te taure’are’a Davida ’e te te’a

Davida ’e ’o Golia, nā Steve Nethercott

13–19 nō Tiunu

1 Samuela 8–10 ; 13 ; 15–18

« Nā Iehova ho’i teie nei tama’i »

Noa atu ē, ’ua fa’ata’ahia te mau ’ohipara’a i raro nei nō te mau tamari’i ’āpī a’e ’aore rā, pa’ari a’e, e nehenehe ’outou e fa’aau i te reira nō te pāhono i te mau hina’aro ’o te mau tamari’i tā ’outou e ha’api’i ra.

Pāpa’i i te mau mana’o e tae mai

’ītona fa’a’itera’a

Tītau i te mana’o

’A fa’a’ite i te hōho’a ’o Davida ’e ’o Golia i roto i te arata’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare. ’A ani i te mau tamari’i ’ia fa’a’ite mai i te mea tā rātou i ’ite nō ni’a i te ’ā’amu, ’e a ui i te mau uira’a nō te tauturu ia rātou ’ia ha’amana’o i te mau tuha’a tā rātou i vaiiho i te hiti.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

1 Samuela 16:1–13

’Ua ’ite te Fatu i te mau mana’o o tō’u ’ā’au.

Te fa’a’itera’a i te ’ā’amu ’o tō te Fatu paraura’a ia Samuela ’ia mā’iti ia Davida ’ei ari’i, e nehenehe te reira e tauturu i te mau tamari’i ’ia ’ite ē, ’ua ’ite te Fatu ia tātou tāta’itahi.

Mau ’ohipari’i e nehenehe e rave

• ’A fa’a’ite e mea nāhea tō te Fatu paraura’a ia Samuela ē, e riro mai Davida ’ei ari’i nō ’Īserā’ela (hi’o 1 Samuela 16:1–13). ’A fa’ati’a ai ’outou i te ’ā’amu, e nehenehe ’outou e vaiiho i te hō’ē tamari’i ’ia fa’ahōho’a ia Samuela. E nehenehe tāna e hōro’a i te hō’ē hei pāpie i te tahi atu tamari’i, ’o tē fa’ahōho’a ia Davida. ‘A fa’a’ite i tō ’outou ’itera’a pāpū ē, ’ua ’ite te Fatu i te ’ā’au ’o Davida ’e ’ua ’ite ’oia ia tātou tāta’itahi.

• ’A fa’a’ite i te hō’ē ’itera’a i reira tō ’outou ’itera’a ē, ’ua ’ite te Fatu ia ’outou. ’A hīmene i te hō’ē hīmene ’o tē ha’api’i ra ē, ’ua ’ite ’e ’ua here te Fa’aora ia tātou, mai te Jésus est notre amiChants pour les enfants, 37).

1 Samuela 17:10–54

E nehenehe te fa’aro’o ia Iesu Mesia e tauturu iā’u ’ia vai itoito noa.

E fa’ahōho’a ’ōhie noa te mau tamari’i ia rātou i te taure’are’a Davida nō te mea, i tōna na’ina’ira’a, ’ua upo’oti’a ’oia i ni’a i te hō’ē tītaura’a rahi. E tauturu ia rātou ’ia ’ite ē, te tumu nō tōna itoito ’e te pūai ’o tōna ïa fa’aro’o ia Iesu Mesia.

Mau ’ohipari’i e nehenehe e rave

• ’A hi’o fa’ahou ’e te mau tamari’i i te ’ā’amu ’o Davida ’e ’o Golia (hi’o « Davida ’e ’o Golia » i roto i Te mau ’ā’amu o te Faufa’a Tahito), ’e ’a vaiiho ia rātou, te tahi i muri i te tahi, ’ia ha’uti mai i te ’ā’amu. E ani i te tamari’i e fa’ahōho’a ra ia Golia ’ia parau, « hō mai na i te tahi ta’ata e papa’i na māua » (1 Samuela 17:10). E ani i te tamari’i e fa’ahōho’a ra ia Davida ’ia parau, tē haere atu nei ra vau ia ’oe, ma te i’oa ’o te Atua Sabaota га ’o Iehova » (1 Samuela 17:45). ’A fa’a’ite pāpū ē, mai te mea e fa’aro’o tō tātou i te Fatu, e tauturu mai ’Oia ia tātou ’ia itoito mai ia Davida.

