buka a Iosua ? (’ei hi’ora’a, hi’o i te mau pene 3, 6,’e 8). E nehenehe te mau pīahi e fa’a’ite mai nāhea rātou i te tāmata ’ia riro ’ei feiā pūai ’e te itoito nō te Mesia.

Iosua 1:8

E nehenehe te parau a te Atua e fa’aruperupe i tō tātou haere’a.

• Nō te fa’aitoito i te mau pīahi i roto i tā rātou tuatāpapara’a pāpa’ira’a mo’a nā te ta’ata iho ’e nā te ’utuāfare, e nehenehe ’outou e tai’o i te Iosua 1:8 ’ei piha ha’api’ira’a. E aha tā tātou i ha’api’i mai i roto i teie ’īrava nō ni’a e nāhea ’ia tuatāpapa i te mau pāpa’ira’a mo’a ? Penei a’e e nehenehe te mau pīahi e fa’a’ite mai e aha tā rātou e rave nei nō te « feruri māite » i roto i te mau pāpa’ira’a mo’a i te « ao ’e te ru’i ». Nāhea tō te Fatu « fa’aruperupera’a i tō tātou haere’a » ’e te hōro’ara’a ia tātou i te « manuiara’a maita’i » ’a tuatāpapa ai tātou i tāna parau ?

  

  E nehenehe te parau a te Atua e « fa’aruperupe [i tō tātou] haere’a » (Iosua 1:8).

Iosua 3–4

E nehenehe tātou e ’ite i te « mau mea ta’a ’ē » a te Atua.

• Penei a’e e mea maita’i nō te mau pīahi ’ia hi’o poto noa i te ’ā’amu o te ’āti ’Īsera’ela i te rāterera’a nā roto i te ’ānāvai nō Ioridana. E nehenehe ’outou e vāhi ’āpitipiti i te piha ha’api’ira’a ’e e ani i te ’āpiti tāta’itahi ’ia fa’ati’a mai i te ’ā’amu i te tahi ’e te tahi, ma te fa’ahiti i te hō’ē pereota i te taime hō’ē (’a fa’aitoito ia rātou ’ia hi’o i roto i te Iosua 3 mai te mea e hina’aro rātou i te tauturu nō te fa’aha’amana’ora’a i te ’ā’amu). I muri iho, e nehenehe te piha ha’api’ira’a e ’āparau i te mau ha’apāpūra’a tā rātou e hina’aro. E aha tā tātou i ha’api’i mai nā roto i teie ’ā’amu ’o tē nehenehe e tauturu ia tātou ’ia ’ite i te « mau mea ta’a ’ē » a te Fatu i roto i tō tātou orara’a ? (’īrava 5). E aha te « mau mea ta’a ’ē » tāna i rave nō tātou ? Nō te aha e mea faufa’a ’ia fāri’i te u’i tāta’itahi i te mau ’itera’a pae vārua ’o tē ha’api’i ia rātou ē, « e mea pūai te Fatu » ? (Iosua 4:24).

• Noa atu ē, e tītauhia ia tātou pā’āto’a ’ia fāri’i i tō tātou iho mau ’itera’a patu fa’aro’o, e mea faufa’a ato’a te ha’amana’ora’a i te mau mea tā te Fatu i rave nō tō tātou mau tupuna. Mai te au i te Iosua 4, e aha tā te ’āti ’Īsera’ela i rave nō te tauturu i te mau u’i nō a muri a’e ’ia ha’amana’o i te rāterera’a nā roto i te ’ānāvai nō Ioridana? (hi’o Iosua 4:1–7). E aha tā tātou e rave nō te ha’apāpū ē, e’ita tō tātou mau ’itera’a e mo’ehia i te mau u’i nō a muri a’e ?

Iosua 6–8

E hōro’a mai te ha’apa’ora’a i te mana o te Atua i roto i tō’u orara’a.

• Tē parau nei te arata’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’ia fa’aau i te mau ’arora’a a te ’āti ’Īsera’ela i te ’āti Kanaana i roto i te Iosua 6 – 8 i tā tātou mau ’arora’a i te fa’ahemara’a. E nehenehe ’outou e ani i te mau pīahi e aha te mau mana’o ’aore rā, te mau ferurira’a tei fāri’ihia e rātou ’a tai’o ai rātou i teie mau pene ’e teie fa’aaura’a i roto i te ferurira’a. ’Aore rā, e nehenehe ’outou e fa’ahi’o ia rātou i te mau ’īrava ta’a ’ē e tano nō tā tātou mau ’arora’a nō te ha’apae i te hara, ’e e nehenehe rātou e paraparau nō ni’a i te mea tā teie mau ’īrava e ha’api’i nei nō ni’a i te fāri’ira’a i te mana o te Atua i roto i tō tātou orara’a. Teie te tahi o te reira mau ’īrava Iosua 6:1–5, 18, 20 ; 7:11–13.

Iosua 23–24

« E fa’ata’a na ’outou i teie nei mahana i tā ’outou e ha’amori ».

• Mai te mea e feruri te mau pīahi ē, e ’āti ’Īsera’ela rātou iho e fa’aro’o ra ia Iosua ’ia hōro’a i teie parau a’o i te hope’a o tōna orara’a, penei a’e e tauturu te reira ia rātou ’ia fa’a’ohipa i te Iosua 23–24 i ni’a ia rātou iho. E nehenehe ’outou e hōro’a i te tahi mau ’īrava nō te tai’o marū noa ’e i muri iho, e ani ia rātou ’ia fa’a’ite mai i te hō’ē mea nō roto mai i te reira mau ’īrava tei fa’auru ia rātou ’ia vai ha’apa’o tāmau noa i te Fatu. E nehenehe ato’a rātou e fa’a’ite mai e mea nāhea tō rātou iho ravera’a i te fa’aotira’a nō ni’a « i tā [rātou] e ha’amori » (Iosua 24:15). Nō te aha rātou i rave ai i teie fa’aotira’a ?

• E nehenehe ’outou e ani i te mau pīahi ’ia rave i te hō’ē pereota i roto i te Iosua 23–24 ’o tē fa’auru ia rātou ’ia mā’iti i te tāvini i te Atua ’e i muri iho, ’ia hāmani i te hō’ē hōho’a pia ’aore rā teie pereota nō te pia i te fare ’aore rā, i ni’a i te tūreiara’a tōtiare.

Ha’amaita’ira’a i tā tātou ha’api’ira’a

E tupu te tupura’a pae vārua i te ’utuāfare. E mea ti’a i te mau melo o tā ’outou piha ha’api’ira’a ’ia fāri’i i tō rātou iho mau ’itera’a pae vārua i rāpae i te piha ha’api’ira’a ’ia ti’a ia rātou ’ia vai pūai noa i te pae vārua. ’A ’imi i te mau rāve’a nō te fa’a’ohipa i tō ’outou taime poto i pīha’i iho ia rātou nō te fa’auru ia rātou ’ia ’imi i te mā’a pae vārua i roto i te mau pāpa’ira’a mo’a i te fare—te ta’ata hō’ē ’e tō rātou ’utuāfare. (Hi’o Ha’api’ira’a mai tā te Fa’aora,18.)