Fa’ahōho’ara’a nō Mose i ni’a i te mou’a Nebo, © Providence Collection/licensed nō roto mai goodsalt.com

16–22 nō Mē

Deuteronomi 6–8 ; 15 ; 18 ; 29–30 ; 34

« E ara ’oe i reira, ’o te moīna Iehova ia ’oe »

’Ua fa’auruhia Mose ’ia ha’api’i i te mau tamari’i o ’Īsera’ela ’ia au i tō rātou mau hina’aro (hi’o Deuteronomi 6:1). ’A tuatapapa ai ’outou i te Deuteronomi, ’a ’imi i te fa’aurura’a nō te ’ite e aha te mau parau tumu e ha’api’i, ’ia au i te mau hina’aro o te mau pīahi.

Pāpa’i i te mau mana’o e tae mai

Tītau i te mana’o

Nō te mea tē vai ra i roto i te Deuteronomi te mau parau hope’a a Mose i te mau tamari’i o ’Īsera’ela, e nehenehe ’outou e ani atu i te mau pīahi ’ia fa’a’ite mai i te hō’ē mea tā rātou i ’ite mai i roto i te Deuteronomi, ’o tā rātou e hina’aro e tu’u i roto i tā rātou mau parau hope’a i tā rātou mau tamari’i ’aore rā, mau mo’otua. ’A fa’a’ite mai ai rātou i te reira, ’a ani ia rātou ’ia fa’ata’a mai nō te aha rātou i mā’iti ai i te reira mau parau.

Ha’api’i i te ha’api’ira’a tumu

Deuteronomi 6:4–7, 20–25 ; 8:2–5, 11–17 ; 29:18–20 ; 30:6–10, 15–20

Tē hina’aro nei te Fatu ’ia here tātou iāna ma tō tātou ’ā’au ato’a.

• I roto i te roara’a o te Deuteronomi, tē vai ra te mau tuha’a pāpa’ira’a ’o tē nehenehe e fa’auru ia tātou ’ia feruri nō ni’a i te huru pae vārua o tō tātou vārua. Nō te tauturu i te mau pīahi ’ia fa’a’ite mai i tō rātou mau mana’o nō ni’a i teie mau tuha’a pāpa’ira’a, e nehenehe ’outou e pāpa’i hōho’ai te hō’ē māfatu i ni’a i te tāpura ’ere’ere. I muri iho, ’a vāhi i teie mau pāpa’ira’a i muri nei nā rotopū i te mau pīahi : Deuteronomi 6:4–7, 20–25 ; 8:2–5, 11–17 ; 29:18–20 ; 30:6–10, 15–20. E ani i te mau pīahi ’ia pāpa’i i te fa’ahorora’a i roto i te māfatu mai te mea tē ha’api’i ra te reira i te hō’ē mea e ti’a ’ia vai i roto i tō tātou māfatu ’aore rā, ’ia pāpa’i i te fa’ahorora’a i rāpae i te māfatu mai te mea tē ha’api’i ra te reira i te hō’ē mea e ti’a ia tātou ’ia ha’apae. E aha te aura’a te parau ē, e hōro’a i tō tātou ’ā’au tā’āto’a i te Metua i te ao ra ?

• Nāhea tātou i te fa’ata’a i tō tātou ’utuāfare ’e ia vetahi ’ē e nō te aha tātou e ha’apa’o ai i te mau fa’auera’a a te Atua ? I muri a’e i te ferurira’a i ni’a i teie uira’a, e nehenehe te mau pīahi e tai’o i te Deuteronomi 6:4–7, 20–25 ’aore rā i te fa’ahitira’a parau i roto i « Te tahi atu mau rāve’a tauturu » ’e ’ia fa’a’ite mai i tō rātou mau mana’o. E aha tā teie mau mana’o e fa’atupu i ni’a i tō tātou mana’o nō ni’a i te mau fa’auera’a ’aore rā, te mau fafaura’a ?

Deuteronomi 6:4–9, 20–25

« ’A ha’api’i ma te itoito i [te mau parau a te Fatu] i tā ’outou mau tamari’i ».

• I te tahi taime e mea maita’i ’ia fa’aro’o i te mau mana’o nō ni’a i te mau huru tā vetahi ’ē e ha’api’i nei ’e e ’apo mai i te ’evanelia i roto i tō rātou ’utuāfare. E ’āparaura’a e mea nāhea te pe’era’a te mau pīahi i te a’ora’a i roto i te Deuteronomi 6:4–9, 20–25 i te hōro’a i tā ’outou piha ha’api’ira’a i te hō’ē rāve’a nō te ha’api’i mai nā roto mai i te tahi ’e te tahi. E aha tā tātou e rave nō te ha’api’i ’e nō te « parau » (’īrava 7) i te parau a te Atua mai tā teie mau ’īrava e fa’ata’a nei ? E aha te mau ’itera’a tā tātou e nehenehe e fa’a’ite, i reira tō te Fatu arata’ira’a ia tātou i roto i tā tātou mau tauto’ora’a ?

Deuteronomi 15:1–15

Te tauturura’a i te feiā nava’i ’ore, e tītauhia te rima hōro’a noa ’e te ’ā’au tae.