• ’A fa’a’ohipa i te ’api ’ohipara’a nō teie hepetoma nō te fa’a’ite i te rahi ’o Golia ’ia fa’aauhia i te hō’ē tamaiti taure’are’a mai ia Davida. ’A fa’ata’a ē, ’ua ri’ari’a te nu’u ’Īserā’ela ia Golia. ’A ani i te mau tamari’i ’ia fa’ahua ri’ari’a. I muri iho, ’a fa’a’ite i te hōho’a nō Iesu Mesia, ’e ’a parau i te mau tamari’i ē, nō te fa’aro’o ’o Davida i te Fatu, i roa’a ai iāna te itoito. ’A ani ia rātou ’ia ti’a ’eta’eta i ni’a, mai te huru ē, e mea itoito rātou.

• E ani i te mau tamari’i ’ia haere mai te huru ē, ’o rātou ’o Davida, tē haere ra e ’aro ia Golia, ma te hīmene i te hō’ē hīmene nō ni’a i te itoito, mai te « Je serai vaillant » (Chants pour les enfants, 85).

1 Samuela 18:1–4

E nehenehe te mau hoa maita’i e riro ’ei ha’amaita’ira’a nō’u.

’Ua riro te auhoara’a ’o Ionatana ’e ’o Davida ’ei hō’ē hi’ora’a maita’i roa nō te mau ha’amaita’ira’a e roa’a mai nā roto i te mau hoa maita’i.

Mau ’ohipari’i e nehenehe e rave

• ’A pāpa’i e piti hōho’a mata i ni’a i te tāpura ’ere’ere, hō’ē nō te fa’ahōho’a ia Davida ’e te tahi nō te fa’ahōho’a ia Ionatana. ’A tai’o i te mau tamari’i i te tahi mau pereota i roto i te 1 Samuela 18:1–4 ’o te ha’apāpū nei i te here o teie nā hoa nō te tahi ’e te tahi. ’A hōro’a i te tamari’i tāta’itahi i te hō’ē māfatu pāpie, ’e ’a ani ia rātou e nāhea e nehenehe ai ia rātou ’ia fa’a’ite i te here i te hō’ē hoa. I muri a’e i te fa’a’itera’a te tamari’i tāta’itahi i te hō’ē mana’o, ’a ani i te tamari’i ’ia tā’amu i te māfatu pāpie i ni’a i te tāpura ’ere’ere.

• ’A parau i te mau tamari’i nō ni’a i te hō’ē hoa maita’i ’o te tauturu nei ia ’outou ’ia ora i te ’evanelia ’aore rā, ’ia patu i tō ’outou fa’aro’o ia Iesu Mesia, ’e ’a ani i te mau tamari’i ’ia fa’a’ite mai ē, ’o vai tē tauturu nei ia rātou. E ani i te mau tamari’i ’ia ha’uti mai i te ravera’a i te hō’ē ’ohipa maita’i nō te hō’ē hoa.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari a’e

1 Samuela 8:6 ; 9:15–17 ; 10:1–24 ; 16:1–13

’O ratou ’o tē tāvini nei i roto i te ’Ēkālesia, ’ua pi’ihia ïa e te Atua.

