King David Enthroned [Te ari’i Davida i ni’a i tōna terono], nā Jerry Miles Harston

20–26 nō Tiunu

2 Samuela 5–7 ; 11–12 ; 1 Ari’i 3 ; 8 ; 11

« Tō ’oe ra bāsileia… e mau ïa ē a muri noa atu »

« Te mau parau mo’a ato’a i pāpa’ihia ra e mea fa’aurua mai ïa e te Atua, ’e e mea maita’i ’ei ha’api’ira’a, ’ei a’ora’a, ’ei fa’a’itera’a hapa, ’ei fa’a’ite mai i te parau ti’a ra » (2 Timoteo 3:16).

Pāpa’i i te mau mana’o e tae mai

’Ua ha’amata te hau o te ari’i Davida ma te parau fafau rahi mau. ’Ua ’atutu te parau nō tōna fa’aro’o fati ’ore i te ha’apaura’a ia Golia. ’Ei ari’i, ’ua ha’amau ’oia ia Ierusalema ’ei ’oire pū, ’e ’ua tāhō’ē ia ’Īserā’ela (hi’o 2 Samuela 5). ’Aita te bāsileia i pūai a’enei mai te reira. Terā rā ’ua fāri’i ’oia i te ’umera’a ’ia hara ’e ’ua mo’e tōna mana pae vārua.

Mai te reira ato’a te hau a tāna tamaiti ’o Solomona, i te ha’amata, ma te parau fafau rahi mau. ’Ua ’atutu te parau nō tōna pa’ari nō ’ō mai i te ra’i, nā reira ato’a te hāro’aro’a. ’Ei ari’i, ’ua fa’arahi atu ā ’oia i te mau ’ōti’a fenua ’e ’ua patu i te hiero nehenehe roa nō te Fatu. ’Aita te bāsileia i pūai a’enei mai te reira. Terā rā mai te ma’ama’a ra, ’ua vaiiho Solomona ’ia fāriu ’ē tōna ’ā’au i te tahi atu mau atua.

E aha te ha’api’ira’a tā tātou e nehenehe e ’apo mai i roto i teie mau ’ā’amu ’oto rahi ? Penei a’e teie hō’ē ha’api’ira’a, ’oia ho’i, ta’a ’ē noa atu te mau ’ohipa i tupu nō tātou, tei ni’a tō tātou pūai pae vārua i te mau mā’itira’a tā tātou e rave i teie nei mahana. E nehenehe ato’a tātou e ’ite i roto i teie mau fa’ati’ara’a ē, e ’ere nā tō tātou noa iho pūai ’e te itoito ’e te pa’ari e fa’aora ia tātou—’o te Fatu rā. Tē fa’a’ite nei teie mau ’ā’amu ē, te ti’aturi mau o ’Īserā’ela—’e tō tātou ho’i—e ’ere ia Davida ra, ’aore rā ia Solomona ’aore rā i te tahi noa atu ari’i tāhuti nei, tei te tahi atu rā « tamaiti nā Davida » : ’o Iesu Mesia (Mataio 1:1), te Ari’i mure ’ore ’o tē « fa’a’ore mai i te hara a [tōna] mau ta’ata » mai te mea e « e fāriu mai ra [iāna ra] » (1 Ari’i 8:33–34).

Nō te hō’ē hi’ora’a rere ā manu nō te buka 2 Samuela ’e 1 Ari’i, hi’o « Samuel, books of » ’e « Kings, books of » i roto i te Bible Dictionary [Fa’atoro parau nō te Bibilia].

Mau mana’o nō te tuatāpapara’a pāpa’ira’a mo’a a te ta’ata hō’ē

2 Samuela 5:17–25

E ti’a i te Fatu ’ia hōro’a mai i te arata’ira’a.

