David and Goliath [Davida ’e Golia], nā Steve Nethercott

13–19 nō Tiunu

1 Samuela 8–10 ; 13 ; 15–18

« Nā Iehova ho’i teie nei tama’i »

E tauturu te mau mana’o i roto i teie arata’i ha’api’ira’a ’ia fa’ata’a i te tahi mau parau tumu faufa’a rahi i roto i teie mau pene. Penei a’e e ’ite ’outou i te tahi atu ā mau parau tumu ’a tuatāpapa ai ’outou.

Pāpa’i i te mau mana’o e tae mai

Mai te taime mai ā ’ua pārahi te mau ’āti ’Īserā’ela i te fenua i parauhia ra, ’ua riro noa te mau ’āti Philiseti ’ei ha’amata’ura’a nō tō rātou pāruru. E rave rahi taime i muta’a ra tō te Fatu fa’aorara’a i te mau tamariʼi a ’Īserā’ela i tō rātou mau ’enemi. I teienei rā, tē ani ra te mau peresibutero o ’Īserā’ela ē : « ’Ei ari’i ā tō mātou… ’ia nā mua ’oia ia mātou, ’a ’aro ai i tā mātou tama’i » (1 Samuela 8:19–20). ’Ua vaiiho noa te Fatu, ’e ’ua fa’atāhinuhia Saula ’ei ari’i. Terā rā ho’i, i te taorara’a te ta’ata rahi ra ’o Golia i tāna parau tama’i i te mau nu’u o ’Īserā’ela, « taiā ihora » ’o Saula—mai te nu’u ato’a ho’i (1 Samuela 17:11). I taua mahana ra, e ’ere nā te ari’i Saula i fa’aora ia ’Īserā’ela, ’o te hō’ē tīa’i māmoe ha’eha’a rā, tōna i’oa ’o Davida, ’aita e mauha’a tama’i, ’ua ’ahu rā ’oia i te fa’aro’o tae’a-’ore-hia, te fa’aro’o i te Fatu. E fa’a’itera’a teie ’arora’a i tō ’Īserā’ela, ’e i te ta’ata ato’a e ’arora’a pae vārua tāna ē, « e ti’a ia Iehova ’ia fa’aora ’eiaha noa atu ’ei ’o’e, ’eiaha ’ei mahae » ’e « nā Iehova ho’i teie nei tama’i » (1 Samuela 17:47).

Mau mana’o nō te tuatāpapara’a pāpa’ira’a mo’a a te ta’ata hō’ē

1 Samuela 8

’O Iesu Mesia tō’u ari’i.

’A tai’o ai ’oe i te 1 Samuela 8, ’a hi’o e aha te mana’o o te Fatu nō ni’a i te hina’aro o te mau tamariʼi a ’Īserā’ela ’ia vai te hō’ē ari’i ’ē atu iāna. E aha te aura’a nō te parau e mā’iti i te Fatu « ’ei ari’i i ni’a iho ia [’oe] »E aha te aura’a no te maiti i te Fatu ia « fa’atere i te reira [ia ’outou] » ?(1 Samuela 8:7). E nehenehe ato’a ’oe e hi’o i te mau taime e ’umehia ’oe ’ia pe’e i te peu parau ti’a ’ore a te ao, ’eiaha rā tā te Fatu. Nāhea ’oe i te fa’a’ite ē ’ua hina’aro ’oe ia Iesu Mesia ’ei ari’i mure ’ore nō ’oe ?

Hi’o ato’a Te mau Tāvana 8:22–23 ; Mosia 29:1–36 ; Neil L. Andersen, « ’Ia upo’oti’a i ni’a i te ao », Liahona, Mē 2017, 58–62.

1 Samuela 9:15–17 ; 10:1–12 ; 16:1–13

Tē pi’i nei te Atua i te ta’ata nā roto i te tohu nō te tāvini i tāna bāsileia.