E nehenehe te mau ’ā’amu ’o te mā’itira’a te Atua ia Saula ’e ’o Davida ’ia riro ’ei ari’i, e tauturu i tā ’outou piha ha’api’ira’a ’ia māramarama ē, nāhea te ta’ata i te pi’ihia ’ia tāvini i roto i te ’Ēkālesia i teie mahana. E nehenehe teie mau ’ā’amu e patu i te fa’aro’o ē, nō ’ō mai i te Atua ra te mau pi’ira’a, nā roto i tāna mau tāvini ha’amanahia.

Tē fa’atāhinu nei Samuela ia Saula

Fa’ahōho’ara’a nō Samuela e fa’atāhinu nei ia Saula, © Lifeway Collection/licensed i roto goodsalt.com

Mau ’ohipari’i e nehenehe e rave

• I ni’a i te mau tuha’a ’api parau, ’a pāpa’i i te mau fa’ahitira’a parau ’e te mau pāpa’ira’a mo’a i muri nei: ’ua hina’aro te ta’ata i te hō’ē ari’i (1 Samuela 8:6); ’Ua parau te Fatu ia Samuela ē, e riro ’o Saula ’ei ari’i (1 Samuela 9:15–17); ’Ua fa’atāhinu ’o Samuela ia Saula(1 Samuela 10:1); ’Ua fa’a’ite ’o Samuela ia Saula i te ta’ata (1 Samuela 10:24). ’A ani i te mau tamari’i ’ia tai’o i te mau ’īrava o te pāpa’ira’a mo’a ’e ’ia tu’u i te reira i roto i te ’āna’ira’a tano.

• ’A ha’api’i ’āmui i te Hīro’a Fa’aro’o nūmera pae. ’A parau poto noa i te mau tamari’i e mea nāhea tō ’outou fāri’ira’a i tō ’outou pi’ira’a ’ia ha’api’i i roto i te Paraimere. Nāhea ’outou e ’ite ai ē, ’ua pi’ihia ’outou e te Atua ? ’A fa’a’ite pāpū ē, e fa’auru te Atua i te feiā fa’atere ’ia pi’i i te ta’ata nō te tāvini.

1 Samuela 16:1–13

« ’Āre’a ’o Iehova, e hi’o ïa i te ’ā’au ».

E mea mātarohia ’ia ha’avā ia vetahi ’ē ’ia au i te mau mea tā tātou e ’ite ra, terā rā, nō te riro hau atu mai ia Iesu, e ti’a ïa ’ia ha’api’i mai tāna e rave ra—nā roto i te hi’ora’a « i te ’ā’au » (1 Samuela 16:7).

Mau ’ohipari’i e nehenehe e rave

• E ani i te mau tamari’i ’ia feruri ē, ’ua anihia ia rātou ’ia mā’iti i te hō’ē ta’ata ’ia riro ’ei ari’i. E aha te mau huru maita’i tā rātou e ’imi ? E tai’o ’āmui i te 1 Samuela 16:6–7 nō te ’ite ē, e aha tā te Fatu i parau ia Samuela ’a ’imi ai ’oia i te hō’ē ari’i ’āpī nō ’Īserā’ela. E aha tā tātou e ’apo mai nā roto mai i te mau arata’ira’a a te Fatu ?

• ’A vauvau i te hō’ē ha’api’ira’a tao’a nō te fa’ahōho’a i te mau tamari’i ē, te mau ha’avāra’a tā tātou e rave tei niuhia i ni’a i « te huru i rāpae’au » (’īrava 7) e’ita paha e tano. ’Ei hi’ora’a, e nehenehe ’outou e fa’a’ite ia rātou i te tahi mau mā’a, ’aore rā, i te hō’ē buka tei pū’ohuhia i te hō’ē pū’ohu ’aita e tū’ati i te mau mea i roto. E aha tā te 1 Samuela 16:7 ’e tā teie ha’api’ira’a tao’a e parau mai nei nō ni’a i te huru o tā tātou hi’ora’a ia tātou iho ’e i te tahi atu mau ta’ata ?

