Debora ’e te mau nu’u

Fa’ahōho’ara’a nō Debora i te arata’ira’a i te mau nu’u o ’Īserā’ela, © Lifeway Collection/licensed nō roto goodsalt.com

30 nō Mē–5 nō Tiunu

Te mau Tavana 2–4 ; 6–8 ; 13–16

« ’Ua fa’atupu a’era Iehova i te fa’aora ia rātou »

Tē vai nei e rave rahi ’ā’amu fa’auru e ’itehia i roto i Te mau Tavana 2–4 ; 6–8 ; 13–16. ’A feruri e nāhea e nehenehe ai ia ’outou ’ia fa’a’ohipa i teie mau ’ā’amu nō te tauturu i te mau tamari’i ’ia ha’afātata atu i te Fa’aora ’e ’ia hina’aro ’ia pe’e iāna.

Pāpa’i i te mau mana’o e tae mai

ītona fa’a’itera’a

Tītau i te mana’o

’A ani i te mau tamari’i tāta’itahi ’ia fa’a’ite mai i te hō’ē ’ā’amu nō roto mai i te mau pāpa’ira’a mo’a tā rātou i ha’api’i mai ’aita i maoro a’e nei. I muri iho ’a ani ia rātou ’ia fa’a’ite mai i te mea tā rātou i ha’api’i mai nā roto mai i teie mau ’ā’amu.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Te mau Tavana 3:9

’O Iesu Mesia tō’u Fa’aora.

I te taime ’a pure ai te ’āti ’Īserā’ela i te Fatu, ’ua fa’atupu ’oia i te hō’ē fa’aora nō rātou. ’A tauturu i te mau tamari’i ’ia ’ite ē, ’o Iesu Mesia te Fa’aora ’o tā te Atua i fa’atupu nō tātou.

Mau ’ohipari’i e nehenehe e rave

• ’A fa’ata’a i te mau tamari’i ē, ’ia fa’aea a’era te ’āti ’Īserā’ela i te ha’apa’o i te mau fa’auera’a a te Atua, ’ua ’ere rātou i tāna pārurura’a ’e ’ua pau rātou i tō rātou mau ’enemi. ’A tai’o i roto i Te mau Tavana 3:9 i te pereota « e ’ia ti’aoro te tamari’i a ’Īserā’ela ia Iehova ra ». E aha tā te ’āti ’Īserā’ela i rave i te taime ’a hina’aro ai rātou i te tauturu ? ’A fa’a’ite i te hō’ē ’itera’a ’a pure ai ’outou nō te ani i te tauturu ’e ’ua pāhono mai te Atua i tā ’outou pure.

• ’A tai’o i roto i Te mau Tavana 3:9 i te pereota «’ua fa’atupu a’era Iehova i te fa’aora ia rātou », ’e ’a ani i te mau tamari’i ’ia fa’ahiti fa’ahou i te reira nō te tahi taime nā muri iho ia ’outou. ’A fa’ata’a ē, hō’ē fa’aora, ’o te hō’ē ïa ta’ata e fa’aora ia tātou. ’A fa’a’ite i te mau tamari’i e rave rahi hōho’a ’o te mau ta’ata, ’e tae noa atu i te hō’ē hōho’a o Iesu Mesia, ’e ’a tu’u i te mau hōho’a i ni’a i te tahua ma te huri i te hōho’a i raro. ’A vaiiho i te mau tamari’i, te tahi i muri i te tahi, ’ia huri i te mau hōho’a, ’ia ’imi i te hōho’a ’o Iesu, ’e ’ia ’āfa’i i te reira i ni’a. ’A fa’a’ite pāpū ē, ’o Iesu Mesia te Fa’aora tā te Atua i fa’ati’a nō te fa’aora ia tātou i te hara ’e i te pohe.

Gideona ’e te nu’u

’Ua ti’aturi ’o Gideona i te Fatu. © Lifeway Collection/licensed from goodsalt.com

Te mau Tavana 6:11–16 ; 7:1–8

E nehenehe te Fatu e fa’a’ohipa i te mau mea ha’iha’i nō te rave i te ’ohipa rarahi.

