Fa’ahōho’ara’a nō Mose e fa’atōro’a ra ia Iosua, nā Darrell Thomas

23–29 nō Mē

Iosua 1–8 ; 23–24

« E fa’a’eta’eta ’oe, ’e ’ia itoito roa »

’A tuatāpapa ai ’outou i te buka a Iosua, ’a feruri nāhea te mau mea tā ’outou e ’apo nei nō ni’a i te mau ’āti ’Īserā’ela e nehenehe e fa’arahi i tō ’outou fa’aro’o ia Iesu Mesia.

Pāpa’i i te mau mana’o e tae mai

E fea u’i tei tītauhia, i teienei rā tē tupu ra te parau fafau a te Fatu : tē fātata ra te taime nō te mau tamari’i a ’Īserā’ela ’ia fatu i te fenua i parauhia ra. I mua rā ia rātou, tē tārava mai ra te ’ānāvai Ioridana, te patu nō Ieriko ’e te hō’ē nūna’a ’ino, e nūna’a pūai rā, e nūna’a tei fa’aru’e i te Fatu (hi’o 1 Nephi 17:35). Nā ni’a roa atu, ’ua reva atu Mose, tō rātou ti’a fa’atere here ra. ’Ua fa’atupu paha teie ’ohipa i te mana’o paruparu ’e te mata’u i roto i te tahi o te mau tamari’i a ’Īserā’ela, ’ua parau rā te Fatu : « E fa’a’eta’eta, ’e ’ia itoito roa ». Nō te aha rātou e feruri ai mai te reira te huru ? E ’ere nō tō rātou iho pūai—e ’ere ato’a nō tō Mose pūai ’aore rā tō Iosua—nō te mea rā « tei pīha’i ato’a iho ho’i tō Atua ’o Iehova ia ’oe i tō mau haere’a ato’a ra » (Iosua 1:9). ’Ia tārava tō tātou iho mau ’ānāvai i mua ia tātou, ’e te mau patu e vāvāhi, e nehenehe te mau ’ohipa fa’ahiahia ’ia tupu i roto i tō tātou orara’a, inaha « ananahi ho’i Iehova e rave ai i te mea ta’a ’ē i roto ia [tātou nei] » (Iosua 3:5).

Nō te hō’ē hi’ora’a rere ā manu nō te buka a Iosua, hi’o « Joshua, book of » i roto i te Bible Dictionary (Fa’atoro parau nō te Bibilia).

Mau mana’o nō te tuatāpapara’a pāpa’ira’a mo’a a te ta’ata hō’ē

Iosua 1:1–9

Tei pīha’i iho te Atua iā’u ’ia ha’apa’o maita’i au iāna.

’A feruri na e aha te mana’o o Iosua ’a pi’ihia ai ’oia nō te mono ia Mose. ’A hi’o na i te mea tā te Fatu i parau i roto i te Iosua 1:1–9 nō te fa’aitoito iāna. ’A feruri i te mau tāmatara’a pa’ari tā ’oe e fa’aruru ra ; e aha te mea i roto i teie mau ’īrava e fa’atupu nei i te itoito i roto ia ’oe ?

E mana’o au e tupu ’ia ’ite ē, te aura’a o te i’oa Iosua (Yehoshua ’aore rā Yeshua nā roto i te reo hebera), ’oia ho’i ïa, « e fa’aora Iehova ». ’E nō roto mai te i’oa Iesu i te i’oa Yeshua. Nō reira, ’ia tai’o ’oe nō ni’a ia Iosua, ’a feruri nāhea tāna misiōni arata’ira’a i te mau tamari’i a ’Īserā’ela i roto i te fenua i parauhia ra, e fa’aha’amana’o nei ia ’oe i te misiōni a te Fa’aora.

Hi’o ato’a Ann M. Dibb, « ’Ia riro ’ei mea itoito roa », Liahona, Mē 2010, 114–16.

Iosua 2

Tītauhia to’opiti te fa’aro’o ’e te ’ohipa nō te fa’aorara’a.

