Fa’ahōho’ara’a nō te fa’atōro’ara’a ’o Mose ia Iosua, nā Darrell Thomas.

23-29 nō Mē

Iosua 1–8 ; 23–24

« E fa’a’eta’eta ’oe, ’e ’ia itoito roa »

’Ia tai’o ana’e ’outou i te Iosua 1–8 ’e 23–24, ’a pāpa’i i te mau mana’o pae vārua tā ’outou e fāri’i. E aha tā ’outou e rave nō te ’ite e aha tā te mau tamari’i tā ’outou e ha’api’i ra e tītau ’ia ha’api’i mai nā roto mai i teie mau pene ?

Pāpa’i i te mau mana’o e tae mai

Tītau i te mana’o

’A pāpa’i i te hō’ē hōho’a i ni’a i te tāpura ’ere’ere nō te hō’ē mea nō roto mai i te mau ’ā’amu i roto i te Iosua 1–8 ; 23–24, ’e ’a hi’o ē, e nehenehe ānei te mau tamari’i e ’imi nō roto mai i tei hea ’ā’amu. ’Ei hi’ora’a, e nehenehe ’outou e pāpa’i i te hō’ē ’ānāvai ’aore rā, i te hō’ē patu ’oire.

Ha’api’i i te ha’api’ira’a tumu : Te mau tamari’i ’āpī a’e

Iosua 1:8

E nehenehe au e feruri i te mau pāpa’ira’a mo’a i te ao ’e te pō.

’Ua parau te Fatu ia Iosua ē, mai te mea e feruri hōhonu ’oia i ni’a i te mau pāpa’ira’a mo’a, ’e e ha’apa’o i te a’ora’a i roto i te reira, e manuia ’oia i te arata’ira’a i te ’āti ’Īsera’ela i roto i te fenua i parauhia ra. E aha tā ’outou e nehenehe e rave nō te ha’api’i i te mau tamari’i i te mau ha’amaita’ira’a rahi e tae mai nā roto mai i te mau pāpa’ira’a mo’a ?

Mau ’ohipari’i e nehenehe e rave

• ’A hōro’a i te tamari’i tāta’itahi i te hō’ē hōho’a ’aore rā, te hō’ē hōho’a pāpa’i o te mahana ’e te ’āva’e. ’A tai’o i mua ia rātou i te Iosua 1:8 : « Feruri hōhonu [i ni’a i te mau pāpa’ira’a mo’a] i te ao ’e i te pō ». ’A fa’ata’a ē, e aura’a te parau feruri hōhonu ’o te ferurira’a ïa ma te hōhonu nō ni’a i te hō’ē mea. ’A fa’ahiti i te pereota e rave rahi taime, ’e ’a ani i te mau tamari’i ïa ’āfa’i i te mahana i ni’a ’ia parau ana’e ’outou « mahana » ’e te ’āva’e ’ia parau ana’e ’outou « pō ». ’A vaiiho i te mau tamari’i ’ia fa’ahiti i te pereota nā muri iho ia ’outou.

• ’A ani i te mau tamari’i ’ia fa’a’ite mai i te i’oa ’o te mau mea tā rātou e rave i te ao ’e te mau mea tā rātou e rave i te pō. ’A parau ia rātou ē, ’ua parauhia ia Iosua ’ia feruri nō ni’a i te mau pāpa’ira’a mo’a i te ao ’e te pō. ’A tauturu ia rātou ’ia feruri i te mau ’ā’amu ’aore rā, i te mau ha’api’ira’a i roto i te mau pāpa’ira’a mo’a, ’ia nehenehe ia rātou ’ia feruri i te reira i te ao ’e te pō. ’A ani ia rātou ’ia pāpa’i i te hō’ē hōho’a nō rātou iho ’aore rā, nō tō rātou ’utuāfare e tuatāpapa ra i te mau pāpa’ira’a mo’a. Nō te aha rātou e au ai ’ia tuatāpapa i te mau pāpa’ira’a mo’a ? Nāhea rātou i te ha’amaita’ihia ’ia nā reira ana’e rātou ?