’Ua mā’iti te Atua ia Saula ’e ia Davida nō te riro ’ei ari’i nā roto i te tohu ’e te heheura’a (hi’o 1 Samuela 9:15–17 ; 10:1–12 ; 16:1–13). Mai te reira ato’a ’oia i te pi’i i te mau tāne ’e te mau vahine nō te tāvini i tāna ’Ēkālesia i teie mahana. E aha te ha’api’ira’a tā ’oe e ’apo nei i roto i teie mau fa’ati’ara’a nō ni’a i te aura’a ’ia « mā’itihia e te Atua nā roto i te tohu » ? (Hīro’a fa’aro’o 1:5). E aha te mau ha’amaita’ira’a e tae mai nō te pi’ira’ahia ’e te fa’ata’ara’ahia e te mau tāvini mana a te Fatu ?

Fa’ahōho’ara’a nō te fa’atāhinura’a Samuela ia Saula, © Lifeway Collection/licensed nā goodsalt.com

1 Samuela 13:5–14 ; 15

« E maita’i rahi tei te ha’apa’o i tei tusia ».

Noa atu ā te teitei o Saula, e mana’o « ha’aha’ara’a ra i [tōna] iho hi’ora’a » i te rirora’a ’oia ’ei ari’i (1 Samuela 15:17). Terā rā, ’a ha’amaita’ihia ai ’oia ’e ’a manuia ai, ha’amata ihora ’oia i te ti’aturi rahi iāna iho, ’aita atu ra i ti’aturi rahi i te Fatu. E aha te fa’a’itera’a tā ’oe e ’ite ra nō te reira i roto i te 1 Samuela 13:5–14 ; 15 ? ’Āhani tei ia Saula ’oe ra, e aha tā ’oe e parau iāna ’o tē nehenehe e tauturu iāna ’ia upo’oti’a i ni’a i tōna « fa’aro’o ’ore » ’e tōna « mārō » ? (1 Samuela 15:23).

Hi’o ato’a 2 Nephi 9:28–29 ; Helamana 12:4–5 ; Te Parau Ha’api’ira’a ’e te mau Parau Fafau 121:39–40 ; Thomas S. Monson, « Ha’amana’o maita’i i te ’ē’a i haerehia e tō ’āvae », Liahona, Nov. 2014, 86–88.

1 Samuela 16:7

« ’Āre’a ’o Iehova, e hi’o ïa i te ’ā’au ».

E aha te tahi huru te ta’ata e ha’avā nei ia vetahi ’ē « i te huru i rāpae » ? E aha te aura’a te parau e hi’o « i te ’ā’au », mai tā te Fatu e rave nei ? (1 Samuela 16:7). ’A feruri nāhea ’oe i te fa’a’ohipa i teie parau tumu i te huru ’oe e hi’o nei ia vetahi ’ē—’e ia ’oe iho ? E aha tā te reira ’ohipa e fa’atupu i roto i tā ’oe mau ’āparaura’a ’aore rā te mau tā’amura’a i te ta’ata ?

1 Samuela 17

Maoti te tauturu a te Fatu, e ti’a iā’u ’ia upo’oti’a i te mau fifi ato’a.

’A tai’o ai ’oe i te 1 Samuela 17, ’a feruri i te mau parau a te mau ta’ata rau i roto i teie pene (hi’o i roto i te tāpura i raro nei). E aha tā tā rātou mau parau e fa’a’ite nei nō ni’a ia rātou ? E mea nāhea te mau parau a Davida e fa’a’ite nei i tōna itoito ’e te fa’aro’o i te Fatu ?

• Goliat : mau ’īrava 8–10, 43–44

• Eliaba : ’īrava 28

• Saula : ’īrava 33

• Davida : mau ’īrava 26, 32, 34–37, 39, 45–47

’A feruri i te mau ’arora’a tā ’oe e fa’aruru nei. E aha te mea tā ’oe e nehenehe e ’ite mai i roto i te 1 Samuela 17 ’o tē ha’apūai i tō ’oe fa’aro’o ē, e ti’a i te Fatu i te tauturu ia ’oe ?