I te noa’ara’a ia Davida ’ia tāhō’ē ia ’Īserā’ela (hi’o 2 Samuela 5:1–5), tītauhia iāna ’ia pāruru i tōna mau ta’ata i te Philiseti. ’A tai’o ai ’outou i te 2 Samuela 5:17–25, ’a feruri nāhea te hi’ora’a o Davida e nehenehe e tauturu ia ’outou i roto i te mau fifi tā ’outou e fa’aruru nei (hi’o ato’a 1 Samuela 23:2, 10–11 ; 30:8 ; 2 Samuela 2:1). Nāhea ’outou i te ’imi i te arata’ira’a a te Fatu i roto i te orara’a ? E mea nāhea ’outou i te ha’amaita’ira’ahia nā roto i te pe’era’a i te heheura’a tā ’outou e fāri’i ?

Hi’o ato’a 1 Paraleipomeno 12 ; Richard G. Scott, « Nāhea e noa’a ai te heheura’a ’e te fa’aurura’a nō tō ’outou iho orara’a », Liahona, Mē 2012, 45–47.

2 Samuela 7

E aha te « fare » tā te Fatu i parau fafau ia Davida ?

I te pūpūra’a Davida e patu i te hō’ē fare nō te Fatu, ’oia ho’i te hiero, (hi’o 2 Samuela 7:1–3), ’ua pāhono mai te Fatu ē, e riro nā te tamaiti a Davida e patu i te reira (hi’o mau ’īrava 12–15 ; hi’o ato’a 1 Paraleipomeno 17:1–15). ’Ua parau ato’a te Fatu ē, e riro ’oia i te patu i te hō’ē « fare », ’oia ho’i te hō’ē hua’ai, ’e e riro tōna terōno i te vai ē a muri noa atu (hi’o 2 Samuela 7:11, 16, 25–29 ; Salamo 89:3–4, 35–37). ’Ua tupu te reira nā roto ia Iesu Mesia, tō tātou Ari’i mure ’ore, e hua’ai ho’i nā Davida (hi’o Mataio 1:1 ; Luka 1:32–33 ; Ioane 18:33–37).

2 Samuela 11 ; 12:1–14

E mea ti’a ’ia vai ara noa vau i mua i te hara.

’Aita te ha’apa’o maita’i o Davida i nā mua a’e i pāruru ’ē iāna i mua i te ’umera’a ’ia hara, ’a « haere noa [’oia] nā ni’a i te tāpo’i fare o te ari’i ra » ’e « tōna ’itera’a atu i te hō’ē vahine tē horoi ra iāna iho » (2 Samuela 11:2). ’A feruri i te ha’api’ira’a tē nehenehe e ’apo mai i roto i teie mau ’ohipa i tupu nōna. E nehenehe te mau uira’a mai teie e tauturu ia ’oe ’ia tuatāpapa i teie fa’ati’ara’a :

• E aha te mau mā’itira’a tā Davida i rave tei fa’atopa iāna i ni’a i te ’ē’a tē rahi noa atu ra te hara ? E aha te mau mā’itira’a parau ti’a tei nehenehe iāna e rave nō te mono i te reira ?

• Nāhea te ’enemi e tāmata nei i te fa’atopa ia ’oe i ni’a i te mau ’ē’a nō te hara, i roto i tō ’oe orara’a ? E aha te mau mā’itira’a tā ’oe e nehenehe e rave i teienei nō te ho’i mai i te vāhi ruru ?

Hi’o ato’a 2 Nephi 28:20–24 ; « To Look Upon » (video), ChurchofJesusChrist.org.

1 Ari’i 3:1–15

E tauturu te hōro’a nō te hāro’aro’a iā’u ’ia fa’ata’a i te maita’i ’e te ’ino.

’Āhani i parau te Fatu ia ’oe : « ’A ani mai i tā’u e hōro’a atu nā ’oe ra » (1 Ari’i 3:5), e aha tā ’oe e ani atu ? E aha te mea tā ’oe e fa’ahiahia nei i te anira’a a Solomona ? ’A feruri nō te aha te « ’ā’au ’ite » nō te « ’ite… i te maita’i ’e te ’ino » (’īrava 9) i te tao’a hōro’a faufa’a rahi. E aha tā ’oe e nehenehe e rave nō te ’imi i teie hōro’a ?

Hi’o ato’a 2 Paraleipomeno 1 ; Moroni 7:12–19.

1 Ari’i 8:12–61

Te hiero ’o te fare ïa o te Fatu.