’Ua fa’ariro ’o Gideona iāna iho ’ei ta’ata veve ’e te mea faufa’a ’ore, ’ua ’ite rā te Atua iāna ’ei « ta’ata pūai ’e te itoito » (Te mau Tavana 6:12). E tauturu i te mau tamari’i ’ia ’ite, noa atu tē mana’o ra rātou e mea ha’iha’i rātou, e nehenehe te Atua e ’ohipa nā roto ia rātou nō te rave i te mau mea faufa’a (hi’o Alama 37:6–7).

Mau ’ohipari’i e nehenehe e rave

• ’A parau i te mau tamari’i ’ua hina’aro te Fatu i te hō’ē ta’ata nō te tauturu Iāna ’ia fa’aora ia ’Īserā’ela i tō rātou mau ’enemi, te ’āti Madiana, ’e ’ua mā’iti ’oia ia Gideona. ’A tai’o i Te mau Tavana 6:15 i te mau tamari’i, ’e ’a ui ia rātou nō te aha ’aita ’o Gideona i mana’o e nehenehe tāna e rave i te mea tā te Fatu i hina’aro. ’A tai’o i te ’īrava 16, ’e ’a ani ia rātou ’o vai tē tauturu ia Gideona, ’ia au i tā te Fatu parau. ’A parau i te mau tamari’i nō ni’a i te hō’ē taime ’a ani ai te Fatu ia ’outou ’ia rave i te hō’ē ’ohipa fifi nō te tāvini iāna, ’e ’ua ’ite ’outou ’ua tāvini ’ oia ia ’outou.

• ’A pia i te mau hōho’a ’o te mau tamari’i ’aore rā ’o te feiā ’āpī i te ravera’a i te mau mea rarahi i roto i te tāvinira’a i te Atua (hi’o Te buka hōho’a ’evanelia, no. 19, 23, 90, 102), ’aore rā ’a parau nō ni’a i te mau hi’ora’a tā ’outou i ’ite. E tauturu i te mau tamari’i ’ia feruri i te mau rāve’a e nehenehe ai rātou e ’āmui atu i roto i te ’ohipa a te Atua, ’e e ani ia rātou ’ia pāpa’i i te mau hōho’a nō rātou iho ma te rave i teie mau mea.

• ’A fa’a’ohipa i te ’api ’ohipara’a nō teie hepetoma nō te ha’api’i i te mau tamari’i e mea nāhea tō te Fatu fa’aitira’a i te nu’u Iseraela ’ia ’ite te ’āti Iseraela nā Tōna mana i fa’aora ia rātou i tō rātou mau ’enemi. ’A fa’a’ite i te mau hi’ora’a ’o te mau mea ha’iha’i ’o tē rave i te hō’ē ’ohipa rahi, mai te mau manu patia ’ia ha’aputu i te pape tiare nō te hāmani i te meri. ’A fa’a’ite i tō ’outou ’itera’a pāpū e nehenehe te Atua e tauturu ia tātou ’ia rave i te hō’ē ’ohipa rahi, noa atu e mea ha’iha’i tātou i tō tātou mana’ora’a.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari a’e

Te mau Tavana 3:7–9, 12–15

’O Iesu Mesia tō’u Fa’aora.

Tē fa’a’ite neiTe mau Tavana 3 i te hō’ē ’ohura’a ’o tā ’outou e nehenehe e fa’a’ohipa nō te ha’api’i i te mau tamari’i ē, e fa’aora te Atua ia tātou i te hara nā roto i te Fa’aora ’o Iesu Mesia.