Iosua 3

E ti’a iā’u ’ia bāpetizohia nō te tomo i roto i te bāsileia o te ao.

Nā te ’ā’amu ’o Iosua e arata’i ra i te ’āti ’Īserā’ela nā roto i te ’ānāvai nō Ioridana i te fenua i parauhia ra, e hōro’a mai i te rāve’a nō te ha’api’i i te mau tamari’i ē, e tītauhia ia tātou ’ia bāpetizohia nō te tomo i roto i te bāsileira o te ao.

Mau ’ohipari’i e nehenehe e rave

• ’A hi’o fa’ahou i te tahi mau fa’ata’ara’a o te ’ā’amu o te mau tamari’i o ’Īserā’ela i te rāterera’a nā roto i te ’ānāvai nō Ioridana nō te tomo i roto i te fenua i parauhia ra (hi’o « Iosua te peropheta » i roto i Te mau ’ā’amu ’o te Faufa’a Tahito). I muri iho, ’a fa’a’ite i te hō’ē hōho’a nō Iesu e bāpetizohia ra, ’e ’a parau i te mau tamari’i ē, ’ua bāpetizo-ato’a-hia Iesu i roto i te reira ’ānāva’i. ’A ani i te mau tamari’i ’ia fa’a’ite mai i te tahi atu mau mea tā rātou i ’ite nō ni’a i te bāpetizora’a a Iesu.

• ’A hīmene ’e te mau tamari’i i te hō’ē hīmene nō ni’a i te bāpetizora’a, mai « Le bapteme » (Chants pour les enfants, 54–55). ’A tauturu ia rātou ’ia ’ite ē, e aha tā teie hīmene e ha’api’i mai nei ia tātou nō te aha Iesu i bāpetizohia ai, ’e nō te aha tātou e pe’e ai i tōna hi’ora’a. ’A vaiiho i te mau tamari’i ’ia fa’a’ite mai i tō rātou mau mana’o ’ia bāpetizohia rātou. ’A paraparau e aha tā te mau tamari’i e nehenehe e rave i teie nei nō te fa’aineine ia rātou ’ia bāpetizohia ’ia ti’a ana’e tō rātou matahiti i te va’u.

  

  E mea ti’a ’ia tātou ’ia bāpetizohia nō te tomo atu i roto i te bāsileia o te ao.

Iosua 24:15

E nehenehe au e mā’iti ’ia tāvini ia Iesu Mesia .

Te parau poro’i hope’a a Iosua i tōna mau ta’ata ’oia ho’i, nā rātou e mā’iti e tāmau noa ānei i te tāvini i te Fatu ’aore rā, e fa’aru’e iāna. Ma taua here ra nō Iosua i tōna mau ta’ata, e nehenehe ’outou e fa’aitoito i te mau tamari’i tā ’outou e ha’api’i ra ’ia mā’iti ’ia tāvini i te Fatu « i teie nei mahana ».

Mau ’ohipari’i e nehenehe e rave

• ’A ani i te mau tamari’i ’ia paraparau nō ni’a i te tahi ’o te mau mā’itira’a tā rātou i rave i teie mahana. E tai’o i mua i te mau tamari’i i te Iosua 24:15 : « E fa’ata’a na ’outou i teie nei mahana i tā ’outou e ha’amori … ’āre’a vau ’e tō’u ato’a ra ’utuāfare, e ha’amori ïa mātou ia Iehova ». E mea nāhea te mau tamari’i i te mā’itira’a ’ia tāvini i te Fatu i teie mahana ? E aha te tahi mau rāve’a tā tātou e nehenehe e mā’iti nō te tāvini iāna i te mau mahana ato’a ?