Hi’o ato’a Gordon B. Hinckley, « Overpowering the Goliaths in Our Lives », Ensign, Mē 1983, 46, 51–52.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

1 Samuela 9:15–21 ; 16:7.E nehenehe te tai’ora’a i teie mau ’īrava, nā reira ato’a te mau parau i muri nei a Elder Dieter F. Uchtdorf, e fa’auru i te hō’ē ’āparaura’a nō ni’a i te tumu te Fatu i mā’iti ai ia Saula ’e ia Davida : « Mai te peu e hi’o tātou ia tātou nā roto noa i tō tātou mata tāhuti nei, e’ita paha tātou e ’ite roa i tō tātou maita’i. Tē hi’o nei rā tō tātou Metua i te Ao ra ia tātou mai te au i tō tātou vaira’a mau ’e te ta’ata e nehenehe tātou e riro mai » (Tē haere maita’i roa ra ! », Liahona, Novema 2015, 23). Penei a’e e nehenehe te mau melo o te ’utuāfare e fa’a’ohu nō te parau i tō rātou mana’o nō ni’a i te mau mea maita’i tā rātou e ’ite ra i roto i te ’ā’au o te tahi ’e te tahi (hi’o 1 Samuela 16:7).

1 Samuela 10:6–12.E aha te taime tātou i te ’itera’a i te Atua i te ha’amaita’ira’a i te hō’ē ta’ata ma te mana pae vārua nō te rave fa’aoti i te hō’ē fa’auera’a ’aore rā te hō’ē pi’ira’a mai tāna i ha’amaita’i ia Saula ? E aha te tahi mau ’ohipa ’o tē nehenehe e fa’a’ite nō te « [hōro’ara’a] te Atua i te ’ā’au ’e [nō tātou] » ’aore rā nō te « [haerera’a] mai ho’i te Vārua o te Atua i ni’a ia [tātou] » i roto i tāna tāvinira’a ? (mau ’īrava 9–10).

1 Samuela 17:20–54.E au paha tō ’outou ’utuāfare ’ia tai’o ’āmui i te ’ā’amu nō Davida ’e Golia (e nehenehe « Davida ’e Golia » i roto i Te mau ’ā’amu nō te Faufa’a Tahito » e tauturu mai) ’aore rā e au paha rātou ’ia māta’ita’i i te video « The Lord Will Deliver Me [E fa’aora te Fatu iā’u] » (ChurchofJesusChrist.org). E nehenehe te reira e ha’amata i te hō’ē ’āparaura’a nō ni’a i te mau fifi tā tātou e fa’aruru nei, e au ē e mau « Golia » nō tātou. E nehenehe ato’a ’outou e pāpa’i i te tahi o teie mau fifi i ni’a i te hō’ē tāpa’o ’aore rā i ni’a i te hō’ē hōho’a nō Golia, ’e e fa’a’ohu rātou nō te taora i te tahi tao’a i ni’a i te reira (mai te tahi pōpō pāpie).

E mea au ato’a paha ’ia tai’o nō ni’a i te ha’ana tama’i ’e te mau mauiha’a tama’i a Golia (mau ’īrava 4–7). E aha tā Davida i rave ? (hi’o mau ’īrava 38–40, 45–47). E aha tā te Fatu i hōro’a nō te tauturu ia tātou ’ia ha’apau i tā tātou mau Golia ?

1 Samuela 18:1–4.Mai te aha te hoara’a o Davida ’e o Ionatana ? Mea nāhea te mau hoa rahi i ha’amaita’i ia tātou ? E aha tā tātou e nehenehe e rave nō te riro ’ei hoa rahi—nō tō tātou ato’a mau melo o te ’utuāfare ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « Je serai vaillant », Chants pour les enfants, 85.

Ha’amaita’ira’a i tā tātou ha’api’ira’a

Fa’a’ite pinepine i tō ’outou ’itera’a pāpū. E nehenehe te ’itera’a pāpū ’ōhie ’e te hōhonu e riro ’ei fa’aurura’a pūai i ni’a [i tō ’outou ’utuāfare]. E mea pūai te hō’ē ’itera’a pāpū mai te mea e mea ’āfaro, ’e nō roto mai te reira i te ’ā’au. ’Aita e tītauhia te nehenehe ’aore rā, te roa » (Ha’api’ira’a mai tā te Fa’aora, 11).

Fa’ahōho’ara’a nō Davida, nā Dilleen Marsh