• ’A fa’a’ite i te hō’ē ’itera’a i reira ’outou i te ha’api’ira’a mai ē, nō te aha e ti’a ia ’outou ’ia « hi’o i te ’ā’au » ’eiaha noa rā « i te rāpae’aura’a » (’īrava 7). E vaiiho i te mau tamari’i ’ia fa’a’ite mai i te tahi mau hi’ora’a mai te reira te huru tā rātou i fāri’i. E hīmene i te hō’ē hīmene ’o tē ha’apāpū i teie parau tumu, mai te « Je viens vers toi » ’aore rā, « We Are Different » (Chants pour les enfants, Children’s Songbook, 78–79, 263).

1 Samuela 17:20–54

E nehenehe Iesu Mesia e tauturu iā’u ’ia upo’oti’a i ni’a i te mau huru tītaura’a ato’a.

E riro paha te mau tamari’i i te fa’aruru i te mau tītaura’a fifi mai te upo’oti’ara’a i ni’a i te hō’ē ta’ata rahi mai ia Golia. E nehenehe te hi’ora’a ’o Davida e hōro’a ia rātou i te ti’aturira’a ē, e tauturu te Fatu i te ’arora’a i tā rātou mau ’arora’a.

Mau ’ohipari’i e nehenehe e rave

• ’A ani i te mau tamari’i ’ia pāpa’i i te mau hōho’a ’o te mau tuha’a ’o te ’ā’amu i roto i te 1 Samuela 17:20–54. ’A pia i te mau hōho’a i ni’a i te tāpura i roto i te ’āna’ira’a tano, ’e ’a ani i te mau tamari’i ’ia fa’a’ite mai i te ’ā’amu nā roto i te paraparaura’a nō ni’a i te mau hōho’a tāta’itahi tā rātou i pāpa’i. E aha tā te Fatu e hina’aro nei ’ia ha’api’i mai tātou mai roto mai i teie ’ā’amu ?

• ’A tauturu i te mau tamari’i ’ia hāmani i te hō’ē tāpura i ni’a i te tāpura ’ere’ere ’o te tahi mau tītaura’a fifi e nehenehe i te hō’ē ta’ata e fa’aruru. ’A ani ia rātou ’ia ’imi i te mau mea tā Davida i parau ’o tē nehenehe e fa’aitoito i te hō’ē ta’ata e fa’aruru nei i te mau tītaura’a mai teie (hi’o 1 Samuela 17:26, 32, 34–37, 45–47). ’A parau i te mau tamari’i e mea nāhea Iesu Mesia i te tauturura’a ia ’outou i roto i te mau tītaura’a.

ītona ’apora’a mai

Fa’aitoito i te ’apora’a mai i te fare

’A ui i te mau tamari’i i te hō’ē uira’a nō ni’a i te hō’ē mea tā rātou i ha’api’i mai i teie mahana. ’A pāpa’i i te uira’a, ’e a hōro’a i te hō’ē hōho’a i te tamari’i tāta’itahi nō te hōpoi i te fare ’e ’ia paraparau ’e tōna ’utuāfare.

Ha’amaita’ira’a i tā tātou ha’api’ira’a

Tauturu i te mau tamari’i ’ia hi’o mana’o i te mau pāpa’ira’a mo’a. E mea pinepine te mau tamari’i i te ha’apa’o rahi a’e i te hō’ē ha’api’ira’a mai te mea e nehenehe ia rātou ’ia hi’o i te mau hōho’a e tū’ati i ni’a i te mau ’ā’amu ’o te papa‘iraa mo‘a ’aore rā, i te mau ha’api’ira’a. ’A feruri i te fa’a’ohipa i te mau hōho’a i roto i Te buka hōho’a ’evanelia ’aore rā, i ni’a i te ChurchofJesusChrist.org.

’api ’ohipara’a : E nehenehe te fa’aro’o ia Iesu Mesia e tauturu iā’u ’ia noa’a te itoito