• E hīmene i te hōʼē hīmene nō niʼa i te ravera’a i te mau mā’itira’a maita’i, mai « Choisir le bien » (Chants pour les enfants, 82). E aha tō tātou huru ’ia mā’iti ana’e tātou e tāvini ia Iesu Mesia ? E ani i te mau tamari’i ’ia pāpa’i i tō rātou iho hōho’a tē rave ra i te hō’ē ’ohipa nō te tāvini i te Fatu. ’A fa’a’ite i te hō’ē ’ā’amu nō roto mai i tō ’outou orara’a ’aore rā, nō roto mai i te hō’ē ve’a a te ’Ēkālesia nō ni’a i te mā’itira’a ’ia tāvini i te Fatu.

Ha’api’i i te ha’api’ira’a tumu : Te mau tamari’i pa’ari a’e

Iosua 1–4 ; 6

« E fa’a’eta’eta ’oe, ’e ’ia itoito roa »

I muri a’e i tō Iosua rirora’a ’ei fa’atere nō te ’āti ’Īserā’ela, ’ua fa’aitoito te Fatu iāna ma te parau ē, « E fa’a’eta’eta ’oe, ’e ’ia itoito roa » (Iosua 1:6). E aha tā te mau tamari’i e nehenehe e ha’api’i mai nā roto mai ia Iosua nō ni’a i te rirora’a ei mea pūai ’e te itoito nō te Mesia ?

Mau ’ohipari’i e nehenehe e rave

• ’A ani i te mau tamari’i ’ia ’imi i te pereota tei fa’ahiti-fa’ahou-hia i roto i te Iosua 1:6, 9, ’e te 18, ’e ’a pāpa’i i te reira i ni’a i te tāpura ’ere’ere (hi’o ato’a te ’īrava 7). ’A tauturu i te mau tamari’i ’ia feruri i te mau tumu e riro tātou i te hina’aro i teie parau poro’i, mai ia Iosua i nā reira. ’A hi’o fa’ahou ’ei piha ha’api’ira’a i te tahi mau ’ā’amu i roto i te Iosua 1–4 ; 6 (hi’o ato’a « Iosua te peropheta » ’e « Rahaba ’e te feiā ’imi » i roto i Te mau ’ā’amu o te Faufa’a Tahito), ’e e ani i te mau tamari’i ’ia ’imi nāhea te mau ta’ata i roto i teie mau ’ā’amu i te fa’a’itera’a i te itoito ’e te pūai.

• E ani i te mau tamari’i ia paraparau mai nō ni’a i te hō’ē ta’ata tā rātou i ’ite e mea pūai ’e te itoito nō Iesu Mesia. ’A fa’aitoito ’ia rātou ’ia pāpa’i i te hō’ē mea tā rātou e hina’aro e rave nō te riro ei ta’ata pūai ’e te itoito nō te Mesia.

Iosua 1:8

E nehenehe au e feruri hōhonu i ni’a i te mau pāpa’ira’a mo’a i te ao ’e te pō.

Te hō’ē rāve’a ’a tauturu ai te Fatu ia Iosua ’ia fa’aineine nō te mau tāmatara’a tāna i fa’aruru, ’oia ho’i, nā roto ïa i te fa’aitoitora’a iāna ’ia « feruri hōhonu » i ni’a i te mau pāpa’ira’a mo’a « i te ao ’e te pō ». Nāhea teie parau a’o i te ha’amaita’i i te mau tamari’i tā ’outou e ha’api’i ra ?

Mau ’ohipari’i e nehenehe e rave

• ’A ani i te mau tamari’i ïa pāpa’i e hia rahira’a taime tā rātou e pau nei i te hō’ē mahana i ni’a i te mau ’ohipara’a rau. I muri iho, ’a ani ia rātou ’ia tai’o i te Iosua 1:8, ma te ’imi i te hō’ē mea e ti’a ia tātou pā’āto’a ’ia rave i te mau mahana ato’a ’e te mau pō ato’a. ’A ani ia rātou ’ia ’imi i te mau ta’o ’e te mau pereota i roto i teie ’īrava ’o tē ha’api’i ia tātou nō ni’a i te mau ha’amaita’ira’a ’o te tuatāpapara’a i te mau pāpa’ira’a mo’a. Nāhea te feruri-hōhonu-ra’a i ni’a i te mau pāpa’ira’a mo’a i te tauturu ia tātou ’ia manuia i roto i te tahi atu mau ’ohipa tā tātou e rave i te mau mahana ato’a ?