’Ua hi’o te mau keresetiano mātāmua ia Rahaba ’ei hi’ora’a nō te mana nō to’opiti te fa’aro’o ’e te ’ohipa (hi’o Hebera 11:31 ; Iakobo 2:25). ’A tai’o ai i te Iosua 2, ’a feruri e mea nāhea te fa’aro’o o Rahaba ’e tāna mau ’ohipa i fa’aora ai iāna, ’e tōna ’utuāfare ’e nā manu a ’Īserā’ela. E aha te ha’api’ira’a tā ’oe e ’apo nei nō ni’a i te huru tō ’oe fa’aro’o i te Mesia ’e tā ’oe mau ’ohipa e nehenehe e fa’atupu i te hō’ē ’ohipa i roto ia ’oe ’e ia vetahi ’ē ?

E aura’a ta’a ’ē paha e ’itehia i te mea ē e tupuna Rahaba nō te ari’i Davida ’e nō Iesu Mesia ato’a (hi’o Mataio 1:5). E aha te tahi ha’api’ira’a tē nehenehe e ’apo mai i reira ?

Rahaba i te ha’amāramarama. Waiting for the Promise [Te tīa’ira’a i te parau fafau], nā Elspeth Young.

Iosua 3–4

E nehenehe tā’u e ’ite i te « mea ta’a ’ē » a te Atua mai te mea e fa’aro’o tō’u ia Iesu Mesia.

Tē hina’aro nei te Fatu « ’ia ’ite tō te ao ato’a nei i te huru o te pūai o te rima o Iehova » (Iosua 4:24). ’A tai’o ai ’oe i te Iosua 3–4, ’a feruri nāhea ’oe ’ia ’ite i te huru o te pūai o te rima o Iehova. Mea nāhea te Fatu i te ravera’a i te « mea ta’a ’ē » i roto i tō ’oe orara’a ?(Iosua 3:5). Nāhea ’oe e nehenehe ai e ’ite—’aore rā e ta’a—pinepine a’e i te reira mau mea ta’a ’ē ? (’ei hi’ora’a, hi’o Iosua 3:17).

I tō ’oe mana’o, nō te aha ’oe e mana’o nei ē, tītauhia i te mau tamariʼi a ’Īserā’ela ’ia ha’amo’a ia rātou hou ’a haere ai nā roto i te ’ānāvai Ioridana ? E aha te ha’api’ira’a tā ’oe e ’ite ra i te mea ē ’ua fa’ata’a ’ē te ’ānāvai i te taime noa « e rari a’era te ’āvae o te feiā tahu’a… i te hiti pape » ?(Iosua 3:13, 15).

Nō te tahi atu mau ’ohipa ta’a ’ē i tupu i te ’ānāvai Ioridana, hi’o 2 Ari’i 2:6–15 ; 5:1–14 ; ’e Mareko 1:9–11. ’A feruri ai ’oe i ni’a i teie mau ’īrava, e aha te mau tū’atira’a tā ’oe e ’ite ra i roto i teie mau ’ohipa ?

Hi’o ato’a Gérald Caussé, « E mea māere ānei ā nō ’outou ? » Liahona, Mē 2015, 98–100 ; « Exercise Faith in Christ [Te fa’a’ohipara’a i te fa’aro’o i te Mesia] » (video), ChurchofJesusChrist.org.

Iosua 6–8

Tē fa’atae nei te ha’apa’o i te mana o te Atua i roto i tō’u orara’a.

Tē fa’ati’a nei teie mau pene nō ni’a i te mau ’arora’a i te mau fenua nō Ieriko ’e nō Ai. ’A tai’o ai ’oe i te reira, ’a feruri nāhea ’oe e ’aro nei i te ’umera’a ’ia hara i roto i tō ’oe iho orara’a (’ei hi’ora’a, hi’o Iosua 7:10–13). E aha tā ’oe e ha’api’i ra nō ni’a i te huru te Atua e nehenehe e tauturu ia ’oe ’e e aha tei tītauhia ia ’oe ’ia rave ’ia matara mai tōna mana ia ’oe ? ’Ei hi’ora’a, e aha te mea tā ’oe e fa’ahiahia nei i roto i te mau arata’ira’a a te Fatu nō te haru ia Ieriko (hi’o Iosua 6:1–5). Penei a’e e riro te fa’ati’ara’a i roto i te Iosua 7 i te fa’auru ia ’oe ’ia hi’o « e mea anatemahia [ānei] » tei roto i tō ’oe orara’a tei tītauhia e tātara (Iosua 7:13).