Mau ’ohipari’i e nehenehe e rave

• ’A pāpa’i i teie mau parau i muri nei i ni’a i te tāpura ’ere’ere : « ’Ua rave i te ’ino », « ’ua ti’aoro atu i te Fatu », ’e « ua fa’atupu i te tahi fa’aora ». ’A ani i te tahi mau tamari’i ’ia ’imi i teie mau pereota i roto i Te mau Tavana 3:7–9, ’e e ani i te tahi pae ’ia ’imi i te reira i roto i Te mau Tavana 3:12–15. ’A fa’ata’a i te mau tamari’i e rave rahi taime i roto i te buka a te mau Tavana, ’ua « rave » te ’āti ’Īserā’ela « i te ’ino ». I muri iho, ’ia ’aro mai tō rātou mau ’enemi, e « ti’aoro atu rātou i te Fatu », ’e « ’ua fa’atupu te Fatu i te tahi fa’aora » nō te tauturu ia rātou. E aha tā tātou e ha’api’i mai nei nō ni’a i te Fa’aora i roto i teie mau ’īrava ?

• ’A hīmene ’āmui i te hō’ē hīmene ’o tē tauturu i te mau tamari’i ’ia māramarama ’o Iesu Mesia tō rātou Tāra’ehara ’e tō rātou Fa’aora, mai te « Il envoya son Fils aimé » (Chants pour les enfants, 20–21). E ani i te mau tamari’i ’ia fa’a’ite mai i tō rātou mau mana’o nō ni’a i te mea tā te Fa’aora i rave nō te fa’aora ia tātou i te hara, te mau tāmatara’a, te ’oto, ’e te pohe.

Te mau Tavana 4:1–15

E nehenehe au e vai ha’apa’o maita’i i te Fatu, noa atu ē, ’aita te tahi atu mau ta’ata e ha’apa’o ra.

Noa atu e rave rahi ’o te ’āti ’Īserā’ela tei fa’aru’e i te Fatu, ’ua ha’apa’o tāmau noa te tahi pae, ’e ’ua ti’a ia rātou ’ia tauturu e rave rahi ’ia ho’i mai i roto i te parauti’a. Nāhea e ti’a ai ia ’outou ’ia fa’aitoito i te mau tamari’i ’ia vai parau-ti’a noa i te Fatu noa atu te mau mea tā vetahi ’ē e rave ra ?

Mau ’ohipari’i e nehenehe e rave

• ’A parau i te mau tamari’i i te hō’ē pu’e tau, ’a ha’apa’o ’ore ai te ’āti ’Īserā’ela, nā te hō’ē vahine parauti’a, ’o Debora, ’e te ra’atira o te nu’u ’āti ’Īserā’ela, ’o Baraka, i fa’aora ’ia ’Īserā’ela i tō rātou mau ’enemi (hi’o Te mau Tavana 4:1–15). ’A tai’o ’āmui i Te mau Tavana 4:14, ’e ’a ani i te mau tamari’i ’ia ’imi i te hō’ē mea tā Debora i parau ’o tei fa’a’ite mai e mea pūai tōna fa’aro’o i roto i te Fatu. I muri iho, ’a ani ia rātou ’ia tai’o i Te Parau Ha’api’ira’a ’e te mau Parau Fafau 84:88 nō te ’ite mai i te hō’ē parau tumu tei roto ato’a i Te mau Tavana 4:14. ’A fa’aitoito ia rātou ’ia fa’a’ite mai e aha te aura’a nō rātou te parau fafau a te Fatu « ’ua reva na Iehova nā mua ia oe ».

• ’A hīmene i te hō’ē hīmene nō ni’a i te ha’apa’ora’a i te mau fa’auera’a, mai te « Mā’iti i te maita’i» (Te mau hīmene, no. 144) ’aore rā « Choisir le bien » (Chants pour les enfants, 82). Nāhea e ti’a ai ia tātou ’ia ti’a nō te parauti’a ’e ’ia ha’apa’o i te mau fa’auera’a noa atu ē, ’aita te mau ta’ata e hā’ati nei ia tātou e ha’apa’o ra ?

Te mau Tavana 7

E mea ta’a ’ē te mau rāve’a a te Atua i te mau rāve’a a tō te ao nei.