• E ani i te mau tamari’i ’ia tai’o ’āmui i te mau pāpa’ira’a mo’a i muri nei : Iosua 1:8 ; 1 Nephi 15:23–24 ; 2 Nephi 31:20 ; 32:3 ; Iakoba 4:6 ; Helamana 3:29–30. ’A ani i te mau tamari’i ’ia ’imi i te hō’ē ta’o ’aore rā, te hō’ē pereota i roto i te pāpa’ira’a tāta’itahi ’o tē ha’api’i ia rātou nō ni’a i te mana o te tuatāpapara’a i te mau pāpa’ira’a mo’a. E aha te mau ’ōpuara’a tā rātou e nehenehe e ha’amau nō tā tātou iho tuatāpapara’a pāpa’ira’a mo’a ?

Iosua 24:15

E nehenehe au e mā’iti ’ia tāvini ia Iesu Mesia .

I roto i te mau parau hope’a a Iosua i te ’āti ’Īserā’ela, tē vai ra hō’ē tāparura’a ’ia « fa’ata’a nā … i teie nei mahana i tā ’outou e ha’amori ». E feruri nāhea teie parau a’o e nehenehe ai e ha’amaita’i ato’a i te mau tamari’i tā ’outou e ha’api’i ra.

Mau ’ohipari’i e nehenehe e rave

• ’A ani i te mau tamari’i ’ia hāmani i te hō’ē hōho’a pia ma te fa’a’ohipa i te tahi ’o te mau ta’o ’e te mau pereota faufa’a i roto i te Iosua 24:15. ’A vaiiho ia rātou ’ia fa’a’ite mai i tā rātou hōho’a pia ’e ’ia fa’ata’a mai nō te aha rātou i mā’iti ai i teie mau ta’o. Nāhea e ti’a ai ia tātou ’ia fa’a’ite i te Atua ē, ’ua mā’iti tātou ’ia tāvini Iāna ?

• E ani i te mau tamari’i ’ia hōro’a mai i te mau hi’ora’a i reira e tītauhia ai ia rātou ’ia fa’aoti ’ia mā’iti i te Atua ’eiaha i te tahi atu mau mea. ’A ani ia rātou ’ia feruri i te mea tā rātou e rave. Nō te aha e mea faufa’a ’ia « mā’iti i teie mahana » ’eiaha rā e tīa’i ’ia tupu mai taua ’ohipa ra ? Nāhea tātou i te ha’amaita’ihia ’ia rave ana’e tātou i te mā’itira’a ti’a ?

Fa’aitoito i te ’apora’a mai i te fare

E ani i te mau tamari’i ’ia mā’iti i te hō’ē mea tā ’outou i paraparau ’o tā rātou e hina’aro e fa’a’ite i tō rātou ’utuāfare. ’A fa’aitoito ia rātou ’ia feruri i te hō’ē rāve’a e ti’a ai ia rātou ’ia fa’a’ite i te reira i teie hepetoma e fā mai nei.

Haʼamaitaʼiraʼa i tā tātou haʼapiʼiraʼa

E tauturu i te mau tamari’i ’ia riro ’ei mau pīahi maita’i a’e. Tā ʼoutou fā i roto i te haʼapiʼiraʼa i te mau tamariʼi e ʼere ïa i te hōroʼa-noa-raʼa i te parau mau ia rātou. E tiʼa atoʼa rā ia ʼoutou ’ia tauturu ia rātou ’ia riro mai ’ei feiā mā’imi parau mau nā roto i tō rātou iho pūai.