Iosua 23–24

« ’Ia ’ati rā ’outou i tō ’outou Atua ra ia Iehova ».

I muri iho i te fa’ata’ara’a i te fenua i parauhia ra i rotopū i nā ’āti e ’ahuru ma piti o ’Īserā’ela (hi’o Iosua 13–21), ’ua hōro’a Iosua ia rātou i tāna mau ha’api’ira’a hope’a. ’A tai’o ai ’oe i teie mau ha’api’ira’a i roto i te Iosua 23–24, e nehenehe paha e tāpe’a mai i te hō’ē tāpura nō te mau fa’aarara’a, te mau parau a’o ’e te mau ha’amaita’ira’a i parauhia. ’Ia hi’ohia te mau mea ato’a tā te mau tamariʼi a ’Īserā’ela i rātere na, ’ia mana’o ’oe, nō te aha Iosua i mā’iti ai e parau ia rātou i teie mau mea i te hope’a o tōna orara’a ? E aha tā ’oe e ’ite ra ’o tē fa’auru ia ’oe « ’ia ’ati [i tō ’oe] Atua » ?? (Iosua 23:8).

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Iosua 1:8.E aha tā teie ’īrava e parau nei nō ni’a i te huru e hi’o i tā tātou tuatāpapara’a pāpa’ira’a mo’a, tā te ta’ata hō’ē ’e tā te ’utuāfare ? E mea nāhea te mau pāpa’ira’a mo’a i ha’amaita’i ai i « [tō tātou] haere’a » ’e « manuia roa ai » ?

Iosua 4:3, 6–9.I muri a’e i te tai’ora’a i te mea tā te Fatu i te hina’aro i te mau tamariʼi a ’Īserā’ela ’ia rave i te mau ’ōfa’i i roto i te ’ānāvai Ioridana, e nehenehe te ’utuāfare e paraparau nō ni’a i te tahi o te mau mea rarahi tā te Fatu i rave nō ’outou. I muri iho e nehenehe e hōro’a i te melo tāta’itahi o te ’utuāfare i te hō’ē ’ōfa’i ma te ani ia rātou ’ia pāpa’i i te parau ’aore rā te hōho’a i ni’a iho nō te hō’ē mea tā te Fatu i rave nō rātou.

Iosua 6:2–5.Penei a’e e au tō ’outou ’utuāfare ’ia ha’uti ta’ata ora i te mau arata’ira’a tā te Fatu i hōro’a i te mau tamariʼi a ’Īserā’ela nō te haru ia Ieriko. E aha ra te ha’api’ira’a tā te Fatu i hina’aro ia tātou ’ia ’apo mai i roto i teie ’ā’amu ?

Iosua 24:15.I muri iho i te tai’ora’a i teie ’īrava, e nehenehe te mau melo o te ’utuāfare e fa’a’ite i te tahi mau ’ohipa i reira rātou i te mā’itira’a e tāvini i te Fatu noa atu ā e mea pa’ari. Nō te aha e mea faufa’a ’ia mā’iti e tāvini iāna « i teie nei mahana », ’eiaha pa’i e tīa’i roa ’ia tupu mai te hō’ē ’ohipa ? Nāhea tātou e nehenehe ai e turu i te mau melo o tō tātou « ’utuāfare » ’a tūtava ai i te « ha’amori ia Iehova » ?

Nō te tahi atu mau mana’o nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Hīmene tei mana’ohia : « Mā’iti i te maita’i », Te mau hīmene, n° 144.

Ha’amaita’ira’a i tā tātou ha’api’ira’a

Fa’a’ite pinepine i tō ’outou ’itera’a pāpū. E nehenehe tō ’oe ’ite ateate nō te parau mau e fa’auru rahi roa i tō ’outou ’utuāfare. ’Aita i tītauhia te mau parau vāna’ana’a ’aore rā te mau parau rahi. E mea pūai te hō’ē ’itera’a pāpū mai te mea e mea ’āfaro ’e nō roto mai i te ’ā’au. (Hi’o Ha’api’ira’a mai tā te Fa’aora, 11.)

’Ua ha’amarua te Fatu i te mau patu nō Ieriko. © Providence Collection/licensed from goodsalt.com