Tau hānerera’a matahiti te maoro i fa’ahōho’ahia te aro o te Atua e te sekene ’āfa’ifa’i, tā Mose i hāmani. Noa atu ā tō Davida hina’aro e patu i te hō’ē vāhi nohora’a pāpū a’e nō te Atua, ’ua mā’iti te Atua i te tamaiti ra a Davida, ia Solomona, nō te patu i te hiero o te Fatu. ’A tai’o ai ’oe i te pure a Solomona nā reira ato’a te mau parau tāna i parau i tōna mau ta’ata i te otira’a te hiero, ’a hi’o na i te huru o tōna mana’o nō ni’a i te Fatu ’e tāna fare. E nehenehe ato’a e tāpura i te mau ha’amaita’ira’a tā Solomona i ani i roto i tāna pure. E aha tā ’oe e ’ite ra nō ni’a i teie mau ha’amaita’ira’a ? E mea nāhea te fare o te Fatu e ha’amaita’i nei ia ’oe i tō tātou nei anotau ?

Hi’o ato’a 2 Paraleipomeno 6.

Hiero nō Barranquilla (Colombia)

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

2 Samuela 5:19, 23.’A nafea ra tātou i te « ui a’era ia Iehova » nō te arata’ira’a ’e te ’avei’a ? Nāhea ’oia i te pāhonora’a mai ia tātou ?

2 Samuela 7:16.I te paraura’a te Fatu ia Davida : « Tō ’oe ra terōno, e mau ïa ē a muri noa atu », tē fa’ahiti ra ’oia i te parau nō te hō’ē ari’i nō ananahi i roto i te hua’ai o Davida, tei iāna te hau ē a muri noa atu : ’O Iesu Mesia. E au paha tō ’outou ’utuāfare ’ia hāmani i te tahi mau hei ari’i ’a paraparau ai nō te aha ’outou e māuruuru nei ē ’o Iesu Mesia tō ’outou Ari’i mure ’ore ra.

2 Samuela 11.E nehenehe paha te tai’ora’a nō ni’a i te mau hara ’oto rahi a Davida ’ia riro ’ei taime tano nō te ’āparau i te ataatara’a o te hōho’a faufau, te mau mana’o vi’ivi’i, nā reira ato’a te ’ohipa vi’ivi’i. E nehenehe te mau mātēria i muri nei e tauturu mau i te ’āparaura’a : te nene’ira’a nō ’Ātopa 2019 o te Liahona, te mau mātēria a te ’Ēkālesia nō ni’a i te hōho’a faufau (ChurchofJesusChrist.org/addressing-Pornography), ’e te mau video « What Should I Do When I See Pornography? [E aha tē rave ’ia ’ite ana’e au i te hōho’a faufau] » ’e « Watch Your Step [Hi’o maita’i i te tu’ura’a ’āvae] » (ChurchofJesusChrist.org). E nehenehe te mau melo o te ’utuāfare ’ia ha’amau i te hō’ē fa’anahora’a nō ni’a i te mea e rave ’ia fa’aruru rātou i te hōho’a faufau.

1 Ari’i 11:9–11.E aha te mau « atua ’ē atu » (’īrava 10) e nehenehe e fa’afāriu ’ē i tō tātou ’ā’au i te Fatu ? Nāhea i te fa’atumu noa i tō tātou ’ā’au i ni’a i te Metua i te Ao ra ’e ia Iesu Mesia ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere

Hīmene tei mana’ohia : « E te Fatu here », Te mau hīmene, N°31.

Haʼamaitaʼiraʼa i tā tātou haʼapiʼiraʼa

Fa’atumu i ni’a i te mau parau tumu e riro i te ha’amaita’i i tō ’outou ’utuāfare. ’A tuatāpapa ai ’outou i te parau a te Atua nā roto i te pure, ’a ui ia ’outou iho : « E aha te mea i’ō nei e riro ’ei mea faufa’a rahi ’e te ta’a ’ē mau nō tō’u ’utuāfare ? » (Hi’o Ha’api’ira’a mai tā te Fa’aora, 17).

Fa’ahōho’ara’a nō te hiero a Solomona, nā Sam Lawlor