’Ua ani te Fatu ia Gideona ’ia rave i te mau mea ’aita paha ’oia i māramarama i taua taime ra. E aha te mea e fa’auru ra ia ’outou i roto i tōna ’ā’amu ? I tō ’outou mana’o, nāhea te reira e nehenehe ai e ha’amaita’i i te mau tamari’i tā ’outou e ha’api’i ra ?

Mau ’ohipai’i e nehenehe e rave

• ’A ani i te mau tamari’i ’ia feruri ’ua tītauhia ia rātou ’ia ha’aputuputu ’āmui i te hō’ē nu’u nō te haere i te tama’i. E aha te rahira’a ta’ata tā rātou e hina’aro i roto i tā rātou nu’u ? Ma te fa’a’ohipa i Te mau Tavana 7:4–7, ’a ani i te mau tamari’i ’ia ha’uti mai e mea nāhea tō te Fatu tauturura’a ia Gideona ’ia mā’iti i te nu’u ’o tē fa’aora ia ’Īserā’ela i te ’āti Madiana. Nō te aha te Fatu i hina’aro ai ’ia iti roa te nu’u a Gideona ? (hi’o Te mau Tavana 7:2). Nō te aha te pe’era’a i te fa’auera’a a te Fatu i riro ai ’ei mea fifi nō Gideona ’e tāna nu’u tama’i ? E ani i te mau tamari’i ’ia fa’a’ite mai i te mau ’ohipa tei tupu a ha’api’i mai ai rātou ’ia ti’aturi i te Fatu noa atu ē, ’aita te reira i riro ’ei mea ’ōhie.

• E ani i te mau tamari’i ’ia pāpa’i i te hōho’a ’o te hō’ē ’o’e, te hō’ē pāruru, te hō’ē pū, te hō’ē lamepa, ’e te hō’ē pita pape. ’A ani i te mau tamari’i, i roto i teie mau tao’a, e aha tā rātou e rave i roto i te hō’ē ’arora’a. ’A ani ia rātou ’ia tai’o i Te mau Tavana 7:16 nō te ha’api’i mai e aha tā te nu’u a Gideona i rave. Nō te aha i tītauhia ai te itoito nō te rave i te reira ? ’A tai’o ’āmui i Te mau Tavana 7:19–21 nō te ha’api’i mai ē, e mea nāhea tō te nu’u fa’a’ohipara’a i te mau pū ’e te mau pita nō te ūpo’oti’a i ni’a i te ’āti Midiana. E aha tā tātou e ha’api’i mai nei nō ni’a i te Fa’aora nā roto mai i teie ’ā’amu ?

ītona ’apora’a mai

Fa’aitoito i te ’apora’a mai i te fare

E ani i te mau tamari’i ’ia fa’a’ite i te hō’ē melo o te ’utuāfare i te hō’ē mea tā rātou i ha’api’i mai i teie mahana ’o tē fa’atupu i te hina’aro i roto ia rātou ’ia ha’apa’o i te mau fa’auera’a.

Haʼamaitaʼiraʼa i tā tātou haʼapiʼiraʼa

E faʼatano i te mau ʼohiparaʼa nō te pāhono i te mau hinaʼaro. ’Eiaha e hi’o i teie mau arata’ira’a ’ei mau fa’auera’a e tītauhia ia ’outou ’ia pe’e. E fa’a’ohipa rā i te reira ’ei ha’aputura’a mana’o nō te tātara mai i tō ’outou iho fa’aurura’a ’a feruri hōhonu ai ’outou i te mau hina’aro o te mau tamari’i tā ’outou e ha’api’i nei. ’Ei hi’ora’a, i te tahi mau taime, e fa’auruhia paha ’outou ’ia fa’aau i te hō’ē ’ohipara’a nā te mau tamari’i ’āpī nō te ha’api’i i te mau tamari’i pa’ari a’e ’aore rā, nō te tahi ’e te tahi.

’api ’ohipara’a : E nehenehe te Fatu e fa’a’ohipa i te mau mea ha’iha’i nō te rave i te ’ohipa rahi