• ’Aita tātou i tae atura i te mahana « ’ia ’ore roa te feiā tao’a ’ore iō ’oe ra » (Deuteronomi 15:4), nō reira, te mau parau tumu nō ni’a i te tauturura’a i te feiā veve i roto i te Deuteronomi 15, e mea faufa’a noa ā ïa, noa atu ē, ’ua taui te mau peu ta’a ’ē nō ni’a i te tārahu ’e te mau tāvini. E nehenehe ’outou e ani i te mau pīahi ’ia hi’o fa’ahou i te mau ’īrava 1–15 ’e ’ia ’ite mai i te mau parau tumu nō ni’a i te tauturura’a i te feiā veve ’e te nava’i ’ore tā rātou e hina’aro e tāu’aparau. E nehenehe te mau uira’a mai teie e tauturu i te ’āparaura’a : E aha te aura’a « E ha’amahora hua rā ’oe i tō rima » i te feiā nava’i ’ore ? (’īrava 8, 11). E aha te ti’ara’a o tō tātou ’ā’au i roto i te tauturura’a ia vetahi ’ē ? (hi’o te mau ’īrava 7, 9–10). E aha tā tātou e nehenehe e ha’api’i mai nō ni’a i te tauturura’a i te feiā nava’i ’ore i roto i te hi’ora’a o te Fatu ? (hi’o ’Īrava 15).

Deuteronomi 29:9 ; 30:15–20

Tē ani mai nei te Fatu ia tātou ’ia mā’iti i rotopū i « te ora ’e te maita’i, ’e te pohe ’e te ’ino ».

• E mea au ’ia fa’aau i te mau parau a Mose i roto i te Deuteronomi i te tahi mau ha’api’ira’a hope’a a Lehi i tōna ’utuāfare i roto i te 2 Nephi 1–4. Penei a’e e ’ite dmai te mau pīahi i te mau ’aifāitora’a ’e te mau ta’a-’ē-ra’a i rotopū i teie mau tuha’a pāpa’ira’a : Deuteronomi 29:9 ’e 2 Nephi 4:4 ; Deuteronomi 30:15–20 ’e 2 Nephi 2:26–29. E mea nāhea tō Lehi fa’ananeara’a i te mau mea tā Mose i ha’api’i ? Nō te aha te mau ta’o mai te orara’a ’e pohera’a e riro ai ’ei rāve’a maita’i nō te fa’ata’a i tā tātou mau mā’itira’a nō te « ha’apa’o » ’aore rā, « e fāriu ’ē » i te mau fa’auera’a a te Atua ? (Deuteronomi 30:16–17). E nehenehe te mau pīahi e fa’a’ite mai e aha tā rātou e ’ite mai i roto i teie mau tuha’a pāpa’ira’a ’o tē fa’auru ia rātou ’ia « mā’iti i te ora » (Deuteronomi 30:19).

Te tahi atu mau rāve’a tauturu

E ha’apa’o tātou i tā tātou mau fafaura’a nō te mea ’ua here tātou i te Atua.

’Ua ha’api’i te peresideni Linda K. Burton:

« I roto i te mau tumu ato’a e ti’a ia tātou ’ia rahi atu te itoito i te fa’aturara’a i tā tātou fafaura’a, teie te tumu pāpū a’e i te mau tumu ato’a—te here.

« ‘Mai te mea ē, ’ua māuruuru hope roa tātou i tō tātou mau ha’amaita’ira’a e rave rahi nā roto i te fa’aorara’a tei ravehia nō tātou, ’aore hō’ē mea tā te Fatu e nehenehe e ani mai ia tātou ’o tā tātou e ’ore e rave ma te hina’aro mau ’e te ’ā’au tae’ [Joseph Fielding Smith, « Te faufa’a o te purera’a ’ōro’a », Ve’a nā te Sōtaiete Tauturu, ’Ātopa 1943, 592]. ’Ia au i teie fa’ahitira’a parau nā te peresideni Joseph Fielding Smith, ’ua riro te ha’apa’ora’a i te fafaura’a ’ei rāve’a nō te fa’a’ite i tō tātou here nō te tāra’ehara fāito ’ore ’e te hope ’ore a tō tātou Fa’aora ’e te Arai ’e te here maita’i roa o tō tātou Metua i te ao ra » (« Te mana, te ’oa’oa, ’e te here nō te ha’apa’ora’a i te fafaura’a », Liahona, Novema 2013, 114).

Ha’amaita’ira’a i tā tātou ha’api’ira’a

’A fa’aro’o. « Te fa’aro’ora’a e ’ohipa ïa nō te here… ’A ani i te Metua i te Ao ra ’ia tauturu mai ia ’outou ’ia māramarama i te mea tā tā ’outou mau pīahi e parau ra. ’Ia ha’apa’o maita’i ana’e ’outou i tā rātou mau poro’i tei parau-vaha-hia mai ’aore rā ’aita i parauhia, e māramarama maita’i a’e ’outou i tō rātou mau hina’aro, tō rātou mau māna’ona’ora’a ’e tō rātou mau hia’ai » (Ha’api’ira’a mai tā te Fa’aora, 34).